“Ti Naindaklan nga Aramid ti Apo ken Naindaklan a Gundawaytayo,” Liahona, Hulio 2024.
Binulan a Mensahe ti Liahona , Hulio 2024
Ti Naindaklan nga Aramid ti Apo ken Naindaklan a Gundawaytayo
No agayat, agibinglay, ken agawistayo, agtartrabahotayo iti Apo a tumulong iti tunggal napateg a kararua nga umasideg Kenkuana.
Tunggal propeta iti daytoy maudi, naindaklan a dispensasion ket nangisuro kadagiti miembro ti Simbaan ni Jesucristo dagiti Santo iti Ud-udina nga Aldaw tapno ibinglayda ti naisubli nga ebanghelio ni Jesucristo. Iti unos ti biagko, pampanunotek ti sumagmamano a pagarigan:
Presidente David O. McKay (1873–1970), ti propeta idi agtutuboak, indeklarana, “Misionario ti tunggal miembro.”
Presidente Spencer W. Kimball (1895–1985) insurona, “Dumtengen ti aldaw ken itan ti panangidanon iti ebanghelio iti ad-adu pay a lugar ken tattao,” ken “masapul a paatiddogentayo ti addangtayo” iti panangibinglay iti ebanghelio iti dadduma.
Ni Presidente Gordon B. Hinckley (1910–2008) kinunana: “Dakkel ti trabahotayo, dakkel ti pagrebbengantayo iti panangtulong a mangsapul kadagiti masuruan. Imbilin ti Apo kadatayo nga isuro ti ebanghelio iti tunggal parsua. Agkasapulan daytoy iti kasayaatan a panagkagumaan[tayo].
Ken insuro ni Presidente Russell M. Nelson: “Ti aramid ti misionario ket napateg a paset ti dakkel a panaguummong ti Israel. Dayta a panaguummong ti kapatgan a trabaho a maar-aramid iti daga iti agdama. Awan ti sabali pay a maidilig iti kadakkelna. Awan ti sabali pay a maidilig iti kinapategna. Dagiti misionario ti Apo—dagiti disipulona—ket makiramraman iti kadakkelan a karit, ti kadakkelan a gapuanan, ti kadakkelan a trabaho ditoy daga ita.”
Naammuak daytoy a mismo kas maysa nga agtutubo a misionario iti British Mission. Ad-adda a siguradoak iti daytoy ita. Kas maysa nga Apostol ni Apo Jesucristo, paneknekak a dagiti gundaway ket iti amin a lugar tapno matulongan dagiti dadduma nga umasideg ken Cristo babaen ti panangipakita iti ayattayo, panangibinglay kadagiti patpatientayo, ken panangawis kadakuada a makikadua kadatayo a mangpadas iti rag-o ti ebanghelio ni Jesucristo.
Agtultuloy ti Aramid
Naparaburanak a naaddaan iti assignment iti Missionary Department ti Simbaan idi naipakaammo ti umuna nga edision ti Preach My Gospel idi 2004, ken manen idi mairuar ti maikadua nga edision idi 2023. Mamatiak a pinaraburan ti Preach My Gospel ti aramid ti misionario iti napalaus a wagas.
Iraman ti Preach My Gospel ti amin a nasursurotayo manipud idi 2004, naparegta a direksion manipud iti tunggal miembro ti Umuna a Panguluen ken Korum dagiti Sangapulo-ket-dua nga Apostol, ken dagiti panagbalbaliw a naaramid para iti panangibinglay iti ebanghelio iti panawen ti digital. Sumagmamano kadagitoy a panagbalbaliw ti nagbunga iti dakkel a balligi.
Natakuatanmi a ti panangibinglay iti ebanghelio kadagiti simple, normal, ken gagangay a wagas babaen kadagiti pagbatayan ti “ayaten, ibinglay, awisen” ket siwawadwad a mangparabur iti pagarian. Imbinglay ni Jesucristo ti ebanghelio iti kastoy a wagas idi nagindeg Isuna iti rabaw ti daga. Imbinglayna ti biagna ken ti ayatna ket inawisna ti amin nga umasideg Kenkuana (kitaen iti Mateo 11:28). Ti panagayat, panangibinglay, ken panangawis a kas iti inaramidna ket naisangsangayan a bendision ken pagrebbengan para iti tunggal miembro ti Simbaan.
Rugian iti Ayat
Iti Minuyongan ti Getsemani ken iti krus, innala ni Jesucristo Mismo dagiti basol ti lubong ket nagsagaba iti amin a ladingit ken “saem ken rigat ken amin a kita ti sulisog” (Alma 7:11). Daytoy ti “nangipaay [Kenkuana], … a kaindaklan ti amin, nga aggarigenggen gapu iti saem, ken agdara iti tunggal teterreman” (Doktrina ken Katulagan 19:18). Babaen ti Pannubbot ken Panagungarna, inaramid ni Jesucristo a posible ti pannakaisalakan ken pannakaitan-ok para iti amin.
Ti yaasideg iti Mangisalakan ken panangutob iti amin nga inaramidna para kadatayo ket mangparnuay kadatayo iti puso a napno iti ayat para Kenkuana. Kalpasanna iturongna ti pusotayo kadagiti dadduma ket bilinennatayo nga ayaten ida (kitaen iti Juan 13:34–35) ken ibinglay kadakuada ti ebangheliona (kitaen iti Mateo 28:19; Marcos 16:15). No marikna dagiti adda iti aglawlawtayo a pudno nga ay-ayaten ken ipategtayo ida, luktanda la ketdi ti pusoda kadagiti mensahetayo, kas iti pananglukat ni Ari Lamoni iti pusona nga umawat iti ebanghelio gapu iti ayat ken serbisio ni Ammon (kitaen iti Alma 17–19).
No ibinglaytayo ti ebanghelio, rugiantayo iti ayat. Bayat ti panangtulongtayo kadagiti dadduma iti ayat—a laglagipentayo nga isuda dagiti kakabsattayo a lallaki ken babbai ken dungdungnguen nga annak ti Nailangitan nga Amatayo—aglukatto dagiti gundaway para kadatayo tapno mangibinglay no ania iti ammotayo a pudno.
Agbalin a Nagagar a Makiraman ken Mangibinglay
Awan ti ad-adda pay a naanep a mangibinglay iti ebanghelio no di ni Presidente M. Russell Ballard (1928–2023). Iti maudi a panagsaritana iti sapasap a komperensia, pinaneknekanna, “Maysa kadagiti kadayagan ken kakasdaawan a banag a mabalin a maammuan ti siasino man iti daytoy a lubong [ket] ti Nailangitan nga Amatayo ken ni Apo Jesucristo impalgakda ti Bagbagida iti daytoy ud-udina nga aldaw ket napaadda ni Joseph [Smith] tapno mangisubli ti pakabuklan ti agnanayon nga ebanghelio ni Jesucristo ”
Iti unos ti biagna, ken iti intero a kaaduan a paset ti lubong, naggagar a nakiraman ni Presidente Ballard iti panangibinglay iti daytoy napateg a mensahe iti tunggal maysa. Inallukoynatayo a mangaramid met iti kasta. Insurona nga ibinglaytayo ti ebanghelio “babaen ti panagbalin a nasayaat a kaarruba ken babaen ti panangaywan ken panangipakita iti ayat.” Iti panangaramid iti kasta, “pagsilnagentayo ti ebanghelio iti bukodtayo a biag, ken … pagsilnagentayo kadagiti [dadduma] dagiti bendision nga idiaya ti ebanghelio.” Kasta met nga “ipaneknek[tayo] no ania ti ammo ken patien[tayo] ken no ania ti marikna[tayo].” Insuro ni Presidente Ballard, “Ti natarnaw a pammaneknek … ket mabalin a maidanon babaen ti bileg ti Espiritu Santo iti puspuso dagiti dadduma a silulukat nga umawat iti daytoy.”
Ti panangibinglay iti naisubli nga ebanghelio ni Jesucristo ti kadakkelan a tarigagay ti puso ni Presidente Ballard. Mabalin a sigagagartayo a makiraman—kas kenkuana—iti panangibinglay iti ebanghelio iti agpada a balikas ken aramid. Ditayo pulos ammo no siasino kadatayo ti mabalin nga agsapsapul iti lawag ti ebanghelio ngem ditayo ammo no sadino ti pakasarakan iti daytoy (kitaen iti Doktrina ken Katulagan 123:12).
Mangted kadagiti Naimpusuan nga Awis
Iti panangtulong kadagiti dadduma nga umay ken Cristo, awisentayo ida a mangpadas iti rag-o nga isangbay ti Mangisalakan ken ti ebangheliona. Maaramidtayo daytoy babaen ti panangawis kadakuada nga umay iti maysa nga aktibidad, mangbasa iti Libro ni Mormon, wenno makipagkita kadagiti misionario. Mabalintayo pay ti mangted iti naimpusuan nga awis para kadakuada tapno tumabuno iti miting ti sakramento a kaduadatayo.
Tumabunotayo iti miting ti sakramento iti tunggal lawas tapno “agdaydayaw iti Dios ken makiranudtayo iti sakramento a manglaglagip ken ni Jesucristo ken ti Pannubbotna.” Nasayaat daytoy a panawen para kadagiti tao a makarikna iti Espiritu, umasideg iti Mangisalakan, ken mangpapigsa iti pammatida Kenkuana.
Bayat ti panagsapultayo kadagiti wagas a mangayat, mangibinglay, ken mangawis, ti panagplano ken panagkagumaantayo ket nasken a mangiraman iti panangtulong kadagiti tao a tumabuno iti miting ti sakramento. No awatenda ti awistayo ken tumabuno iti miting ti sakramento, ad-adda nga agtultuloyda iti dana nga agturong iti panagbuniag ken kumbersion. Mamatiak iti amin a pusok a dumtengto ti dakkel a balligi bayat ti panangawistayo iti dadduma a tumabuno iti miting ti sakramento ken tulongantayo ida a mangbigbig kadagiti bendision a mabalinda nga awaten manipud iti panangaramidda iti dayta.
Iwanwannatayto ti Apo
Ditayo pulos ammo no ania dagiti balligi ken karit a maaddaantayto bayat ti panagayat, panangibinglay, ken panangawistayo. Dagiti annak a lallaki ni Mosiah “napanda iti tunggal siudad, ken iti tunggal balay a pagdaydayawan, … kadagiti Lamanite, a mangikasaba ken mangisuro iti balikas ti Dios kadakuada; ket kasta ti nanipudan ti dakkel a balligida.” Babaen kadagiti panagkagumaanda, “rinibu ti nayeg iti pannakaammo ti Apo,” ket adu ti “napasurot … [ken] saanda a pulos a natnag” (Alma 23:4–6).
Idinto a saan a kanayon a padastayo daytoy, inkari ti Apo nga agtrabahonto a kaduatayo gapu ta napateg Kenkuana ti tunggal kararua. No agtalektayo iti Apo ken makipasettayo iti serbisiona, tarabayennatayo no kasano nga ibinglay ti ebangheliona iti dadduma babaen ti panangayattayo kadakuada, panangibinglaytayo iti biag ken pammaneknektayo kadakuada, ken panangawis kadakuada a makikadua kadatayo a mangsurot Kenkuana.
“Nalausto ti rag-o[tayo]” (Doktrina ken Katulagan 18:15) a manggundaway kadagiti opurtunidad a tumulong ken ni Apo Jesucristo iti naindaklan nga aramidna a mangyeg kadagiti kararua Kenkuana.
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, Hulio 2024. Ilokano. 19293 864