God El ac Ahkkweye ac Liye Kuhtyang

Sel Elder Dale G. Renlund

Sin U luhn Mwet Sap Singucul Luo

Kuht kuh in eis kahsruh kuhlacna ac kuh nuhke mweun ma kuht puhlakihn in moul se inge oacna Kacptin Moroni.

Kacptin Moroni el kohlwack fuhlwack in sukohsohk

Ke nga tuhfahna riti Puk luhn Mormon ke pacl se emet, Nga luhngse riti ke mweun ma sikyak inmahsrlon mwet Nephites ac mwet Lamanites ah. Nga nuhnkuh yohk ke luhlahlfongi, suhmaht, ac ohiyac ma orekmakihnyuck sel Kacptin Moroni, sie mwet sap ma sollac tuh in kol nohfohn mwet in mweun luhn Nephite ah ke el yac 25 ah. El lahlmwetmwet, fokoko, ac suhmaht. El orekma na upac nuh ke sukohsohk ac karihngihnyen mwet lal. (Liye Alma 48:11–12.)

Ke elos kuhtanglah mweun uh Moroni el tiacna puhsrkuhlwack nuh luhng tuhsruhk, el sang kuloh ke orwaclah wo lal nuh sin God ac nuh sin muhtwacn ac tuhlihk ke elos sang ahkkweyeyuhk nuh sin solse lal. El fahk nuh sin mwet lokalok lal: “Leum … pa eiskomyang nuh lun pouk uh. Ac inge nga kena tuh kom in kahlwem kac lah ma inge oreklac nuh sesr ke srihpen alu lasr ac luhlahlfongi lasr in Kraist. Moroni el fahkwelihk ke nuhank lal: “God El ac kahsruh, ac liyacacng, ac karihngihn kuht, kuht fin oaru nuh Sel, ac nuh ke luhlahlfongi lasr, ac alu lasr” (Alma 44:3, 4).

Nga akihlacnwack lah ma Moronni el luti inge kht kuh in orekmakihn nuh sesr in kahsrwe kuht kuhtanglah ma tuhkuh sun kuht ke moul lasr misenge. Ke kuht ahkyohkye luhlahlfongi lasr ke Jisus Kraist, Mwet Lahngo luhn facluh, El ac ahkinsewowoye kuht ke kuh lal. Tuhsruhk kuht enenuh in kahlwem ke sripac lasr uh, orekma nuhke orwaclah wo, ac ahkolah nuhke ma upac e sun kuht, oacna ke Moroni el ahkolah nuhke mweun sikyak in moul lal, el ac use kuh lal. Ke kuht oruh uh, Pahpah tuhmahsr inkosrao ac Jisus Kraist ac ahkkweye kuht ac liye kuhtyang.

Kahlwem ke Sripac Lasr

Moroni el kalweni na in fahk nuh sin mwet ah lah elos (mwet usrui olwelah lal Abraham), suc elos pa (tuhlihk sacohklacna nuhtin God), ac pa sripac ses elos acnwuhk kac (sucu, luhlahlfongi, ac sukohsohk). Moroni el luti mwet lal lah elos mweun nuhke moul lalos ac sukohsohk lalos liki ahkkohs ac kapihr. Tuhsruhktuh, mwet lokalok lalos elos acnwuhk kena sripen luhkuhk ac kuh ke elos ac uniyac mwet sahyac.

Ke kuhtuh sin mwet Nephites ah suk in kol ke luhngse kuh kuh lalos sifacna, Moroni el seyac nuknuk lal ah ac suhmuhslah kac mwe fahkwack na yohk sripac se: Mwe acsmakihn ke God lasr, alu lasr, ac sukohsohk lasr, ac mislac, muhtwacn kiacsr, ac tuhlihk nahtuhsr. El kuhlwack flwack se inge, suc el pahngon “sifac luhn moul sukohsohk,” ke sahflahiyacn pol soko inge ac orekmakihn in ahkacsmakihn mwet lal ke sripen mweun lalos ac in orwaclosweni nuhke sripac se inge. (Liye Alma 46:12–13, 19–20.)

Ke mweun in nguhn ke moul se inge, “kuht tia mweuni mahno ac srah, tuhsruk ma yohk, kuh, lain leum luhn ma lohsr luhn facl se inge, ac lain nguhn fohkfohk ke acn fuhlwact” (Ephesians 6:12). Kuht enenuh pac in ahkacsmakihyeyuhk ke meac kuht mweun nuhkac uh. Elder Neal A. Maxwell (1926–2004), sie mwet Sap Singucul Luo met, el fahkwack nuhnak se inge ke sie sramsram fototo.

Ke yac 2004 ah, Nga muhtwacta nuh yohrohl Elder Maxwell ke infuhkihl in uhspituhl lal met liki na el misac ah. El arulacna kuhlwacng nuh sin mwet nuhkwewa ma muhtwacta yohrohl kuh kahsrwel ah. Mwet orekma ke acn in ono uh utyak nuhke infuhkihl lal uh ac tuhng tifoklac. Nga fahkwacng nuhsel, “Elder Maxwell, ma se inge arulacna upac.” El isrwacsr ac fahk, “Oh, Dale, kuht mwet tiacna kuh in misac muhta ke facl se inge. Kuht srolah liki acn lasr, oacna ke ik uh srolah liki kof uh. Fin kuht kuh in ngwetlah pal na kuht kuh in kahlwem ke ma inge.

Kuht in kalweni in liye ohiyac muhtahl lasr ac moul ma pahtpaht lasr ac lokoalok koluk ma lain kuht. Kuht fin kahlwem ke plwacn luhn Pahpah tuhmasr Inkosrao e pahtok kuht in kampare na nuhke moul ma pahtpaht lasr ac ke sukohsohklah lasr liki kapihr luhn nguhn.

Orekmakihn kain in ohiyac nuhke Orwaclah wo

Ke mweun nuhkwewa ma solse lal oruh, Moroni el orekmakihn kain in ohiyac elos in orwaclah wo. El orekmakihn mwet in spai in konwacack ma mwet lokalok lal oruh. El suk inkacnek pwacye sel mwet pahluh, Alma. Moroni el orekmakihn kahs lal Alma in kahsrwel ke inkacnek in mweun lal. El kihtaclihk ma uh fal nuhke enenuh, fihliyac solse ke siti ma srihklac kuh muhnahs loangweyuhk we. El orekmakihn kain in ohiyac kuh inkacnek in orwaclah plwacn lal fal nuhke mwe etwacack sasuc el eis.

Pwacnwacng el eis kuh fin solse luhn mwet lokalok lal. El tiacna falkihn itto lal ke pacl somlah; tuhsruhk, el tahfwelah na in ahkwoyacllah ac solse lal nuhke ma upac e tuhfah sonuhltahl tok.

Kuht kuh in orekmakihn kain in inkacnek se lal inge nuhke ma upac kuht puhla ke moul in nguhn lasr. Kuht kuh in muhtwacwacack in akihlen lah mac Setuhn el srihke in oruh ke moul lasr uh. El srihke in lusrong kuht liki sripac lasr uh. Ke kuht sun mwe sruhf uh, kuht enenuh in siyuhk sesr sifacna:

Mukwikwi se inge el fuhkah lain kahs luhn God?
Meac e tuhkuh kac fin nga orwaclah mukwikwi se inge?
Yac mukwikwi se inge e kahsrweyuc in ahkfahsryelah sripac luhk fin facluh?

Kuht enenuh in akihlen ma e tuhkuh ke kuht e sruhflah ke finne mwe sruhf srihsrihk. Ke kuht muhnahslah ke mwe sruhf uh, kuht kanglah “pwesin na luhlahp” (Alma 47:18), inkacnek se ma fokoko emet ke kuh luhn ma koluk ma kuh in pwen kuht nuhke muhnahslah luhn nguhn.

Kuht kuh in loangwe kuhtlac liki mwe sruhf lal Setuhn ke kuht ukwe inkacnek ma kuht eis sin mwet pahluh lasr misenge uh. Kuht fin oruh ohinge kuht e kuh in ngwetlah pal ac liye ma fal kuht enenuh in oruh. Sokwack kain in inkacnek kuht in kuhtanglah mwe sruhf uh ac kahsrwekuht in sulaclah ma wo ke pacl sacn. Inkacnek kuh oniyac ma kuht plwacnwelah na [met e kahsrwe kuht in lain ma e lusrong kuht liki sripac lasr.

Sie mwe srihkasrak an pa tacknaloji. Tacknoloji el kuh pac in oacna sie mitmit ma kohsroh kwewana sait kac ah, ac yohk srihpac ac oacyacpac sensen, wiwi na orerkmakihnyac sesr In kahsrwekuht oraclah sulaclah wo nuhke kuhfwen tacknoloji nahtuhsr, fuhsr ac mahtuh kuh in orekmakihn, ac pa kol ke tacknoloji uh” and Mwe ahkkweye mwet fuhsr: kolyuck nuhke sulaclah. Ma inge ahkacsmahkihnyekuht ke srihpac lasr, srihsrngihkuht nuh yohrohl, ac kahsrwekuht suli nguhn muhtahl nuhke moul lasr. Plwacnwelah fuhkah, ngac, ac oyac kuht ac orekmakihn tacknoloji ac loangwekuhtlac liki ohiyac koluk, ohiyac lal setuhn.

Ahkolah nuhke mweun ke nguhn

Moroni el ahkolah mwet in mweun nuhkwewa lal ke prahsplet, mwe loang, susu, ac oacyacpac nuknuk mahtoltol met liki mweun suc ac tuhfah tuhkuh. El lafuhswack fohk raunwelah siti ah,muhsahelah singkac in muh ahkolah kwewa mwet ke siti sac nke mweun uh.

Kuht kais sie ahkolah nguhnasr ke kuht liyacacng masap luhn God. Kuht oraclah olwelah lasr sin God ac liyacacng olwelah lasr inge ma use kuh lal Jisus Kraist nuhke moul lasr uh. Kuht oruh ohiyacn alu lasr sifacna, kain se nuhke pruhe, lalo, ac riti ke ma suhmuhslah. Kuht oacyacpac orekma ke luhlahlfongi, nuhke kolyuhk luhn nguhn suc kuht eis. Kuht ahksasucye olweacng uh ke Sacnri ke kuht ipeis ke kuhfa luhn Leum uh. Ke kuht oruh uh, Mwet Lahngo el fokokoi ke moul lasr uh, oacna ke el mwet pwacye ac moul se sel Moroni, suc tuh na kuh ke luhlahlfongi lal ke Jisus Kraist. Moroni el etuh lah el kuh in luhlahlfongi kacl Mwet Lahngo ke kolyuhk lal (liye Alma 48:16). Kuht kuh pac in ngwet nuh ruhl Jisus Kraist ac luhlahlfongi kolyuhk lal.

Kuht kuh in ahkyohkye pac ahkolah lasr uh ke kuht ahfokokoye sucu lasr uh. Pahpah tuhmasr Inkuhsrao El oakiyac sucu uh in kahsrwe kuht in engan ac lotwelah lah kuht e fuhkah fohlohklac nuh yohrohl. Sucu lasr uh kuh in mwe kahsruh se nuh sesr. Kuht nohofohn kuh in puhla engan ac luhngse ke kuht esam lah kuht ipin sucu lal God, finne kuht mwet fuhkah se ke sucu lasr sifacna.

Kuht kuh in eis kuh ac ahkolah nuhke mweun nuhke nguhn lasr uh ke kuht wi toeni luhng mwet luhlahlfongi uh. Lohm alu lasr inge use nuh sesr acn in monglac ac karihngihnyuhk. Kuht kuh in ahkkapye kuht kais sie, kahsruh sie sin sie in liyacacng masap luhn God, ac pahtok kais sie sin sie in ngwet nuh yohrohl Kraist, pacl nuhkwewa finnne nuhke pac upac. Ke kuht fahsrweni uh, kuht akilacnack lah kuht tiacna muhkwena ke mweun lasr. Oasr kawuhk lasr, mwet luti, ac mwet kol suc kuh in kahsrwe kuht ac karihgnihn kuht. Kuht nohfohn fokoko ke kuht tuhkweni ahkolah uh.

Moroni el sang nohfohnna engan luhn mwet lal ke elos pwacye nuhke luhlahlfongi lalos ke God ac alu laltahl. In oacna Moroni, kuht enenuh in akihlen lah engan uh tuhkuh ke sripen Pahpah Tuhmasr Inkuhsrao ac plwacn lal ac ke sripacl Jisus Kraist ac Iwaclah lal. Ke kuht muhtwacwacack in kahlwem ke srihpac lasr uh, ac orekmakihn kain in ohiyac nuhke oraclah wo, ac ahkolah nuhke mweun ke nguhn, kuht eis kahsruh ac kuh sin God.

Oacna Moroni, Nga etuh lah Pahpah Luhng ac Jisus Kraist elos use sukohsohklah liki kapihr—sukohsohk liki misac ac ma koluk. Elos ahkinsewowoye kuht ke kuh lalos ke kuht ngwet nuh selos ke ma nuhkwewa uh.

© 2024 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac ke lweng: 6/19. Luhngasyucklac luhn Monthly Liahona Message, August 2024. Kosraean. 19294 868