“Ang Dako nga Buluhaton sang Ginuo kag ang Aton Dako nga Oportunidad,” Liahona, Hulyo 2024.
Bulanan nga Mensahe sa Liahona, Hulyo 2024
Ang Dako nga Buluhaton sang Ginuo kag ang Aton Dako nga Oportunidad
Kon nagapalangga kita, nagapakigbahin, kag nagaimbitar, nagapangabudlay kita upod sa Ginuo para buligan ang tagsa ka pinalangga nga kalag nga magpalapit sa Iya.
Ang tagsa ka propeta sa sining katapusan kag halangdon nga dispensasyon nagtudlo sa mga miyembro sang Ang Simbahan ni Jesucristo sang mga Santos sa Ulihing mga Adlaw nga ipakigbahin ang ginpanumbalik nga ebanghelyo ni Jesucristo. Sa kalawigon sang akon kabuhi, pila ka halimbawa ang madumduman ko:
Si Pangulong David O. McKay (1873–1970), ang propeta sang lamharon pa ako, nagsiling, “Ang tagsa ka miyembro misyonero.”
Si Pangulong Spencer W. Kimball (1895–1985) nagtudlo, “Ang adlaw sang pagdala sang ebanghelyo sa mas madamo nga lugar kag katawhan amo na subong,” kag “kinahanglan naton dakuon ang aton tikang” sa pagpakigbahin sang ebanghelyo sa iban.
Si Pangulong Gordon B. Hinckley (1910–2008) nagsiling: “Kadako sang aton buluhaton, mabug-at ang aton responsibilidad sa pagbulig pangita sang mga tudloan. Ginhatag sang Ginuo sa aton ang mandato sa pagtudlo sang ebanghelyo sa tagsa ka tinuga. Kinahanglan diri ang tanan [naton] nga masarangan.”
Kag si Pangulong Russell M. Nelson nagtudlo: “Ang pang-misyonaryo nga buluhaton isa ka kinahanglanon nga bahin sang dako nga pagtipon sang Israel. Ang ina nga pagtipon ang pinakaimportante nga butang nga nagakatabo sa kalibutan sa karon nga panahon. Wala na sang [makapareho] sa kadakuon sini. Wala na sang [makapareho] sa importansya sini. Ang mga misyonero sang Ginuo—ang Iya mga disipulo—nagahikot sa pinakadako nga hangkat, sa pinakadako nga kawsa, sa pinakadako nga buluhaton sa duta sa karon.”
Nahibal-an ko ini sa akon kaugalingon sang lamharon pa ako nga misyonero sa British Mission. Mas sigurado pa gid ako subong. Bilang Apostoles sang Ginuong Jesucristo, nagapamatuod ako nga ang mga oportunidad ara sa bisan diin sa pagbulig sa iban nga magpalapit kay Cristo paagi sa pagpakita sang aton pagpalangga, pagpakigbahin sang aton mga ginapatihan, kag pag-imbitar sa ila nga mag-upod sa aton para maeksperiyensyahan ang kalipay sa ebanghelyo ni Jesucristo.
Ang Buluhaton Nagaabante
May pribelihiyo ako nga maasayn sa Missionary Department sang Simbahan sang ginpakilala ang una nga edisyon sang Iwali ang Akon Ebanghelyo sang 2004, kag liwat sang ginpagwa ang ikaduha nga edisyon sang 2023. Nagapati ako nga ang Iwali ang Akon Ebanghelyo nagbugay sa pang-misyonaryo nga buluhaton sa matahum nga paagi.
Ang bag-o nga Iwali ang Akon Ebanghelyo nagaunod sang tanan naton nga natun-an halin sang 2004, inspirado nga giya sang tagsa ka miyembro sang Unang Pangulohan kag Korum sang Dose ka Apostoles, kag mga pagbag-o sa pagpakigbahin sang ebanghelyo sa digital nga panahon. Ang iban sining mga pagbag-o nagresulta sa dako nga kadalag-an.
Nakita namon nga ang pagpakigbahin sang ebanghelyo sa simple, normal, kag natural nga pamaagi paagi sa mga prinsipyo sang “magpalangga, magpakigbahin, mag-imbitar” nagabugay sing dako sa ginharian. Ginpakigbahin ni Jesucristo ang ebanghelyo sa sini nga paagi sang nagapuyo pa Sia sa duta. Ginpakigbahin Niya ang Iya kabuhi kag ang Iya pagpalangga kag gin-imbitar ang tanan nga magpalapit sa Iya (tan-awa sa Mateo 11:28). Ang magpalangga, magpakigbahin, kag mag-imbitar pareho sa Iya isa ka espesyal nga bugay kag responsibilidad sang tagsa ka miyembro sang Simbahan.
Magsugod nga may Pagpalangga
Sa Hardin sang Getsemani kag sa krus, gindala ni Jesucristo sa Iya Kaugalingon ang mga sala sang kalibutan kag gin-antos ang tanan nga kasubo kag “kasakit kag mga pag-antos kag mga pagsulay sang tagsa ka sahi” (Alma 7:11). Ini “nagpakurog sa [Iya] … nga pinakagamhanan sa tanan, bangod sa kasakit, kag nagwa ang dugo halin sa tagsa ka buho-buho sang panit” (Doktrina kag mga Kasugtanan 19:18). Paagi sa Iya Pagbayad-Sala kag Pagkabanhaw, ginpatigayon ni Jesucristo ang kaluwasan kag pangkahitaasan para sa tanan.
Ang pagdangop sa Manluluwas kag pagbinagbinag sang tanan Niya nga ginhimo para sa aton nagahatag sa aton sang tagipusuon nga puno sang gugma para sa Iya. Dayon ginaliso Niya ang aton mga tagipusuon sa iban kag ginasugo kita nga palanggaon sila (tan-awa sa Juan 13:34–35) kag ipakigbahin ang Iya ebanghelyo sa ila (tan-awa sa Mateo 28:19; Marcos 16:15). Kon mabatyagan sang ara sa aton palibot nga tunay ang aton pagpalangga kag pag-ulikid sa ila, laban-laban nga buksan nila ang ila mga tagipusuon sa aton mensahe, pareho sang ginbuksan ni Haring Lamoni ang iya tagipusuon para batunon ang ebanghelyo tungod sa pagpalangga kag serbisyo ni Amon (tan-awa sa Alma 17–19).
Kon magpakigbahin kita sang ebanghelyo, sugdan naton sa pagpalangga. Kon makig-angot kita sa iban nga may pagpalangga—nga ginatandaan nga mga utod naton sila kag pinalangga nga mga anak sang aton Amay nga Langitnon—magabukas sa aton ang mga oportunidad nga ipakigbahin ang nahibal-an naton nga matuod.
Mangin Mapisan sa Pagpakigbahin
Wala na sang mas dedikado sa pagpakigbahin sang ebanghelyo sangsa kay Pangulong M. Russell Ballard (1928–2023). Sa katapusan niya nga mensahe sa pangkabilogan nga komperensya, nagpamatuod sia, “Isa sa pinakamahimayaon kag matahum nga mga butang nga pwede mahibal-an sang bisan sin-o sa sining kalibutan [amo] nga ginpakita sang aton Amay nga Langitnon kag sang Ginuong Jesucristo ang Ila mga Kaugalingon sa sining ulihing mga adlaw kag si Joseph [Smith] ginpataas para ipanumbalik ang kabug-osan sang wala katubtuban nga ebanghelyo ni Jesucristo.”
Sa bilog niya nga kabuhi, kag sa halos bilog nga kalibutan, si Pangulong Ballard mapisan nga nagpakigbahin sining malahalon nga mensahe sa tanan. Ginpaisog niya kita nga himuon man ini. Gintudlo niya nga ginapakigbahin naton ang ebanghelyo “paagi sa pagka-maayo nga kaingod kag sa pag-ulikid kag pagpakita sang pagpalangga.” Sa paghimo sini, “ginapasanag naton ang ebanghelyo sa aton kaugalingon nga kabuhi, kag … ginapasanag sa [iban] ang mga bugay nga ginatanyag sang ebanghelyo.” Aton man “ginapamatud-an ang [aton] nahibal-an kag ginapatihan kag kon ano ang [aton] nabatyagan.” Gintudlo ni Pangulong Ballard, “Ang puro nga testimonya … sarang dalhon paagi sa gahum sang Balaan nga Espiritu pasulod sa tagipusuon sang iban nga handa sa pagbaton sini.”
Ang pagpakigbahin sang ginpanumbalik nga ebanghelyo ni Jesucristo amo ang pinakadako nga handum sang tagipusuon ni Pangulong Ballard. Pwede kita mangin mapisan sa pagpakigbahin—pareho sa iya—sang ebanghelyo sa pulong kag sa buhat. Indi gid naton mahibal-an kon sin-o sa mga kaupod naton ang nagapangita sang kasanag sang ebanghelyo pero wala makahibalo kon diin ini pangitaon (tan-awa sa Doktrina kag mga Kasugtanan 123:12).
Magtanyag sang Sinsero nga mga Imbitasyon
Para buligan ang iban nga magpalapit kay Cristo, ginahagad naton sila nga maeksperiyensyahan ang kalipay nga dala sang Manluluwas kag sang Iya ebanghelyo. Pwede naton ini himuon paagi sa paghagad sa ila nga magkadto sa aktibidades, magbasa sang Libro ni Mormon, ukon makigkita sa mga misyonero. Pwede man kita maghatag sang sinsero nga imbitasyon nga magkadto sa sakramento nga miting upod sa aton.
Nagakadto kita sa sakramento nga miting kada semana para “magsimba sa Dios kag mag-ambit sang sakramento para dumdumon si Jesucristo kag ang Iya Pagbayad-Sala.” Maayo ini nga tiyempo para mabatyagan sang mga tawo ang Espiritu, mas maglapit sa Manluluwas, kag pabakuron ang ila pagtuo sa Iya.
Samtang nagapangita kita sang paagi para magpalangga, magpakigbahin, kag mag-imbitar, dapat upod sa aton pagplano kag mga pagpaninguha ang pagbulig sa mga tawo nga magkadto sa sakramento nga miting. Kon batunon nila ang aton imbitasyon kag magkadto sa sakramento nga miting, laban-laban nga magpadayon sila sa banas padulong sa bunyag kag pagkahaylo. Nagapati ako sing hugot nga magaabot ang dako nga kadalag-an kon hagaron naton ang iban nga magkadto sa sakramento nga miting kag buligan sila nga makilala ang mga bugay nga mabaton nila kon himuon nila ini.
Giyahan Kita sang Ginuo
Wala kita makahibalo kon ano nga kadalag-an kag kabudlayan ang aton atubangon samtang nagapalangga kita, nagapakigbahin, kag nagaimbitar. Ang mga anak ni Mosias “naglakat sa tagsa ka siyudad, kag sa tagsa ka balay sang pagsimba, … sa mga Lamanhon, agud magwali kag magtudlo sang pulong sang Dios sa ila; kag gani nagsugod sila nga mangin madinalag-on.” Paagi sa ila mga pagpaninguha, “linibo ang nadala sa ihibalo parte sa Ginuo,” kag madamo ang “nahaylo … [kag] wala gid nagtalikod” (Alma 23:4–6).
Bisan indi amo sini pirme ang aton maeksperiyensyahan, nagpromisa ang Ginuo nga magapangabudlay Sia upod sa aton tungod ang tagsa ka kalag malahalon sa Iya. Kon ibutang naton ang aton pagsalig sa Ginuo kag makigbahin sa Iya pagserbisyo, giyahan Niya kita kon paano ipakigbahin ang Iya ebanghelyo sa iban paagi sa pagpalangga sa ila, pagpakigbahin sang aton mga kabuhi kag testimonya sa ila, kag pag-imbitar sa ila nga mag-upod sa aton sa pagsunod sa Iya.
“Kadako [sang aton] kalipay” (Doktrina kag mga Kasugtanan 18:15) kon gamiton naton ang mga oportunidad sa palibot naton para buligan ang Ginuong Jesucristo sa Iya dako nga buluhaton sang pagdala sang mga kalag sa Iya.
© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, July 2024. Hiligaynon. 19293 861