“An Ewe Samon Watten Angang me Ach Watten Tufich ,”Liahona, July 2024.
Porousen Liahona Iteiten Maram, July 2024
An Ewe Samon Watten Angang me Ach Watten Tufich
Nupwen sia tong, aporousa, me kokorato, sia fiti ewe Samon ne angang ne anisi emon me emon aramas mi auchea ne feitto ren I.
Meinisin soufos non ei omuchunon, wachemuken kinikinin fansoun ra aiti chon Ewe Mwichefenin Jises Kraist ren Aramas mi Pin non Fansoun Soponon ar repwe aporousa ewe kapas allimen Jises Kraist mi niwinsefanito. Non unusenn manauei, ekkoch minen apiru a tonong non mokurei:
Preseten David O. McKay (1873–1970), ewe soufos atun ai onuon, a affata, “Meinisin memper i emon misineri.”
Preseten Spencer W. Kimball (1895–1985) a osukuna, “Ewe ranin uwei ewe kapas allim ngeni meinisin chommong neni me aramas ikei me iei,” me “sipwe chok atamano ach fetan” ne oporousa fetanei ewe kapas allim ngeni ekkoch.
Preseten Gordon B. Hinckley (1910–2008) a apasa: “Murino ach angang, wesewesen eingeing wisach non aninisin kutta ekkana sipwe afanafaner. Ewe Samon a fen watiw woch ew ourour ach sipwe afanafana ewe kapas allim ngeni meinisin aramas. Ei epwe awora [ach] wesewesen achocho.”
Me Preseten Russell M. Nelson a fen afanafana: “Angangen misineri ew auchean kinikinin ewe watten ioni fengeni Israel. Ena ionfengeni ina ewe angang mi kon auchea a fis won fonufan ikenai. Ese pwan wor och mettoch mi nonno ngeni watten. Ese pwan wor och mettoch mi nonno ngeni auchean. Noun ewe Samon misineri—Noun chon kuno—ra fiti ewe tes mi nap, ewe mwokutukut mi nap, ewe angang mi nap won fonufan ikenai.”
A etto ai uwa sinei ei ren pusin won inisi ussun emon onuon misineri non ewe British Misin. A fen napeno ai uwa fat ren ikenai. Ussun emon Soufosun ewe Samon Jises Kraist, Ua pwarata pwe ekkewe tufich ra nom ekis meinisin ar repwe anisi ekkoch ar repwe feitto ren Kraist ren ach pwarano ach tong, aporousa ach nuku, me kokorireto ar repwe fiti kich ne mefi ewe pwapwan ewe kapas allimen Jises Kraist.
Ewe Angang a Mokutuno Mwan
A wor ai tufich ai upwe nom won ew angang non ewe Missionary Departent ren ewe Mwichefen nupwen ewe aewin kinikinin ewe Preach My Gospel a pwano porousan non 2004, me pwan nupwen ewe oruen kinikin a tou non 2023. Ua nuku pwe Afanafana Ai Kapas Allim a fen efeiochu angangen misineri non ew wewewochun napanapan.
Ewe minafon Afanafana Ai Kapas Allim a aunusa meinisin sia kaeo seni 2004, emwen seni meinisin memperun ewe Aewin Presetensi me Kinikin ekkewe Engon me Ruemon Aposol, me akasiwinin ach nounou fengen ewe kapas allim non muun ikenai. Ekkoch me nein ekkei ekesiwin a fen pwano non murinon fefeitan.
Sia fen kuna pwe aporousa ewe kapas allim non mecheres, me nonomun me pusin napanapan seni ekkewe nongonongun “tong, aporousa, kokorireto” a wesewesen efeiochu ewe muu. Jises Kraist a aparousa ewe kapas allim non ei napanap nupwen I a nom won fonufan. I a fangeno manauan fan itach me An tong me korikicheto meinisin ach sipwe feitto ren I (engeni Matthew 11:28). Ach sipwe tong, aea fengen, me korato aramas a ew auchean feioch me wis ren meinisin chon ewe Mwichefen.
Poputa fiti Tong
Non ewe Atake Gethsemane me won ewe irapenges, Jises Kraist a wata won Inisin ekkewe tipisin fonufan me riaffouni meinisin netipeta me “metek me sokopaten sosot meinisin” (Alma 7:11) Ei a “fisingeni [I], … ewe a napanap seni meinisin, an epwe chech pokiten metek me cha a pupu seni inisin meinisin,” (Doctrine and Covenants 19:18). Seni An Achasefan me Manausefan, Jises Kraist a fen fori an angangen amanaua me manau fefeita an epwe tufich ngeni meinisin.
Kun ngeni ewe Chon Amanau me ekieki meinisin I a fen fori fan itach a fori non kich ew netip mi ur ren tong fan iten I. Iwe mwirin a okunu netipach ngeni ekkoch me annuku ngenikich pwe sipwe tonger (nengeni John 13:34–35) me sipwe aporousa An kapas allim ngenir (nengeni Matthew 28:19; Mark 16:15). Ika ekkana ra nom unukuch ra tongeni mefi pwe sia fokkun tonger me etenekir, repwe fokkun suki netiper ngeni ach porous, ussun chok an King Lamoni a suku netipan an epwe etiwa ewe kapas allim pokiten an Ammon tong me angang (nengeni Alma 17–19).
Ika sia aporousa ewe kapas allim, sipwe poputani ren tong. Nupwen sia eteneki ekkoch non tong—chemeni pwe ir pwich me fefinach me nouch Samach won Nang semirit mi achengicheng—ekkewe tufich repwe suk fan itach ach sipwe aporousa met sia sinei pwe mi ennet.
Meseik ne Pachenong me Aporousa
Ese wor emon a fangetani inisin an epwe aporousa ewe kapas allim nap seni Preseten M. Russell Ballard (1928–2023). Non ewe omuchunon afanafan non mwichenap, a pwarata, “Ew me nein ekkewe mettoch a kon amwarar me ning minne ese wor emon me won ei fonufan a tongeni sinei [pwe] Samach won Nang me ewe Samon Jises Kraist re fen pwarano Inisir non ei fansoun soponon me Joseph [Smith] a fen sikita an epwe eniwinisefanieto ewe unusochun ewe kapas allimen Jises Kraist ese much.”
Non unusen manauan, me napengeni unusen ewe fonufan, Preseten Ballard a meseik ne pachenong inisin non afanafanen ei porous mi amwarar ngeni meinisin. A pesei kich ach sipwe ach sipwe fori ussun chok i. I a afanafana pwe sia aporousa ewe kapas allim “ren ach murino ngeni chon oruch me ren ach etenekir me pwar ngenir tong.” Non ach fori ei, sia “achowano ewe kapas allim non pusin manauach, me … achowano ngeni [ekkoch] ekkewe feioch ewe kapas allim a fen awora.” Sia pwan “awora kapasen pwarata ren met [sia] sinei me nuku me met [sia] mefi.” Preseten Ballard a afanafana, “Ew kapasen pwarata mi nimenimoch … a tongeni an epwe kekino ren manamanen ewe Ngun mi fen ngeni non netipen ekkoch ekkewe ra suki ar repwe angei.”
Aporousa ewe kapas allimen Jises Kraist mi niwinsefanito ina ewe wachemuken mochenin netipen Preseten Ballard. Sia tongeni meseik ne pachenong—ussun i—non an aporousa ewe kapas allim non ir me ruu kapas me angang. Sise mo nge sinei ika ion neich epwe kukuta ewe saramen ewe kapas allim nge ese sinei ian epwe kuna me ian (nengeni Doctrine and Covenants 123:12).
Atou Taropwen Tingor fiti Memefin Netip
Non ach anisi ekkoch ne feitto ren Kraist, sia tingorer ar repwe sinei ewe pwapwa minne ewe Chon Amanau me An kapas allim a wato. Sia tongeni fori ei ren tingorer ar repwe feitto ngeni ew mokutukut epwe fis, ne anneani ewe Puken Mormon ika ne churi ekkewe misineri. Sia pwan tongeni atoura echo taropwen tingor fiti memefin netip ren ar repwe fitikich ne fiti mwichen sakramen
{Sia fiti mwichen sakramen ew me ew wik ach sipwe “fel ngeni Kot me angei ewe sakramen ach sipwe chechemeni Jises Kraist me An ewe Achasefan.” Iei ew fansoun tufich ren aramas ar repwe mefi ewe ngun, arap ngeni ewe Chon Amanau, me apochokuna ar nuku non I.
Nupwen sia kukuta ekkewe anen ach sipwe tong, aporousa, me korireto, ach kokkot me achocho epwe apachanong anisi aramas ar repwe fiti mwichen sakramen. Ika repwe etiwa ach kokon tingor me fiti mwichen sakramen, ra pwan tongeni soposopono won ewe an ngeni papatais me winiti chon ei Mwichefen. Ua nuku fiti unusen netipei pwe watten feioch epwe feitto nupwen sipwe kokorato ekkoch ar repwe fiti mwichen sakramen me anisir ar repwe esinna ekkewe feioch ra tongeni angei seni ar fori.
Ewe Samon Epwe Emweni Kich
Sise tongeni sinei met feioch me sosot epwe wor ngenikich nupwen sia tong, aporousa, me kokorireto. Noun Mosaia kewe at ra “feinno seni teninim ngeni tenini, me seni ew imwen fel ngeni pwan ew, … nein kewe chon Leiman, ar repwe afanafana me ar repwe osukuna ewe kapasen Kot neir; me ra poputa ne wor ar watten fetanoch.” Seni ar achocho, “ngorou ra feitto ngeni ewe miritin ussun ewe Samon,” me chommong “ra siwinino ngeni ewe samon … [me] rese tongeni rikino” (Alma 23:4–6).
Nupwen ei esap iteitan sipwe sinei, ewe Samon a fen pwonei pwe I epwe fitikich ne angang pokiten meinisin mi auchea ngeni I. Nupwen sia watiw ach nuku non ewe Samon me pachenong non an angang, I epwe emweni kich non ifa ussun sipwe aporousa An kapas allim ngeni ekkoch ren ach sipwe tonger, aporousa ussun manauach me ach kapasen pwarata ngenir, me korireto ar repwe fiti kich non ach tapweno mwirin I.
“Epwe fokkun napanap [ach] pwapwa” (Doctrine and Covenants 18:15) nupwen sia angei ekkewe tufich mi pwenikich ar repwe anisi ewe Samon Jises Kraist non An angang watte ne uweato aramas ngeni I.
© 2024 seni Intellectual Reserve, Inc. Meinisin pung mi kawor. A för non USA. Kapungunon non fosun Merika: 6/19. Kapungunon chiakun: 6/19. Chiakun Porous ren Liahona Iteiten Maram, July 2024. Chuukese. 19293 901