“Sel Klou el Urerel a Rubak me a Klou el Techelled,” Liahona, Ongeuid el buil 2024.

Klumech er a bek el buil LiahonaOngeuid el buil 2024

Sel Klou el Urerel a Rubak me a Klou el Techelled

Mla er a Elder Quentin L. Cook

Er a Chelechad er a Teruich me a Terung el Apostol

Sel doubeltikerreng, omerek, e siotai, e kede oureor lobengkel a Rubak lolngeseu er a bek el mekreos el ngelekel el mo er Ngii.

teru redil el kadechecheduch el merael er a rael

Rokui el profet er tial, uriul el klebesei a ulsisechakl er a rechedal a Ikelesia er a Jesus Kristo er a Uriul-klebesei el Santo el mo omerek er a mla moluut el ebangkelio er a Jesus Kristo. Chelsel tial klengar er ngak, e ngarngii a bebil er a okesiu el mera uldesuek:

President David O. McKay (1873–1970), el mle profet er sel taem el blek ngeasek , a dilu, “Bek el rechad a Ikelesia a misionari.”

President Spencer W. Kimball (1895–1985) a ulsisechakl, “A sils louchais er a ebangkelio el mo er a rokui el basio me a rechad a ngar tiang er a chelechang,” me “kid a kired el blak a rengud loureor” e omerek er a ebangkelio el mo er a rebebil.

President Gordon B. Hinckley (1910–2008) a dilu: “Ng klou a urered, e kmal klou a ngercheled lolngeseu losiik er tikrel bo dolsisechakl er tir. A Rubak a mla meskid a ngerachel el mo olisechakl er a ebangkelio el mo er a rokui el chad. Tiang a ousbech [er] sel blakerreng er kid.”

Ea President Russell M. Nelson a ulsisechakl: “A urerel a misionari a klou a belkul telengtengil sel omgengideb er a Israel. A mengideb a kot el klou a ultutelel el ureor el ngii a ngarngii er a beluulechad er chelechal sils. Ng diak a ngii dil ngera el sebechel mengaisisiu er a klungel. Ng diak a ngii dil ngera el sebechel mengaisisiu er a ultutelel. Re misionari er a Rubak—re oltirakl er Ngii—a oureor er sel kot el klou el de chelbangel er ngii, el ngarbab a moktek er ngii, e kot el ngarbab el ureor er a beluulechad er chelecha el sils.”

Ngak a mlo medengelii tiang serak ngeasek el misionari el ngar sel British Mission. E ngak a kmal mla ungil medengelii er a chelechal taem. Me sel ngak a Apostol er a Rubak el Jesus Kristo, e ak kuchais el kmo a techall a kmal betok el mo olngeseu er a rebebil el mo er a Kristo sel dolecholt a beltkil a rengud, ouchais a doumerang, e siotai er tir el mo obengked el mo medegelii a deurreng el ngara ebangkelio er a Jesus Kristo.

A Ureor a Merael mo Ruchei

Ng mlarngii a techellek el mo oureor er sel Missionary Department er a Ikelesia el sel kot el llecheklel a Preach My Gospel a lulechotii sera 2004, me a dirrek sel ongeru llecheklel el tilobed er a 2023. Ak kumerang el kmo a Preach My Gospel a kmal ngarngii a bla rellii lomekngeltengat er a urerel a misionari.

Sel beches el Preach My Gospel a uldimukl er ngii a ikel dulsuub sera 2004, el ulekrael llomes el mlara bek el chedal a First Presidency me a Chelechad er a Teruich me a teru Apostol, me a ikel reuoll el milengodech a le riruul el kirel a olechotel a ebangkelio el mlo digital. A bebil er a ikel reuoll el milengodech a kmal ngarngii a blel rellii.

Aki miltik el kmo a olechotel a ebangkelio loba beot, ungil teletael, me a omeruul lokiu a osisecheklel a “beltikerreng, omerek, siotai” el ngii a kmal mla omekngletengat er a renged. A Jesus Kristo a ulechais er a ebangkelio loba tial teletael sera lekiei er a beluulechad. Ngii a ulemerek er a klengar er Ngii me a Betlkil a Rengul e mle siotai er a rokui el mo er Ngii (mesa Mateus 11:28). Sel mo oubeltikerreng, omerek, e siotai el uai Ngii a tokubets el klengeltengat me a ngerachel el mo e ra rokui el rechedal a Ikelesia.

Omuchel loba beltikerreng

Ngara Sers er a Gethsemane me a ngara kerus, a Jesus Kristo a ngilai a kengtil a beluulechad e mlo chuarm er a klengiterreng me a ringel me a ongarm me a omengesuseu er a bek bedengel omeruul (mesa Alma 7:11). Tial klou e diak a ulebengelel ringel a uchul me Ngii a mlo mengerderid leng uchul a ringel, e mlo merael a rasech er a bek el belsibs er a bedengel (mesa Doctrine and Covenants 19:18). Ngokiu a Tngakireng er Ngii me a Okiis er a kodall, a Jesus Kristo a uchul ea mo suobel me a diak a ulebengelel klengar a sebechel mo er a rokui el chad.

Mesel mo chemau a Osobel e omdasu a ikel rokui el Ngii a mla remuul el merkid a rullii a rengud el mo mui er a beltikerreng el mo er Ngii. Me Ngii a mult a rengud el mo er a rebebil e mellach er kid el mo oubeltikerreng el mo er tir (mesa Johanes 13:34–35) e omerek er a ebangkelio er Ngii el mo er tir (mesa Mateus 28:19; Markus 16:15). A lsekum tirkel meliuekl er kid a omelchesuar a meral beltkil a rengud me a ulekerreu el mo er tir, e te mo oumesind el mok a rengrir el kirel a klemeched, el di uai a King Lamoni el milkengii a rengul el mo nguu a ebangkelio eleng beltkil a rengul a Ammon me a ngelsuir (mesa Alma 17–19).

Me sel domerek er a ebangkelio, e domuchel loba beltikerreng. Mesel dolngeseu er a rebebil loba beltikerreng—e omdasu er tir el rodam e rodos er kid e betik a rengrir ngelekel a Chedam er a babeluades—ea techall a merkid el mo ouchais a ikel dodengei el klemerang.

Blak a Rengum Loureor e Omerek

Ngdiak a ngidil chad el blak a rengul el omerek er a ebangkelio el uai a President M. Russell Ballard (1928–2023). Sel mlo ulebongel el cheldechedal er a klou el ongdibel, e ngii a ulechais el kmo, “A tara kmal chetengakl e meang el tekoi el rokui el chad a mo medengelii [el] kmo a Demad er a Babeluades me a Rubak el Jesus Kristo a mla me Chemolt er chelchal uriul klebesei ea Joseph [Smith] a mla mengilt el mo oluut er a cherrungel ebangkelio er a Jesus Kristot.”

Chelsel a klengar er ngii, me a bebil er a beluu er a beluulechad, a President Ballard a mle blak a rengul loureor lomerek er tial meang el klumech el mo er a rokui el chad. Ngii a mle soal a bo doruul osisiu el tekoi. Ngii ulsisechakl el kmo kede omerek er a ebangkelio “sel dungil el tonari el omekerreu e olecholt a beltikerreng.” Me sel doruul a ikang, e kede “olecholt er a ebangkelio el ngara chelsel a klengar er kid, e … olecholt el mo er a [rebebil] a ikel klengeltengat el mengai er a ebangkelio.” Kede dirrek “louchais a klaumerang er a ikel [kid] a medengei e oumerang me a ikel [kid] omelchesuar.” A President Ballard ulsisechakl, “A klikiid el klaumerang … e mengai lokui a Chedaol Reng el mo er a chelsel a rengrir a rebebil el mla mok el mo melai er ngii.”

Omerek er a mla moluut el ebangkelio er a Jesus Kristo a mle kot el ngara rengul a President Ballard. Ng sebeched el blak a rengud loureor—el di uai ngii—lomerek er a ebangkelio loba tekoi me a omeruul. Ng diak dodengelterir a ngara delonged losiik er a llomes er a ebangkelio eng di ngdiak lodengei el mo metik er ngii er ker (mesa Doctrine and Covenants 123:12).

Siotai loba Ungilreng

Olngeseu er a rebebil el mei er a Kristo, e kede siotai er tir el mo omelchesuar a deurreng el Osobel me a ebangkelio er Ngii olab. Ng sebeched el meruul sel de siotai er tir el mei er a omilil, menguiu a Babier er a Mormon, a lechub e to mo mesterir a remisionari. Ng dirrek el sebeched siotai loba ungilreng me lebo er a sakrament miting lobengked.

Kede mora sakrament miting er a bek el sandei el mo “mengull er a Dios e melai er a sakrament el mo melatk er a Jesus Kristo me a Tngakireng er Ngii.” Tiang a sel techall el rechad a mo omelchesuar er a Chedaol Reng, e mo kmeed el mo er a Osobel, e mo melisiich a klaumerang er tir er Ngii.

Me sel dosiik a techall el mo oubeltikerreng, omerek, e siotai, ea uldesued me a ureled a kirel luldimukl er a olngeseu er a rechad el mora sakrament miting. A lsekum mete mo kongei er a siotai er kid e mo er a sakrament miting, eng mo ngarngii a techall el tir a melemolem el ngarsel rael el mora techolbechelid me a bult. Ak kumerang loba rokui el renguk el kmo di mo ungil a rokui tekoi sel de siotai er a rebebil el mo e r a sakrament miting e olngeseu er tir me bo lodengei a klengeltengat el sebecherir el ngmai sel loruul a ikang.

A Rubak a Mo Mengetikaik er Kid

Ng diak dodengei a ikal mo ungil besul ma olibesongel bo dechau sel doubeltikerreng, omerek, e siotai. A rengelekel a Mosiah el sechal a ulemais a beluu, el ngara tal blai er a omenguul el mo er a tang, el ngara delongelir a re Lamanites, el mengedecheduch e olsisechakl a tekingel a Dios er a delongelir; me sei a uchul meng mlo smiich a urelir. Ngokui a urelir, e te telael el chad a mlo er ngii a klemedengei er tir el kirel a Rubak, e betok er tir a ulbult a rengrir meng di mlak el luut el ruebet er a klengit (mesaAlma 23:4–6).

Meng locha tiang a diak el blechoel bo dechau er ngii, a Rubak a mle yaksok el kmo Ngii a oureor lobengked ele rebek el chad a mekreos el mo er Ngii. Me sel denguu a klaumerang er kid el mo er a rubak e meruuul a Urerel, Ngii a mo mengetikaik er kid el mo omerek er a ebangkelio er ngii lobengterir a rebebil sel doubeltikerreng el mo er tir, ouchais a klengar er kid me a klaumerang lobengterir, e siotai er tir el me teloi er kid loltirakl er Ngii.

Ng mo klou a deurreng er [kid] (mesaDoctrine and Covenants 18:15) sel denguu a techall el mo olngeseu er a Rubak el Jesus Kristo er a klou el Urerel el lobtiterir a rechad el mo er Ngii.