Nouri Nanm Ou avèk Lapriyè Souvan

Èldè Ulisses Soares

Nan Kolèj Douz Apot yo

Nou bezwen nouriti espirityèl ki se kominikasyon avèk Papa nou ki nan Syèl la, yon benediksyon ki toujou disponib pou nou tou kote ak tout tan.

Nou tout konn santi nou grangrou. Doulè nan lestomak akoz grangou se fason pou kò nou di ke l bezwen nouriti. Epi lè nou grangou, nou konnen sa nou dwe fè—manje.

Lespri nou tou gen fason pou l fè nou konnen lè nou bezwen nouriti espirityèl. Men ta sanble li pi fasil pou nou jis inyore grangou espirityèl la pase grangou fizik la.

Menm jan gen plizyè kalite manje nou kapab manje lè nou grangou a, genyen plizyè bagay nou kapab fè pou satisfè grangou espirityèl nou tou. Pa egzanp, nou kapab “fè festen avèk pawòl Kris la” (2 Nefi 32:3) nan ekriti yo epi atravè pawòl pwofèt yo. Nou kapab ale legliz regilyèman epi patisipe nan sentsèn nan (gade Doktrin ak Alyans 59:9). Nou kapab sèvi Bondye ak pitit Li yo (gade Mozya 2:17).

Men genyen yon lòt sous nouriti espirityèl ki disponib pou nou tout tan, nan chak moman nan lavi nou, kèlkeswa sikonstans nou. Nou kapab toujou kominike avèk Papa nou ki nan Syèl la atravè lapriyè.

“Nanm Mwen te Grangou”

Pandan pwofèt Enòs t ap chase bèt nan forè a, li t ap reflechi sou “pawòl [li] te toujou konn tande papa [li] konn di sou lavi etènèl ak sou lajwa sen yo.” Pawòl sa yo “te antre dwat nan fon kè [li]” (Enòs 1:3).

Akoz Enòs te nan yon eta despri espirityèl, li te santi yon gwo bezwen: “Nanm mwen grangou,” sa se sa li te di (Enòs 1:4; italik ajoute).

Kisa Enòs te fè lè l te santi grangou espirityèl sa a, bezwen nouriti espirityèl sa a? “Mwen te ajenou devan Kreyatè m nan,” li te di, “epi m te kriye nan pye l ak gwo priyè ak siplikasyon pou nanm mwen” (Enòs 1:4).

Enòs te gen yon sitèlman gwo grangou espirityèl ki li te lapriyè “tout lajounen … lè l te nan nuit, [li] toujou leve vwa [li] wo jistan l te touche syèl la” (Enòs 1:4). Finalman, Bondye te reponn priyè li ak padone peche l yo. Enòs te santi kilpabilite l la efase. Men nouriti espirityèl li a pa t fini la.

Li te aprann sou pouvwa lafwa nan Jezikri, epi li devèse tout nanm li pou pèp li a—pou menm enmi l yo. Li te fè alyans avèk Senyè a epi Senyè a te fè l pwomès. Epi apre lapriyè puisan Enòs la, li te ale nan mitan pèp li a pou l te pwofetize ak temwanye sou bagay li te tande ak wè yo. (Gade Enòs 1:5–19.)

Se pa tout lapriyè k ap jwenn repons nan yon fason siyifikatif konsa, men eksperyans nou fè nan lapriyè kapab toujou siyifikan epi ka chanje lavi nou. Nou kapab aprann kèk leson enpòtan nan eskperyans Enòs fè ak lapriyè a. Pa egzanp:

Efòse nou pou nou viv levanjil la totalman kapab ede nou santi grangou espirityèl nou.
Grangou espirityèl nou kapab e ta dwe fè nou mete ajenou pou n chèche èd Papa nou ki nan Syèl la.
Papa nou ki nan Syèl la kapab ede nou satisfè grangou espirityèl la—e menm plis bagay toujou.
Nou kapab priye nenpòt kote, nenpòt kilè.
Lapriyè kapab ede nou repanti.
Lapriyè kapab ranfòse lafwa nou nan Jezikri.
Nou kapab resevwa yon temwayaj pèsonèl ki di ke Papa nou ki nan Syèl la tande nou epi Li konnen nou la.
Temwayaj ak fòs nou resevwa atravè lapriyè yo kapab ede nou sèvi ak fòtifye lòt moun.

Eksperyans mwen avèk Pouvwa Lapriyè

Menmjan ak Enòs, mwen te aprann menm leson sa yo atravè eksperyans pèsonèl. Paran m te rantre nan Legliz Jezikri pou Sen Dènye Jou yo lè m te yon jèn tigason, epi m te batize lè m te gen laj uitan. Mwen te toujou gen bon santiman plen chalè nan kè m apwopo Papa nou ki nan Syèl la ak apwopo Jezikri, ak levanjil retabli L la ak Legliz L la. Men se te jis lè m te prèske gen laj 16 lane ke m te kòmanse lapriyè pou m te konn verite sou bagay sa yo.

Evèk enspire m nan te mande m pou m te anseye yon klas Lekòldidimanch pou jèn yo. Mwen te sipoze anseye yon leson sou fason nou kapab akeri yon temwayaj konsènan levanjil la atravè lapriyè. Tach sa a evèk la te ban mwen an te fè m reflechi pi pwofondeman sou pwòp temwayaj pa m. Mwen te pran tan pou m te etidye Liv Mòmon an epi toujou santi ke Legliz la te vrè. Mwen te toujou kwè nan Sovè a Jezikri, men mwen pa t janm pote nan kè m pwomès Mowoni an nou jwenn nan Mowoni 10:4–5 la. Mwen pa t janm lapriyè sou verasite levanjil la.

Mwen sonje m te santi nan kè m ke si m ta pral anseye jèn sa yo kijan pou yo akeri yon temwayaj atravè lapriyè, mwen ta dwe lapriyè pou m te ka jwenn yon temwayaj pou tèt pa mwen. Nanm mwen te grangou—petèt nan yon fason ki diferan de pa Enòs la, men malgresa mwen te santi yon bezwen espirityèl.

Pandan m t ap prepare leson an, mwen te mete ajenou epi m te ofri dezi kè mwen bay Papa nou ki nan Syèl la pou konfime verite m te santi andedan m nan. Mwen pa t atann okenn gwo manifestasyon. Lè m te mande Senyè a si levanjil la te vrè a, mwen te santi nan kè m yon santiman ki te agreyab anpil—ti vwa trankil sa a ki te konfime m ke li te vrè epi m te dwe kontinye fè sa m t ap fè a.

Santiman an te sitèlman fò ke m pa t ap ka janm ka inyore repons sa a epi di ke m pa t konnen. Mwen te pase tout jounen an ak kè kontan. Lespri m te nan syèl, ap kontanple bèl santiman sa a ki te nan kè m nan.

Jou Dimanch apre a, mwen te kanpe devan twa oswa kat kanmarad klas, ki tout te pi piti pase mwen. Mwen te rann yo temwayaj ke Papa nou ki nan Syèl la t ap reponn lapriyè yo si yo te gen lafwa.

Yon repons priyè Èldè Soares te resevwa lè l te yon jèn tigason te pèmèt li temwaye—antanke yon misyonè (anlè a), kòm papa ak mari, epi kòm apot—ke Papa nou ki nan Syèl la reponn priyè nou ofri Li nan lafwa yo.

Depi lè a, temwayaj sa a te rete avèk mwen. Li te ede m pran desizyon, espesyalman nan moman mwen te nan difikilte. Priyè sa a nan jou sa a, ansanm ak temwayaj adisyonèl mwen resevwa atravè ane yo, te pèmèt mwen rann temwayaj bay moun avèk konviksyon, ke yo kapab jwenn repons nan men Papa nou ki nan Syèl la si yo priye ak lafwa. Sa te vin vre pandan m t ap temwaye antanke yon misyonè, antanke yon dirijan Legliz, antanke yon papa ak mari, epi menm jodi a antanke yon Apot.

Kilè ak Kisa pou nou Lapriyè

Natirèlman, nou pa priye sèlman lè nou santi yon bezwen espirityèl ki patikilyèman fò. Kidonk, kilè nou dwe priye? Epi poukisa nou dwe priye? Repons kout la se nenpòt kilè ak pou nenpòt bagay.

Bondye se Papa nou ki nan Syèl la. Lè nou konn sa, sa chanje fason nou priye. Pwofèt Joseph Smith te anseye: “Genyen konesans nan Bondye, nou kòmanse konnen fason pou nou pwoche Li, epi fason pou nou mande pou nou jwenn yon repons. … Lè nou pare pou n vin jwenn Li, Li pare pou L vin kontre nou.”¹

Papa nou ki nan Syèl la toujou pare pou L koute nou epi Li vle nou priye Li regilyèman ak souvan. Nou dwe “konsilte Senyè a nan tout sa [n] ap fè” (Alma 37:37) epi nou priye maten, midi, ak aswè. Nou dwe priye lakay nou, nan travay, nan lekòl—nenpòt kote nou ka ye epi pou nenpòt bagay n ap antreprann (gade Alma 34:17–26).

Nou dwe priye nan fanmi nou (gade 3 Nefi 18:21). Nou dwe priye “fò ak an silans nan kè [nou], an piblik ak an prive” (Doktrin ak Alyans 81:3). Epi “lè [nou] p ap kriye nan pye Senyè a, [se pou] kè [nou] plen meditasyon, panche nan lapriyè tout tan devan l pou byen nou ak byen moun ki bò kote [nou]” yo (Alma 34:27). Epi nou dwe toujou priye Papa a nan non Jezikri (gade 3 Nefi 18:19–20).

Ilistrasyon Joseph Smith pa Walter Rane, pa dwe kopye

Pwoche kot Papa nou ki nan Syèl la

Papa nou ki nan Syèl la vle beni nou. Epi L ap fè sa—si nou mande. Pwofèt Joseph Smith te anseye, “Sonje, si nou pa mande, nou ka pa jwenn anyen; se poutèt sa, mande ak lafwa, l ap resevwa yon benediksyon konsa paske Bondye wè sa k ap bon pou nou.”²

Lapriyè regilye ak abondan nou yo se yon pati esansyèl nan rejim nouriti espirityèl ekilibre pou nanm grangou nou an. Kominikasyon avèk Papa nou ki nan Syèl la atravè lapriyè disponib epi toujou byenveni toupatou.

Youn nan pasaj prefere m nan ekriti yo anseye fason nou dwe apwoche Papa nou ki nan Syèl la lè nou mete ajenou pou nou priye: “Rete enb; epi Senyè a, Bondye pa w la, ap pran men w pou kondwi ou, epi l ap reponn priyè ou” (Doktrin ak Alyans 112:10). Lè nou enb ak obeyisan, Papa nou ki nan Syèl la ap ansanm avèk nou. L ap pran nou pou kondui nou. L ap enspire nou ki kote pou n ale ak sa pou nou fè. L ap reponn priyè nou selon volonte Li, fason Li, tan Li ak selon konesans absoli Li genyen sou sa k ap bon pou nou.

Nou dwe sonje sa epi apresye okazyon nou genyen pou nou pwoche bò kote twòn Bondye a epi resevwa benediksyon nan men Li.

© 2024 by Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, April 2024. 19283 036 Language.