Vajtswv Hu Peb Los Ua Zoo

Los ntawm Txwj Laug Ronald A. Rasband

Ntawm Pawg Kaum Ob tug Thwj Tim

Daim Duab

Txwj Laug Ronald A. Rasband

Peb txhim tsa Vajtswv lub nceeg vaj thaum peb pab lwm tus, tsa peb lub teeb, thiab txhawb nqa kev ywj siab xaiv kev teev ntuj.

Nkide-oos paub cov lus qhuab qhia cuav thaum nws hnov lawm. Yav tas los nws twb hnov los ntawm Vaj Ntxwv Nau-as thiab nws cov pov thawj—cov pov thawj uas “khav theeb vim lawv lub siab muab hlob” thiab lawv “tau noj tau haus txhawb nqa lawv txoj kev tub nkeeg, thiab lawv tej kev sib daj sib deev, los ntawm tej se uas vaj ntxwv Nau-as tau tsub rau nws cov neeg” (Mauxiyas 11:5–6).

Tsis tas li ntawd xwb, Vaj Ntxwv Nau-as tau txib kom tua tus yaj saub Anpinadais tuag thiab xav ua rau Amas thiab nws cov neeg uas hloov siab los ntseeg raug puas tsuaj thiab (saib Mauxiyas 17; 18:33–34). Xwv kom txiav txoj kev ua phem npaum li no, Nkide-oos cog lus tias nws yuav tua tus vaj ntxwv tuag, tiam sis nws tsis ua li ntawd tsuas yog cov Neeg Lamas tab tom los ua tsov ua rog (saib Mauxiyas 19:4–8).

Tom qab ntawd, Nkide-oos hais qhov yog thaum nws liam tias Nau-as cov pov thawj tau nyiag 24 tus ntxhais Lamas mus. Nws pom tias twb tau muaj raws li tej yam uas Anpinadais hais yuav muaj thaum yav tom ntej vim lawv twb tsis txaus siab hloov siab lees txim. (Saib Mauxiyas 20:17–22.) Nws tau pab Leehais cov neeg dim txim, vim lawv raug ua qhev rau cov neeg Lamas (saib Mauxiyas 22:3–9).

Nws twb laus lawm, es Nkide-oos rov qab tawm tsam kev muab hlob thiab kev ua phem ntxiv thaum nws sawv ntawm Nihos, tus uas tau txhim tsa tej tswv yim xib hwb cuav rau cov neeg. Nihos tab tom “tawm tsam lub koom txoos” thiab nws sim coj cov neeg mus ua yuam kev. (Saib Amas 1:3, 7, 12; kuj saib 2 Nifais 26:29.)

Nkide-oos twb siv Vajtswv txoj lus kom qhuab ntuas Nihos hais tias Nihos ua phem. Nihos chim siab thiab xuas ntaj tua Nkide-oos. (Saib Amas 1:7–9.) Yog li ntawd ib tug “ib tug txiv neej [ncaj ncees] uas tau ua ntau yam zoo nyob hauv cov neeg no” xiam li no (Amas 1:13).

Nyob hauv hnub nyoog kawg uas peb nyob no muaj ntau lub cib fim rau peb coj raws li Nkide-oos ua “ib rab cuab yeej nyob hauv Vajtswv txhais tes” (Amas 1:8) los “pab” (Mauxiyas 22:4) lwm tus, txhawb nqa kev ncaj ncees, thiab nyob khov kho thaum muaj neeg xav rhuav peb txoj kev ywj pheej teev hawm thiab ua hauj lwm rau Vajtswv. Thaum peb coj raws li Nkide-oos tus yam ntxwv uas rau siab ntseeg, peb kuj yuav ua zoo ntau thiab.

Daim Duab

tus poj niam uas nqa ib daim phiaj nqa zaub mov uas sawv ntawm ib tug poj niam uas pw hauv txaj

Koom Siab Pab Lwm Tus

Thawj Pawg Thawj Tswj Hwm tau hais tias, “Vim peb yog cov uas coj raws li [tus Cawm Seej], peb xav hlub Vajtswv thiab peb cov neeg zej zog nyob thoob plaws lub ntiaj teb. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej xav foom koob hmoov rau lwm tus thiab pab cov neeg uas xav tau. Peb tau koob hmoov vim peb muaj peev xwm, muaj khoom, thiab muaj tej kev sib raug zoo nrog lwm tus nyob thoob plaws lub ntiaj teb kom thiaj li ua tau kev lav ris dawb ceev no.”¹

Kuv ris Vajtswv txiaj rau qhov cov mej zeej ntawm lub Koom Txoos ua siab dawb pab thiab hwm Vajtswv hauv peb cov tuam tsev thiab nyob hauv lawv pawg ntseeg, ceg ntseeg, thiab ceg txheem ntseeg. Kuv kuj zoo siab uas lub Koom Txoos cov mej zeej ua hauj lwm hauv tej lub zej zog, cov tsev kawm ntawv, thiab tej lub koom haum pab cov txom nyem suav tsis txheeb thiab lawv ua ntau txhiab lub txheej xwm pab cov txom nyem txhua xyoo, ua siab dawb pub sij hawm ntau kawg li nyob hauv yuav luag 200 lub teb chaws thiab thaj chaw.²

Ib txoj kev uas lub Koom Txoos ua rau tib neeg muaj cib fim pab lwm tus nyob hauv ntau lub teb chaws yog kev siv JustServe.org. Lub Koom Txoos txhawb nqa qhov no tiam sis leej twg uas xav foom koob hmoov rau lwm tus yeej siv tau, JustServe.org “muab cov neeg uas xav tau kev pab hauv zej zog” uas “ua rau tib neeg muaj lub neej zoo nyob hauv zej zog.”³

Lub Koom Txoos thiab cov mej zeej kuj koom ua ke nrog tej koom haum pab nyob thoob plaws lub ntiaj teb. Vim muaj cov mej zeej zoo, lub Koom Txoos yog “lub koom haum uas pub ntshav rau Red Cross ntau tshaj rau xyoo 2022.” Tsis tas li ntawd xwb, tsis ntev tas los lub Koom Txoos tau pub $8.7 lab nyiaj rau Red Cross.⁴

Lub Koom Txoos kuj nrog tej lub koom haum ua hauj lwm ua ke ua tej lub txheej xwm nyob thoob plaws lub ntiaj teb kom muaj dej huv thiab muaj kev huv si. Nyob rau xyoo 2022, lub Koom Txoos tau koom tes ua 156 lub txheej xwm no.⁵ Peb kuj koom tes nrog lwm lub koom haum uas pab txhawb nqa Vajtswv cov me nyuam uas raug txom nyem thiab muab nyiaj rau lawv pub dawb.⁶

Thawj Tswj Hwm Henry B. Eyring, tus Pab Cuam thib Ob hauv Thawj Pawg Thawj Tswj Hwm hais tias, “Thaum peb tuav tes pab tib neeg uas xav tau kev pab, ces tus Tswv ua rau peb koom siab koom ntsws.”⁷

Daim Duab

dauv tes thiab lub hnub ci ntsa iab

Tsa Nej lub Teeb

Vim peb yog tus Cawm Seej cov thwj tim, peb kuj foom koob hmoov rau peb cov neeg zej zog thaum peb ua raws li peb tej kev khi lus thiab ua neej raws li Yexus Khetos ua. Phau Ntawv Maumoos qhia tias “cov neeg ntawm lub koom txoos” yuav tsum tsis txhob xaiv kev ncaj ncees xwb tiam sis lawv kuj yuav tsum siv lawv lub suab ncaj ncees yog tias lawv xav kom tus Tswv pov hwm lawv thiab ua rau lawv vam meej (saib Amas 2:3–7; kuj saib Mauxiyas 29:27). Tus Tswv yeej xav tias peb yuav qhia peb txoj kev ntseeg thiab tsa peb lub teeb rau lwm tus saib. “Saib seb kuv yog lub teeb uas nej yuav tsa” (3 Nifais 18:24).

Thawj Tswj Hwm Dallin H. Oaks, tus Pab Cuam hauv Thawj Pawg Thawj Tswj Hwm hais tias, “Peb tsis ua hauj lwm zoo rau peb tus Cawm Seej yog tias peb hwm tib neeg tshaj peb hwm Vajtswv.” Nws kuj hais tias, “Vajtswv hu peb los txhim tsa tus Tswv tej kev cai, tsis yog kom coj raws li neeg ntiaj teb tej kev cai.”⁸

Txawm nyob hauv tsev kawm ntawv, hauj lwm, los sis thaum ua si, mus ncig teb chaws, tham hluas nkauj, nyob onilne los, tus Tswv cov thwj tim yeej tsis “txaj muag ris Khetos lub npe” (Amas 46:21). Los ntawm peb tej lus thiab peb tej hauj lwm, peb ua tim khawv tias Vajtswv muaj txoj sia nyob thiab peb coj raws li Nws Leej Tub.

“Peb txoj kev ntseeg yeej tsis muab sib cais, thiab yeej yuav tsum tsis txhob ua li ntawd. Paul Lamber, ib tug Neeg Ntseeg hauv Hnub Nyoog Kawg uas yog ib tug kawm txuj txog tej kev teev ntuj hais tias, “Kev ntseeg tsis yog ib yam nyob hauv lub koom txoos xwb, tsis yog ua hauv tsev xwb, tsis yog ua hauv [lub tsev kawm ntawv] xwb. Yeej yog ib yam yus ua txhua lub sij hawm.”⁹

Peb tsis paub tias peb zaj lus tim khawv, kev coj yam ntxwv zoo, thiab tej yam peb ua zoo yuav ua li cas rau lwm tus. Tiam sis thaum peb txhawb nqa qhov yog thiab tsa tus Cawm Seej lub teeb, tib neeg yuav pom peb thiab cov nyob saum ntuj mam li txhawb nqa peb.

Daim Duab

tus poj niam sawv lub tuam tsev sab nraud

Txhawb Nqa Kev Ywj Pheej Teev Ntuj

Tej tswv yim xib hwb cuav uas muaj niaj hnub no, tsis hais tej lub sawm fem tsis ntseeg uas tawm tsam cov neeg ntseeg los yog, yeej tsis txawv ntawm tej tswv yim uas muaj hauv Phau Ntawv Maumoos. Cov neeg uas tawm tsam hais lus nrov dua tawm tsam qhov uas yuav tsum muaj kev teev ntuj hauv cov pej xeem thiab kev kav teb chaws. Cov uas tsis ntseeg thiab tej tsoom fwv, tsis hais tej tsev kawm ntawv thiab tej tsev kawm ntawv qib siab, yuam kev coj cwj pwm thiab tshaj tawm txhawb nqa kev coj tsis tsim txiaj, kev tsis ntseeg Vajtswv, thiab kev coj ncaj ncees nyob ntawm seb yus xav li cas.

Ntshe cov uas tawm tsawm kev ywj pheej teev ntuj yuav yeej yog tias peb tsis txhawb nqa peb txoj kev muaj cai teev ntuj. Tsis ntev tas los kuv tau qhia hais tias, “Peb lub koom txoos tag nrho, peb nrog lwm txoj kev teev ntuj sib koom siab tiv thaiv txhua yam kev ntseeg thiab kev xav thiab txoj cai uas cia lawv hais raws li lawv lub siab nyiam.”¹⁰

Twb tau ua tsov rog saum ntuj ceeb tsheej txog kev ywj siab coj ncaj ncees—yog peb txoj kev ywj siab xaiv. Yog peb xav tiv thaiv peb txoj kev ywj siab xaiv ces peb yuav tsum rau siab tiv thaiv peb txoj kev ywj pheej teev ntuj.

Kev ywj pheej teev ntuj uas khov kho yeej ntxiv dag zog thiab pov hwm tsev neeg, zej zog, thiab tej teb chaws. Ua rau tib neeg xav ua raws li kev cai, saib taus lub neej thiab tej thaj av, thiab qhia kom muaj kev siab hlub, siab ncaj, thiab kev coj zoo—yog tej kev tsim txiaj uas yuav tsum muaj kom cov pej xeem ua ncaj, muaj kev ywj siab, thiab sib raug zoo. Peb tsis tas thov txim vim peb ntseeg.

Yog vim peb txoj kev mus ua tub txib, peb tej hauj lwm sawv cev nyob hauv cov tuam tsev, peb tej hauj lwm txhim tsa Vajtswv lub nceeg vaj, thiab peb txoj kev zoo siab, peb thiaj li yuav tsum txhawb nqa kev ntseeg thiab kev ywj pheej teev ntuj. Yog peb poob txoj kev ywj pheej ntawd ces kuj yuav poob lwm txoj kev ywj pheej thiab.

Tus Yaj Saub Joseph Smith qhia hais tias, “Twb yog kuv txoj kev nyiam kev ywj pheej uas tshoov kuv lub siab—tib neeg sawv daws txoj kev ywj pheej ntawm tej kev cai lis choj thiab kev teev ntuj tib si.”¹¹ Kev ywj pheej teev ntuj kuj yuav tshoov peb lub siab thaum peb ua raws li cov thawj coj hauv lub Koom Txoos qhia hais tias:

“Cia li kawm tas li txog tej xwm txheej uas tseem ceeb rau cov pej xeem, ces ua siab loj thiab ua siab zoo tsa nej lub suab hais lus.”¹²
“Cia li to taub tias qhov uas peb txoj kev ywj pheej teev ntuj ploj zuj zus yuav tshem tej lub cib fim kom peb muaj zog thiab paub txog txoj moo zoo, kom peb tau koob hmoov los ntawm cov kab ke dawb ceev, thiab kom peb tso siab rau tus Tswv txoj kev coj Nws lub Koom Txoos.”¹³
“Cia li sawv ntsug thiab hais lus nrov qhia tias muaj Vajtswv tiag thiab muaj tej lus tseeb nyob hauv Nws cov lus txib.”¹⁴
“Tawm tsam tej kev cai uas yuav rhuav peb txoj kev ywj pheej ua raws li peb ntseeg.”¹⁵
“Mus thoob plaws lub ntiaj teb ua tej yam zoo, kom tib neeg ntseeg Vajtswv tus uas Muaj Hwj Chim Tag Nrho, thiab kom pab lwm tus muaj kev zoo siab ntxiv.”¹⁶
Cia li kawm cov ntawv pab nyob ntawm religiousfreedom.ChurchofJesusChrist.org thiab nyob ntawm religiousfreedomlibrary.org/documents.

Peb txhim tsa Vajtswv lub nceeg vaj thaum peb pab lwm tus, tsa peb lub teeb, thiab txhawb nqa kev ywj pheej teev ntuj. Thov kom tus Tswv foom koob hmoov rau peb thaum peb siv zog “ua zoo ntau” nyob hauv peb tsev neeg, zej zog, thiab tej teb chaws.

© 2024 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, June 2024. Hmong. 19347 295