“Orekma Yohk luhn Leum ac Pacl Wowo Lasr

Sel Elder Quentin L. Cook

Ke U luhn Mwet Sap Singucul Luo

Ke kuht luhngse, akacsruhi, ac suli, kuht wi Leum orekma in kahsruh kais sie mwet in tuhkuh nuh Yohrohl.

muhtwacn luo tuhkweni fahsr sramsram ke inkacnek

Kais sie mwet pahluh ke fihl sahflah, yohk se inge tuh luti mempucr ke Alu luhn Jisus Kraist luhn Mwet Luhlahlfongi ke Lwen-sahflah in akacsruhi ke wosasuc fohlohkihnyuckyak luhn Jisus Kraist. Ke moul luhk, nga nuhnkuh ke kuhtuh mwe srihkasrak.

Prestuhn David O. McKay (1873–1970), mwet pahluh ke pacl fuhsr luhk, el fahk, “Kais sie mempucr el misinacri se.”

Prestuhn Spencer W. Kimball (1895–1985) el luti, “Lwen se ma kuht in usaclihk wosasuc nuh fin acn pucspucs ac mwet puhs pa ingena,” ac “kuht in ahkloesye falkacsr” in akacsruhi ke wosasuc nuh sin mwet sahyac.

Prestuhn Gordon B. Hinckley (1910–2008) el fahk: “Yohk ma kunacsr, ac yohk kunohkohn lasr in kahsruh konwacack mwet in luti. Leum El use nuh sesr sap se in luti wosasuc nuh sin mwet nuhkwewa. Ma inge enenuh [kuhiyacsr] nohfohn.”

Ac Prestuhn Russell M. Nelson el luti: “Orekma luhn misineri pa sie ip yohk srihpac nuh ke fahsrweni yohk luhn Israel. Fahsrweni sacn pa orekma se ma yohk srihpac emeet ma sikyak in pacl inge fin facluh. Wacngihn ma yohk sahyac oacna ma se inge. Wacngihn ma yohk srihpac sahyac oacna ma se inge. Misineri luhn Leum—mwet tuhma lutlut Lal—elos ahkfahsrye orekma na upac se inge, orekma suc ma yohk srihpac emeet, orekma suc ma yohk emeet fin facluh mihsenge.”

Nga etwaclah ma inge nuh sihk sifacna ke nga misinacri fuhsr se ke Misin Britain. Nga etuh yohk liki na ingacn mihsenge. Oacna Mwet Sap luhn Leum Jisus Kraist, nga fahkwack lah oasr pacl wo ke acn nuhkwewa in kahsruh mwet sahyac in tuhkuh nuh yurun Kraist ke ahkkahlwemye luhngse lasr, akacsruhi ke luhlahlfongi lasr, ac solwaclos in wi kuht in puhlakihn engan ke wosasuc luhn Jisus Kraist.

Orekma uh Fahsr nuh Met

Nga eis kunohkohn wo nuh ke Missionary Department luhn Alu uh ke Preach My Gospel tuh oreklac emet ke 2004 ah, ac sifilpac na ke ma ahkluo tuh oreklac ke 2023 ah. Nga luhlahlfongi tuh Preach My Gospel tuh ahkinsewowoye yohk orekma luhn misineri.

Preach My Gospel sasuc se weacng ma nuhkwewa kuht etwaclah tukun 2004, kolyuck moklweyuck sin kais sie mempucr ke Prestuhnsi Se Met ac U luhn Mwet Sap Singucul Luo, ac eklac nuh ke akacsruhi ke wosasuc ke pacl digital se. Kuhtuh eklac se inge oraclah ma wo yohk.

Kuht tuh konwacack lah akacsruhi ke wosasuc ke ma fihsrwacsr, wo, ac ohiyac kwacna sikyak ke ip yohk luhn “luhngse, akacsruhi, suli” arlac ahkinsewowoye tohkohsrahi. Jisus Kraist El akacsruhi ke wosasuc ke ohiyac se inge ke El moul fin facluh. El akacsruhi moul Lal ac luhngse Lal ac suli mwet nuhkwewa in tuhkuh nuh Yohrohl (liye Matthew 11:28). In luhngse, akacsruhi, ac suli oacna El oruh pa mwe insewowo wo se ac kunohkohn se luhn mempucr nuhkwewa ke Alu uh.

Muhtwacwacack ke Luhngse

Ke Imac Gethsemane ac fin sahkseng soko, Jisus Kraist El eis nuh Facl ma koluk luhn facluh ac kweok ke ahsor ac “ngal ac kweok ac kain in mwe sruhf nuhkwewa” (Alma 7:11). Ma inge oruh tuh kweok lal Jisus arulacna yohk pwacnwacng El rarrar ke srihpen waek, ac srah kahklac liki Mahnol (liye Doctrine and Covenants 19:18 Nuh ke Iwaclah ac Auliyak, Jisus Kraist El oraclah tuh molwelah ac moul ma pahtpaht kuh in sikyak nuh sin mwet nuhkwewa.

Foracng nuh sin Mwet Lahngo ac motko ke ma nuhkwewa El oruh nuh sesr oraclah insiacsr luhngse nuh Sel. El na oraclah insiacsr nuh sin mwet sahyac ac sapkihn nuh sesr in luhngse elos (liye John 13:34–35) ac in akacsruhi wosasuc nuh selos (liye Matthew 28:19; Mark 16:15). Fin elos ma rauni kuht kuh in puhla tuh kuht luhngse ac nuhkuh kelos, elos ac ikacklah insiaclos nuh ke pweng lasr, oacna Tohkohsrah Lamoni el ikacslah insiacl in eis wosasuc ke srihpen luhngse ac kuhlwacnsuhp lal Ammon (liye Alma 17–19).

Ke kuht akacsruhi ke wosasuc, lwelah kuh muhtwacwacack ke luhngse. Ke kuht saplak nuh mwet sahyac ke luhngse—esam lah elos pa ma sacohk wiyuck ac tuhlihk nuhtin Pahpah tuhmasr Inkuhsrao—pacl wo ac ikacklah nuh sesr in akacsruhi ma ke etuh in pwacye.

Ahkolah Pacl Nuhkwewa ac Akacsruhi

Wacngihn mwet oaru in akacsruhi ke wosasuc oacna M. Russell Ballard (1928–2023). Ke sramsram in toeni luhlahp sahflah lal, “Ma se inge inmahsrlon ma wolacna ac kahto emet lah mwet suc fin facluh kuh in etuh—lah Pahpah tuhmasr Inkuhsrao ac Leum Jisus Kraist Elos ahkkahlwemyaclos sifacna ke lwen sahflah inge ac lah Joseph el kolyucklac in fohlohkohnwack fohnlah luhn wosasuc ma pahtpaht luhn Jisus Kraist.”

Nuh ke moul lal, ac nuh ke inkaiyacn facluh, Prestuhn Ballard el ahkolah pacl nuhkwewa in akacsruhi wosasuc nuh sin mwet nuhkwewa. El kwacfe kuht in oruh oacpacna. El luti kuht in akacsruhi ke wosasuc “in mwet tuhlan wowo ac kuhlwacnsapuh mwet sahyac ac ahkkahlwemye luhngse.” In oruh, kuh “ahkkahlwemye wosasuc ke moul lasr … ahkkahlwemye nuh sin [mwet sahyac] mwe insewowo ma oasr ke wosasuc.” Kuht oacyacpac “fahkwack luhlahlfongi ke ma [kuht] etuh ac luhlahlfongi ac ma [kuht] puhla.” Prestuhn Ballard el luti, “Fahkwack ma pwacye uh … kuh in utuck ke kuh luhn Nguhn Muhtahlnuh selos suc ma ikacslah insiaclos in eis uh.

Akacsruhi wosasuc fohlohkohnwack luhn Jisus Kraist pa kena yohk insiacn Prestuhn Ballard. Kuht kuh in ahkolah pacl nuhkwewa—oacna el—ke akacsruhi wosasuc ke kahs ac mukwikwi. Kuht tiac etuh suc inmahsrlosr suk ke kahlwem luhn wosasuc tuh tiac etuh acn in suk kac (liye Doctrine and Covenants 123:12).

Sang Suli Insiac

In kahsruh mwet sahyac tuhkuh nuh Kraist, kuht solwaclos in puhlakihn engan ma Mwet Lahngo ac wosasuc Lal use. Kuht kuh in oruh ma inge ke kuht solwaclos in tuhkuh nuh ke mukwikwi se, riti Puk luhn Mormon, kuh ohsun sin misinacri. Kuht kuh in oacyacpac sang nuh selos suli insiacsr nuh selos in wi toeni luhn kuhfa luhn Leum yohrohsr.

Ke kuht wi toeni nuhke kuhfa luhn Leum kais sie wik in “kuhlwacnsapuh God ac ipeis ke kuhfa luhn Leum in esam Jisus Kraist ac Iwaclah Lal.” Pa inge pacl wo se mwet in puhla Nguhn, fahsr fototo nuh sin Mwet Lahngo, ac ahkkweye luhlahlfongi lalos nuh Sel.

Ke kuht suk ohiyac in luhngse, akacsruhi, ac suli, plwacn ac mukwikwi lasr weacng kahsruh mwet in wi toeni luhn kuhfa luhn Leum. Elos fin eis mwe suli lasr ac tuhkuh nuh ke toeni nuhke kuhfa luhn Leum, elos ac luhngse yohk liki met in kampare ke inkacnek luhn pacptais ac eklac. Nga luhlahlfongi ke insiuck kwewa lah ma wo yohk ac tuhkuh ke kuht suli mwet sahyac in wi toeni nuhke kuhfa luhn Leum ac kahsrwelos akihlen mwe insewowo elos kuh in eis.

Leum El Fah Kol Kuht

Kuht tiac etuh ma wo ac ma upac ma ac tuhkuh ke kuht luhngse, akacsruhi, ac suli. Wen nuhtin Mosiah elos “som nuh ke siti nuh ke siti, ac nuh ke sie lohm in alu nuh ke siepac, … inmahsrlon mwet Laman, in sramsramkihn ac luti kahs luhn God inmahsrlolos; ac ohinge elos muhtwacwacack in kuhtanglah yohk.” Nuh ke mukwikwi lasr lasr, “mwet tausin elos eisyuckme nuh ke etwacack luhn Leum,” ac pucs “tuh eklac … [ac] tiac fahsr liki” (Alma 23:4–6).

Finne ma inge tiac sikyak pacl nuhkwewa, Leum El olwelah nuh Sesr tuh Elac wi kuht orekma ke srihpen nguhn nuhkwewa sacohk nuh Sel. Ke kuht fihliyac luhlahlfongi lasr ke Leum ac wi kuhlwacnsap Lal, El ac kol kuht in akacsruhi wosasuc Lal ke kuht luhngse elos, akacsruhi moul lasr ac luhlahlfongi lasr nuh selos, ac solwaclos in wi kuht ac ukwacl.

In yohk engan [lasr] (liye Doctrine and Covenants 18:15) ke kuht suk pacl wowo ma rauni kuht in kahsruh Leum Jisus Kraist ke orekma yohk Lal in use nguhn nuh Sel.

© 2024 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac ke lweng: 6/19. Lwenglah luhn Pweng ke Kais Sie Mahlwem ke Liahona, Julahe 2024 Kosraean. 19293 868