Jaar Kūr n̄an Kōm̧m̧an Em̧m̧an

Jān Elder Ronald A. Rasband

Jān Doulul eo an Jon̄oulruo Rijilōk ro

Jej kallōk aelōn̄ in kiin̄ eo an Anij ilo ad jerbal n̄an ro jet, kotak meram eo ad, im jutak kōn anemkwoj in kabun̄.

Gideon eaar jeļā kōn katak ko rebōd ke ekar ron̄. Ekar ron̄ m̧oktaļo̧k jān Kiin̄ Noa im pris ro an—pris ro “ro im raar utiej ilo juwa in burueer” im ro “kar rejetake er ilo aer jowan, im ilo aer kabun̄-jar n̄an ekjab, im ilo aer jerbal in ļōn̄, jān ewōj ko kiin̄ Noa eaar likūt ioon armej ro an” (Mosaia 11:5–6).

N̄an kappan̄ļo̧k wōt, Kiin̄ Noa eaar bōk mour eo an rikanaan Abinadi im kar pukōt kilen n̄an kakkure Alma im ro doon (lale Mosaia 17; 18:33–34). N̄an kabōjrak jorrāān in, Gideon eaar kallim̧ur n̄an kabōjrak kiin̄ eo, eo im eaar lo̧mo̧o̧re kōnke riLeman ro raar tariņaeikier (lale Mosaia 19:4–8).

Tokālik, Gideon eaar kajejjōt ilo an ņa ruōn pris ro an Noa ilo aer kar bōk 24 kōrā ro nejin riLeman ro. Eaar ron̄ kanaan eo an Abinadi kōn armej ro eaar kūrm̧ool kōnke rekar m̧akoko in ukweļo̧k. (Lale Mosaia 20:17–22.) Eaar jipan̄ kanemkwoj armej in Limhi ro, ro im rekar kam̧akoko an riLeman ro (lale Mosaia 22:3–9).

Kiiō erūttoļo̧k, Gideon eaar jelm̧ae utiej bōro im jerawiwi bar juōn allen ilo an kar jutak im̧aan Nehor, eo im eaar kwaļok n̄an armej ro jerbal ko an pris ro. Nehor eaar “jum̧ae kabun̄ eo” im kajjieon̄ n̄an an tōl armej ro ilo jōbwābwe. (Lale Alma 1:3,7,12; lale bar 2 Nipai 26:29.)

Kōjerbale naan ko an Anij āinwōt an kein tariņae, Gideon eo eaar peran eaar kakkōl Nehor kin nana ko an. Ilo an illu, Nehor eaar kamej Gideon kōn jāje eo an. (Lale Alma 1:7–9.) Innām eaar jem̧ļo̧k raan ko an “juon em̧m̧aan ewānōk”, eo eaar, “kōm̧m̧an eļap em̧m̧an ilubwiljin armej rein” (Alma 1:13).

Raan kein āliktata im jej mour ie elōn̄ iien ko im jej āinwōt Gideon “eo eaar juōn kein jerbal ilo pein Anij” (Alma 1:8) ilo an “jerbal” (Mosiah 22:4) n̄an ro jet, jutak ilo jim̧we, im anjo̧ jen menin jelm̧ae ko im rej bōbrae jen ad anemkwoj in jar im jerbal n̄an Anij. Ilo ad ļoore waanjon̄ak eo an Gideon ilo tōmak, jemaron̄ in bar kōm̧m̧an eļap em̧m̧an.

Ippān doon ilo Jerbal in Jipan̄

Būreejtōnji eo Kein Kajuon eaar ba, “Āinwōt rikaļoor ro an [Rilo̧mo̧o̧r], jej kappukot n̄an iakwe Anij im ro riturid ilo aolepen laļin. “Kabun̄ eo an Jisōs Kraist im Armej ro Rekwojarjar ilo Raan Ko Āliktata rej barāinwōt m̧ōņōņō in kōjeraam̧m̧an im leļo̧k jipan̄ n̄an ro rej pād ilo aikuj. Jejjeraam̧m̧an bwe ewōr ad maron̄, kein jipan̄ ko, im bujen jemjera ko eļap lōke ioer n̄an kōm̧m̧ane jerbal kein rekwojarjar.”¹

Eļap aō kam̧m̧oolol kōn jerbal in jipan̄ ko reļļap im ro uwaan Kabun̄ in rej letok ilo tampeļ ko ad im ilo ward ko, branch ko, im stake ko. Ij barāinwōt kam̧m̧oolol kōn ro uwaan Kabun̄ in im rej jerbal ilo elōn̄ jukjukin pād ko, jikin jeļāļo̧kjen, im ra ko rej leļo̧k jipan̄ im rej bōk koņaer ilo būrojāāk in jipan̄ ko an ro jet kajjojo iiō, ilo aer wujlepļo̧k millien awa ko iturunļo̧k 200 laļ im aelōn̄ ko.²

Juōn wāween Kabun̄ in ej kōļapļo̧k iaļ in jipan̄ ko ilo jet laļ ko ej ilo Justserve.org. Kabun̄ in ej eddoki bōtaab ej n̄an jabdewōt eo ej itok limo in jipan̄ ro jet, JustServe.org “en̄in ej liin̄ eo kōn aikuj ko n̄an jipan̄ im aikuj ko aer” ro rej “ļōn̄aj jokkon mour ilo jukjukin pād eo.”³

Kabun̄ in ej barāinwōt kobaļo̧k im kōm̧m̧ani jerbal in leļo̧k jipan̄ ko reļļap an armej ro im doulul in jipan̄ ko jet ilo aolepān laļin. Kabun̄ in, kam̧m̧oolol n̄an membōr ro an, ekar “eo ej make an ļaptata an kar jipan̄ ilo lelo̧k bōtōktōk ilo jerbal in jipan̄ eo an Red Cross.“ N̄an kakkobaba, Kabun̄ in eaar maron̄ ko̧ļļāik jon̄an in $8.7 millien jāān in jipan̄ n̄an Red Cross.⁴

Kabun̄ in ej barāinwōt kobaļo̧k ippān doulul in jipan̄ ko n̄an boktok dān erreo im jerbal in karreo ko jet ilo peļaakin laļin. Ilo 2022 eo, Kabun̄ in eaar bōk koņaan ilo 156 jerbal rot kein.⁵ Kōmij bar jerbal ippān doulul ko jet n̄an lelo̧k menin jipan̄ ko n̄an ro nejin Anij im rej pād ilo aikuij .⁶

“Ilo ad ippān doon im jipan̄ ro im rej pād ilo aikuij,” Būreejtōn Henry B. Eyring, Rikakpilōklōk eo Kein Karuo ilo Būreejtōnji eo Kein Kajuon ekar ba, “Irooj ej kobaik būruwōd.”⁷

Kotak Ami Meram

Āinwōt rikaļoor ro an Rilo̧mo̧o̧r, jej barāinwōt kōjeraam̧m̧an ro riturid ilo ad kōjparok bujen ko ad n̄an tōl Mour āinwōt Kraist. Bok in Mormon ej katakin bwe “armej ro ilo Kabun̄ in” rejjab wōt kāālet jim̧we ak rej bar kōm̧m̧an bwe ainikier en emejaja n̄e rej kōņaan bwe Irooj en kōjparok im kōjeraam̧m̧an er (lale Alma 2:3–7; lale bar Mosaia 29:27). Anij ej kōņaan bwe jen jere tōmak eo ad im jen kotak meram eo ad. “Lo N̄a ij meram eo kom̧ naaj kotak lōn̄ļo̧k” (3 Nipai 18:24).

“Jejjab jerbal n̄an Anij ilo jejjōt ilo ad mijakļo̧k armej jen ad Anij,” Būreejtōn Dallin H. Oaks eaar ba, Rikakpilōklōk eo Kein Kajuon ilo Būreejtōnji eo Kein Kajuon. Eaar ba, “Jaar kūr n̄an ad kajutak jon̄ak ko an Anij, jaab n̄an ļoor laļin .”⁸

Mekarta ilo jikuuļ, jerbal, ak ilo ikkure, ilo iien kakkije, ilo iien bwebwenato, ak online, rikaļoor ro an Anij rejjab “jook n̄an bōk ioer etan Kraist” (Alma 46:21). Ilo naan im jerbal ko ad, jej kam̧ool bwe Anij ej mour im bwe jej ļoor eo Nejin.

“Tōmak eo ad ejjab n̄an keidi, ejjab aikuj in āindein. Tōmak ejjab n̄an wōt m̧ōņjar eo, ak im̧ōko m̧wōd, ejjab n̄an wōt [jikin jikuļ],” Paul Lambert eaar ekkatak, juon membōr jān Armej ro Rekwojarjar ilo Raan Ko Āliktata im etijem̧ļo̧k ilo katak kōn elōn̄ kain tōmak ko. “Ej n̄an men ko otemjej im kwoj kōm̧m̧ane.”⁹

Jejjab jeļā wāween an jelet naan in kam̧ool ko ad, waanjon̄o̧k eo em̧m̧an, im jerbal ko rem̧m̧an n̄an ro jet. Ak ilo ad jutak kōn jim̧we im kotak meram eo an Rilo̧mo̧o̧r, armej renaaj loe kōj im lan̄ enaaj lan̄lōn̄ ilo kōj.

Jutak kōn Anemkwoj in Kabun̄

Rainin priestcraft, ilo an ļapļo̧k māletlet n̄an jum̧ae tōmak ko an armej, ejjab oktak jen tōre ko ilo Bok in Mormon. Ainikien ro rej jum̧ae eddo eo an kabun̄ ilo lo̧bwilej im ilo an emejaja ilo jikin kakien ko. Rein rejjab tōmak kab kien ko, ekobba elōn̄ jikuuļ ko im kaļōj ko, rej kipel im ukote m̧wil im wāween ko n̄a im rettoon, jab tōmak ilo Anij, im bwe kōm̧m̧an ko ad ej ad pepe.

Jorreen ko ņae anemkwoj in kabun̄ renaaj anjo ilo ad jab jutak kōn maron̄ ko ad n̄an kabun̄. “Āinwōt juon kabun̄,” iaar katak juon men,“jej koba ippān kabun̄ ko jet n̄an bōbrae armej ro jen aolep tōmak im kareel ko im jim̧we eo aer n̄an kōnono kōn kajoor in tōmak eo ippāer.”¹⁰

Juon tariņae eaar bōk jikin ilo lan̄ kōn anemkwoj in kāālet—ad anemkwoj n̄an kāālet. N̄an kōjparok anemkwoj in kāālet eo ad eaorōk bwe jen niknik im kōjparok anemkwoj eo ad n̄an kabun̄.

Tōmak eo an kabun̄ ej kōkajoorļo̧k im kōjparok baam̧le ko, jukjukin pād ko, im laļ eo. Ej kōļapļo̧k ad pokake kien ko, kōjparok mour im men ko m̧weiid, n̄an kwaļo̧k iakwe, m̧ool im erreo—erreo ilo jim̧we, anemkwoj, im jukjukinpād. Jejjab aikuj joļo̧k ad bōd kōn tōmak eo ad.

Kijejeto ko ad kōn jerbal in mijenede, jerbal ko ad ilo tempeļ im jej kōm̧m̧ani ilo etan ro jet, ad katte kōj n̄an kajutak aelōn̄ in kiin̄ eo an Anij, im ad m̧ōņōņō rej pedped ioon ad jutak kōn tōmak in kabun̄ im anemkwoj. Jejjab maron̄ kōtļo̧k anemkwoj in ilo ad jab maron dāpij anemkwoj ko jet.

Rikanaan Josep Smith eaar kwaļo̧k, “Ej iakwe eo n̄an anemkwoj eo im ej kam̧ōņōņō jetōb eo aō—anemkwoj n̄an mour im kabun̄ n̄an aolep armej otemjeļo̧k.”¹¹ Anemkwoj in kabun̄ enaaj bar kam̧ōņōņō ad jetob ilo ad ļoori katak ko jen ritōl ro ilo Kabun̄ in:

“Lale im bōk meļeļe kōn apan̄ ko an armej ro im remenin aorōk, im kōnono kaki ilo peran im jim̧we.”¹²
“Kile bwe ilo an dikļo̧k anemkwoj in kabun̄ ko ad enaaj kanooj jelet ad wōnm̧anļo̧k n̄an eddōkļo̧k ilo kajoor n̄an jeļā kōn gospel in, bōk kōjeraam̧m̧an ko rekwojarjar, im n̄an kōm̧m̧an Ankilaan Anij n̄an tilmaake Kabun̄ in An.”¹³
“Jutak im kwaļo̧k am̧ kam̧ool ke Anij ej mour im bwe ewōr kein kam̧ool ko kake im kien ko An rej kwaļok.”¹⁴
“Jutak im jelm̧ae kien ko im rej boktok kakkure n̄an kōjerbale anemkwoj eo ad n̄an kwaļok ad tōmak.”¹⁵
“Ilo̧k n̄an aolep laļ im kōm̧m̧an em̧m̧an, n̄an kalōk tōmak ilo Anij Ekajoor Bōtata, im jipan̄ bōktok ro jet n̄an juon jikin elem̧ōņōņōļo̧k.”¹⁶
Lale kein katak ko religiousfreedom.ChurchofJesusChrist.org im ilo religiousfreedomlibrary.org/documents.

Jej kallōk aelōn̄ in kiin̄ eo an Anij ilo ad jerbal n̄an ro jet, kotak meram eo ad, im jutak kōn anemkwoj in kabun̄. Kōm̧m̧an bwe Irooj en kōjeraam̧m̧an kōj ilo kijejeto ko ad n̄an kōm̧m̧an ”eļap em̧m̧an” ilo baam̧le ko ad, jukjukin pād ko, im laļ ko.