Duruw’iyem e Ya’el rom ko pi Meybil ni Bo’or

Ku Elder Ulisses Soares

Ko fare Ulung ko fare Ragag nge L’agruwi Apostle

Gadad bat’uf e yongo’ol ko non ngak e Chitamangiy nu tharmiy nifan e ya’el rodad, binem e tawa’ath rodadni gubin e ngiyal’.

Gadad gubin ni kad thameyed e bilig ni kafram. Amith ko balig ir e rogon e dowef ma weliy’ ni bat’uf e yongo’ol. Nge napan nira yib e bilig, gadad manang thingarda rrin’ed—kayed.

Ya’el rodad bay e rogon ni ngar weliyed ngodad napan gadad bat’uf e yongo’ol ko ya’el. Machane rib moem ni dabda motoyil gad nagk e bilig ko ya’el.

Woed ni bay bo’or e miit e gaan rayog ni ngad kayed napan ra yib e bilig, bay bo’or e pi’nen rayog ni ngad rrin’ed nira sug e bilig ko ya’el. Boed, rayog ni ngad “mu duruw’iyed gimed ko thin rok’ Kristus” (2 Nephi 32:3) ulan fapi scripture nge ufithik’ e pi thin ko pi profet. Rayog ni ngad un’ed e missa nge thapeged fare sacrament (muguy ko Doctrine and Covenants 59:9). Rayog ni ngad pigpig nagk Got nge pi Fak (muguy ko Mosiah 2:17).

Machane bay reb miit e yongo’ol ko ya’el ni bay rodad gubin ngiyal’, ulan urngin’ e ngiyal’ u yafos rodad, ni dariy’fan e rogon rodad. Rayog ni ngad noned ngak Chitamangiy nu Tharmiy udakaen e meybil.

“Ya’el Rog e ri Yibe Bilig Ngak’”

Napan fare profet Enos ni ke mokol gamanman nga magerger, ni ke lemnag mornga’agen “ma fapi thin ni’ir e baga’ ni [ke] rung’ag ni ma weliy e chitaman[gin] u mornga’agen e yafos ni gubinfen, nge falfalaen’ rok’ fapi saints.” Fapi thin ney ke “rich nib to’aer nga lan gum’ircha’[en” (Enos 1:3).

Bachane Enos nike lemnag mornga’agen e pi’nen nib thothup, ni ke thamiy nib ga’: “Ma ya’el rog e ri yibe bilig ngak’,” nike yoeg (Enos 1:4; emphasis added).

Mang e Enos ni key rrin’ napan ni ke fek e bilig ko ya’el, biney e ba’adag nifan e tongo’ol ko ya’el? “Mug ragbug nga butʼ u pʼoewchen e Anisunmiyeg,” nike yoeg, “mug yoer ngakʼ u dakean e meybil rog nge wenig rog ni fan ko yaʼel rog” (Enos 1:4).

Me rib ga’ e bilig ko ya’el rok’ Enos ni ke meybil “fare rran ni polo’ … ma nap’an ni nep’ ma [ke] be meybil nib gaa’ la[m] nge yaeni taw nga tharmiy” (Enos 1:4). Me tomur, Got nike fulweg e meybil rok’ nge ke n’agfan e pi denen rok’. Enos ni ke thamey e kireb rok e ke m’ay. Machane e yongo’ol ko ya’el rok dabi tal uram.

Ke fil mornga’agen gelngin e mich u lan e Yesus Kristus, nge ni ke pii’eg ni polo’ ni fan e gidii’ rok’—ni mus e pi to’ogor rok’. Ke fal’eg e pi michmicheg ngak fare Somoel nge nike thapeg e pi micheg Rok’. Nge tomuren e meybil nib gel’ rok’ Enos, nike yaen iyaen u fithik’ fapi gidii’ rok’ nike prophesy ni mornga’agen mornga’agen e pin’en ni kug rung’ag ma kug gguy. (Muguy ko Enos 1:5–19.)

Gathi gubin e meybil ni ra thapeg e fulweg nib ga’ rogon, machane e pi’nen nima buch ko meybil e rayog ni nge mang nib fel’ nge thilyeg e yafos. Rayog ni ngad fil’ed e pi’nen nib ga’ ufithik’ e rogon ko Enos ko meybil. Woed rogon:

Guy rogon ni ngan fol ko fare gospel ea ma ayuwegdad ningad nanged e bilig ko ya’el rodad.
Bilig ko ya’el rodad ea rayog ni nge ayuwegdad ni ngad ragbug gad nga dakean e buut’ ni fna ni ngad piryeged e ayuw rok’ Chitamangiy nu Tharmiy.
Meybil ngak e Chitamangiy nu Tharmiy nima sug nag e bilig ko ya’el rodad—nge pii’ boech ni reb.
Rayog ni ngad meybil gad u demtrug tafen, demtrug e ngiyal’.
Meybil ma ayuwegdad ni ngad kalngan’.
Meybil ea ma gel nag e mich rodad ku Yesus Kristus.
Rayog ni ngad thapeged e mich rodad ni Chitamangdad nu Tharmiy ea ma motoyil ngodad me nang dad.
Fare mich nge gelngin gadad ma thapeged udakaen e meybil nima ayuwegdad ni ngad pigpig gad nge gelnag reb e bee’.

Pi’nen Rog mornga’agen fare Gelngin e Meybil

Woed Enos ma kug fil boech e machib nib ta’abrogon udakaen e pi’nen ni ke buch ngog. Galibthir kar un’ed Fare Galasia ku Yesus Kristus ni fan ko gidii’en Got rok’ ko Tin Tomur e Rran napan kug pagal, nge kug tawefe nag napan meruk e duw rog. Bay e thamey nib fel’ nib guwael ulan e gum’irach’en mornga’agen e Chitamangiy nu Tharmiy nge Yesus Kristus, e gospelrok nib fulweg, nge Galasia Rok’. Machane dab ku meybil fa’anra e pi’ney ir riyul’ fa danaga’ umon chuchugur’ 16 e duw rog.

Bisof rog ni ke fith ngog ni nggu machib nag e klass ko Sunda School. Ke t’uf ni nggu machib nag mornga’agen e rogon ni ngad thapeged e mich ko fare gospel ufithik e meybil. Muruwel’ rok fare bisof ni ke l’ugeg ni nggu lemnag mornga’agen e mich rog. Kug thapeg e ngiyal’ ni nggu fil ulan fare Babyor ku Mormon nge guma lemnag ni riyul’ e Galasia. Ya michaen’ ngak’ Yesus Kristus urngin ngiyal’, machane dabgu tay ulan e gum’ircha’eg e micheg rok’ Moroni ni bay u Moroni 10:4–5. Dabgu meybil mornga’agen e tin nib riyul’ ko fare gospel.

Gube puguran ni kug thamey ulan e gum’ircha’eg fa’an gura sensey nag ngak e pi gidii’ nib fel’ yang’ren urogon ni ngar thapeged e mich ufithik e meybil, tuf ni nggu meybil nifan e mich rog. Ya’el rog e ri yibe bilig ngak’—sana u thil e rogon ko Enos, machane dariy’fan bachane kug bat’uf e pi’nen ko ya’el.

Napan kug t’aer midlen e machib rog, kug ragbug nga dakean e buut’ nge weliy e tin ni ba’adag e gum’ircha’eg ngak’ e Chitamag nu Tharmiy nge nanged e tin nib riyul’. Dabgu lemnag ni ra yib e thogthog nib ga’. Machane napan ni kug fith ngak fare Somoel fa’anra ba riyul’ e gospel, nike yib nga gum’ircha’eg e thamey nib fel’—binir e lam, nib sumunguy ni be kathkath nike weliy ngog biney ir riyul’ nge thingari gu ul’ul’ e rogon rog.

Thamtham ney nib ga’ ni dabgu pagtalin e fulweg nem nge gog dab gunang. Kug thapeg e falfalaen nifan gubin e rran. Tafney rog ke lemnag bo’or mornga’agen e pi’ney nib fel’ ni kug thamey ulan e gum’ircha’eg.

Binem e Madnom, kug sak’iy ko gin bay dalip fa aningeg e fagar ko class, yad nib bitir ko gag. Kug pii’ e mich rog ni Chitamangiy ni bay u Tharmiy nira fulweg e pi meybil rorad fa’an bay e mich rorad.

Fulweg ko meybil rok’ Elder Soares napan e pumo’on nib yangren nike pii’ e rogon ni nge pii’ e mich—woed e missionary (nga lang), chitimangiy nge figirngiy, nge Apostle—ni Chitamangiy ni bay u Tharmiy ma fulweg e meybil be pii’ ufithik’ e mich.

Me tomuren, mich ney ma paer ngog. Ke ayuwegeg ni nggu mel’eg e pi’nen, ni rib gaa’ nu fithik’ e ngiyal’ kug fek e magawon. Binem e meybil u rran ney, nge peth ko boch reb e m’ag ni kug thapeged ufithik’ e pi duw, ke pii’ ngog e rogon ni nggu pii’ e mich rog, ni bay e gelngin riy, e rayog ni ngar thapeged e pi fulweg ko Chitamangiy ni bay u Tharmiy napan ni yad ba meybil ufithik’ e mich. Iraray e pi’nen nib riyul’ napan kug pii’ e mich rog napan kug mang e missionary, tiyugang ko Galasia, chitimangiy nge figirngiy, nge daba’ ko Apostle.

Fare Ngiyal’ nge Mang ko Meybil

Riyul’, dabda meybil kemus napan gadad ra thamed e bat’uf ko ya’el nib ga’. Ere, mang e ngiyal’ thingarda meybil gad? Nge mang e pi’nen thingarda meybil nifan? Fulweg nib ngochngoch ni demtrug e ngiyal’ nge nifan gubin e pi’nen.

Got ir e Chitamangdaed nu Tharmiy. Ganop ney nima thilyeg e rogon ni ngad meybil gad. Fare Profet Joseph Smith nike fil: “Napan ni bay e ganop ko got, gadad ra nanged urogon ni ngad yib Ngak, nge rogon ni ngad fith ere gadad ra thapeged e fulweg. … Napan gadad ba fel’ rogon ni ngad dared Ngak, Ir ba fel’ rogon ni nge yib ngodad.”

Chitamangdad ni bay u Tharmiy ma fal’eg rogon ni nge mmotoyil ngodad nge ba’adag ni ngad meybil Ngak gubin e rran nge bo’or yay. Thingarda “mogow puruy’ ngak’ Somoel u fithik’ gubin e pin’en ni gadad ma rrin’ed” (Alma 37:37) nge meybil u kakadbul, nge misiw’, nge balayal’. Thingarda meybil gad u na’un, u muruwel’, u school—demtrug gadad be pared nge nifan demtrug e pi’nen (muguy ko Alma 34:17–26).

Thingarda meybil gad ulan e tabinaw rodad (muguy ko 3 Nephi 18:21). Thingarda meybil gad ko lam’dad nge ulan e gum’ircha’[dad], ufithik’ e gidii’ nge ni yigo gur (Doctrine and Covenants 81:3). Nge “napʼan ni [dabda] meybil gaed ngakʼ Somoel, ma [ngad] paged e pi gumʼirchaʼ[dad] nge sug ko lʼagaenʼ ngak, u lan e meybil ni gubin e ngiyalʼ ni fan ko paer [rodad], nge ku fan ko paer rokʼ e piʼin ni yaed bay u taʼab [dad]” (Alma 34:27). Nge thingarda meybil ngak e Chitimangiy udakaen e fithingan Yesus Kristus (muguy ko 3 Nephi 18:19–20).

Sasing mrunga’agen Joseph Smith rok’ Walter Rane, dabiyog ni ngam copy nag

Yib ngak’ Chitamangdaed nu Tharmiy

Chitmangdad ni bay u tharmiy ma ba’adag ni nge tawa’ath nag dad. Nge ni ra rrin’—fa’anra gadad be fith. Fare Profet Joseph Smith nike fil, “Mu puguran fa’anra dabda fith ma dabda thapeged e pi’nen; ere, mu fith ngak ufithik’ e mich, nge rayog ni ngam thapeg e tawa’ath e Got ni ba’adag ni nge pii’ ngomed.”²

Fare pi meybil nima buch urngin e rran ir ba ga’fan ni fan e yongo’ol ko ya’el ni fan e bilig ko ya’el rodad. Non ngak e Chitamangiy ni bay u Tharmiy ufithik’ e meybil me bay u demtrug e tafen nge urngin e ngiyal’.

Ta’areb e scripture ni gube’adag ma fil urogon e rayog ni ngad yib nga chitamangdaed nu Tharmiy napan ni ngad ragbug nga dakean e buut’ nifan e meybil: Ngam mang nib sobut’aen’; nge fare Somoel ni Got nira powi’iymed u tanpa’, nge pii’ ngomed e pii’ fulweg ko pi meybil romed (Doctrine and Covenants 112:10). Napan gadad ba mang nib sobut’aen’gad nge be fol gad, me paer ngodad Chitamangiy nu Tharmiy. Irra powi’iydad u tanpa’ Irra pii’ ngodad e thogthog ni ngad nanged e tafen thingarda dared nge pi’nen ni ngad rrin’ed Ir ma fulweg e pi meybil rodad udakaen e ba’adag, rogon, ngiyal’ nge ganop Rok’ mornga’agen e pi’nen nib fel’ nifan dad.

Thingarda puguran biney nge ba’adag e pi rogon rayog ni ngam yib nga gi’ “Got nge thapeged e pi tawa’ath.

© 2024 by Intellectual Reserve, Inc. Gubin mat’won ma bay. Kan yoloey u USA. Kan micheg nag ko thin nu Ngalis: 6/19. Micheg i pilyeg: 6/19. Pilyegthin ko Fare Mulwon nifan e Liahona ko biney e puul ko, April 2024. Language. 19283 905