Suportaran ken Taginayonennatayto ti Dios

Ni Elder Dale G. Renlund

Ti Korum dagiti Sangapulo-ket-dua nga Apostol

Kas ken ni Kapitan Moroni, makaawattayo iti nadiosan a tulong ken bileg para kadagiti dangadang a sangsanguentayo iti biag.

Ni Moroni a mangig-iggem iti wagayway ti wayawaya

Idi damo a binasak ti Libro ni Mormon, tinagiragsakko ti pakasaritaan dagiti gubat iti nagbaetan dagiti Nephite ken Lamanite. Naallukoyak iti pammati, kinalaing, ken taktika nga inusar ni Kapitan Moroni, maysa a komander ti militar a nadutokan a mangidaulo kadagiti amin a buyot a Nephite idi agtawen isuna laeng iti 25. Nasaririt, napigsa, ken masirib isuna. Naan-anay a naikumit isuna iti wayawaya ken pagimbagan dagiti taona. (Kitaen iti Alma 48:11–12.)

Imbes nga ipabigbig ni Moroni ti balligi ti militar iti bagina, impabigbig ni Moroni ti balligi iti Dios ken iti sagrado a suporta nga inawat dagiti buyotna manipud kadagiti saan a mannakigubat a babbai ken ubbing. Imbagana iti naabak a lider a kabusor: “Ti Apo … winayawayaannakayo kadagiti imami. Ket ita kayatko a nasken nga awatem a napasamak daytoy … gapu iti pammatimi ken iti panamatimi ken ni Cristo.” Kalpasanna imbinglay ni Moroni daytoy naimpadtuan a pannakaammo ken pannakaawat: “Tumulong ti Dios, ken mangtungpal, ken mangtaginayon kadakami, no la ketdi ta napudnokami kenkuana, ken iti panamatimi, ken ti pammatimi” (Alma 44:3, 4).

Iti panaglabas ti panawen, naamirisko nga inmodelo ni Moroni dagiti prinsipio a mabalintayo a yaplikar tapno matulongannatayo a mangsango kadagiti karit ti moderno a biagtayo. No aramatentayo ti pammati ken ni Jesucristo, ti Mangisalakan iti lubong, bendisionannatayo iti pannakabalinna. Ngem tapno maaramidna daytoy ken tapno mabigbigtayo dagiti bendisionna, kasapulan a maawatantayo ti panggeptayo, agestratehia para iti balligi, ken agsagana para kadagiti dangadang a mainaig iti metapora a sangsanguentayo, kas met laeng iti panagsagana ken panangsango ni Moroni kadagiti pudno a dangadang iti biagna. No aramidentayo daytoy, suportarandatayo ti Nailangitan nga Ama ken ni Jesucristo.

Pannakaawat iti Panggeptayo

Inulit-ulit nga impalagip ni Moroni kadagiti tao no siasinoda (agtawid iti katulagan ni Abraham), no siasinoda (patpatgen nga annak ti Dios), ken ti gapu a nakilabanda (pamilia, pammati, ken wayawaya). Insuro ni Moroni kadagiti taona a makilablabanda para iti mismo a pannakaisalakanda ken para iti wayawaya manipud pannakairurumen ken pannakaadipen. Iti kasupadina, nakiranget dagiti kabusorda para iti personal a pannakaitan-ok ken pannakabalin babaen ti panangsakupda kadagiti dadduma.

Idi inkagumaan ti sumagmamano a Nephite nga agawen ti turay para iti personal a gunggona, pinigis ni Moroni ti kagayna ket insuratna iti maysa a pedaso daytoy dagiti kangrunaan nga elemento ti mensahena: “Kas panglaglagip iti Diostayo, ti relihiontayo, ken wayawayatayo, ken ti talnatayo, dagiti assawatayo, ken dagiti annaktayo.” Intag-ayna daytoy a bandera, nga inawaganna iti “ti wagayway ti wayawaya,” iti murdong ti maysa a poste ket inusarna dayta a mangipalagip kadagiti tao no ania ti kaipapanan ti pannakidangadang ken tapno pagtitiponenna ida para iti panggep. (Kitaen iti Alma 46:12–13, 19–20.)

Ita nga agdama agbibiagtayo iti lubong a “ti pannakidangadangtayo saan a maibusor iti lasag ken dara, no di ket kadagiti … agturay iti lubong daytoy a sipnget … [ken] kadagiti espiritu ti kinadakes” (Taga Efeso 6:12). Kasapulantayo met a mapalagipan no ania ti maipapan iti pannakidangadang. Ni Elder Neal A. Maxwell (1926–2004), sigud a miembro ti Korum dagiti Sangapulo-ket-dua nga Apostol, inyebkasna daytoy a kapanunotan iti nalaing, nupay ababa, a panagsasarita.

Idi 2004, sinarungkarak ni Elder Maxwell iti kuartona iti ospital saan a nagbayag sakbay a natay. Naasi unay iti tunggal maysa a simmarungkar wenno timmulong kenkuana. Simrek iti kuartona dagiti agay-aywan iti salun-at ket rimmuarda nga agsangsangit. Kinunak kenkuana, “Elder Maxwell, talaga a narigat daytoy.” Napaisem ket kinunana, “O, Dale, agnanayontayo a parsua nga agbibiag iti mortal a lubong. Addatayo iti ruar ti elementotayo, kas kadagiti ikan a rummuar iti danum. No laeng addaantayo iti agnanayon a pannirigan a ti ania man kadaytoy ket adda aniaman a kaipapananna.”

Ditay koma pulos malipatan ti dakkel a buklen ti nadiosan a kinatao ken agnanayon a pagtungpalantayo ken dagiti diabolikal a puersa a sumuppiat kadatayo. Ti umno a pannakaawat iti plano ti Nailangitan nga Ama ti mangparegta kadatayo nga agtultuloy a makiranget para iti agnanayon a pannakaisalakantayo ken para iti pannakawayawayatayo manipud iti naespirituan a pannakaadipen.

Panangestratehia para iti Balligi

Iti intero a pannakidangadang dagiti buyotna, nagestratehia ni Moroni tapno masigurado ti balligi. Inusarna dagiti espia a mangtakuat kadagiti aktibidad ken panggep dagiti kabusorna. Nagsapul iti panangiturong manipud iti propeta, ni Alma. Kalpasanna, inusar ni Moroni dayta naparegta nga impormasion iti wagasna iti pannakigubat. Inkabilna dagiti resources segun iti kasapulan, a nangikabil iti ad-adu a soldado kadagiti siudad a saan unay a nasarikedkedan. Estratehiko nga inkeddengna dagiti plano ti operasion a naibatay kadagiti napabaro nga impormasion.

Isu ti nakagun-od iti kasta kadagiti pagimbagan kadagiti buyot ti kabusor. Saan a pulos a kontento kadagiti napalabas a balligi; imbes ketdi, intultuloyna a pinasayaat ti kapasidadna ken dagiti buyotna a mangsango kadagiti karit iti masanguanan.

Mabalintayo nga usaren dagiti umasping a wagas a makilangen kadagiti naespirituan a kabusor. Mabalintayo a rugian babaen ti panangbigbig no ania ti padpadasen nga aramiden ni Satanas iti biagtayo. Padasenna a singaennatayo manipud iti panggeptayo. No maipasangotayo iti sulisog, nasken nga saludsodentayo iti bagitayo:

Kasano a maitumpok daytoy nga aramid iti biangko a maibusor iti naipalgak a balikas ti Dios?
Ania dagiti bunga ti panangaramid iti daytoy a tignay?
Tulongannak kadi daytoy nga aramid a mangtungpal iti panggepko ditoy daga?

Nasken pay a bigbigentayo ti kamaudianan a pagbanagan ti panagtulnog uray kadagiti babassit a sulisog. Bayat ti panagtulnogtayo iti sulisog, inumentayo ti “in-inut a sabidong” (Alma 47:18), maysa nga epektibo unay nga estratehia nga us-usaren dagiti bileg ti kinadakes a mabalin a mangiturong kadagiti naespirituan a bunga ti pannakapapatay.

Mabalintayo a pabilgen ti bagitayo maibusor kadagiti sulisog ni Satanas babaen ti panangsurot iti panangiturong nga awatentayo manipud iti propetatayo iti ud-udina nga aldaw. Ti panangaramid iti kasta ti makatulong kadatayo a mangtaginayon iti agnanayon a pannirigan a babaen iti dayta ket matingitingtayo dagiti aramidtayo. Ti panagestratehia no kasano a sanguentayo dagiti sulisog a tumaud iti nadumaduma a tay-ak ti biagtayo ket mangtulongto kadatayo a mangaramid kadagiti naum-umisu a pili iti kanito. Dagiti naipasakbay a naiplano nga estratehia ken wagas ket mangtulongto kadatayo a mangidepensa kadagiti pakasingaan manipud iti agnanayon a panggeptayo.

Maysa a pagarigan ket ti teknolohia. Ti teknolohia ket mabalin a doble ti tademna nga espada, agpadpada a maaramat ken makadangran, depende no kasano ti panangusartayo iti dayta. Tapno matulongannatayo nga agpili kadagiti nainsiriban maipapan kadagiti alikamentayo, mabalin nga agibasar dagiti agtutubo ken nataengan iti “Taking Charge of Technology” ken Para iti Pigsa dagiti Agtutubo: Maysa a Pangiwanwan iti Panagpili. Dagitoy ti mangipalagip kadatayo iti panggeptayo, mangitudo kadatayo ken ni Jesucristo, ken tumulong kadatayo a mangawis iti Espiritu Santo iti biagtayo. Ti panagplano no kasano, kaano, ken sadino ti pangusarantayo iti teknolohia ket mangpatibkerto kadatayo a maibusor kadagiti nababa, nailubongan a taktika.

Panagsagana para kadagiti Dangadang a Mainaig iti Metaporika

Iti panangpadpadaanna kadagiti umay a gubat, insagana ni Moroni dagiti taona a saggaysa nga addaan kadagiti kabal, kalasag, kallugong, ken napuskol a kawes. Insaganana dagiti taona a sangkamaysa babaen ti pananglikmutna kadagiti siudad nga addaan kadagiti sarikedked, a nangipuesto kadagiti igid ti daga iti aglawlawda.

Iti kinaespirituan, saggaysa nga agsaganatayo babaen iti panagtungpal kadagiti bilin ti Dios. Mangaramid ken agtungpaltayo kadagiti katulagan iti Dios a manggun-od iti bileg ni Jesucristo iti biagtayo. Makiramantayo kadagiti personal, pribado nga aramid ti debosion, kas iti panagkararag, panagayuno, ken panagsukisok kadagiti nasantuan a kasuratan. Agtignaytayo pay iti pammati, a sumungsungbat iti naespirituan a panangiturong nga awatentayo. Sipapanunot nga agsagana ken maikaritayo a makiranud iti sakramento. Bayat ti panangaramidtayo iti kasta, agbalin a napudpudno ti Mangisalakan iti biagtayo, kas met laeng no kasano nga Isu ket pudno ken ni Moroni, a natibker iti pammatina ken ni Jesucristo. Ammo ni Moroni a mabalinna ti agpannuray iti Mangisalakan para iti panangiturong ken pannakaispal (kitaen iti Alma 48:16). Makapagpannuraytayo met ken ni Jesucristo para iti panangiturong ken pannakaispal.

Ad-adda a makapagsaganatayo babaen ti panangpapigsa kadagiti pamiliatayo. Binukelnatayo ti Nailangitan nga Amatayo kadagiti pamilia tapno matulongannatayo nga agbalin a naragsak ken masursuro no kasano ti agsubli Kenkuana. Dagiti pamiliatayo ti mabalin a pagtaudan ti tulong para kadatayo. Mariknatayo amin ti rag-o ken ayat no laglagipentayo a pasettayo ti naindaklan a pamilia ti Dios, ania man ti kasasaad ti tunggal maysa dagiti pamiliatayo.

Mabalintayo a sangkamaysa a makagun-od iti pigsa ken agsagana para kadagiti naespirituan a dangadangtayo bayat ti pannakikappengtayo kadagiti komunidad dagiti Santo. Dagiti stake ken distritotayo ti mangipaay iti kasta a lugar a pagkamangan ken saluad. Mabalintayo a taraonan ti tunggal maysa iti naespirituan, agtitinnulongtayo a mangtungpal kadagiti bilin ti Dios, ken agpipinnaregta nga agpannuray ken Cristo, kanayon ken nangnangruna kadagiti panawen ti karit. No agtitipontayo, maamiristayo a saantayo nga agmaymaysa a mangsaranget kadagiti dangadangtayo. Addaantayo kadagiti gagayyem, mannursuro, ken lider a makatulong ken makasalaknib kadatayo. Napigpigsatayo amin no agsaganatayo a sangkamaysa.

Makapainteres ta impateg ni Moroni ti amin a ragsak dagiti kailianna iti panagbalin a napudno iti pammatida iti Dios ken iti relihionda. Kas ken ni Moroni, nasken a maamiristayo nga umay ti rag-o gapu iti Nailangitan nga Ama ken ti planona ken gapu ken ni Jesucristo ken ti Pannubbotna. Bayat ti pannakaawattayo iti panggeptayo, panagestratehia para iti balligi, ken panagsagana para kadagiti dangadang a mainaig iti metapora, umawattayo iti nadiosan a tulong ken bileg.

Kas ken ni Moroni, ammok a yeg ti Nailangitan nga Ama ken ni Jesucristo ti kangrunaan a wayawaya manipud iti pannakaadipen—wayawaya manipud iti ipapatay ken basol. Bendisionandatayo iti bilegda no kumitatayo Kadakuada iti amin a banag.

© 2024 by Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, Agosto 2024. Ilokano. 19294 864