Ginatawag Kita sa Paghimo sang Maayo

Ni Elder Ronald A. Rasband

Sang Korum sang Dose ka Apostoles

Ginatukod naton ang ginharian sang Dios kon nagaserbisyo kita sa iban, ginapataas ang aton kasanag, kag ginatindugan ang kahilwayan sang relihiyon.

Makilala ni Gideon ang indi matuod nga doktrina kon mabatian niya ini. Nabatian niya ini sang una kay Haring Noe kag sa iya mga pari—mga pari nga “nag-alsa sa bugal sang ila mga tagipusuon” kag “ginsuporta sila sa ila katamad, kag sa ila pagkamadios-dioson, kag sa ila mga pagkamakihilawason, paagi sa mga buwis nga ginpabayad ni haring Noe sa iya katawhan” (Mosias 11:5–6).

Malain pa, ginpapatay ni Haring Noe si propeta Abinadi kag gintinguhaan nga patyon si Alma kag ang iya mga hinaylo (tan-awa sa Mosias 17; 18:33–34). Para matapos ini nga kalainan, nanumpa si Gideon nga punggan ang hari, nga ginluwas lang niya tungod sang pagsalakay sang mga Lamanhon (tan-awa sa Mosias 19:4–8).

Sang ulihi, husto gid nga ginbasol ni Gideon ang mga pari ni Noe sa pag-kidnap sang 24 ka anak nga babayi sang mga Lamanhon. Naobserbahan niya nga ang propesiya ni Abinadi sa mga tawo natabo tungod indi sila gusto maghinulsol. (Tan-awa sa Mosias 20:17–22.) Ginbuligan niya nga makapalagyo ang katawhan ni Limhi, nga gin-ulipon sang mga Lamanhon (tan-awa sa Mosias 22:3–9).

Karon nga tigulang na, ginkontra liwat ni Gideon ang bugal kag kalainan sang gin-atubang niya si Nehor, nga amo ang nagsugod sang butig nga pagkapari sa tunga sang katawhan. Si Nehor “nagapanudlo batok sa simbahan” kag ginapatalang ang katawhan. (Tan-awa sa Alma 1:3, 7, 12; tan-awa man sa 2 Nefi 26:29.)

Gamit ang pulong sang Dios bilang armas, ginsaway sang maisog nga Gideon si Nehor tungod sa iya kalainan. Nangakig, ginlabo kag ginpatay ni Nehor si Gideon gamit ang iya espada. (Tan-awa sa Alma 1:7–9.) Gani natapos ang inadlaw sa kabuhi sang “matarong nga tawo” nga “nakahimo sing dako nga kaayohan sa sining katawhan” (Alma 1:13).

Ang ulihing mga adlaw nga nagakabuhi kita karon, nagahatag sa aton sang madamo nga oportunidad para sundon si Gideon bilang “instrumento sa mga kamot sang Dios” (Alma 1:8) paagi sa “pag-alagad” (Mosias 22:4) sa iban, pagtindog sa matarong, kag pagbato sa mga hangkat sa aton kahilwayan sa pagsimba kag pagserbisyo sa Dios. Kon sundon naton ang tampad nga ehemplo ni Gideon, makahimo man kita sang dako nga kaayohan.

Mag-isa sa Pagserbisyo

“Bilang mga sumulunod sang [Manluluwas], ginahandum naton nga palanggaon ang Dios kag ang aton mga isigkatawo sa bilog nga kalibutan,” siling sang Unang Pangulohan. “Ang Simbahan ni Jesucristo sang mga Santos sa Ulihing mga Adlaw nagakalangkag sa pagbugay sa iban kag pagbulig sa mga nagakinahanglan. Ginbugayan kita nga makaangkon sang abilidad, mga pamaagi, kag masaligan nga mga koneksyon sa kalibutan para ipatuman ining sagrado nga responsibilidad.”¹

Nagapasalamat ako sa maalwan nga serbisyo kag ministering nga ginahimo sang mga miyembro sang Simbahan sa aton mga templo kag sa ila mga ward, branch, kag stake. Nagapasalamat man ako nga ang mga miyembro sang Simbahan nagaserbisyo sa indi maisip nga mga organisasyon sa komunidad, edukasyon, kag tawhanon nga bulig kag nagaentra sila sa linibo ka tawhanon nga mga proyekto kada tuig, nga nagaboluntaryo sang minilyon ka oras sa malapit 200 ka pungsod kag mga teritoryo.²

Isa ka paagi nga ginapasangkad sang Simbahan ang mga oportunidad sa pagserbisyo sa pila ka mga pungsod amo ang paagi sa JustServe.org. Ginaisponsoran sang Simbahan pero bukas sa bisan sin-o nga gusto magbugay sa iban, ang JustServe.org “nagaangot sang mga panginahanglan sang komunidad sa mga nagaboluntaryo” nga “nagapauswag sang kalidad sang pagpangabuhi sa komunidad.”³

Ang Simbahan kag ang mga miyembro sini nagaupod man sa nagaalagad nga mga organisasyon sa bilog nga kalibutan. Ang Simbahan, salamat sa mga miyembro sini, amo ang “pinakadako nga kontribyutor sa Red Cross blood drive sang 2022.” Dugang pa, nagdonar ang Simbahan sining karon lang sang $8.7 milyon sa Red Cross.⁴

Nagaupod man ang Simbahan sa mga organisasyon agud dalhon ang mga proyekto sa paghatag sang matinlo nga tubig kag sanitasyon sa bilog nga kalibutan. Sang 2022, nagpartisipar ang Simbahan sa 156 sining mga proyekto.⁵ Nagabuligay man kita kag nagadonar sa iban nga mga ahensya para hatagan sang kaumpawan ang nagaantos nga mga anak sang Dios.⁶

“Kon mag-ulolupod kita sa pag-alagad sa mga tawo nga nagakinahanglan,” siling ni Pangulong Henry B. Eyring, Ikaduhang Manuglaygay sa Unang Pangulohan, “ginahiusa sang Ginuo ang aton mga tagipusuon.”⁷

Ipataas ang Inyo mga Suga

Bilang mga disipulo sang Manluluwas, ginabugayan man naton ang aton mga isigkatawo kon ginatuman naton ang aton mga kasugtanan kag nagapangabuhi nga Cristohanon. Ginatudlo sa Libro ni Mormon nga ang “katawhan sang simbahan” wala lang nagapili sang pagkamatarong kundi nagapabati man sang ila matarong nga mga tingug kon gusto nila nga protektahan sila kag pauswagon sang Ginuo (tan-awa sa Alma 2:3–7; tan-awa man sa Mosias 29:27). Ginapaabot sang Ginuo nga ipakigbahin naton ang aton pagtuo kag mga ginapatihan kag ipataas ang aton mga suga. “Tan-awa ako ang kasanag nga ipataas ninyo” (3 Nefi 18:24).

“Wala naton ginaserbisyohan sang maayo ang aton Manluluwas kon mas ginahadlukan kita sa tawo sangsa Dios,” siling ni Pangulong Dallin H. Oaks, Unang Manuglaygay sa Unang Pangulohan. Dugang pa niya, “Gintawag kita para ipahamtang ang mga sulundan sang Ginuo, indi agud sundon ang iya sang kalibutan.”⁸

Bisan sa eskwelahan, sa trabaho, ukon sa hampang, sa bakasyon, sa date, ukon online, ang mga disipulo sang Ginuo wala “[nagakahuya] sa pagdala sa ila kaugalingon sang ngalan ni Cristo” (Alma 46:21). Sa aton mga tinaga kag sa aton mga hinimuan, nagasaksi kita nga buhi ang Dios kag ginasunod naton ang Iya Anak.

“Ang aton pagtuo wala ginabahin-bahin, ukon indi ini dapat bahin-bahinon. Ang pagtuo indi lang para sa simbahan, indi lang para sa balay, indi lang para sa [eskwelahan],” siling ni Paul Lambert, Santos sa Ulihing-Adlaw nga eksperto sa pagdamo sang relihiyon. “Para ini sa tanan ninyo nga ginahimo.”⁹

Wala kita kahibalo sang epekto sa iban sang aton testimonya, maayong halimbawa, kag maayong binuhatan. Pero kon tindugan naton ang husto kag ipataas ang kasanag sang Manluluwas, matalupangdan kita sang mga tawo kag magakasadya ang langit para sa aton.

Tindugi ang Kahilwayan sa Relihiyon

Ang butig nga pagkapari sa karon nga panahon, sa mas nagasekular nga mga sosyedad nga nagakontra sa mga nagatuo, indi malayo sa butig nga pagkapari sa panahon sang Libro ni Mormon. Ang tingug sang mga nagakontra sang importante nga papel sang relihiyon sa publiko kag pulitika mas nagatodo. Ang mga sekularista kag mga gobyerno, upod ang madamo nga eskwelahan kag unibersidad, nagadikta sang pamatasan kag nagatudlo sang imoralidad, pagka-ateista [kakulang sang pagpati sa Dios], kag moral nga pagpinagusto tungod wala sang sala kag husto.

Ang mga pag-atake sa relihiyoso nga kahilwayan magadaog kon indi naton pagtindugan ang aton mga kinamatarong sa relihiyon. “Bilang simbahan,” gintudlo ko sang sini lang, “nagaupod kita sa iban nga mga relihiyon sa pagprotekta sang katawhan nga may lainlain nga ginapatihan kag relihiyon kag sa ila kinamatarong sa paghambal sang ila mga ginatuohan.”¹⁰

Ang giyera sa langit gin-away para sa aton moral nga kabubut-on—ang aton kahilwayan sa pagpili. Ang pag-amlig sang aton kabubut-on nagapangayo nga mangin matutom kita sa pagprotekta sang aton relihiyoso nga kahilwayan.

Ang buhi nga pagtuo sa relihiyon nagapabakod kag nagaprotekta sang mga pamilya, komunidad, kag mga nasyon. Nagaresulta ini sa pagsunod sa layi, nagapatubo sang respeto sa kabuhi kag propiyedad, kag nagatudlo sang pagpalangga sa isigkatawo, katampad, kag moralidad—mga pamatasan nga kinahanglanon para magpadayon ang isa ka patas, hilway, kag sibil nga sosyedad. Indi naton kinahanglan magpangayo pasensya tungod sa aton pagtuo.

Ang aton misyonero nga mga pagpangabudlay, ang aton mga buluhaton sa templo para sa patay, ang aton pagpaninguha sa pagtukod sang ginharian sang Dios, kag ang aton mismo kalipayan nagapangayo nga tindugan naton ang aton relihiyoso nga pagtuo kag kahilwayan. Kon madula ang aton relihiyoso nga kahilwayan, madula man sa aton ang iban naton nga kahilwayan.

Gintudlo ni Propetang Joseph Smith, “Ang gugma sa kahilwayan nagapapagsik sa akon kalag—sibil kag relihiyoso nga kahilwayan sang bilog nga katawhan.”¹¹ Ang relihiyoso nga kahilwayan magainspirar man sang aton mga kalag kon sundon naton ang laygay sang aton mga lider sa Simbahan:

“Hibaloa ang mga isyu nga may importansya sa publiko, kag maghambal nga may kaisog kag pagtahod.”¹²
“Kilalaha nga ang amat-amat nga pagkadula sang relihiyoso nga kahilwayan may dako nga epekto sa aton mga oportunidad nga magtubo sa kusog kag ihibalo sang ebanghelyo, nga mabugayan sang sagrado nga mga ordinansa, kag magdangop sa Ginuo para pangunahan ang Iya Simbahan.”¹³
“Manindugan kag maghambal para magpamatuod nga may Dios kag may lubos nga mga kamatuoran nga ginapahamtang ang Iya mga kasuguan.”¹⁴
“Hangkata ang mga layi nga magapugong sang aton kahilwayan nga ipangabuhi ang aton mga ginapatihan.”¹⁵
“Maglakat sa kalibutan para maghimo sang kaayohan, para magpatubo sang pagtuo sa Dios nga Makagagahum, kag buligi ang iban nga makalab-ot sa mas malipayon nga kahimtangan.”¹⁶
Tun-i ang mga balasahon sa religiousfreedom.ChurchofJesusChrist.org kag sa religiousfreedomlibrary.org/documents.

Ginatukod naton ang ginharian sang Dios kon nagaserbisyo kita, ginapataas ang aton kasanag, kag ginatindugan ang kahilwayan sang relihiyon. Kabay nga bugayan kita sang Ginuo sa aton mga pagpaninguha nga maghimo sang “dako nga kaayohan” sa aton mga pamilya, mga komunidad, kag mga nasyon.

© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, June 2024. Hiligaynon. 19347 861