“Fare bin Th’abi Fel’ e Muruwel rok Somoel nge bin Th’abi Fel’ e Tawa’ath Rodaed,” Liahona, July 2024.
Mulwol ni Ngan Thapeg ko biney e Pul nifan e Liahona ko, uly 2024
Fare bin Th’abi Fel’ e Muruwel rok Somoel nge bin Th’abi Fel’ e Tawa’ath Rodaed
Napan ni gadaedra dag e tu’ufeg, ser, min pinning e girdi’, ma aram ni gadaed be un ko muruwel rok’ Somoel ko ayuw ni yibe pinning e girdi’ ni nge yib ngak.
Gubin e profet ko biney, e mfen e ke fil ngak girdi’en Fare Galasia Rok’ Yesus Kristus ni fan e Gidii’en ko Tin Tomur e Rran ni ngar weliyed fare gospel ku Yesus Kristus nikan sulweg yarmen. Ulan e yafos rog, bay in e susun nike yib ko tafney rog:
President David O. McKay (1873–1970), fare profet ko ngiyal’ ni kab fel’yangreg, e ga’ar, “Gubin girdi’en e Galasia ma yaed e tapigpig.”
President Spencer W. Kimball (1895–1985) e ke machib nag, “Fare rran ni ngan fek e fare gospel ngak nga yuyang nge ngak e girdi’ e taw ngay ni’ir e ngiyal’ ne chiney.
President Gordon B. Hinckley (1910–2008) e ga’ar: “Baga’ e muruwel rodaed, bagel buguwan e muruwel roaed ni ngan pii’ e ayuw ko pire’eg e girdi’ ni ngan machib nag. Somoel e ke tay e biney e muruwel nga dakean daed ni ngad machib niged fare gospel ngak e girdi’ ni gubin. Biney era tu’uf ni ngaed rrin’ed u ftihik’ e athamgil.”
President Russell M. Nelson e ke machib nag: “Muruwel rokʼ e tapigpig e rib gaʼfan ko rogon e mukun rokʼ piyu Isreal. Biney e muruwel e bin thʼabi gaʼfan e muruwel nibay u daken e fayleng e dabaʼ. Dariy reb e muruwel nib taʼab rogon ngay. Dariy reb e muruwel nib gaʼfan ko biney. Fapi tapigpig rokʼ Somoel—pi gachalpen—e yaed be un ko tin thʼabi momawʼ, nge tin nthʼabi gaʼfan, nge tin nthʼabi tolang e muruwel u fayleng e dabaʼ.”
Kug nang e biney ko napan ni gag reb e tamachib ko fare British Mission. Makari michuwun’ug e biney e daba’. Gag ni reb e pigachalpen Somoel Yesus Kristus, gube micheg ni ayuw e bay ni gubin yang ni ngan ayuweg e girdi’ ni ngar bad ngak Kristus u dakean e tu’ufeg, ser, min piningraed ni ngar uned ngodaed ko thapeg fare falfalaen’ ko gospel rok’ Yesus Kristus.
Fare Muruwel e Be Yean nga Mm’on
Gub tawa’ath ni kug un ko reb e muruwel ko fare Missionary Department ko Galasia napan ni yib e bin somm’on e edition ko fare Preach My Gospel napan noeg mornga’agen ko 2004, nge biyay napan ni yib e bin l’agruw e edition ko 2023. Michuwun’ug ni Preach My Gospel e ke tawa’ath nag e muruwel ko tamachib nib gel rogon.
Fare bin be’ech e Preach My Gospel e mu’un urngin ban’en ngay nikad filed ko napan e 2004, tin nikan thogthog nag kanawo’en nike yib rok’ fapi member ko fare bin Somm’on e Presidency nge Ulung ko fare Ragag nge L’agruw i Apostle, makun fal’ag rogon ni nrayag ni ngan share nag fare gospel ko digital. Boech e pin’ey nikam thilyeg e kan guy ni rib ga’ e mon’og riy.
Kug pire’eged ni share nag fare gospel ko kanawo’en nib moem, mab munguy rogon, u dakean fapi yalen ko “tu’ufeg, ser, nge pinning e girdi’” e rima tawa’ath nag fare kingdom. Irreray rogon ni ser nag Yesus Kristus fare gospel ko napan ni’i moey u fayleng. Ke ser nag e yafos rok’ nge tu’ufeg rok’ make pinning gubin e girdi’ ni ngar bad Ngak (muguy ko Matthew 11:28). Ra ngan tu’ufeg, min ser, min pinning e girdi’ ni nge yib ni woed rogon nike rrin’ e ir reb e tawa’ath nge muruwel nifan gubin e chonggin e Galasia.
Tabab ko Tu’ufeg
U dakean fare milay’ u Gethsemane nge dakean e kuruth, Yesus Kristus e fek nga dakean fapi denen ko fayleng me “gafgow ko pi amith nge kirbaenʼ nge pi lumel ni gubin mit;” (Alma 7:11). Biney “e amith ni ta’ [Yesus] ’ni amith ni rib gel, … ma ii yib ea racha’ ko gubin yang u doew” (Doctrine and Covenants 19:18). U dakean fare Bayul rok nge Foskoyam’, ma Yesus Kristus e ke fal’ag kanawo’en e thap nge falfalaen’ ko n’uf ngalang nifan ngak gubin e girdi’.
Tafney nag fare Tathapeg nge pi n’en nike rrin’ nifan ngodaed era sunmiy u gum’ircha’endaed e tu’ufeg ngak. Ma aram nira pingeg gum’ircha’endaed ngak e girdi’ me motochiyel nagdaed ni ngad tu’ufeg raed (muguy ko John 13:34–35) min ser nag e gospel rok’ ngoraed (muguy ko Matthew 28:19; Mark 16:15). Fa’anra pi’in nibay u to’oben daed e yaedra thamiy ni yaed ba tu’uf rodaed, mara moem ni yaedra bing gum’ircha’enraed ko fapi mulwol rodaed, woed rogon fare Pilung Lamoni ni bing gum’ircha’en nge thapeg fare gospel ni bachan fare tu’ufeg nge pigpig rok’ Ammon (muguy ko Alma 17–19).
Napan ni gadaedra ser nag fare gospel, tabab gaed ko tu’ufeg. Napan ni gadaedra ayuweg e girdi’ u fithik’ e tu’ufeg—mu tay u wun’um ni yaed e pi walagendaed ni pumo’on nge bpin ni pifak e Chitamangiy nibay u Tharmiy—mara mab kanawo’en ni ngad ser niged e tin ni gadaed manang nib riyul’.
Mu’un ko Muruwel ko Ser Nag
Dariy be’ ni fani gel ko muruwel ko ser nag e gospel ni woed President M. Russell Ballard (1928-2023). Ulan fare bin tomur e general conference ni non, ke micheg, “Reb e ban’en ni th’abi fel’ ma reb e ma’ang’ang ni gubin e gidii’ u fayleng nrayag ni nge nang [e] Chitamangdaed nu Tharmiy nge Somoel Yesus Kristus e kar dagew row ko biney e mfen nge Joseph [Smith] nikan chuwathiliy ni nge sulweg yarmen fare gospel ku Yesus Kristus ni ga’angin nib polo’”
Napan e yafos rok’, nge ga’angin yang u fayleng, e un President Ballard ko re muruwel ney nib gel i ser nag fare mulwol ngak e girdi’. Ke pi’ e athamgil ngodaed ni ngadrrin’ed e biney. Ke machib nag ni gadaedra ser nag fare gospel ni “gadaed be mang e buguliyiror nib fel’ ma gadaed be dag e tu’ufeg.” Ran rrin’ e biney, ma “arram ni gadaed be dag e tomilang ko fare gospel ulan e yafos rodaed … daged ngak e [girdi’] fapi tawa’ath ko gospel nibay.” Ma krayag ni ngaed weliyed “e pi mich ko tin ni [gadaed] manang nge michuwun’uy nge tin ni [gadaed] be thamiy.” Machib nag President Ballard, “Mich nib polo’ … e rayag ni nge yean u dakean fare Kan ni Thothup ngalan gum’ircha’en e pi’in ni ba’dag ni nge thapeg.”
Ser nag fare gospel ku Yesus Kristus e irerram e bin th’abi ga’ ulan gum’ircha’en President Ballard. Rayag ni ngad uned ko biney e muruwel—ni woed ir—ni yibe ser nag fare gospel ko rogon e thin nge ngongley. Dan dananged ko mini’ e bay u fithik’ daed nibe gay fare tomilang ko gospel machane de nang ko gin ni nge pire’eg riy (muguy ko Doctrine and Covenants 123:12).
Mulwol ni Yibe Pi’ u Fithik’ e Munguy
Ran ayuweg e girdi’ ni nge yib ngak Kristus, ma gadaedra pinning raed ni ngar bad ngar thamiyed fare falfalaen’ nima pi’ fare Tathapeg nge fare gospel rok’. Rayag i ngan rrin’ e biney ni yibe pinningraed ni ngar uned ko gosgos, be’eg fare Babyor ku Mormon, fa mada’ nag fapi tamachib. Ma krayag ni ngan pinningraed u fithik’ e munguy ngar uned ko fare mo’olung ko sakrament.
Gadaed ma un ko mo’olung ko sakrament ni gubin e wik, ni nan “liyoer ngak Got ma gadaed fek fare sakrament ni nge yib ngaen’ daed Yesus Kristus nge fare Bayul rokʼ.” Irerray e ngiyal’ nifan e girdi’ ni nge thamiy fare Thothup, chuchugur ngak fare Tathapeg, me gel nag e mich nakg.
Napan ni gadaed be sap nag rogon ni ngad tu’ufeged, min ser, min pinning e girdi’ ni nge yib, ma susun ni ngad uneged ngay ni ngan pinningraed ngar uned ko mo’olung ko sakrament. Fa’an yaedra fanay fare mulwol ni ngar uned ko mo’olung ko sakrament, mara moem ngoraed ni ngar ul’ul’gaed ko fare pi’i kanwo’en e tawfe nge gumi’ircha’en raed nira thil. Rib michuwun’uy ngay ulan gum’ircha’eg ni mon’og nib ga’ era yib napan ni gadaedra pinning e girdi’ ni nge un ko mo’olung ko sakrament min ayuwegraed ni ngar guyed fapi tawa’ath ni rayag ni ngar thapeged ni yaed be rrin’ e pin’ey.
Somoel ere Powi’iy Daed
Dab dananged ko miti i mang mon’og fa mo’owar era yib ko napan ni gadaed be gay rogon e tu’ufeg, ser, nge pinning. Fapi pagal ni fak Mosiah e “ranoed iyaen u rebe binaw ngo reb, ma ranoed u rebe tafen e meybil ngo reb , … sensey u gaʼangin yang e binaw u fithikʼ fapi Lamanites, ni ngar machib gaed mar filed fare thin ku Got ko gidiiʼ u fithikʼraed; ma aram rogon ni tabab e muruwel roraed nib felʼ rogon. U dakean e muruwel roraed, “biyuʼ e piʼin ni tamilang laniyaenʼraed u morngaʼagen Somoel,” arragon, yu biyuʼ e piʼin ni michaenʼraed … [mar] pired riy ni dar mul gaed” (Alma 23:4–6).
Biney e woed ni sana dabi buch rodaed, machane Somoel e ke micheg nag ngodaed nira un ngodaed ko muruwel ya gubin e ya’el ma rib tu’uf rok’. Napan ni gadaedra tay e pagaen’ rodaed ngak Somoel min un ko pigpig rok’, mara powi’iy daed ko rogon nrayag ni ngan ser nag fare gospel rok’ ngak boech e girdi’, min ser nag e yafos rodaed ngoraed, min pinning raed ngar uned ngodaed i laek wo’en.
“Th’abi ga’ e falfalaen’ [rodaed]” (Doctrine and Covenants 18:15) napan ni gadaedra pi’ e ayuw ko fare muruwel rok’ Somoel Yesus Kristus ni ngan pinning e girdi’ ni ngeyib Ngak.
© 2024 ko Intellectual Reserve, Inc. Gubin nibay mat’won. Kan yoloey u USA. Kan micheg nag ko thin nu Ngalis: 6/19. Micheg i pilyeg: 6/19. Translation of Monthly Liahona Message, July 2024. Yapese. 19293 905