Pakaona ang Imo Kalag sa Pirme nga Pagpangamuyo

Ni Elder Ulisses Soares

Sang Korum sang Dose ka Apostoles

Litrato

Elder Ulisses Soares

Kinahanglan naton ang espirituhanon nga sustansya sang pagpakighambal sa aton Amay nga Langitnon, bugay nga maangkon naton sa bisan diin kag sa tanan nga tion.

Litrato

Si Enos nga nagapangamuyo

Litrato sang isa ka aktor sa papel ni Enos iya ni Matt Reier

Tanan kita nakaagi nga magutom. Ang hapdi sang kagutom pamaagi sang lawas nga pahibal-on kita nga kinahanglan sini sang pagkaon. Kag kon gutom kita, nakahibalo kita sang dapat naton himuon—magkaon.

Ang aton mga espiritu may pamaagi man sa pagpahibalo sa aton kon san-o kita nagakinahanglan sang espirituhanon nga pagkaon. Pero daw mas mahapos para sa aton nga ibale-wala ang espirituhanon nga kagutom sangsa pisikal nga kagutom.

Pareho nga may madamo nga klase sang pagkaon nga makaon naton kon gutom kita, may madamo man nga butang nga mahimo naton agud busgon ang aton espirituhanon nga kagutom. Halimbawa, pwede kita “magpaayaw sa pulong ni Cristo” (2 Nefi 32:3) sa balaan nga mga kasulatan kag paagi sa pulong sang mga propeta. Pwede kita magsimba pirme kag mag-ambit sang sakramento (tan-awa sa Doktrina kag mga Kasugtanan 59:9). Pwede kita mag-alagad sa Dios kag sa Iya mga anak (tan-awa sa Mosias 2:17).

Pero may isa pa gid ka kuluhaan sang espirituhanon nga sustansya nga matigayon naton pirme, sa tagsa ka tion sang aton mga kabuhi, bisan ano man ang aton mga sirkumstansya. Mahimo kita magpakighambal pirme sa Amay nga Langitnon paagi sa pangamuyo.

“Ang Akon Kalag Gingutom”

Samtang ang propetang si Enos nagpangayam sang mga sapat sa lasang, nagpamensar sia parte sa “mga pulong nga masami [niya] mabatian nga ginahambal sang [iya] amay parte sa kabuhi nga wala’y katapusan, kag sa kalipay sang mga santos.” Ining mga pulong “nagdulut sing madalom sa [iya] tagipusuon” (Enos 1:3).

Tungod si Enos yara sa amo sini nga panghunahuna, nakabatyag sia sing daku nga panginahanglan: “Ang akon kalag gingutom,” siling niya (Enos 1:4; emphasis gindugang).

Ano ang ginhimo ni Enos sang nabatyagan niya ining espirituhanon nga kagutom, ining kakinahanglan sang espirituhanon nga sustansya? “Nagluhod ako sa atubang sang akon Tagtuga, kag nagpakitluoy ako sa iya sa hugot nga pagpangamuyo kag pag-ampo para sa akon kaugalingon nga kalag” (Enos 1:4).

Tuman ang espirituhanon nga kagutom ni Enos nga nagpangamuyo sia “sa bug-os nga adlaw … kag sang nag-abot ang gab-i ginbayaw [niya] sa gihapon ang [iya] tingug pataas sa bagay nga nakalab-ot ini sa mga langit” (Enos 1:4). Sang ulihi, ginsabat sang Dios ang iya pangamuyo kag ginpatawad ang iya mga sala. Nabatyagan ni Enos nga nadula sing lubos ang iya kabasulanan . Pero ang iya espirituhanon nga sustansya wala nag-untat didto.

Natun-an niya ang parte sa gahum sang pagtuo kay Jesucristo, kag ginbubo niya ang iya bug-os nga kalag para sa iya katawhan—bisan pa para sa iya mga kaaway. Naghimo sia sang mga kasugtanan sa Ginuo kag nagbaton sang Iya mga promisa. Kag pagkatapos sang gamhanan nga pangamuyo ni Enos, naglibot sia sa tunga sang iya katawhan nga nagapropesiya kag nagasaksi sang mga butang nga iya nabatian kag nakit-an. (Tan-awa sa Enos 1:5-19.)

Indi pagsabton ang tagsa ka pangamuyo sa amo sina ka talalupangdon nga paagi, pero ang aton mga eksperiyensia sa pangamuyo mahimo gihapon nga mangin makahulugan kag makabag-o kabuhi. Makatuon kita sang pila ka importante nga mga leksyon sa ekperiyensia ni Enos sa pagpangamuyo. Halimbawa:

Ang pagtinguha nga lubos nga ipangabuhi ang ebanghelyo makabulig sa aton nga mabatyagan ang aton espirituhanon nga kagutom.
Ang aton espirituhanon nga kagutom mahimo kag dapat magdala sa aton sa pagluhod agud pangayuon ang bulig sang Amay nga Langitnon.
Ang pagpangamuyo sa Amay nga Langitnon makabulig busog sang aton espirituhanon nga kagutom—kag masobra pa.
Makapangamuyo kita sa bisan diin, sa bisan ano nga oras.
Ang pangamuyo makabulig sa aton nga maghinulsol.
Ang pangamuyo makapabakod sang aton pagtuo kay Jesucristo.
Makabaton kita sang personal nga panaksihon nga ang aton Amay nga Langitnon nagapamati sa aton kag nakatalupangod sa aton.
Ang panaksihon kag kusog nga aton mabaton paagi sa pangamuyo makabulig sa aton nga alagaran kag pabakuron ang iban.

Litrato

Si Elder Soares sang bata pa

Ang Akon Eksperiyensia sa Gahum sang Pangamuyo

Pareho kay Enos, natun-an ko ang pila sang amo man sining mga leksyon paagi sa personal nga eksperiyensia. Ang akon mga ginikanan nagpamiyembro sa Ang Simbahan ni Jesucristo sang mga Santos sa Ulihing mga Adlaw sang gamay pa ako, kag ginbunyagan ako sang walo ako ka tuig. Pirme ako may maayo kag manami nga balatyagon parte sa akon Amay nga Langitnon kag kay Jesucristo, sa Iya ginpanumbalik nga ebanghelyo kag sa Iya Simbahan. Pero sang 16 anyos pa ako nga nagpangamuyo ako parte sa kamatuoran sining mga butang.

Ang inspirado ko nga bishop nagpangabay sa akon nga magtudlo sa klase sa Sunday School para sa mga lamharon. Dapat ako magtudlo sang leksyon parte sa kon paano kita makaangkon sang panaksihon sa ebanghelyo paagi sa pangamuyo. Ini nga asaynment halin sa akon bishop nagpapensar sa akon sing madalom parte sa akon kaugalingon nga panaksihon. Natun-an ko na ang Libro ni Mormon kag nakabatyag pirme nga ang Simbahan matuod. Nagapati gid ako sa Manululuwas nga si Jesucristo, pero wala ko gid ginseryoso ang promisa ni Moroni nga makita sa Moroni 10:4-5. Wala gid ako nakapangamuyo parte sa kamatuoran sang ebanghelyo.

Madumduman ko ang pamatyagan nga kon tudloan ko ining mga lamharon kon paano maangkon ang panaksihon paagi sa pangamuyo, dapat ako mismo magpangamuyo para sa panaksihon. Ang akon kalag gingutom—siguro sa lain nga paagi sangsa kay Enos, pero bisan pa sina nakabatyag ako sang espirituhanon nga panginahanglan.

Samtang ginahanda ko ang leksyon, nagluhod ako kag ginpahayag ko ang handum sang akon tagipusuon sa akon Amay nga Langitnon nga kumpirmahon ang kamatuoran nga akon nabatyagan. Wala ako nagpaabot sang bisan ano nga daku nga pagpahayag. Pero sang ginpamangkot ko ang Ginuo kon ang ebanghelyo matuod, may nag-abot sa akon tagipusuon nga manami kaayo nga balatyagon—inang diutay nga tingug nga nagahutik nga nagakumpirma sa akon nga matuod ini kag dapat nga padayonon ko ang akon ginahimo.

Ang balatyagon tuman kabaskog nga indi ko gid mabale-wala inang sabat kag magsiling nga wala ako nakahibalo nga ang ebanghelyo matuod. Nagligad inang bilog nga adlaw nga sobra ako ka malipayon. Ang akon hunahuna nakatutok sa espirituhanon nga mga butang nga nagapamensar sang manami nga balatyagon sa akon tagipusuon.

Pagkadason nga Domingo, nagtindog ako sa atubang sang akon tatlo ukon apat ka klasmeyt, nga tanan mas bata sangsa akon. Nagpamatuod ako sa ila nga ang Amay nga Langitnon magasabat sa ila pangamuyo kon may pagtuo sila.

Ang ginsabat nga pangamuyo nga nabaton ni Elder Soares bilang pamatan-on nagtugot sa iya nga magpamatuod—bilang misyonaryo (sa ibabaw), amay kag bana, kag Apostoles—nga ang Amay nga Langitnon nagasabat sang mga pangamuyo nga may pagtuo.

Halin sadto, ining panaksihon nagpabilin sa akon. Nagbulig ini sa akon nga maghimo sang mga desisyon, labi na gid sa mga tinion nga nagpangatubang ako sang mga hangkat. Inang pangamuyo sadto nga adlaw, upod ang dugang nga mga saksi nga akon nabaton sa mga tinuig, nagtugot sa akon nga magpamatuod sa katawhan, nga may kasigurohan, nga makabaton sila sang mga sabat halin sa Amay nga Langitnon kon magpangamuyo sila nga may pagtuo. Nangin matuod ini sang nagpanaksihon ako bilang misyonaryo, bilang lider sang Simbahan, bilang amay kag bana, kag bisan subong bilang Apostoles.

San-o Kita Mangamuyo kag Ano ang Aton Pangamuyoan?

Siyempre, indi lang kita magpangamuyo kon san-o lang nga makabatyag kita sang labi kabaskog nga espirituhanon nga panginahanglan. Gani, san-o kita mangamuyo? Kag ano ang aton pangamuyoan? Ang malip-ot nga sabat amo ang bisan ano nga tion kag para sa bisan ano.

Ang Dios amo ang aton Amay nga Langitnon. Ang paghibalo sini nagabag-o kon paano kita magpangamuyo. Ang Propetang si Joseph Smith nagtudlo: “Tungod may ihibalo parte sa Dios, nagasugod kita sa paghibalo kon paano magpalapit sa Iya, kag kon paano magpamangkot agud makabaton sang sabat. … Kon handa kita nga magpalapit sa Iya, handa Sia nga magpalapit sa aton.”¹

Ang aton Amay nga Langitnon handa pirme magpamati sa aton kag gusto nga mapangamuyo kita sa Iya sing tayuyon kag pirme. Dapat kita “magkonsulta sa Ginuo sa tanan [naton] nga ginahimo” (Alma 37:37) kag magpangamuyo sa aga, sa udto, kag sa gab-i. Dapat kita magpangamuyo sa balay, sa ulobrahan, kag sa eskwelahan—bisan sa diin kita kag para sa bisan sa ano naton nga mga hilikuton (tan-awa sa Alma 34:17-26).

Dapat kita magpangamuyo sa aton mga panimalay (tan-awa sa 3 Nefi 18:21). Dapat kita magpangamuyo “sing mabaskog kag sa [aton] tagipusuon, sa kadam-an kag [kon] nagaisahanon“ (Doktrina kag mga Kasugtanan 81:3). Kag “kon wala [kita] nagaampo sa Ginuo, [dapat naton] tugotan ang [aton] mga tagipusuon nga mapuno, nga dalayon nga nagapangamuyo sa iya para sa [aton] kaayohan, kag para man sa kaayohan sinang mga yara sa [aton] palibot” (Alma 34:27). Kag dapat kita magpangamuyo sa Amay sa ngalan ni Jesucristo (tan-awa sa 3 Nefi 18:19–20).

Litrato

Si Joseph Smith bilang pamatan-on

Ilustrasyon kay Joseph Smith ni Walter Rane, indi pwede kopyahon

Pagpalapit sa Aton Amay nga Langitnon

Gusto sang aton Amay sa Langit nga bugayan kita. Kag himuon Niya—kon pangayuon naton. Ang Propetang si Joseph Smith nagtudlo, “Dumduma nga kon indi kita magpangayo, wala kita sang mabaton; gani, magpangayo nga may pagtuo, kag magabaton kamo sinang mga bugay nga nakita sang Dios nga nagakabagay nga ihatag sa inyo.”²

Ang aton regular kag pirme nga mga pangamuyo importante nga bahin sang balansiado nga kalan-on para sa espirituhanon nga sustansya sang aton gutom nga mga kalag. Ang pagpakighambal sa Amay nga Langitnon paagi sa pangamuyo matigayon kag malipayon nga ginabaton sa bisan diin kag sa tanan nga tion.

Isa sang akon paborito nga balaan nga mga kasulatan nagatudlo kon paano kita magpalapit sa aton Amay nga Langitnon kon magluhod kita sa pagpangamuyo: “Magmangin mapainubuson; kag ang Ginuo nga imo Dios magatuytoy sa imo sa kamot, kag magahatag sang sabat sa imo mga pangamuyo.” (Doktrina kag mga Kasugtanan 112:10). Kon mapainubuson kita kag matinumanon, ang Amay nga Langitnon mangin kaupod naton. Tuytuyan Niya kita sa kamot. Tudloan Niya kita kon diin makadto kag kon ano ang himuon. Sabton Niya ang aton mga pangamuyo suno sa Iya pagbuot, pamaagi, tiempo, kag lubos nga ihibalo sang kon ano ang maayo para sa aton.

Dapat naton dumdumon ini kag apresyahon ang mga oportunidad nga magpalapit sa trono sang Dios kag magbaton sang mga bugay halin sa Iya kamot.

© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, April 2024. Language. 19283 861