Kuht Pahngonyuck in Oruh Ma Wo

Sel Elder Ronald A. Rasband

Sin U luhn Mwet Sap Singucul Luo

Kuht muhsahi tohkohsrahi luhn God ke kuht kuhlwacnsuhpuh mwet sahyac, suhkwack nuh lucng kahlwem lasr, ac tu kuh ke sukohsohk in alu.

Gideon el etuh mwe luti kikiacp ke el lohng ah. El lohng met sel Tohkohsrah Noah ac mwet tol lal—mwet tol ma “puhsruhkuhltahlack in insefuhlwact ke insiaclos sifacna” ac suc ma “kahsreyuck ke alsrungwesr lalos, ac ke alyalu lalos, ac ke inkacnek in kosro lalos, ke molo suc tohkohsrah Noah el likiyac nuh fin mwet lal” (Mosiah 11:5–6).

Koluk liki na, Tohkohsrah Noah el fihlilyac mwet pahluh Abinadi nuh ke misac ac suk in kuhnaosuhlah Alma ac mwet el ekuhlah ah (liye Mosiah 17; 18:33–34). In tilokihnyac ma koluk inge, Gideon el fuhlahk in tilokihnilyac tohkohsrah, suc el fuhlwelah muhkwena ke srihpen elos ukweyuck sin mwet Lamanites (liye Mosiah 19:4–8).

Tok, Gideon el sang mwacta nuh sin mwet tol lal Noah ke elos uslah tuhlihk muhtwacn Lamanites 24. El akihlwen lah ma Abinadi el palyei kacn mwet inge fohnlah ke srihpen elos sruhnga auliyak. (Liye Mosiah 20:17–22.) El kahsruh in uslah mwet lal Limhi, suc muhta in kapihr sin mwet Lamanites (liye Mosiah 22:3–9).

Na ke el mahtuhoh, Gideon el sifwilpac liye insefuhlwact ac ma koluk ke el tu ye muhtahl Nehor, suc sruhmuhn ma kikiacp nuh sin mwet uh. Nehor el “sruhmuhn ma lain alu uh” ac srihke in kohlah mwet uh nuh sahyac. (Liye Alma 1:3, 7, 12; liye pac 2 Nephi 26:29.)

Orekmakihn kahs luhn God in katlas lal, Gideon el tu na kuh in fahk nuh sel Nehor ke ma koluk lal. Kasrkuhsrak, Nehor el onel Gideon ke katlas nahtuhl ac unilyac. (Liye Alma 1:7–9.) Oruh ahksahfyelah pacl luhn “mwet suwohswohs” suc “oraclah ma wo pucspucs inmahsrlon mwet inge” (Alma 1:13).

Lwen sahflah ma kuht oasr kac inge use puhslac inkacnek kuht kuh in etahenuhl Gideon in “orekmakihnyuck ke poun God” (Alma 1:8) ke ohiyac in “kuhlwacnsap” (Mosiah 22:4) nuh sin mwet sahyac, tu na kuh ke ma suwohs, ac kuhtanglah ma lusrohngten nuh ke sukohsohk lasr in ahkfuhlwact ac kuhlwacnsuhpuh God. Ke kuht ukwe srihkasrak in luhlalhlfongi lal Gideon, kuht oacyacpac kuh in oruh ma wo yohk.

Tuhkweni ke Kuhlwacnsap

“Ekihn mwet fahsr tukun [Mwet Lahngo], kuht suk in luhngse God ac mwet tuhlan lasr fin facluh nohfohn,” Prestuhnsi Se Met elos fahk. “Alu luhn Jisus Kraist luhn Mwet Luhlahlfongi Lal ke Lwen-sahflah kena ahkinsewowoye mwet sahyac ac in kasrelos suc enenuh kahsruh. Kuht ahkinsewowoyeyuck ke etuh, kuhfa, ac ohiyac luhlalfongi fin facluh in usaclihk kunohokohn muhtahl se inge.”¹

Nga srui ke kuhlwacnsap puhsisacl ac orekma ma mempucrs ke Alu uh oruh lin tempuhl ac ke ward, pracns, ac stek lalos. Nga oacyacpac srui ke mempucrs ke Alu uh kuhlwansap ke mura, lutlut, kain in acn in orek donation ac elos wi ahkfahsrye ma sikyak ke project tausin luhn humanitarian ke yac nuhkewa, sifacna kihsackuhnlah ao miliacn lalos in kahsruh muhtuhnfacl ac acn apkuhran in sun 200 ma.²

Sie ohiyac ma Alu uh ahkyohkye kuhlwacnsap lalos ke kuhtuh muhtuhnfacl inge tuhkuh ke JustServe.org. Kasreyuck sin Alu uh tuhsruhk ma nuh sin mwet nuhkewa ma luhngse ahkinsewowoye mwet sahyac, JustServe.org “oracni mwet ma luhngse kahsruh wi mwet sahyac ma luhngse pac kasruh” suc ma oruh “ahkyohkyelihk srihpac wo ke moul uh in mura se.”³

Alu uh ac mempucrs elos toeni wi kain in u in kuhlwacnsap fin facluh nohfohn. Alu uh, kuloh nuh sin mempucrs, el pa “u in kahsruh se ma yohk emet ke Red Cross ma oracni srah ke 2022.” Weacng pacna ma inge, Alu uh tuhfahna in kahsruh ke miliacn $8.7 nuh sin Red Cross.⁴

Alu uh oacyacpac wi kain in u in sang kof nwacsnwacs ac project in sanitation nuh ke acn nuhkewa fin facluh. Ke 2022, Alu uh wi oruh project 156.⁵ Kuht oacyacpac wi ac sang kahsruh nuh sin kain in u ma kahsruh tuhlihk enenuh nuhtin God.⁶

“Ke kuht tuhkwenii nuh sie in kuhlwacnsuhpuh mwet enenuh uh,” Prestuhn Henry B. Eyring, Mwet in Kahsruh Ahkluo ke Prestuhnsi Se Met el fahk, “Leum El orwacni insiacsr.”⁷

Sruhkwack nuh Lucng Kahlwem Lom an

Ekihn mwet tuhma lutlut luhn Mwet Lahngo, kuht oacyacpac ahkinsewowoye mwet tuhlan lasr ke kuht karihngihn wuhlweacng lasr ac kol moul oacna ke Kraist el oruh. Puk luhn Mormon luti lah “mwet ke alu uh” tiac enenuh in sulwaclah suwohswohs muhkwena tuhsruhk in oruh in lohlngohk puhsra suwohswohs lalos elos fin luhngse Leum elan karihngihn ac ahkpuhsye moul lalos (liye Alma 2:3–7; liye pac Mosiah 29:27). Leum el kena kuht in akacsruhi luhlahlfongi ac etuh lasr ac in sruhkwack nuh lucng kahlwem lasr uh. “Liye Nga pa kahlwem se ma kowos fah sralwack” (3 Nephi 18:24).

“Kuht tiacna kuhlwacnsuhpuh Mwet Lahngo lasr wo kuht fin sahngeng sin mwet uh liki God,” Prestuhn Dallin H. Oaks, Mwet in Kahsruh Se Met ke Prestuhnsi Se Met. El tahfwelah, “Kuht pahngonyuck in akiyac srihkasrak luhn Leum, in tiac ukwe ma facluh.”⁸

Lah kom oasr ke lutlut, orekma, ke sritacl, kuh monglac liki orekma, wi kawuck, kuh online, mwet tuhma lutlut luhn Leum tiac na “mwekihn in eis nuh faclos inen Kraist” (Alma 46:21). Ke kahs lasr ac orekma lasr, kuht lohoh lah God el moul ac kuht fahsr tukun Wen Nahtuhl.

“Luhlahlfongi lasr uh tiacna kihtakatelihk nuh ke u, kuh tena enenuh in oruh ohinge. Luhlahlfongi tiac ma nuh ke alu muhkwena, tiac ma na ne lohm ah, tiac ma na nuh ke [lutlut],” tuniyuck sel Paul Lambert, mwet pihsrlac ke lutlut ke kain in luhlahlfongi ke Lwen-sahflah. “Ma nuh ke ma nuhkewa kowos oruh.”⁹

Kuht tiac etuh ma e tuhkuh tok ke testimony lasr, srihkasrak wowo, ac orekma wowo kuht oruh nuh sin mwet sahyac. Tuhsruhk ke kuht tu na kuh ac sralwack nuh lucng kahlwem luhn Mwet Lahngo, mwet uh e akihlen kuht ac inkuhsrao e engan sesr.

Tu Kuh ke Sukohsohk in Alu

Misenge, yohk luti in sifacna kohnkihn, ke kais sie u ma ahkolukye mwet ke kain in luhlahlfongi, tiac pac eklac nuh ke pacl ke Puk luhn Mormon. Yohkwelihk puhsraclos suc lain ma yohk srihpac ke alu ke acn in toeni ac ke acn masap uh. Kafucrmacn ac mwet pihsrlac srihke in ahkfohsyeack ma ke alu, sikyak puhs ke lutlut ac acn lutlut luhlahp, luti ac pacnlah liki moul ma pahtpaht, in tiac luhlahlfongi ke God, ac in luhlahlfongi ke ma luhn facluh.

Apihrack ke sukohsohk in alu kuh in kuhtangyucklac fin kuht tiac tu kuh ke suwohs lasr ke alu uh. “Ekihn alu se,” tuhfahna in lutiyuck nga lah, “kuht wi pacna alu sahyac karihngihn mwet ke luhlahlfongi nuhkwewa ac keok lalos ac suwohs lalos in fahk ma elos kuh kac.”¹⁰

Meun se inkuhsrao ahkfahsryeyuck ke srihpen sulwaclah lasr facluh—sukohsohk in sulwaclah lasr. In sruokyac na sulwaclah lasr uh kuht enenuh in oaru in karihngihn sulwaclah in alu lasr uh.

Luhlahlfongi kuh fihrihr se ahkkweye ac karihngihn sucu, mura, ac acn luhlahp se. El kohlah nuh ke ahkostwen nuh ke masap, sruokyac kuh suhnak nuh ke moul ac ma lasr, ac luti luhngse pwacye, suwohs, ac ma pwacye ac stuhuh—ma nwacsnwacs muhtahl ma kuh in sruokyac u fal, wo ac fokoko se. Kuht tiac enenuh in taltal koluk ke luhlahlfongi lasr.

Kampare lasr ke misineri, inswacneacng in orekma lasr tempuhl, kampare lasr in muhsahi tohkohsrahi luhn God, ac engan lasr enenuh in tuhkuh kuht fin tu kuh ke sukohsohk in luhlahlfongi ac alu lasr uh. Kuht tiac kuh in sislah sukohsohk se ingacn fin kuht tiac fuhlwelah sukohsohk se sahyac ah.

Mwet Pahluh Joseph Smith el luti, “Luhngse se inge mwesahs suc moklwe insiuck—nuh ke masap ac sukohsohk in alu nuh sin mwet nuhkwewa.”¹¹ Sukohsohk in alu oacyacpac moklwe insiacsr ke kuht ukwe kahs luhn mwet kol ke Alu uh:

“Muhta lohacng nuh ke ma yohk srihpac sruhmuhnyuck ke acn sum an, ac fahk puhsrem ke puhlaik ac kuh.”¹²
“Akihlwen lah puhtatlac wacngihnlac luhn suhkohsohk in alu uh oruh ekuhlah yohk inkacnek lasr in kapwack ke kuh ac etuh ke wosasuc, in ahkinsewowoyeyuck ke ma muhtahl, ac in fungyang nuh sin Leum in kol Alu Lal.”¹³
“Tuyak ac fahk ke kuh lah God el oasr ac lah pwacye masap Lal akiyucki.”¹⁴
“Lain masap ma ahkmuhnahsye sulwaclah in moulkin luhlalfongi lasr uh.”¹⁵
“Som nuh facluh in oruh ma wo, in muhsahi luhlahlfongi ke God Kuhlwacna, ac in kahsruh use mwet sahyac nuh ke acn engan se.”¹⁶
Lutlutkihn kuhfwen mwe luti inge ke religiousfreedom.ChurchofJesusChrist.org ac ke religiousfreedomlibrary.org/documents.

Kuht muhsahi tohkohsrahi luhn God ke kuht kuhlwacnsap, sruhkwack nuh lucng kahlwem lasr, ac tu kuh ke sukohsohk in alu. Lwelah Leum elan ahkinsewowoye kuht ke kampare lasr in oruh “orekma wo” inmahsrlon sucu, mura, ac acn sesr.

© 2024 sin Intellectual Reserve, Inc. Suwohs nuhkewa fihliyucki. Printiyucki fin acn USA. Ahkkweyeyucklac nuh ke English: 6/19. Ahkkweyeyucklac ke lweng: 6/19. Lwenglah luhn Pweng ke Mahlwem Nuhkwewa Liahona, Jun 2024. Kosraean. 19347 868