Gran Travay Senyè a ak Gran Opòtinite Nou

Èldè Quentin L. Cook

Nan Kolèj Douz Apot yo

Lè nou renmen, pataje, ak envite, n ap travay avèk Senyè a pou n ede chak nanm presye retounen al jwenn Li.

de (2) fi k ap diskite pandan y ap mache nan yon riyèl

Chak pwofèt nan dènye e gran dispansyon sa a te anseye manm Legliz Jezikri pou Sen Dènye Jou yo pou yo pataje levanjil retabli Jezikri a. Pandan peryòd mwen viv la, gen plizyè eksperyans ki vin nan lespri m:

Prezidan David O. McKay (1873–1970), pwofèt jenès mwen an, te deklare, “Chak manm se yon misyonè.”

Prezidan Spencer W. Kimball (1895–1985) te anseye, “Jou pou pote levanjil la plis kote e bay plis moun nan rive e se kounyeya menm,” epi “nou dwe ranfòse efò nou” nan pataje levanjil la avèk lòt moun.

Prezidan Gordon B. Hinckley (1910–2008) te deklare: “Se yon travay ekstrawòdinè n ap fè, nou gen gwo responsablite pou n ede jwenn moun pou n anseye yo. Senyè a konfye nou misyon pou nou anseye levanjil la bay chak kreyati. Sa pral mande pou [nou] fè plis efò.”

Epi Prezidan Russell M. Nelson te anseye: “Travay misyonè a se yon pati esansyèl nan gran rasanbleman Izrayèl la. Rasanbleman sa a se travay ki pi enpòtan k ap fèt sou tè a jodi a. Pa gen okenn lòt bagay ki gran menm jan avèk li. Pa gen okenn lòt bagay ki pi enpòtan pase li. Misyonè Senyè a—disip Li yo—angaje nan pi gwo defi, pi gwo kòz, pi gwo travay sou tè a jodi a.”

Mwen te rive aprann sa pou tèt pa m lèm te yon jèn misyonè nan Misyon Britanik la. Jounen jodi a, mwen menm plis sèten toujou. Antanke yon Apòt Senyè Jezikri, mwen temwanye ke opòtinite yo egziste tout kote pou ede lòt moun vin jwenn Kris la pandan n ap montre lanmou, pataje kwayans nou, ak envite yo rejwenn nou pou yo kapab viv lajwa ki genyen nan levanjil Jezikri a.

Travay la Ap Avanse

Mwen te gen privilèj pou yo te ban m yon tach nan Depatman Misyonè Legliz la lè yo t ap entwodui premye edisyon Preche Levanjil Mwen an nan lane 2004, epi ankò lè yo te repibliye dezyèm edisyon an nan lane 2023 a. Mwen kwè ke Preche Levanjil Mwen an beni travay misyonè a nan yon fason ki pwofon.

Nouvo Preche Levanjil Mwen an gen ladan l tout sa nou te aprann depi ane 2004 la, direksyon enspire de chak manm Premye Prezidans lan ak Kolèj Douz Apòt yo, ansanm ak chanjman ki fèt pou pataje levanjil la nan yon mond dijital. Gen kèk nan chanjman sa yo ki pote gwo rezilta siyifikan.

Nou konstate ke lè nou pataje levanjil la nan fason ki senp, nòmal, ak natirèl atravè prensip “lanmou, pataj, envitasyon” yo, sa beni wayòm nan anpil. Jezikri te pataje levanjil la fason sa a lè Li t ap viv sou tè a. Li te pataje lavi Li ansanm ak lanmou Li epi Li te envite tout moun vin jwenn Li (gade Matye 11:28). Renmen, pataje, ak envite jan Li te fè a se yon benediksyon ak yon responsablite espesyal pou chak manm nan Legliz la.

Kòmanse avèk Lanmou

Nan Jaden Getsemani an ak sou kwa a, Jezikri te pran fado peche mond lan met sou do Li epi li te andire tout doulè ak “lapenn, afliksyon ak tout kalite tantasyon” (Alma 7:11). Sa te “lakoz [Limenm], … ki pi gran pase tout moun, tranble anba doulè, epi senyen nan chak twou swè nan kò Li” (Doktrin ak Alyans 19:18). Atravè Ekspyasyon ak Rezirèksyon L la, Jezikri te rann sali ansanm ak egzaltasyon posib pou tout moun.

Lè nou tounen vè Sovè a epi nou reflechi sou tout sa Li te fè pou nou, sa ranpli kè nou ak lanmou pou Li. Lè sa a, Li tounen kè nou vè lòt moun epi li ba nou lòd pou nou renmen yo (gade Jan 13:34–35) ak pou nou pataje levanjil Li a avèk yo (gade Matye 28:19; Mak 16:15). Si moun ki bò kote nou yo ka santi nou renmen yo tout bon vre epi nou sousye de yo, li pwobab pou yo louvri kè yo pou yo resevwa mesaj nou yo, menm jan ak Wa Lamoni ki te louvri kè li pou l te resevwa levanjil la gras ak lanmou ak sèvis Ammon (gade Alma 17–19).

Lè n ap pataje levanjil la, an nou kòmanse avèk lanmou. Pandan n ap eseye lonje lamen bay lòt moun yo nan lanmou—pandan n ap sonje ke yo se frè ak sè nou epi yo se pitit byeneme Papa nou ki nan Syèl la—nou pral jwenn plis opòtinite pou nou pataje sa nou konnen ki se verite a.

Se Nou Pou Angaje Nou Totalman epi Pataje

Pa gen moun ki te plis devwe pou l te pataje levanjil la pase Prezidan M. Russell Ballard (1928–2023). Nan dènye diskou konferans jeneral li a, li te temwanye ke, “Youn nan bagay ki pi gloriye ak pi mèveye ke nenpòt moun nan mond sa a kapab konnen [se] ke Papa nou ki Nan Syèl la ansanm ak Senyè Jezikri te revele Tèt Yo nan dènye jou sa e ke Joseph [Smith] te elve pou l te retabli levanjil etènèl Jezikri a nan plenitid li.”

Pandan tout lavi li, ak pifò kote nan mond lan, Prezidan Ballard te angaje li totalman nan pataje mesaj presye sa a avèk tout moun. Li te ankouraje nou fè menm bagay la tou. Li te anseye ke fason nou pataje levanjil la “se lè nou sèvi kòm bon pwochen ak lè nou sousye ak pataje lanmou.” Pandan n ap fè sa a, nou “reyone levanjil la nan pwòp vi pa nou, epi … nou reyone nan vi [lòt moun] benediksyon levanjil la gen pou ofri yo.” Nou “rann temwanyaj tou sou sa [nou] konnen ak kwè ak sou sa [nou] santi.” Prezidan Ballard te anseye, “Yon temwanyaj pur… kapab transpòte pa pouvwa Sentespri a antre nan kè moun ki dispoze pou yo resevwa li.”

Pataje levanjil retabli Jezikri a sete pi gwo dezi Prezidan Ballard te genyen nan kè li. Nou kapab totalman angaje nou—men jan li te fè sa a—nan pataje levanjil la alafwa atravè pawòl ak aksyon nou. Nou pa janm konnen kiyès pami nou ki ka petèt ap chèche jwenn limyè levanjil la men ki pa konnen ki kote pou l jwenn li (gade Doktrin ak Alyans 123:12).

Bay Envitasyon Sensè

Nan ede lòt moun vin jwenn Kris la, nou envite yo viv lajwa ke Sovè a ansanm ak Levanjil Li a pote a. Nou kapab fè sa nan envite yo vini nan yon aktivite, li Liv Mòmon an, oswa lè nou fè yo rankontre avèk misyonè yo. Nou kapab voye yon envitasyon sensè tou pou yo kapab patisipe nan reyinyon sentsèn avèk nou.

Nou patisipe nan reyinyon sentsèn chak semèn pou nou kapab “adore Bondye ak pran sentsèn nan pou nou sonje Jezikri ansanm ak Ekspyasyon L lan.” Sa se yon moman apwopriye pou moun santi Lespri a, rapwoche pi pre Sovè a, ak ranfòse lafwa yo nan Li.

Pandan n ap chèche fason pou nou renmen, pataje, ak envite a, planifikasyon nou ak jefò nou ta dwe enkli ede moun patisipe nan reyinyon sentsèn. Si yo aksepte envitasyon nou an epi yo vini nan reyinyon sentsèn nan, yo gen plis chans pou yo kontinye sou chimen ki mennen nan batèm ak konvèsyon an. Mwen kwè ak tout kè m ke nou pral gen bonjan siksè pandan n ap envite lòt moun pou yo vini nan reyinyon sentsèn epi ede yo rekonèt benediksyon yo kapab resevwa lè yo rive fè sa a.

Senyè a Ap Gide Nou

Nou pa janm konnen ki siksè ak difikilte nou pral jwenn pandan n ap renmen, pataje, ak envite a. Pitit gason Mozya yo “yo te mache nan yon vil al nan yon lòt, … nan pami Lamanit yo, pou preche e pou yo ansenye pawòl Bondye a nan pami yo; se konsa yo te kòmanse gen anpil siksè.” Gras ak jefò yo, “anpil milye Lamanit te vin konnen Senyè a,” epi anpil “te konvèti …, [epi] yo pa t janm kite legliz la” (Alma 23:4–6).

Pandan ke eksperyans sa a se p ap toujou menm pou nou, Senyè a pwomèt ke L ap travay ansanm avèk nou paske chak nanm presye pou Li. Pandan n ap mete konfyans nou nan Senyè a epi angaje nou nan sèvis Li, L ap gide nou nan fason pou nou pataje levanjil Li a avèk lòt moun nan renmen yo, pataje lavi nou ak temwanyaj nou avèk yo, epi envite yo rejwenn nou pou yo kapab suiv Li.

“Lajwa [nou] ap anpil” (Doktrin ak Alyans 18:15) lè nou pwofite tout opòtinite ki egziste bò kote nou pou nou ede Senyè a, Jezikri, nan gwo travay Li ki se mennen nanm al jwenn Li an.

© 2024 by Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, July 2024. Haitian. 19293 036