Disha Anyima Weba ne Disambila dia Dituku Dionsu

Kudi Mukulu Ulisses Soares

Wa mu Mpuilu wa Bapostolo Dikumi ne Babidi

Image

Mukulu Ulisses Soares

Tudi dijinga ne ndishilu wa nyuma wa kuyukila ne Tatu wa mu diûlu, etshi tshidi dibenesha didi kutudi mu miaba ne misangu yonsu.

Image

Enosha udi usambila

Foto wa munayi uleja Enosha kudi Matt Reier

Bantu bonsu batu bumvua nzala. Busumi bua nzala budi mushindu udi mubidi utuambila dijinga diawu dia tshiakudia. Ne patudi ne nzala, tudi bamanya bimpa tshitudi ne bua kuenza—kudia.

Nyuma yetu kabidi, idi ne mishindu ya kutuambila tshikondu tshitudi dijinga ne tshiakudia tshia nyuma. Kadi bidi bimueneka ne, mbipepela kutudi bua kuvuluka nzala ya mubidi ne kupua moyo ya nyuma.

Amu bu mudiku mishindu ya bungi ya biakudia bitudi mua kudia patudi ne nzala, kudi kabidi bintu bia bungi bitudi mua kuenza kua kûkutshisha nzala ya nyuma yetu. Tshilejelu, tudi mua “kutshionkomokela pa mêyi a Kilisto” (2 Nefi 32:3) mu mifundu ne mu mêyi a bambi. Tudi mua kuya mu ekelezia misangu yonsu ne kudia biakudia bia tshijila (tangila Dilongesha ne Bipungidi 59:9). Tudi mua kusadila Nzambi ne bana benda (tangila Mosiya 2:17).

Kadi kudi mushindu mukuabu kutudi wa kudisha nyuma mu tshikondu tshionsu, mu tshitupa tshionsu tshia moyo wetu, kabiyi kutangila malu atudi nawu. Tudi mua kuikala kuyukila ne Tatu wa mu diûlu kupitshila ku disambila.

“Anyima Wanyi Uvua ne Nzala”

Bu muvua muambi Enosha wipata nyama mu metu, wakela meji bitangila “mêyi avua[ye] mumvua tatu[enda] wamba misangu mivula bua moyo wa tshiendelela, ne disanka dia bansantu.” Mêyi â “akadîna menamena mu mutshima [wenda]” (Enosha 1:3).

Bu muvua Enosha mu tshipidia tshia meji a nyuma etshi, wakumvua dijinga dinena: Wakamba ne, “anyima wanyi uvua ne nzala,” (Enos 1:4; ngenyi mikumbajija).

Nthinyi tshivua Enosha muenza pavuaye mumvua nzala ya nyuma eyi, pavuaye mumona dijinga dia tshiakudia tshia nyuma etshi? Yeya wakamba ne, “ngakatua binu kumpala kua Mufuki wanyi, ne ngakabila kudiye mu disambila dia bukitu ne ditendekena bua anyima wanyi” (Enosha 1:4).

Bua bunena buvua nzala ya nyuma wa Enosha, wakasambila “dituku dijima … ne pakalua butuku [u]tshivua [u]bandisha dîyi [dienda] bikola bua ne difika mu diûlu” (Enosha 1:4). Ku ndekelu, Nzambi wakandamuna ku disambila dienda ne kumubuikidilaye mibi yenda. Enosha wakumvua bubi buenda bukupudibua. Kadi nzala ya nyuma wenda kayakajikila apu to.

Wakalonga bitangila bukola bua ditabuija mu Yezu Kilisto, ne wakapumuna anyima wenda mujima bua tshisamba tshienda—nansha bua bena lukuna benda kabidi. Wakenza bipungidi ne Mukalenga ne kupetaye milayi kudiye. Ne panyima pa disambila dia bukitu dia Enosha edi, wakaya munkatshi mua bantu benda wenda wamba mêyi a buambi ne ujadika pa malu avuaye mumvua ne mumona. (Tangila Enosha 1:5–19.)

Disambila dionsu kadia kuandamunyibua mu mushindu wa kukema ewu to, kadi dimanya dietu dia disambila ne dikala ne ngumvuilu ne nedishintulula moyo. Tudi mua kulonga malongesha a mushinga ku dimanya dia Enosha bua disambila. Tshilejelu:

Kudienzeja bua kuteka lumu luimpa mu tshienzedi, kudi mua kutuambuluisha bua kumvua nzala idi nyuma wetu nayi.
Nzala ya nyuma wetu idi mua kututuma ku binu bua kukeba diambuluisha kudi Tatu wa mu diûlu.
Kusambila Tatu wa mu diûlu kudi mua kutuambuluisha bua kujikija nzala ya nyuma wetu—ne malu makuabu.
Tudi mua kusambila muaba yonsu ne mu tshikondu tshionsu.
Disambila didi mua kutuambuluisha bua kukudimuna mutshima.
Disambila didi mua kukankamika ditabuija dietu mu Yezu Kilisto.
Tudi mua kupeta bujadiki bua nkaya bua ne, Tatu wetu wa mu diûlu udi ututeleja ne mmutumanya.
Bujadiki ne dikankamika bitudi tupeta kupitshila ku disambila bidi mua kutuambuluisha bua kusadila ne kukankamika bakuabu.

Image

Mukulu Soares pavuaye nsonga

Dimanya dianyi dia Bukola bua Disambila

Bu Enosha, ngakalonga panyi amua a ku malongesha â kupitshila ku dimanya dia nkaya. Baledi banyi bakabuela mu Ekelezia wa Yezu Kilisto wa Bansantu ba Matuku a Ndekelu pamvua muikala nsonga, ne ngakatambuishibua pamvua ne bidimu muandamukulu. Mvua amu muikala ne ngumvuilu muimpa ne wa luya mu mutshima wanyi bua Tatu wanyi wa mu diûlu ne bua Yezu Kilisto, bua lumu luimpa lupinguluja, ne bua Ekelezia wenda. Kadi ngakasambila bua kuamanya bulelela bua malu â amu pangakakumbaja bidimu 16.

Muepiskopo wa lungenyi lua nyuma wanyi wakandomba bua kulongesha mu kalasa ka Tshilongelu tshia Dialumingu tshia bansonga. Mvua ne bua kulongesha dilongesha pa mushindu utudi mua kupeta bujadiki bua lumu luimpa kupitshila ku disambila. Ditumika dia kudi muipiskopo wanyi edi, diakantuma bua kuela meji menamena pa bujadiki buanyi nkayanyi. Ngakangata tshipolu tshia kulonga Mukanda wa Molomo ne ngakatungunuka kumvua bua ne, Ekelezia uvua mulelela. Mvua amu muitabuija mu Mupandishi Yezu Kilisto, kadi ntshivua muanji kuangata ne moyo mujima mulayi wa Moloni udi mu Moloni 10:4–5. Ntshivua muanji kusambila bua bulelela bua lumu luimpa to.

Ndi mvuluka ngumvuilu imvua nayi mu mutshima yamba ne, ndi ne bua kuanji kusambila nkayanyi bingikala ne bua kulongesha bansonga aba mushindu wa kupeta bujadiki kupitshila ku disambila. Anyima wanyi uvua ne nzala—pamua apa mu mushindu mushilangana ne wa Enosha, kadi mvua mumvua bushuwa dijinga dia nyuma.

Bu mumvua ndongolola dilongesha, ngakatua binu ne kulambula majinga a mutshima wanyi kudi Tatu wanyi wa mu diûlu bua anjadikila bulelela bumvua mumvua munda muanyi. Ntshivua mutekemena dimuenesha dinena to. Kadi pangakakonka Mukalenga bua kumanya bikala lumu luimpa lulelela, ngumvuilu mushema wakabuela mu mutshima wanyi—dîyi dikesa ne diteketa diakanjadikila ne, luvua lulelela ne mvua ne bua kutungunuka bimvua ngenza.

Ngumvuilu ewu uvua mukola bua ne tshiena mua kuvila diandamuna adi ne kuamba ne ntshiena mumanya. Ngakapitshisha dituku dijima adi mu disanka dia bungi. Meji anyi avua ne kukema kua bungi bua kumona ngumvuilu mimpa mu mutshima wanyi.

Dialumingu divua dilonda, ngakimana kumpala kua malongi betu basatu anyi banayi, bonsu bavua bateketa kundi. Ngakabajadikila ne, Tatu wa mu diûlu udi wandamuna masambila abu pikalabu ne ditabuija.

Disambila diandamunyibua divua Mukulu Soares mupeta pavuaye nsongaluma, diakamuambuluisha bua kujadika—bu muena bukenji (kulu eku), tatu ne muluma, ne mupostolu—bua ne, Tatu wa mu diûlu udi wandamuna masambila adi alambudibua mu ditabuija.

Katshia amu ku tshikondu atshi, bujadiki ebu buakashala nanyi. Buakangambuluisha bua kuangata mapangadika, nangananga mu bikondu bimvua ne ntatu. Disambila dia dituku adi, pamua ne majadiki makuabu amvua mupeta mu bidimu biakalonda, biakangambuluisha bua kujadikila bantu, ne dituishibua, bua ne badi mua kupeta mandamuna kudi Tatu wa mu diûlu padibu basambila mu ditabuija. Etshi tshivua tshilelela bu mumvua mujadika bu muena bukenji, bu mulombodi wa Ekelezia, bu tatu ne muluma, ne nansha kabidi lelu bu mupostolu.

Tshikondu ne Tshiena-bualu tshia Disambila Dietu

Bushuwa, katuena tusambila amu patudi ne bualu bunena bua nyuma busunguluka to. Nanku, ntshikondu kayi tshitudi ne bua kusambila? Ne ntshiena-bualu kayi tshia disambila dietu? Diandamuna dipi ndia ne, tshikondu tshionsu ne bua bualu bonsu.

Nzambi udi Tatu wetu wa mu diûlu. Dimanya edi didi dishintulula mushindu utudi tusambila. Muambi Joseph Smith wakalongesha ne: Patudi ne dimanya dia Nzambi, tudi tubangisha kumanya mushindu wa kusemena kudiye, ne mushindu wa kulomba ne kupeta diandamuna. Patudi pabuipi ne kulua kudiye, yeya udi pabuipi ne kulua kutudi.¹

Tatu wetu wa mu diûlu utu amu pabuipi bua kutumvua ne mmusua bua tusambila kudiye matuku onsu ne misangu yonsu. Tudi ne bua “kuebeja Mukalenga mu midimu [yetu] yonsu” (Alama 37:37) ne kusambila mu dinda, mu munya ne mu butuku. Tudi ne bua kusambila mu nzubu, ku mudimu, mu tshilongelu— mu miaba yonsu itudi mua kuikala ne kusambila bua midimu yonsu (tangila Alama 34:17–26).

Tudi ne bua kusambila mu mêku etu (tangila 3 Nefi 18:21). Tudi ne bua kusambila ne dîyi ne mu mutshima wetu, mu bantu ne mu muaba wa nkaya (Dilongesha ne Bipungidi 81:3). Ne “pa[tu]di ka[tu]yi [tu]bila kudi Mukalenga to, mitshima ye[tu] ikala miwula, midifila kudiye mu disambila misangu yonsu bua diakalengela die[tu], ne bua diakalengela dia bonsu badi pabuipi nue[tu] kabidi” (Alama 34:27). Ne tudi ne bua kuikala tusambila Tatu mu dina dia Yezu Kilisto (tangila 3 Nephi 18:19–20).

Image

Joseph Smith pavuaye nsongaluma

Tshimfuanyi tshia Joseph Smith kudi Walter Rane, katshiena mua kutentudibua to

Kusemena kudi Tatu wetu wa mu diûlu

Tatu wetu wa mu diûlu mmusua bua kutubenesha. Ne udi wenza nanku—patudi tumulomba. Muambi Joseph Smith wakalongesha ne; tuvuluka ne bituabenga kulomba, katuena tupeta tshintu to; bitualomba mu ditabuija, netupeta mabenesha adi Nzambi utufundila.²

Masambila etu a musangu yonsu ne dituku dionsu, adi tshitupa tshia mushinga tshia tshipimu tshikumbana tshia ndishilu wa nyuma wa nzala ya mitshima yetu. Muyuki wa kuenza ne Tatu wa mu diûlu kupitshila ku disambila, udi ukumbana kuenjibua miaba yonsu ne misangu yonsu.

Umua wa ku mifundu yanyi minangibua udi ulongesha mushindu utudi ne bua kuakula ne Tatu wa mu diûlu patudi tutua binu bua kusambila: tuikala ne didipuekesha bua Nzambi atuludika ne atuandamuna ku masambila etu (Dilongesha ne Bipungidi 112:10). Patudi badipuekeshi ne batumikidi, Tatu wa mu diûlu neikala netu. Yeya neatuludika. Yeya neatupesha meji a nyuma bua tumanya kua kuya ne tshia kuenza. Yeya neandamuna masambila etu bilondeshela disua dienda, mushindu wenda, tshikondu tshienda, ne dimanya dijalama dia tshidi tshimpa buetu.

Tudi ne bua kuvuluka malu â ne kusanka ne mishindu ya kusemena ku nkuasa wa butumbi wa Nzambi ne kupeta mabenesha a ku tshianza tshienda.

© 2024 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, April 2024. Language. 19283 760