Maawagantayo nga Agaramid iti Nasayaat

Ni Elder Ronald A. Rasband

Ti Korum dagiti Sangapulo-ket-dua nga Apostol

Bangonentayo ti pagarian ti Dios bayat ti panagserbitayo kadagiti dadduma, panangitag-aytayo iti silawtayo, ken panagtakdertayo para iti wayawaya a mainaig iti relihion.

Ammo ni Gideon ti palso a doktrina idi mangngeganna daytoy. Nangngegnan daytoy idi manipud ken Ari Noe ken kadagiti saserdotena—dagiti saserdote a “naitag-ay iti kinapalangguad ti puspusoda” ken “nasalakniban iti kinasadutda, ken iti panangrukbabda iti didiosen, ken iti kinamannakiabigda, babaen ti buis nga impaulog ni ari Noe kadagiti taona (Mosiah 11:5–6).

Nakarkaro pay, pinatay ni Ari Noe ni propeta Abinadi ket ginadatna a dadaelen ni Alma ken dagiti napasurotna (kitaen iti Mosiah 17; 18:33–34). Tapno aggibus ti kasta a kinadakes, inkari ni Gideon a mangpasardeng iti ari, nga inispalna laeng gapu iti panagraut dagiti Lamanite (kitaen iti Mosiah 19:4–8).

Idi agangay, umisu ti panangpabasol ni Gideon kadagiti saserdote ni Noe gapu iti panangipanawda iti 24 nga annak a babbai a Lamanite. Napaliiwna a naipatungpal ti padto ni Abinadi a maibusor kadagiti tao gapu ta nagkedkedda nga agbabawi (Kitaen iti Mosiah 20:17–22). Timmulong a nangispal kadagiti tao ni Limhi, a naadipen kadagiti Lamanite (kitaen iti Mosiah 22:3–9).

Ita a lakayen, naipasango manen ni Gideon iti kinapalangguad ken kinadangkes bayat ti panagtakderna iti sango ni Nehor, a nangyam-ammo iti panaginsasaserdote kadagiti tao. Ni Nehor ket “nangsupsupring iti simbaan” ken nangpadpadas a mangyaw-awan kadagiti tao. (Kitaen iti Alma 1:3, 7, 12; kitaen met iti 2 Nephi 26:29.)

Iti panangusarna iti balikas ti Dios a kas igamna, binalakadan ni maingel a Gideon ni Nehor iti kinadangkesna. Nakapungtot, dinarup ken pinatay ni Nehor ni Gideon iti espadana. (Kitaen iti Alma 1:7–9.) Ket naggibus dagiti aldaw ti “nalinteg a tao” nga “adu ti naaramidna a kinaimbag kadagitoy a tao” (Alma 1:13).

Dagiti maudi nga aldaw a pagbibiagantayo ket mangipaay kadatayo iti nawadwad a gundaway a mangtulad ken ni Gideon kas “ramit iti ima ti Dios” (Alma 1:8) babaen iti “panagserbi” (Mosiah 22:4) iti dadduma, panangitakder iti kinalinteg, ken panangsaranget kadagiti pangta iti wayawayatayo nga agdayaw ken agserbi iti Dios. Bayat ti panangsurottayo iti napudno nga ulidan ni Gideon, adu pay ti maaramidtayo a naimbag.

Agkaykaysa iti Serbisio

“Kas pasurot [ti Mangisalakan], ikagumaantayo nga ayaten ti Dios ken dagiti kaarrubatayo iti intero a lubong,” kinuna ti Umuna a Panguluen. Ti Simbaan ni Jesucristo dagiti Santo iti Ud-udina nga Aldaw ket aggagar a mangbendision kadagiti daddumaa ken mangtulong kadagiti agkasapulan. Naparaburantayo nga addaan iti kabaelan, resources, ken mapagtalkan a sangalubongan a koneksion a mangitungpal iti daytoy sagrado a pagrebbengan.”¹

Agyamanak iti saan a managimbubukod a panagserbi ken ministering nga idiaya dagiti miembro ti Simbaan kadagiti templotayo ken kadagiti ward, branch, ken stake-da. Agyamanak pay nga agserserbi dagiti miembro ti Simbaan kadagiti di mabilang nga organisasion ti komunidad, edukasion, ken panangngaasi ken tinawen a makiramramanda kadagiti rinibu a proyekto a humanitarian, nga agboluntario iti minilion nga oras iti dandani 200 a pagilian ken teritorio.²

Maysa a wagas a panangpadakkel ti Simbaan kadagiti gundaway ti panagserbi iti sumagmamano a pagilian ket babaen ti JustServe.org. Inesponsoran ti Simbaan ngem sidadaan a magun-od ti siasino man nga agtarigagay a mangbendision kadagiti dadduma, ti JustServe.org “ket mangisilpo kadagiti kasapulan a boluntario ti komunidad kadagiti boluntario” a “mangpasayaat iti kalidad ti biag iti komunidad.”³

Makitinnulong pay ti Simbaan ken dagiti miembrona kadagiti organisasion ti serbisio iti intero a lubong. Ti Simbaan, gapu kadagiti miembrona, ket “ti kadakkelan a single Red Cross blood drive contributor idi 2022.” Maysa pay, nabiit pay a nangted ti Simbaan iti $8.7 milion a donasion iti Red Cross.⁴

Makikappeng pay ti Simbaan kadagiti organisasion a mangyeg kadagiti proyekto iti nadalus a danum ken sanitasion kadagiti lugar iti intero a lubong. Idi 2022, nakipaset ti Simbaan iti 156 a kakasta a proyekto.⁵ Makitinnulong ken agidonartayo pay kadagiti dadduma nga ahensia a mangyeg iti bang-ar kadagiti agsagsagaba nga annak ti Dios.⁶

“No agtitinnulongtayo nga agserbi kadagiti tao nga agkasapulan,” kinuna ni Presidente Henry B. Eyring, Maikadua a Mamagbags iti Umuna a Panguluen, “ti Apo pagkaykaysaenna dagiti puspusotayo.”⁷

Itag-ayyo ti Silawyo

Kas disipulo ti Mangisalakan, bendisionantayo pay dagiti kaarrubatayo bayat ti panagtungpaltayo kadagiti katulagantayo ken panangiturongtayo iti biag a kas ken Cristo. Isuro ti Libro ni Mormon a nasken a saan laeng a pilien dagiti “tao ti simbaan” ti kinalinteg no di ket ipangngegda pay dagiti nalinteg a timekda no tarigagayanda a salakniban ken parang-ayen ida ti Apo (kitaen iti Alma 2:3–7; kitaen met iti Mosiah 29:27). Namnamaen ti Apo nga ibinglaytayo ti pammati ken dagiti panamatitayo ken itag-aytayo ti silawtayo. “Adtoy siak ti silaw nga itag-ayyo” (3 Nephi 18:24).

“Saantayo nga agserbi a naimbag iti Mangisalakantayo no ad-adda nga agbutengtayo iti tao ngem iti Dios,” kinuna ni Presidente Dallin H. Oaks, Umuna a Mamagbaga iti Umuna a Panguluen. Innayonna,“Naawagantayo a mangipasdek kadagiti pagalagadan ti Apo, saan a mangsurot kadagiti pagalagadan ti lubong.”⁸

Iti man pagadalan, pagtrabahuan, wenno pagay-ayaman, bakasion, panagdeyt, wenno online, saan a “mabain dagiti disipulo ti Apo a mangawat iti bagida iti nagan ni Cristo” .(Alma 46:21). Babaen kadagiti balikas ken aramidtayo, masaksiantayo a sibibiag ti Dios ken surotentayo ti Anakna.

“Saan a nabingbingay ti pammatitayo, wenno awan duadua a nasken a saan. Ti pammati ket saan laeng a para iti simbaan, saan laeng a para iti pagtaengan, saan laeng a para iti [eskuelaan],” napaliiw ni Paul Lambert, maysa nga eksperto a Santo iti Ud-udina nga Aldaw iti narelihiosuan a pluralismo a mainaig iti relihion. “Para iti amin nga ar-aramidenyo.”⁹

Saantayo nga ammo ti epekto a mabalin nga ipaay ti pammaneknektayo, nasayaat a pagwadan, ken naimbag nga aramidtayo kadagiti dadduma. Ngem bayat ti panangitakdertayo iti umno ken panangitag-aytayo iti silaw ti Mangisalakan, makitadatayto dagiti tao ket agrag-onto ti langit para kadatayo.

Agtakder para iti Wayawaya a Mainaig iti Relihion

Ti panaginsasaserdote ita, nga addaan kadagiti umad-adu a sekular a kagimongan a mangsupsupring kadagiti tao nga addaan pammati, ket saan a naiduma unay iti panawen ti Libro ni Mormon. Pumigpigsa ti timek dagidiay sumupsupiat iti napateg nga akem ti relihion iti publiko ken kadagiti politikal arena. Dagiti sekular ken gobierno, agraman ti adu nga eskuelaan ken unibersidad,ket ipilpilitda ti ugali ken iwarwarnakda iti imoralidad, ateismo, ken moral a relatibismo.

Agballiginto ti panangbatikos iti wayawaya a mainaig iti relihion no ditayo itakderan dagiti kalintegantayo a mainaig iti relihion. “Kas maysa a simbaan,” nabiit pay nga insurok, “makikappengtayo kadagiti dadduma a relihion a mangsalsalaknib kadagiti tao iti amin a pammati ken panangallukoy ken ti kalinteganda nga agsao kadagiti kombiksionda.”¹⁰

Maysa a gubat idiay langit ti nakilaban gapu iti moral nga kinawaya nga agpili—ti wayawayatayo nga agpili. Tapno mataginayon ti kinawayatayo nga agpili, agkasapulan nga agbalintayo a napasnek a mangsalaknib iti wayawayatayo iti relihion.

Ti nabiag a pammati iti relihion ket mangpapigsa ken mangsalaknib kadagiti pamilia, komunidad, ken nasion. Mangpataud daytoy iti panagtulnog iti linteg, mangimula iti panagraem iti biag ken sanikua, ken mangisuro iti kinamanangngaasi, kinapudno, ken moralidad—dagiti birtud a kasapulan tapno agtultuloy ti nalinteg, nawaya, ken sibil a kagimongan. Ditayo kasapulan ti dumawat iti dispensa para iti pammatitayo.

Dagiti panagreggettayo kas misionario, ti aramidtayo a mangisaup kadagiti templo, dagiti panagreggettayo a mangbangon iti pagarian ti Dios, ken ti mismo a ragsaktayo ket agkasapulan a tumakdertayo para iti pammati iti relihion ken wayawaya. Ditayo mapukaw dayta a wayawaya no ditayo mapukaw ti dadduma pay a wayawaya.

Insuro ni Propeta Joseph Smith, “Daytoy ti panagayat iti wayawaya a mangparegta iti kararuak—wayawaya iti sibil ken relihion iti sibubukel a puli ti tao.”¹¹ Ti wayawaya iti relihion ket mangparegtanto pay kadagiti kararuatayo no surotentayo ti balakad dagiti lidertayo iti Simbaan.

“Agtalinaedkayo a mapakaammuan maipapan kadagiti isyu a napateg iti publiko, ket kalpasanna agsaokayo nga addaan tured ken sibilidad.”¹²
“Bigbigen a ti pannakadadael ti wayawaya iti relihion ket dakkel ti epektona kadagiti gundawaytayo a dumakkel iti pigsa ken pannakaammo iti ebanghelio, tapno mabendisionan kadagiti sagrado nga ordinansa, ken agpannuray iti Apo a mangiturong iti Simbaanna.¹³
“Tumakderkayo ket agsaokayo tapno pasingkedan nga adda Dios ken adda dagiti naan-anay a kinapudno nga ipasdek dagiti bilinna.”¹⁴
“Kariten dagiti linteg a mangdadael iti wayawayatayo a mangsanay kadagiti pammatitayo.”¹⁵
“Mapankayo ditoy lubong tapno agaramid iti naimbag, mangbangon iti pammati iti Mannakabalin-amin a Dios, ken tumulong a mangyeg kadagiti dadduma iti naragragsak a lugar.”¹⁶
Adalen dagiti resources iti religiousfreedom.ChurchofJesusChrist.org ken iti religiousfreedomlibrary.org/documents.

Bangonentayo ti pagarian ti Dios bayat ti panagserbitayo, panangitag-aytayo iti silawtayo, ken panagtakdertayo para iti wayawaya iti relihion. Sapay koma ta bendisionannatayo ti Apo iti panagkagumaantayo nga agaramid iti “adu a naimbag” kadagiti pamilia, komunidad, ken nasiontayo.

© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, June 2024. Ilokano. 19347 864