Nyankopɔn Bɔ Boa Hɛn na Ɔabɔ Hɛnho Ban

Elder Dale G. Renlund ne Kasaa

Ɔkã Asomafo Duebien no hɔn Quorum no ho

Tse dɛ Ɔsahen Moroni no, yebotum enya mboa na tum krɔnkrɔn dze ama nkõdzen a yehyia no wɔ abrabɔ mu no.

Mber a Midzii kan kenkaan Mormon Nwoma no, m’enyi gyee akõkoekõ a osisii wɔ Nephifo nye Lamanfo ntamu abakɔsɛm no ho. Ɔsahen Moroni ne gyedzi, nokwar nyansa, na enyitsew a ɔdze dzii dwuma, dɛ akõfo sahen a woyii no dɛ Nephi nsordaafo dɔm nyinara hɔn baanodzinyi mber a nna oedzi mfe 25 pɛr no yɛɛ me ahomka. Nna ɔyɛ nyansafo, ɔhoɔdzenfo, na badwembanyi. Ɔdze noho nyina hyɛɛ no nkorɔfo hɔn fahodzi na yieyɛ mu. (Hwɛ Alma 48:11–12.)

Nkyɛ ɔbɛgye akofo konyimdzi ama noho no, Moroni dze konyimdzi no maa Nyankopɔn na bambɔ krɔnkrɔn a no nsordaafo dɔm no nyae fii mbaa na mbofra a wɔannkɔ ɔkõ no hɔ. Ɔkãa kyerɛɛ ɔtamfo baanodzinyi a nna oedzi nkõgu dɛ: “Ewuradze … dze hom ahyɛ hɛn nsa. “Na afei mepɛ dɛ hom tse ase dɛ … osian hɛn nyamesom nye hɛn gyedzi a ɔwɔ Christ mu ntsi.’’ Afei Moroni kãa nkɔnhyɛsɛm nhumu yi dɛ: “Nyankopɔn bɔboa hɛn, na ɔakora hɛn do, na ɔabɔ hɛnho ban wɔ mbertsentsen biara a yebedzi nokwar ama no, dze ama hɛn gyedzi, nye hɛn nyamesom” (Alma 44:3, 4).

Mber resen no, meebohu dɛ Moroni hyehyɛɛ fapem horow a yebotum dze edzi dwuma ma yeenya hɛn ndɛ hɛn abrabɔ no nsɔhwɛ ano yi. Ber a yesie gyedzi wɔ Jesus Christ mu, wiadze n’Agyenkwa no, Ɔdze No tum no behyira hɛn. Mbom Ɔbɛyɛ dɛm no na ma hɛn so yeehu Ne nhyira no, ohia dɛ yɛtse hɛn botae ase, yɛyɛ konyimdzi ho nhyhyɛɛ, na yɛyɛ ahoboa ma akõkõekõ ne ngyinahɔmadze a yehyia no, dɛmara dɛ Moroni yɛɛ ahoboa na ohyiaa akõkõekõ ankasa wɔ n’abrabɔ mu no. Sɛ yɛyɛ dɛm a, Ɔsor Egya na Jesus Christ bɔboa hɛn na Wɔabɔ hɛnho ban.

Yɛretse Hɛn Botae Ase

Moroni sii do bɔɔ no nkorɔfo no nkaa wɔ hɔn nyimpa ban a wɔyɛ ho (Abraham ahyɛmudzi adzedzifo), hɔn a wɔyɛ hɔn dze (Nyankopɔn ne mba adɔfo), na siantsir a wɔkõe ho (maa ebusua, gyedzi, na fahodzi). Moroni kyerɛkyerɛɛ no nkorɔfo no dɛ wɔrokõ ma wɔatsena ase ankasa na ma hɔn fahodzi fi nhyɛ na nkowaasom mu. Ne ebirabɔ no, hɔn atamfo no kõe dze gyee hɔnankasa hɔn enyimnyam na tum dɛ wodzi nkaafo do.

Mber a Nephifo binom hwehwɛɛ dɛ wobotu tumdzi egu dze enya hɔnho no, Moroni sunsuaan no sortar mu na ɔkyerɛɛw wɔ tamsin mu no n’asɛm ne tsitsir dɛ: “Yɛdze kaa hɛn Nyankopɔn, hɛn nyamesom, nye fahodzi, nye hɛn asomdwee, hɛn yernom, nye hɛn mba.’’ Ɔmaa mfrankaa yi do wɔ sor, a ɔfrɛɛ no “ahotɔ mfrankaa,’’ wɔ poma ano na ɔdze bɔ no nkorɔfo no nkaa wɔ dza ɔfa ho nyinara wɔ ɔkõ no ho na ɔdze boaa hɔn ano wɔ ne siantsir ntsi. (Hwɛ Alma 46:12–13, 19–20.)

Abrabɔ no sunsum mu nkõdzen mu no, “Yɛnnye honam nye bɔgya na enya ntokwadzi, na yɛnye … sum yi mu ahemfo … [nye] emumuyɛ esunsuma’’ (Ephesusfo 6:12). Hɛn, so, yehia dɛ wɔbɔ hɛn nkaa wɔ dza ɔfa ɔkõ ne nyinara ho. Elder Neal A. Maxwell (1926–2004), nkaano Asomafo Duebien no hɔn Quorum mu ba no, kyerɛɛ adwen yi wɔ anotsew, mpo ɔyɛ dɛ, nkɔmbɔdzi bi mu.

Afe 2004 mu no, meseraa Elder Maxwell wɔ n’asopitsi dan mu annkyɛr na owui. Ɔkyerɛɛ ayamuyie maa obiara a ɔkɛseraa no anaa ɔboaa no. Apɔwmudzen edwumayɛfo kɔɔr ne dan mu na wofi mu pue a nna worusũ. Mekãe kyerɛɛ no dɛ, “Elder Maxwell, iyi ɔyɛ dzen ara yie.’’ Ɔpeem ne men mu na ɔkãa dɛ, “O, Dale, yɛyɛ onnyiewiei abɔdze a yɛtse ɔnnkyebo wiadze mu. Yeefi hɛn abɔdzedze mu, tse dɛ nam a oefi nsu mu. Sɛ yenya onnyiewiei nhumu nko a na yɛbɛtse iyi mu biara ase.”

Onnyi dɛ hɛn werɛ fir hɛn awosu krɔnkrɔn na onnyiewiei hyɛbea no nwanwa a ɔtserɛw na abɔnsam nhyɛ horow a ɔkõ tsĩa hɛn no. Yɛretse Ɔsor Egya ne nhyehyɛɛ ase yie no bekenyan hɛn ma yɛakɔdo akõ ama hɛn onnyiewiei nkwagye na hɛn fahodzi fi sunsum mu nkowaasom mu.

Konyimdzi ho Nhyehyɛɛ

Akõkõekõ a no nsordaafo kõe nyinara no, Moroni yɛɛ nhyehyɛɛ wɔdze bedzi konyim. Ɔmaa atsɛwfo kohuun n’atamfo hɔn dwumadzi na nsusui horow. Ɔhwehwɛɛ akwankyerɛ fii nkɔnhyɛnyi, Alma hɔ. Afei Moroni dze dɛm nkenyan akwankyerɛ no dzii dwuma wɔ ne akõdzi no ho. Ɔdze mboa a wohia dɛ mbrɛ hɔn ehiadze tse, a ɔdze nsordaafo beberee tõtõo nkuropɔn a nna wɔnnhyɛ hɔ dzen kɛse no. Ɔyɛɛ nhyehyɛɛ a wɔdze bedzi dwuma a nna ogyina nsɛm a ɔrokɔ do a ɔtse no do.

Dɛm ntsi onyaa tum wɔ nsordaafo atamfo no do. No bo anndwe no wɔ konyimdzi adadaw no ho; mbom, ɔkɔɔr do tuu ɔnoara n’ahom na no nsordaafo hɔn dze so mpon dɛ wɔdze begyina ndaamba nsɔhwɛ ano.

Yebotum dze kwan horow a ɔsɛ dze edzi dwuma egyina sunsum mu esidzifo ano. Yebotum ahyɛ ase ber a yeruhu dza Satan robɔ mbɔdzen ayɛ no wɔ hɛn abrabɔ mu. Ɔbɔ mbɔdzen dan hɛn enyi fi hɛn botae ho. Sɛ yehyia nsɔhwɛ a, ɔwɔ dɛ yebisa hɛnho dɛ:

Nyɛe wɔ m’afã yi si dɛn yɛ ntotoho tsĩa Nyankopɔn n’asɛm a Oeyi akyerɛ?
Nyɛe a mereyɛ yi no nsunsuando nye dɛn?
Ana nyɛe yi bɔboa me ma maahyɛ mo botae mã wɔ asaase do?

Ɔwɔ dɛ yɛsan hu yɛrema nsɔhwɛ nketsenketse mpo ho kwan no nsusuando a ɔbɛba. Sɛ yɛma nsɔhwɛ ho kwan a, yedzi “edubɔn nkakrankakra’’ (Alma 47:18), a nhyehyɛɛ a ɔyɛ ndam dodow a omumuyɛnyi no tum dze dzi dwuma a obotum dze sunsum mu esian nsusuando aba.

Yebotum ahyɛ hɛnho dzen etsĩa Satan no nsɔhwɛ ber a yeridzi akwankyerɛ a yenya fi hɛn nda a odzi ekyir nkɔnhyɛnyi no hɔ do. Yɛreyɛ dɛm no boa hɛn ma yenya onnyiewiei nhumu a yedua do dze ker hɛn nyɛe. Yɛreyɛ mbrɛ yebesi behyia nsɔhwɛ a ofi hɛn arabɔ n’afa afa mu ba ho nhyehyɛɛ no bɔboa hɛn ma yɛayɛ nsan mu yi horow beberee a ɔtsen wɔ ber no mu. Nhyehyɛɛ ahorow a woedzi kan ahyehyɛ na akwan a yɛbɛfa do no bɔboa hɛn ma yɛabɔ hɛnho ban etsĩa ndanenyi fi hɛn onnyiewiei botae ho.

Mfatoho a ɔyɛ abaefo dze. Abaefo mfir ndzɛmba botum ayɛ nkrantsee afanu ebien, ɔyɛ mfaso na sianfo, a ogyina mbrɛ yebesi dze bedzi dwuma ho. Ɔaboa hɛn ma yɛayɛ nyansa nsan mu yi horow fa hɛn edwindze ho no, mbofra na mpanyin botum akenkan “Taking Charge of Technology’’ na Ma Mbabun Enya Ahoɔdzen: Akwankyerɛ ma Nsanmuyi. Iyinom bɔ hɛn nkaa fa hɛn botae ho, kyerɛ hɛn kɔ Jesus Christ hɔ, na wɔboa hɛn ma yɛfrɛ Sunsum Krɔnkrɔn no ma ɔba hɛn abrabɔ mu. Yɛrehyehyɛ mbrɛ yebesi yɛbɛyɛ, mber, na bea a yɛdze abaefo mfir bedzi dwuma no bɛhyɛ hɛn dzen etsĩa wiadze nhyehyɛɛ gyangyan ho.

Yɛreyɛ Ngyinahɔmadze Akõkõekõ ho ahoboa

N’enyi da akõkõekõ a oribesi ho kwan no, Moroni siesiee dze akatabo, akokyɛm, daadzekyɛw, na efuradze eduudur dze sisiee no nkorɔfo no dɛ ankorankor. Osiesiee no nkrɔfo no bɔɔ mu ber a wɔdze ban twaa hɔn nkurowpɔn ho hyiae, na wɔtow dɛtse dze bɔ ho aprɔw.

Sunsum mu no, yɛyɛ ankorankor ahosiesie ber a yesie Nyankopɔn ne mbrasɛm. Yɛnye Nyankopɔn dzi ahyɛmu na yesie ma ɔtwe Jesus Christ no tum no ba hɛn abrabɔ mu. Yɛdze hɛnho hyɛ ankorankor, kokoa nyɛe krɔnkrɔn mu, tse dɛ yɛrobɔ mpaa, yɛrekye kɔm, na yɛrohwehwɛ kyerɛwsɛm no mu. Yɛsan dze gyedzi dzi dwuma, a yɛdze sunsum mu akwankyerɛ a yenya no bɔ bra. Yɛgye enyim ara yɛ ahosiesie ma sacrament no na emudzi mu ara yedzi bi. Ber a yɛyɛ dɛm no, yehu Agyenkwa nankasa no yie wɔ hɛn abrabɔ mu, dɛmara dɛ Moroni hun No ankasa, nyia a nna ne gyedzi wɔ Jesus Christ mu yɛ dzen no. Nna Moroni nyim dɛ obotum adan Agyenkwa no enya akwankyerɛ na Ɔagye hɔn (hwɛ Alma 48:16). Hɛn, so, yebotum adan Jesus Christ dze enya akwankyerɛ na Ɔagye hɛn.

Yebotum akɔdo ayɛ nsiesie ber a yɛrehyɛ hɛn ebusua ebusua dzen. Hɛn Ɔsor Egya hyehyɛɛ hɛn dɛ ebusua ebusua ma ɔaboa hɛn ma yeenya enyigye na yeesũa mbrɛ yebesi bɛsan akɔ No hɔ. Hɛn ebusua ebusua botum ayɛ mboa ne farbaa ama hɛn. Hɛn nyinara botum atse dɛwdzi na ɔdɔ nkã ber a yɛrekaa dɛ yɛkã Nyankopɔn n’ebusua kɛse no ho, a hɛn ankorankor ebusua ebusua ne gyinabew horow mmfa ho.

Yebotum abɔ mu enya ahoɔdzen na yɛayɛ hɛn sunsum mu akõkõekõ ho ahoboa ber a yɛnye Ahotseweefo ekuwekuw yɛ nkabɔmu. Hɛn stake na district ahorow ma hɛn guandɔbea na bambɔ bea a ɔtse dɛm. Yebotum yɛanyɛn hɛnho nkorkor sunsum mu, yɛaboa hɛnho nkorkor ma yeesie Nyankopɔn ne mbrasɛm, na yɛahyɛ hɛnho nkuran nkorkor ma yɛadan Christ, aber nyina na tsitsir ara wɔ nsɔhwɛ mber mu. Sɛ yɛboa hɛn ano a, yehu dɛ nnyɛ hɛn nkotsee na yɛkõ akõkõekõ no. Yɛwɔ anyɛnkofo, akyerɛkyerɛfo, na baanodzifo a wobotum aboa hɛn na wɔabɔ hɛnho ban. Sɛ hɛn nyinara yɛbɔmu a nna yɛyɛ dzen yie.

Nwanwa mu ara, Moroni dze no nkorɔfo enyigye nyinara maa hɔn nokwardzi ma hɔn gyedzi wɔ Nyankopɔn na wɔ hɔn nyamesom mu. Tse dɛ Moroni no, ɔwɔ dɛ yehu dɛ dɛwdzi ba osian hɛn Ɔsor Egya na Ne nhyehyɛɛ ntsi na osian Jesus Christ na No Werdambɔ no ntsi. Ber a yɛba bɛtse hɛn botae ase, yɛyɛ konyimdzi ho nhyehyɛɛ, na yɛyɛ akõkõekõ ngyinahɔmadze ho ahoboa no, yenya mboa na tum krɔnkrɔn.

Tse dɛ Moroni no, minyim dɛ Ɔsor Egya na Jesus Christ na wɔdze fahodzi fi nkowaasom mu korakoraa no ba—fahodzi fi owu na bɔn mu. Wɔdze Hɔn tum hyira hɛn sɛ yɛhwɛ Hɔn wɔ adze nyinara mu a.

© 2024 by Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Bosoom bosoom Liahona Amandzɛɛbɔ, Dzifuu 2024 ne nkyerɛasee. Fante. 19294 502