Kitail Malipilipieng en Wia Me Mwahu

Sang Elder Ronald A. Rasband

Sang Pwihn en Wahnpoaron Ehk Riemeno

Kitail kawada wein Koht ni atail papah mehteikan, kasalehda atail marain, oh kesihnenkihda saledek en palien lamalam.

Kidion kin ese rongada padahk likamw akan. E rongehr mwowehu sang Nanmwariki Nohwa oh sapwellime samworo kan—samworo kan me kin “direki pohnmwahso nan kapehdirail” oh me kin “aliale sawas pwehki arail pohnkahke, oh ni arail kin pwongih dikedik en eni, oh ni arail kin kamwahl, sang ni daksis me nanmwarki Nohwa ketikihong sapwellime aramas akan”(Mosaia 11:5–6).

Me keieu suwedo, Nanmwariki Nohwa ahpw kaloke soukohp Apinadai lao e mehla oh ahpw pil nantiheng pwehn kemehla Alma oh sapwellime souleng kan me iangala ih (kilang Mosaia 17; 18:33–34). Pwehn kawuhdi soangen wiewia suwed wet, Kidion ahpw kaukihla me e pahn kawuhdi nanmwariki menet, me ihte me e pitkihla pwehn mahwin me mehn Lemenaid kan wia (see Mosaia 19:4–8).

Mwurin mwo, Kidion ahpw kapwopwohniki neihn Nohwa samworo kan ni arail wahsang neihn mehn Lemenaid kan serepein 24. E kasawiada me en Apinadai kokohp ong aramas akan pweidahr pwehki irail men koluhla. (Kilang Mosaia 20:17–22.) E sewese iang kapitala irail aramas en Limai kan, me mehn Lemenaid kan koledi oh saliedi (kilang Mosaia 22:3–9).

Met ni eh likeilapalahr, Kidion ahpw pwurehng tuhwong irail me pohnmwahso oh tiahksuwed kan ni eh kesihnenda mwohn Nehor, ohl me kapehsehieng aramas akan duwen doadoahk en samworo likamw akan. Nehor ahpw kin “pelpelian mwomwohdiso” oh nanantiheng en kaweid aramas akan sang nan ahl pwungo. (Kilang Alma 1:3, 7, 12; pil kilang 2 Nihpai 26:29.)

Ni ah kin doadoahngki mahsen en Koht en kin wia doarepe, Kidion ahpw komwadada oh iding Nehor pwehki ah wiewia suwed akan. Nehor ahpw lingeringerda oh peiengada oh kemehla Kidion ki nah kedlahso. (Kilang Alma 1:7–9.) Eri met me kaimwsekalahr rahn akan en “aramas pwung men” ohl emen me “wiadahr doadoahk mwahu me inenen laud rehn aramas akan” (Alma 1:13).

Ni imwin rahn akan me kitail wie mihmi loale met e kieng kitail ansou mwahu kan me itar ong kitail en duwehte Kidion me wia sapwellimen Koht mehn doadoahk (Alma 1:8) sang ni pwukoah doadoahk en papah (Mosaia 22:4) ong mehteikan, uhki me pwung ansou koaros, oh powehdi kasongosong kan me pahn kin song en kawehla atail pwuhng en pwongih oh papah Koht. Ni atail pahn idawehn en Kidion karasaras, kitail pahn pil kak wia doadoahk mwahu me pil laud.

Ehupene Nan Pwukoah Doadoahk en Papah

“Ni atail wia souleng kan en Sounkomouro, kitail kin rapahki kitail en poakoahng Koht oh mehn impetail kan wasa koaros nan sampah,” Presedensi Keieu me mahsanier met. “Mwomwodiso en Sises Krais en Souleng en Imwin-rahn akan kin men sawas kapaiada mehteikan oh sewese irail kan me anahne sawas. Kitail udahn ahniki kapai en kak ahniki koahiek, soangen mehn sawas akan, oh likilik me mie wasah kan nan sampah en kak apwalih pwukoah sarawi wet.”¹

I inenen kapingki sawas kan me wiawi ni sohpeikasal oh papah me toweh kan en Mwomwohdiso kin wia nan tehnpas sarawi kan oh nan arail ward kan, branch kan, oh steik kan. I pil kapingki toweh kan en Mwomwohdiso me kin papah nan kousapw akan, wasahn kaskuhl kan, oh nan pwihn en sawas en tohnmetei kan oh ni arail kin pil patehng kid samwahn proatek en kodahn sawas akan nan ehu ehu pahr akan, tohnmeteikihla milien en awah kan nan kerenieng wehi oh kahndeke 200.²

Ehu wiepe me Mwomwohdiso kin kasalehda ong katehlapalahn papah nan wehi teikan iei sang nan JustServe.org. Iei Mwomwohdiso me kin apwalih ahpw e pil mweimwei ong emen emen me men kapaiada mehteikan, JustServe.org “kadokepene me kin sawas nan kousapw akan me anahne soun sawas akan” me kin “sawas kamwauihala momour en nan ehu kousapw.”³

Mwomwohdisoh oh toweh kan pil kin ehupene patehng pwihn en sawas teikan wasa koaros nan sampah. Mwomwohdiso, kaping mehlel ong toweh kan, me “sawaskihda inta ong Red Cross me keieu laud nan pahr 2022.” Pil patehng met, Mwomwohdisoh pil ahpwtehn sawaskihda $8.7 milien ong Red Cross.⁴

Mwomwohdiso pil iang patehng pwihn en pwihn akan ong kihda pihl mwakelekel oh proatek en roson mwakelekel ong wasah kan nan sampah. Nan pahr 2022, Mwomwohdiso patehng soangsoangen proatek 156.⁵ Kitail pil iang patehng doadoahk oh sawas ong ohpis teikan me kin sewesehda sapwellimen Koht serih kan me mihmi nan apwal.⁶

Preseden Henry B. Eyring, Sounsawas Keriau nan Presedensi Keieu koasia me, “Ni atail kin ehupene pwehn sewese aramas akan me kin anahne sawas, Kauno pahn kin ketin kadokeikitailpene.”⁷

Kasalehda Maraihnpamwail

Ni atail wia sapwellimen Sounkomouro tohnpadahk kan, kitail pil kapaiada mehn impetail kan ni atail kin kolokol atail inou sarawih kan oh momourki tiahk en Krais. Pwuhk en Mormon padahngki me “aramas akan en mwomwohdisoh” en sohte piladahte momour pwung ahpw en pil kasalehda ngilarail kan ni pwung ma irail mwauki Kauno en apwalih irail oh kapai irailda (kilang Alma 2:3–7; pil kilang Mosaia 29:27). Kauno ketin kasik me kitail pahn ehukieng mehteikan atail pwoson oh lamalam oh kasalehda marainpatail. “Kilang ngehi me maraino me kumwail pahn kolada” (3 Nihpai 18:24).

“Kitail sohte pahn papah atail Sounkomouro mwahu ma kitail pahn masak aramas sang Koht,” Presiden Dallin-H. Oaks, Sounsawas Keieu en Presaidensi Keieu me mahsanih. E pil kapatahieng koasoia, “Kitail malipilipieng en kawada sapwellimen Kauno koasondih kan, ieremen idawehn koasondihn sampah.”⁸

Ma pil wasahn skuhl, doadoahk, de wasahn kamwadong, ansou en mwemweiht/pekeisin, tuhpenehn kapehse, de pil online, sapwellimen Kauno tohnpadahk kan kin sohte “namenengki alehda mwaren Krais” (Alma 46:21). Sang ni atail lokaia oh atail doadoahk, kitail kadehdehki me Koht ketin ieias oh me kitail kin idawehn Sapwellime Ieroso.

“Atail pwoson sohte pwalpweseng me wewehki me kitail pahn pwoson me a mwo soh, oh udahn e sohte pahn mih ni soangen mwohmw wet. Pwoson kaidehnte ong mwomwohdiso, kaidehnte ong nan wasahn kouson, kaidehnte ong [wasahn kasukuhl],” Paul Lambert, emen Souleng en Imwin-rahn akan me wia semen en palien lamalam me koasoia met. “E ong soahng koaros me kumwail wia.”⁹

Kitail sohte ese wen atail kadehde, karasaras mwahu, oh wihwia mwahu me kin saihr mehteikan. Ahpw ni atail kin kesihnenkihda me pwung oh kolada sapwellimen Sounkomouro maraihn, aramas pahn kak kilang kitail oh nanleng pahn pereperenkin kitail.

Uhki Saledek en Kaudek

Rahnwet samworo likamw akan, tohtohlahn kemwekid kan me sohte pidada palien lamalam me kalewehdier aramas akan me ahniki pwoson, met e sohte weksang dahme kin wiawi nan Pwuhk en Mormon nan ansouo. Ngilen aramas akan me kin uhwong pwukoahn lamalam akan me kin wiawi nan elen weipokon oh nan wasahn kapahrek kan wie lalaudla. Kemwekid kan me palien lamalam sohte kin pidada loale oh palien kopwermend, iangahki skuhl kan oh unipersidi kan, kin wia kemwekid en iding oh padpadahngkiseli mour soutik, kin sohte kamehlele me mie Koht, oh kin kamehlele me soahng koaros tehpsang palien tiahk.

Mahwin ong saledek en palien lamalam pahn pweida ma kitail sohte pahn kesihnenkihda atail pwuhng kan en me mehlelo. “Ni ah wia mwomwodiso ehu,” me I apwtehn padahngki, “kitail kin ehuong palien lamalam teikan doarehla aramas akan en palien lamalam koaros oh padahkiong irail oh arail pwung en kosoia arail sapwung kan koaros.”¹⁰

Mahwin ehu nanleng me wiawiher ong saledek en pilipil ong me momour—iei atail saledek en pilada. Pwe kitail en kak kolokol atail saledek en pilipil kitail anahne kehlailki en doandoare atail saledek ong atail palien lamalam.

Kehlepen pwoson en palien lamalam kin kakehlaka oh doarehla peneinei kan, kousapw kan, oh wehi laud kan. E kin kieng kehlepen kosonned, kakehlaka wahu en mie ong ni momour oh sohsoh kan, oh padahngki duwen sawas en tohnmetei, mehlel, oh dahme pwung oh sapwung—wiewia mwahu kan me anahne en wihwiawi kokohlahte nan lopidih kan me kin momourki me pwung oh mehlel, saledek, oh maraihn. Kitail anahne en dehr kin pekmahngki atail pwoson de dahme kitail kamehlele.

En neitail misinerih kan koahiek en doadoahk, atail doadoahk en nan tehnpas sarawi kan, atail koahiek en ineng en kawada wehin Koht, oh peihn atail peren anahne kitail en kesihnenda ong palien pwoson lamalam oh saledek. Kitail sohte pahn luhsang saledeko oh pil luhsang saledek teikan.

Soukohp Joseph Smith padahngki me “Iei e wia limpoak en saledekla me kaperenih pali ngeniet—meleilei oh mwahupene en palien lamalam akan ong aramas koarosie.”¹¹ Saledek en palien lamalam pil pahn kaperenih atail palingehn ni atail pahn idawehn kaweid sang kaun akan en Mwomwohdiso:

“Kin iang tetehk duwen ire kesempwal akan en weipokon, oh iang kasalehda amwail ire ni amwail pahn ahniki eimah oh maraihniki.”¹²
“Kasawih me dahme kin pwaradah kan ong saledek en palien lamalam pahn udahn saihr atail ahnsou kan en kekeirda ni kehlail oh eripit kihla duwen rongamwahuo, kapaida sang tiahk sarawih kan, oh koapwoaroapwoarki me Kauno me pahn ketin kaweid Sapwellime Mwomwohdiso.”¹³
“Kesihnenda oh indahla ni ngidingid me mie Koht oh me mie kamehlelepen me Sapwellime kosonned akan wiawihda.”¹⁴
“Song kosonnend akan me kin kaluwetehla atail saledek en wie lamalam.”¹⁵
“Kowei nan sampah oh wia mwahu, kalaudehla pwoson Koht Lapalap, oh iang sawas kapwurehdo mehteikan ong ni wasa kapereno.”¹⁶
Mehn onop kan kak dierek wasaht religiousfreedom.ChurchofJesusChrist.org oh pil wasaht religiousfreedomlibrary.org/documents.

Kitail kawada weihn Koht ni atail papah mehteikan, kasalehda atail marain, oh kesihnenkihda saledek en palien lamalam. Kauno en ketin kapaiada emen emen kitail ni atail kin inengieng en wia “mwahu laud” nan atail peneinei kan, kousapw kan, oh wehi laud kan.

© 2024 sang Intellectual Reserve, Inc. Kolokol pwuhng koaros. Intingda nan Wehi en Amerika. Kamanaman ohng ni lokaiahn Wai: 6/19. Kamanaman ohng kawehwe: 6/19. Kawewehpen Padahk en Sounpwung kan Liahona, Suhn 2024. Pohnpeian. 19347 885