“Ewuradze N’Edwuma Kɛse na Hɛn Kwan Kɛse a Yenya,’’ Liahona, Ayɛwoho 2024.
Bosoom Bosoom Liahona Amandzɛɛbɔ, Ayɛwoho 2024
Ewuradze N’Edwuma Kɛse na Hɛn Kwan Kɛse a Yenya
Sɛ yɛdɔ, yɛkyɛ, na yɛto nsa frɛ a, nna yɛnye Ewuradze reyɛ edwuma dze aboa ɔkra kor biara a ɔsom bo ma ɔaba No hɔ.
Mberano kɛse yi a odzi ewiei no nkɔnhyɛnyi biara akyerɛkyerɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba no dɛ wɔnkyɛ Jesus Christ n’asɛmpa a wɔdze asanananmu no. M’abrabɔ mu no, fasusu beberee na wɔaba m’adwen mu:
President David O. McKay (1873–1970), me mbabun mu nkɔnhyɛnyi, paa mu kãa dɛ, “Asɔrba biara yɛ asɛmpasomafo.’’
President Spencer W. Kimball (1895–1985) kyerɛkyerɛɛ dɛ, “Da no a wɔdze asɛmpa no bɔkɔ mbea mbea na nkorɔfo beberee hɔ no, ɔyɛ sesei,’’ na otwar dɛ “yɛtsen ananmɔntu mu’’ wɔ yɛnye binom rekyɛ asɛmpa no mu.
President Gordon B. Hinckley (1910–2008) kãa dɛ: “Hɛn edwuma yɛ kɛse, hɛn asodzi yɛ kɛse papaapa dɛ yɛroboa ahwehwɛ hɔn a yɛbɛkyerɛkyerɛ hɔn adze. Ewuradze dze asɛdze ato hɛn do dɛ yɛkyerɛkyerɛ abɔdze biara asɛmpa no. Iyi bɛgye [hɛn] mbɔdzembɔ a oye papaapa.’’
Na President Russell M. Nelson akyerɛkyerɛ dɛ: “Asɛmpasomafo edwuma no yɛ afã tsitsir wɔ Israel mboano kɛse no mu. Dɛm mboano no nye edwuma a ohia dodow a ɔrokɔ do wɔ asaase do ndɛ. Biribiara nnye no nnsɛ wɔ ne kɛseyɛ mu. Biribiara nnye no nnsɛ wɔ ne hia a ohia mu. Ewuradze n’asɛmpasomafo—N’esuafo—dze hɔnho ahyɛ tafɛrbanyinmbɔmu kɛsenara, botae kɛsenara, na edwuma kɛsenara mu a ɔwɔ asaase do ndɛ mu.”
Mubohunii iyi maa moho ber a nna meyɛ asɛmpasomafo aberantsɛba wɔ British Asɛmpakã Mbew do. Ndɛ mpo minyim no pefee ara yie. Dɛ Ewuradze Jesus Christ no Ɔsomafo no, midzi dase dɛ akwanhorow wɔ beebiara dɛ yɛboa binom ma wɔba Christ hɔ ber a yɛkyerɛ hɛn dɔ, hɛn gyedzi, na yɛto nsa frɛ hɔn dɛ wɔmbra mbenya Jesus Christ n’asɛmpa no ho dɛwdzi no.
Edwuma No Kɔ Kan
Ɔyɛɛ me adom dɛ mikedzi dwuma wɔ Asɔr no n’Asɛmpasomafo Asoɛe mber a wɔdze Preach My Gospel a odzi kan no puee guado wɔ afe 2004 mu, na bio ber a wɔdze dza otsĩa ebien no so puee wɔ afe 2023 mu no. Megye dzi dɛ Preach My Gospel ehyira asɛmpasomafo edwuma wɔ kwan a no mu dɔ yie mu.
Biribiara a yeesũa ofitsi afe 2004 wɔ Preach My Gospel fofor no mu, nkenyan akwankyerɛ fi President a Odzi Kan na n’Apamfo no biara hɔ, na Asomafo Duebien hɔn Quorum no hɔ, na nsesa a wɔayɛ wɔ asɛmpa ne nkyɛe mu wɔ abaefo mber mu. Nsesa yinom bi no nsusuando ayɛ nkonyimdzi tsitsir.
Yeehu dɛ yerudua “ɔdɔ, kyɛ, na to nsa frɛ’’ fapem do rekyɛ asɛmpa no wɔ akwan a ɔnnyɛ dzen, ɔyɛ ntɔyɛe, na ɔkã hɛnho no hyira ahenman no kɛsenara. Jesus Christ kyɛɛ asɛmpa no wɔ kwan yi mu mber a nna Ɔtse asaase do. Ɔkyɛɛ N’abrabɔ na No dɔ na Ɔtoo nsa frɛɛ obiara dɛ ɔmbra No hɔ (hwɛ Matthew 11:28). Ebɔdɔ, ebɛkyɛ, na ato nsa afrɛ dɛ mbrɛ Ɔyɛe no yɛ nhyira na asodzi soronko ma Asɔrba biara.
Fa Ɔdɔ Hyɛ Ase
Gethsemane Ture mu na wɔ mbeamudua no do no, Jesus Christ dze wiadze bɔn too Nankasa no ho do na Ohun awerɛhow amandzehu nyinara na “yaw na amandze na nsɔhwɛ ahorow biara’’ (Alma 7:11). Iyi “maa [Ɔno], … a [ɔ]sō sen obiara mpo, [n]oho popoe osian yaw ntsi, na bɔgya fii [no] honandua enyi nyina” (Nkyerɛkyerɛ na Ahyɛmudzi 19:18). Ɔnam No Werdambɔ na Wusoɛr do no, Jesus Christ ama nkwagye na nkwagye ntowdo bɛyɛ hɔ ama obiara.
Yɛredan akɔ Agyenkwa no do na yɛrodwendwen dza Ɔayɛ nyinara ama hɛn no ma yɛtse hɛn akoma a ɔdɔ ahyɛ mu mã nkã ma No. Ɔdan hɛn akoma kɔ binom do na ɔhyɛ hɛn mbra dɛ yɛndɔ hɔn (hwɛ John 13:34-35) na yɛnye hɔn nkyɛ N’asɛmpa no (hwɛ Matthew 28:19; Mark 616-15). Sɛ hɔn a woetwa hɛn ho ehyia no tse nkã dɛ nokwar ara yɛdɔ hɔn na hɔnho hia hɛn a, wɔbɛpɛ dɛ wobobue hɔn akoma mu agye hɛn nsɛm, dɛmara dɛ Ɔhen Lamoni buee n’akoma mu dze gyee asɛmpa no osian Ammon no dɔ na ɔsom ntsi (hwɛ Alma 17-19).
Sɛ yɛkyɛ asɛmpa no a , hom mma yɛmfa ɔdɔ nhyɛ ase. Sɛ yɛdze ɔdɔ kɔ binom hɔ—a yɛrekaa dɛ wɔyɛ hɛn nuambanyin na nkyerɛbaa na hɛn Ɔsor Egya ne mba adɔfo a—akwanhorow bobue ama hɛn ma yɛakyɛ dza yenyim dɛ ɔyɛ nokwar no.
Fa Enyimpi Hyɛ Mu na Kyɛ
Obiara enntu noho ennsi hɔ ankyɛ asɛmpa no annkyɛn President M. Russell Ballard (1928–2023). Ne wiadze mfendzanan ehyiadzi mu n’asɛm a odzi ewiei no, odzii dase dɛ, “Ndzɛmba a ɔyɛ enyimnyam na ɔyɛ nwanwa dodow mu kor a obiara a ɔwɔ wiadze yi mu no botum ehu {nye] dɛ Ɔsor Egya na Ewuradze Jesus Christ eyi Hɔnho akyerɛ wɔ nda a odzi ekyir yi mu na dɛ Woeyi Joseph [Smith] dɛ ɔdze Jesus Christ ne daapem asɛmpa no bɛsan ananmu aba.”
N’abrabɔ nyina mu, na wɔ wiadze no dodow nyina mu no, nna President Ballard dze enyimpi dɛ ɔnye obiara bɛkyɛ asɛm a ɔsom bo yi. Ɔhyɛɛ hɛn nkuran dɛ yɛnyɛ dɛmara. Ɔkyerɛkyerɛɛ dɛ yɛnkyɛ asɛmpa no “ber a yɛreyɛ fipamfo apapa na ber a yɛrekyerɛ ɔdɔ.’’ Yɛreyɛ dɛm no, “yɛhyerɛn asɛmpa no wɔ hɛnara hɛn ababɔ mu, na … yɛhyerɛn nhyira a asɛmpa no wɔ dze kyerɛ [binom].’’ Yɛsan so “gye dase fa dza [ye]nyim ho na [yɛ]gye dzi ho na dza [yɛtse] ho nkã.’’ President Ballard kyerɛkyerɛɛ dɛ, “Dase a ɔyɛ wansawansa … Sunsum Krɔnkrɔn no tum botum asoa akɔ binom a woebue hɔn akoma no dɛ wɔbɛgye no mu.”
Nna President Ballard n’akoma n’apɛdze kɛsenara nye ɔbɛkyɛ Jesus Christ n’asɛmpa a wɔdze asanananmu no. Yebotum dze enyimpi—dɛ mbrɛ nna ɔyɛe no—wɔ yɛdze nsɛm na nyɛe rekyɛ asɛmpa no mu Yennkotum ehu dabiarada nyia a ɔwɔ hɛn ntamu a ɔbɛba no dɛ ɔrohwehwɛ asɛmpa ne kan no naaso onnhu bea a obohu efi (hwɛ Nkyerɛkyerɛ na Ahyɛmudzi 123:12).
Tserɛw Ahomka Nsato Mu
Eroboa binom ma wɔaba Christ hɔ no, yɛto nsa frɛ hɔn dɛ wombenya dɛwdzi no a Agyenkwa na N’asɛmpa dze ba no. Yebotum ayɛ iyi ber a yɛto nsa afrɛ hɔn ma wɔaba dwumadzi bi, wɔakenkan Mormon Nwoma no, anaa woehyia asɛmpasomafo no. Yebotum so atserɛw ahomka nsato mu ama hɔn dɛ wɔnye hɛn nkɔ sacrament nhyiamu.
Yɛkɔ sacrament dapɛn biara dze “kɔ sɔr Nyankopɔn na yeedzi sacrament no dze akaa Jesus Christ na No Werdambɔ no.’’ Iyi yɛ mber papa ama nkorɔfo aatse Sunsum no nkã, wɔatwe abɛn Agyenkwa no yie, na wɔahyɛ hɔn gyedzi wɔ No mu no dzen.
Sɛ yɛhwehwɛ akwanhorow dze dɔ, dze kyɛ, na yɛto nsa frɛ a, ɔwɔ dɛ yɛroboa nkorɔfo ma wɔaba sacrament nhyiamu no kã hɛn nhyehyɛɛ na mbɔdzenbɔ no ho. Sɛ wɔbɛgye hɛn nsato no ato mu na wɔaba sacrament nhyiamu a, ɔnnkɛyɛ nwanwa dɛ wɔbɔkɔ do wɔ enuma na nsakyeree anamɔn kwan no do. Medze m’akoma nyinara gye dzi dɛ nkonyimdzi bɛba ber a yɛto nsa frɛ binom ma wɔba sacrament nhyiamu na yɛboa hɔn ma wohu nhyira a obotum efi dza wɔayɛ no mu aba ho.
Ewuradze Bɛma Hɛn Kwankyerɛ
Yennkotum ehu nkonyimdzi na nsɔhwɛ horow a yebenya no dabiarada ber a yɛdɔ, yɛkyɛ, na yɛto nsa frɛ. Na Mosiah ne mbambanyin no “fii kurow kor mu kɔr kor so mu, fii asɔrfi kor mu kɔr kor so mu, … kɔr Lamanfo no mu wɔ asaase no do hɔ nyina, dɛ wɔnkã Nyame n’asɛm no na wɔnkyerɛkyerɛ hɔn; na dɛm maa hɔn edwuma kɔr do yie.’’ Ɔnam hɔn mbɔdzembɔ do no, “wɔtwee mpempem baa Ewuradze ho nyimdzee ho,’’ na pii na “wɔsakyeree … [na] wɔannhwe ase bio da’’ (Alma 23:4–6).
Ber a iyi nnkɛyɛ hɛn sũahu aber nyina no, Ewuradze abɔ anohoba dɛ Ɔnye hɛn bɛyɛ edwuma osiandɛ ɔkra biara som bo ma No. Sɛ yɛdze hɛn werɛ hyɛ Ewuradze mu na yɛdze hɛnho hyɛ No ɔsom mu a, Ɔbɛkyerɛ hɛn kwan wɔ mbrɛ yebesi nye binom akyɛ N’asɛmpa no ber a yɛrodɔ hɔn, yɛnye hɔn rekyɛ hɛn abrabɔ na dasedzi, na yɛroto nsa afrɛ hɔn ma wɔabɛka hɛnho ma yɛabɛka No do.
“[Hɛn] dɛwdzi bɛyɛ kɛse’’ (Nkyerɛkyerɛ na Ahyɛmudzi 18:15) sɛ yɛfa akwanhorow a woetwa hɛnho nyinara ehyia .dɛ yɛbɔboa Ewuradze Jesus Christ wɔ N’edwuma kɛse mu dɛ yɛdze akra bɛbrɛ No a.
© 2024 by Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, Ayɛwoho 2024. ne nkyerɛaseeFante. 19293 502