Eregye Christ Edzi Ana Ɔasan Aba Bio

Joshua T. Dennis na Jessica Zoey Strong Kyerɛwee

Asɔr Dawurbɔ Nkrataa

Nna Nephifo no wɔ gyedzi ana Agyenkwa no reba, na yebotum enya gyedzi ana Ɔasan aba bio.

Ana adwen ho pɛn dza ɔbɛyɛ dɛ ebɛgye Agyenkwa no edzi ana Ɔreba asaase do? Nna tsetse Nephifo no wɔ dɛ wɔyɛ dɛm ara pɛr—“wɔhwɛ Messiah no kwan, na wɔgye dzi dɛ ɔbɛba bio tse dɛ ma ɔaba dada” (Jarom 1:11).

Ndaansa yi, yɛwɔ kyerɛwsɛm na abakɔsɛm nkyerɛwee a wɔgye dase dɛ Jesus Christ tsenaa ase, wui, na Ɔsoɛree bio. Yɛwɔ gyedzi wɔ Agyenkwa a Ɔaba dada no mu. Mbom yɛsan so wɔ gyedzi wɔ Agyenkwa a Ɔbɛsan aba bio no mu.

Ansaana Jesus Christ reba no, Nephifo no Nyaa Gyedzi Dɛ:

Wɔdze hɔn bɔn bɛkyɛ hɔn.

“Obiara a ɔbɛgye edzi dɛ Christ bɛba no, [be]nya bɔnfakyɛ, na ɔdze enyigye [be]dzi dɛw kɛsenara, tse dɛ ɔaba hɔn mu dada mpo” (Mosiah 3:13; woetsĩ mu akã ho).

Wɔdze hɔn bɔn kyɛ hɔnho.

“Na ndze bi baa mo hɔ see dɛ: Enos, wɔdze wo bɔn akyɛ wo. … Dɛm ntsi, wɔpepaa m’afɔdzi. Na mesee dɛ: Ewuradze, ɔyɛ dɛn yɛ? Na ɔsee me dɛ: Osian wo gyedzi a ɔwɔ Christ a enntsee ne nkã da na innhun no da no mu ntsi. Na mfe pii botwa mu akɔ ansaana ɔada no ho edzi wɔ honam mu; … wo gyedzi agye wo.” (Enos 1:5–8; woetsi mu akã ho).

Wɔyɛ anwawadze.

“Yenyim Christ, na yenyaa enyidado wɔ n’enyimnyam ho mfe aha pii ansaana ɔreba. … Kesi dɛ nokwar yebotum yɛahyɛ wɔ Jesus dzin mu ma ndua, anaadɛ mbepɔw, anaadɛ po asorɛkye etsie hɛn” (Jacob 4:4, 6; woetsĩ mu akã ho).

Wonya nyikyerɛ.

“Binom wɔ hɔ a nna hɔn gyedzi yɛ dzen kɛse mpo ansaana Christ reba, hɔn a biribiara nnkesiw hɔn kwan dɛ wɔbɛhɛn ntwamutam no mu, na mbom nokwar wɔdze hɔn enyiwa hun[ii]” (Ether 12:19); woetsĩ mu akãa ho.

ĩAnsaana Jesus Christ Bɛba Bio no, Yebotum Enya Gyedzi Dɛ:

Yebenya bɔnfakyɛ, yɛdze hɛn bɔn bɛkyɛ hɛnho, yɛyɛ anwanwadze, na yenya nyikyerɛ (tse dɛ Nephifo no).

Yɛbɛyɛ ahosiesie ama Ne mbae.

Ber a yɛper dɛ yebesie hɛn ahyɛmudzi no, nna yerisiesie hɛn ho dɛ yɛbɛtsena celestial ahenman no mu. “Na hwɛ, nkwaber yi mu nna ɔwɔ dɛ nyimpa siesie hɔnho hyia Nyankopɔn kwan; nyew, hwɛ dɛm nkwanda yi mu nna ɔwɔ dɛ nyimpa dze yɛ hɔn ndwuma” (Alma 34:32).

Yɛbɔboa esiesie wiadze ama Ne mbae.

President Russell M. Nelson ato nsa afrɛ hɛn dɛ yɛnka “edwuma a ɔsõ koraa wɔ asaase do” no ho—Israel mboano no. “Hɛn Ɔsor Egya dze N’esunsum enyimnyamfo mu dodow esie—ebia, mubotum ase dɛ, No kuw wɔyɛ ndam papaapa no— ama dzibew a odzi ewiei yi. Dɛm esunsum enyimnyamfo no—akansifo mu akɔbran no, ekunyin no—nye hom!”¹

Yebenya enyidado wɔ mber a ɔyɛ dzen mu.

Sɛ Agyenkwa no ba bio a, atseneneefo bɛtsena ase asomdwee mu. Agyenkwa no bedzi hen, na wɔbɛtsentsen esisisɛm. “Na Ewuradze bɛtsena hɔn finimfin, na n’enyimnyam bɛba hɔn do, na ɔbɛyɛ hɔn hen na hɔn mbrahyɛfo” (Nkyerɛkyerɛ na Ahyɛmudzi 45:59).

Yɛdze hɛn werɛ hyɛ Wusoɛr no mu.

Adasa nyinara bɔsoɛr efi owu mu. Yebenya bɛkyebo honam a odzi mu. Yebotum ehu adɔfo a woewuwu kɔ. “Sunsum nye nyimpadua bɛsan abɔmu bio ma ne nyimpa su edzi mu; nsa na anan nye akwaado akwaado nyina bɛkã esisi enyim bio ma eedzi mu, mpo dɛ mbrɛ yɛtse seseiara yi” (Alma 11:43).

Tsetse Nephifo no nyaa gyedzi wɔ Agyenkwa No mu ana Ɔreba. Yebotum enya gyedzi dɛ Agyenkwa no bɛsan aba bio—a [ye]bohu [No] wɔ sor mununkum mu, dɛ [Ɔ]dze tum na enyimnyam kɛse” (Nkyerɛkyerɛ na Ahyɛmudzi 45:44; san so hwɛ Ndwuma 1:11). Iruhu dɛ Ɔbɛba bio no besi dɛn asesa dza ebɛyɛ no ndɛ?

© 2024 odzi wɔ Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly For the Strength of Youth Message, April 2024. ne nkyerɛase Language. 19353 502