Taraonanyo ti Kararuayo iti Masansan a Panagkararag

Ni Elder Ulisses Soares

Ti Korum dagiti Sangapulo-ket-dua nga Apostol

Kasapulantayo ti naespirituan a taraon iti pannakisarita iti Nailangitan nga Amatayo, maysa a bendision a magun-odtayo iti sadinoman ken kanayon.

Nakariknatayon amin iti bisin. Dagiti sakit gapu ti panagbisin ket ti wagas a panangibaga ti bagi kadatayo a kasapulanna ti taraon. Ket no mabisintayo, ammotayo no ania ti masapul nga aramidentayo—mangan.

Adda met dagiti wagas a panangibaga ti espiritutayo kadatayo no kasapulantayo ti naespirituan a taraon. Ngem kasla nalaklaka para kadatayo a di ikankano ti naespirituan a bisin ngem ti pisikal a bisin.

No kasano ti kinaadu ti nadumaduma a kita ti taraon a mabalintayo a kanen no mabisintayo, adda met dagiti nadumaduma a banag a mabalintayo nga aramiden tapno mapennek ti naespirituan a bisintayo. Kas pagarigan, mabalintayo ti “agpennek kadagiti balikas ni Cristo” (2 Nephi 32:3) kadagiti nasantuan a kasuratan ken babaen kadagiti balikas dagiti propeta. Mabalintayo a kanayon a mapan iti simbaan ken makiranud iti sakramento (kitaen iti Doktrina ken Katulagan 59:9). Mabalintayo ti agserbi iti Dios ken kadagiti annakna (kitaen iti Mosiah 2:17).

Ngem adda sabali pay a pagtaudan ti naespirituan a taraon a magun-odtayo iti amin a panawen, iti tunggal kanito ti biagtayo, aniaman ti kasasaadtayo. Kanayon a makasaritatayo iti Nailangitan nga Ama babaen ti kararag.

“Nabisinan ti Kararuak”

Bayat nga agan-anup ni propeta Enos kadagiti animal iti kabakiran, napanunotna “dagiti balikas a masansan a mangngeg[na] iti ama[na] maipapan iti agnanayon a biag, ken ti ragsak dagiti santo.” Dagitoy a balikas ket “simlep iti puso[na]” (Enos 1:3).

Gapu ta adda ni Enos iti daytoy naespirituan a kasasaad ti panunot, nariknana iti kasta unay a panagkasapulan: “ Nabisinan ti kararuak,” kinunana (Enos 1:4; nainayon ti panangyunay-unay).

Ania ti inaramid ni Enos idi nariknana daytoy naespirituan a bisin, nga agkasapulan iti naespirituan a taraon? “Nagparintumengak iti sango ti Namarsua kaniak,” kinunana, “ket immawagak kenkuana iti napasnek a panagkararag ken panangipakumbaba iti bukodko a kararua” (Enos 1:4).

Kasta unay ti naespirituan a panagbisin ni Enos isu a nagkararag “iti unos dayta nga aldaw … ket idi dimteng ti rabii ipukpukkaw[na] pay laeng ti timek[na] tapno dumanon iti langit” (Enos 1:4). Kamaudiananna, sinungbatan ti Dios ti kararagna ket pinakawanna dagiti basolna. Narikna ni Enos a naikkaten ti basolna. Ngem saan a nagpatingga sadiay ti naespirituan a pannakataraonna.

Naammuanna ti maipapan iti bileg ti pammati ken ni Jesucristo, ket impaayna ti intero a kararuana maigapu kadagiti taona—uray dagiti kabusorna. Nangaramid kadagiti katulagan iti Apo ken nakagun-od kadagiti kari manipud Kenkuana. Ket kalpasan ti nabileg a kararag ni Enos, napan kadagiti tattaona a nangipadto ken nangpaneknek kadagiti bambanag a nangngegna ken nakitana. (Kitaen iti Enos 1:5–19.)

Saan a masungbatan ti tunggal kararag iti kasta a dramatiko a wagas, ngem dagiti padastayo iti panagkararag ket mabalin latta a makagunggona ken mangbalbaliw iti biag. Masursurotayo dagiti sumagmamano a napateg a leksion manipud iti padas ni Enos iti panagkararag. Kas pagarigan:

Ti panangikagumaan a naan-anay nga agbiag iti ebanghelio ket makatulong kadatayo a makarikna iti naespirituan a panagbisintayo.
Ti naespirituan a panagbisintayo ti mabalin ken rumbeng a makaiturong kadatayo nga agparintumeng nga agkiddaw iti tulong iti Nailangitan nga Ama.
Makatulong ti panagkararag iti Nailangitan nga Ama a mangpennek iti naespirituan a panagbisintayo—ken dadduma pay.
Mabalintayo ti agkararag iti sadinoman, iti aniaman nga oras.
Matulongannatayo ti kararag nga agbabawi.
Mapapigsa ti kararag ti pammatitayo ken ni Jesucristo.
Makaawattayo iti personal a pammaneknek a dumngeg kadatayo ti Nailangitan nga Amatayo ken ammonatayo.
Ti pammaneknek ken pigsa a maawattayo babaen ti kararag ket makatulong kadatayo nga agserbi ken mangpapigsa kadagiti dadduma.

Ti Kapadasak iti Bileg ti Kararag

Kas ken ni Enos, nasursurok ti sumagmamano kadagitoy isu met laeng a leksion babaen ti personal a padasko. Nagkameng dagiti nagannako iti Ti Simbaan ni Jesucristo dagiti Santo iti Ud-udina nga Aldaw idi ubingak pay, ket nabuniaganak idi walo ti tawenko. Kanayon nga addaanak iti nasayaat, nabara a rikna iti pusok maipapan iti Nailangitan nga Amak ken maipapan ken ni Jesucristo, ti naisubli nga ebangheliona, ken ti Simbaanna. Ngem idi laeng dandani agtawenak iti 16 ti panangikararagko maipapan iti kinapudno dagitoy a banag.

Kiniddaw ti naparegta a bishop-ko a mangisuroak iti klase dagiti agtutubo iti Sunday School. Mangisuroak koma iti maysa nga adalen maipapan iti no kasano a magun-odtayo ti pammaneknek iti ebanghelio babaen ti kararag. Daytoy nga annongen manipud iti bishop-ko ti nangtignay kaniak a mangpanunot iti naun-uneg maipapan iti bukodko a pammaneknek. Nangipaayak iti panawen a nangadal iti Libro ni Mormon ket kanayon a mariknak a pudno ti Simbaan. Mamatiak iti Mangisalakan a ni Jesucristo, ngem diak pulos impapuso ti kari ni Moroni a masarakan iti Moroni 10:4–5. Diak pay pulos inkararag maipapan iti kinapudno ti ebanghelio.

Malagipko a nariknak iti pusok a no isurok dagitoy nga agtutubo no kasano ti makagun-od iti pammaneknek babaen ti kararag, masapul nga agkararagak a mismo para iti pammaneknekko. Nabisinan ti kararuak—nalabit iti naiduma a wagas ngem ni Enos, ngem kaskasdi a nariknak ti naespirituan a panagkasapulak.

Bayat ti panangisaganak iti adalen, nagparintumengak ket indatonko ti tarigagay ti pusok iti Nailangitan nga Amak a mangpasingked iti kinapudno a nariknak iti kaunggak. Diak ninamnama ti aniaman a dakkel a pannakaiparangarang. Ngem idi dinamagko iti Apo no pudno ti ebanghelio, maysa a nasam-it unay a rikna ti dimteng iti pusok—dayta a naalumamay, bassit a timek ti mangpasingked kaniak a pudno daytoy ken rumbeng nga itultuloyko nga aramiden no ania ti ar-aramidek.

Napigsa la unay ti nariknak isu a diak pulos mailaksid dayta a sungbat ket ibagak a diak ammo. Nagmalmalem a naragsakak. Naipamaysa ti panunotko kadagiti naespirituan a banag a mangpampanunot iti napintas a rikna iti pusok.

Iti simmaganad a Domingo, nagtakderak iti sanguanan ti tallo wenno uppat a kaklasek, nga ub-ubingda amin ngem siak. Impaneknekko kadakuada a sungbatan ti Nailangitan nga Ama ti kararagda no adda pammatida.

Ni Elder Soares — Ti nasungbatan a kararag a naawat ni Elder Soares idi agtutubo pay ti nangipalubos kenkuana a mangpaneknek—kas maysa a misionario (iti ngato), ama ken asawa, ken Apostol—a sungbatan ti Nailangitan nga Ama dagiti kararag a naidaton iti pammati.

Manipud idin, nagtalinaed kaniak daytoy a pammaneknek. Nakatulong daytoy kaniak a mangaramid kadagiti pangngeddeng, nangnangruna kadagiti kanito a naipasangoak kadagiti karit. Dayta a kararag iti dayta nga aldaw, agraman dagiti kanayonan a saksi a naawatko iti panaglabas dagiti tawen, ti nangipalubos kaniak a mangpaneknek kadagiti tattao, nga addaan kombiksion, a makaawatda kadagiti sungbat manipud iti Nailangitan nga Ama no agkararagda a buyogan ti pammati. Pudno daytoy bayat ti panangpaneknekko kas maysa a misionario, kas maysa a lider ti Simbaan, kas maysa nga ama ken asawa, ken uray ita kas maysa nga Apostol.

Ti Kaano ken Ania iti Panagkararag

Siempre, saantayo laeng nga agkararag no mariknatayo ti partikular a napigsa a naespirituan a panagkasapulan. Gapuna, kaano ngarud a rumbeng nga agkararagtayo? Ken ania ti rumbeng nga ikararagtayo? Ti ababa a sungbat ket aniaman nga oras ken para iti aniaman a banag.

Ti Dios ti Nailangitan nga Amatayo. Ti pannakaammo iti daytoy balbaliwanna ti wagas ti panagkararagtayo. Insuro ni Propeta Joseph Smith: “Gapu iti kaadda ti pannakaammo iti Dios, mangrugitayo a mangammo no kasano ti umasideg Kenkuana, ken no kasano ti agkiddaw tapno makaawat iti sungbat. … No nakasaganatayo nga umasideg Kenkuana, nakasagana met Isuna nga umasideg kadatayo.”¹

Kanayon a nakasagana ti Nailangitan nga Amatayo a dumngeg kadatayo ken kayatna a kanayon ken masansan nga agkararagtayo Kenkuana. Masapul a “pabalakadan[tayo] iti Apo iti amin nga aramiden[tayo]” (Alma 37:37) ken agkararagtayo iti bigat, tengnga ti aldaw, ken rabii. Masapul nga agkararagtayo iti pagtaengan, iti pagtrabahuan, iti eskuelaan —sadinoman a mabalin nga ayantayo ken iti aniaman a panagreggettayo (kitaen iti Alma 34:17–26).

Masapul nga agkararagtayo kadagiti pamiliatayo (kitaen iti 3 Nephi 18:21). Masapul nga agkararagtayo “a napigsa ken naimpusuan, iti tallaong wenno iti nalimed” (Doktrina ken Katulagan 81:3). Ket “no saan[tayo] nga umawag iti Apo, punnuen[tayo] koma ti puso[tayo] , paglippiasen[tayo] iti kararag para iti pagimbagan[tayo], ken kasta met ti pagimbagan dagiti adda iti aglawlaw[tayo] ” (Alma 34:27). Ket masapul a kanayon nga agkararagtayo iti Ama iti nagan ni Jesucristo (kitaen iti 3 Nephi 18:19–20).

Ladawan ni Joseph Smith ni Walter Rane, mabalin a saan a makopia

Umasideg iti Nailangitan nga Amatayo

Kayat ti Amatayo iti Langit a bendisionannatayo. Ket aramidenna—no agkiddawtayo. Insuro ni Propeta Joseph Smith, “Laglagipenyo a no saantayo nga agkiddaw awan ti maawattayo; ngarud, dumawatkayo a sipapammati, ket awatenyonto dagiti bendision a makitanto ti Dios a maitutop nga ipaayna kadakayo.”²

Ti kanayon ken masansan a panagkararagtayo ket napateg a paset ti balanse a taraon iti naespirituan a pannakataraon dagiti mabisin a kararuatayo. Ti pannakisarita iti Nailangitan nga Ama babaen ti kararag ket magun-odan ken maawat iti sadinoman ken kanayon.

Maysa kadagiti paboritok a nasantuan a kasuratan isurona no kasano ti rumbeng a yaasidegtayo iti Nailangitan nga Amatayo no agparintumengtayo nga agkararag: “Agpakumbabaka; ket kibinennakanto nga iturong ti Apo a Diosmo, ket itdennanto kenka ti sungbat dagiti kararagmo” (Doktrina ken Katulagan 112:10). No napakumbaba ken natulnogtayo, kaduatayo ti Nailangitan nga Amatayo. Idauluannatayo babaen ti imana. Isu ti mangparegta kadatayo no sadino ti papanan ken no ania ti aramidentayo. Isu ti mangsungbatto kadagiti kararagtayo segun iti pagayatanna, wagasna, tiempona, ken naan-anay a pannakaammona no ania ti nasayaat para kadatayo.

Masapul a laglagipentayo daytoy ken ipategtayo dagiti gundaway nga umasideg iti trono ti Dios ken umawat kadagiti bendision manipud iti imana.

© 2024 by Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, April 2024. Language. 19283 864