ພຣະເຈົ້າຈະ ອູ້ມຊູ ແລະ ປ້ອງກັນເຮົາ

ໂດຍ ແອວເດີ ແດວ ຈີ ເຣັນລັນ

ແຫ່ງກຸ່ມອັກຄະສາວົກສິບສອງ

ເຊັ່ນດຽວກັບນາຍທັບໂມໂຣໄນ, ເຮົາສາມາດຮັບຄວາມຊ່ວຍເຫລືອ ແລະ ພະລັງຈາກສະຫວັນສຳລັບການສູ້ຮົບທີ່ເຮົາປະເຊີນໃນຊີວິດ.

ເມື່ອຂ້າພະເຈົ້າອ່ານພຣະຄຳພີມໍມອນເປັນຄັ້ງທຳອິດ, ຂ້າພະເຈົ້າມັກປະຫວັດສາດສົງຄາມລະຫວ່າງຊາວນີໄຟ ແລະ ຊາວເລມັນຫລາຍ. ຂ້າພະເຈົ້າປະທັບໃຈໃນສັດທາ, ຄວາມສະຫລຽວສະຫລາດ, ແລະ ຍຸດທະວິທີທີ່ນຳໃຊ້ໂດຍນາຍທັບໂມໂຣໄນ, ຜູ້ບັງຄັບບັນຊາກອງທະຫານທີ່ໄດ້ຮັບແຕ່ງຕັ້ງໃຫ້ເປັນຜູ້ນຳຂອງກອງທັບຊາວນີໄຟ ເມື່ອເພິ່ນອາຍຸພຽງແຕ່ 25 ປີເທົ່ານັ້ນ. ເພິ່ນເປັນຄົນມີສະຕິປັນຍາ, ແຂງແຮງ, ແລະ ສະຫລາດຫລັກແຫລມ. ເພິ່ນໄດ້ມຸ່ງໝັ້ນຕໍ່ອິດສະລະພາບ ແລະ ສະຫວັດດີພາບຂອງຜູ້ຄົນຂອງເພິ່ນ. (ເບິ່ງ ແອວມາ 48:11–12.)

ແທນທີ່ຈະໃຫ້ກຽດຄວາມສຳເລັດທາງກອງທະຫານແກ່ຕົນເອງ, ໂມໂຣໄນໄດ້ຍົກຄວາມສຳເລັດໃຫ້ແກ່ພຣະເຈົ້າ ແລະ ໃຫ້ແກ່ການສະໜັບສະໜູນທີ່ກອງທັບຂອງເພິ່ນໄດ້ຮັບຈາກພວກແມ່ຍິງ ແລະ ເດັກນ້ອຍທີ່ບໍ່ໄດ້ຮ່ວມຮົບ. ເພິ່ນໄດ້ບອກຜູ້ນຳສັດຕູທີ່ຜ່າຍແພ້ວ່າ: “ພຣະຜູ້ເປັນເຈົ້າ … ສົ່ງຕົວທ່ານມາຢູ່ໃນກຳມືຂອງພວກເຮົາ. ແລະ ບັດນີ້ຂ້າພະເຈົ້າຢາກໃຫ້ທ່ານເຂົ້າໃຈວ່າ ມັນເປັນໄປແນວນີ້ … ເພາະສາດສະໜາ ແລະ ສັດທາຂອງພວກເຮົາໃນພຣະຄຣິດ.” ແລ້ວໂມໂຣໄນກໍໄດ້ແບ່ງປັນຄວາມຮູ້ແຈ້ງແຫ່ງຄຳທຳນາຍວ່າ: “ພຣະເຈົ້າອູ້ມຊູ ແລະ ປົກປັກຮັກສາ ແລະ ປ້ອງກັນພວກເຮົາ, ຕາບໃດທີ່ພວກເຮົາຊື່ສັດຕໍ່ພຣະອົງ, ຕໍ່ສັດທາຂອງພວກເຮົາ, ແລະ ຕໍ່ສາດສະໜາຂອງພວກເຮົາ” (ແອວມາ 44:3, 4).

ເມື່ອເວລາຜ່ານໄປ, ຂ້າພະເຈົ້າກໍໄດ້ຮູ້ວ່າ ໂມໂຣໄນໄດ້ເປັນແບບຢ່າງເຖິງຫລັກທຳທີ່ເຮົາສາມາດນຳໃຊ້ເພື່ອຊ່ວຍໃຫ້ເຮົາປະເຊີນກັບຄວາມທ້າທາຍຕ່າງໆຂອງຊີວິດຍຸກໃໝ່ຂອງເຮົາ. ເມື່ອເຮົາໃຊ້ສັດທາໃນພຣະເຢຊູຄຣິດ, ພຣະຜູ້ຊ່ວຍໃຫ້ລອດຂອງໂລກ, ພຣະອົງກໍຈະອວຍພອນເຮົາດ້ວຍອຳນາດຂອງພຣະອົງ. ແຕ່ເພື່ອໃຫ້ພຣະອົງເຮັດເຊັ່ນນັ້ນ ແລະ ເພື່ອໃຫ້ເຮົາຮູ້ຈັກເຖິງພອນຂອງພຣະອົງ, ເຮົາຈຳເປັນຕ້ອງເຂົ້າໃຈຈຸດປະສົງຂອງເຮົາ, ວາງຍຸດທະສາດສູ່ຄວາມສຳເລັດ, ແລະ ກຽມພ້ອມສຳລັບການສູ້ຮົບທາງການປຽບທຽບທີ່ເຮົາປະເຊີນ, ເຊັ່ນດຽວກັບທີ່ໂມໂຣໂນໄດ້ກຽມພ້ອມ ແລະ ປະເຊີນໃນການສູ້ຮົບທີ່ແທ້ຈິງໃນຊີວິດຂອງເພິ່ນ. ເມື່ອເຮົາເຮັດເຊັ່ນນັ້ນ, ພຣະບິດາເທິງສະຫວັນ ແລະ ພຣະເຢຊູຄຣິດຈະອູ້ມຊູ ແລະ ປ້ອງກັນເຮົາ.

ການເຂົ້າໃຈຈຸດປະສົງຂອງເຮົາ

ໂມໂຣໄນໄດ້ຢໍ້າເຕືອນຜູ້ຄົນຢ່າງຊໍ້າໆວ່າ ພວກເຂົາເປັນໃຜ (ຜູ້ສືບທອດພັນທະສັນຍາແຫ່ງອັບຣາຮາມ), ພວກເຂົາເປັນຂອງໃຜ (ລູກໆທີ່ຮັກຂອງພຣະເຈົ້າ), ແລະ ອຸດົມການທີ່ພວກເຂົາຕໍ່ສູ້ເພື່ອ (ຄອບຄົວ, ສັດທາ, ແລະ ອິດສະລະພາບ). ໂມໂຣໄນໄດ້ສິດສອນຜູ້ຄົນຂອງເພິ່ນວ່າ ພວກເຂົາກຳລັງຕໍ່ສູ້ເພື່ອຄວາມຢູ່ລອດຂອງພວກເຂົາເອງ ແລະ ເພື່ອອິດສະລະພາບຈາກການກົດຂີ່ ແລະ ຄວາມເປັນທາດ. ໃນທາງກົງກັນຂ້າມ, ສັດຕູຂອງພວກເຂົາຕໍ່ສູ້ເພື່ອການແຜ່ຄວາມເປັນໃຫຍ່ ແລະ ອຳນາດ ໂດຍການປາບປາມຜູ້ອື່ນ.

ເມື່ອຊາວນີໄຟບາງຄົນພະຍາຍາມທີ່ຈະຍາດຊິງສິດອຳນາດເພື່່ອຜົນປະໂຫຍດສ່ວນຕົວນັ້ນ, ໂມໂຣໄນໄດ້ຈີກເສື້ອຄຸມຂອງເພິ່ນ ແລະ ຂຽນອົງປະກອບຫລັກຂອງຂ່າວສານຂອງເພິ່ນໃສ່ຜ້າທີ່ຈີກອອກວ່າ: “ເພື່ອມັນຈະໄດ້ເປັນທີ່ລະນຶກເຖິງພຣະເຈົ້າຂອງພວກເຮົາ, ສາດສະໜາຂອງພວກເຮົາ, ແລະ ອິດສະລະພາບຂອງພວກເຮົາ, ແລະ ສັນຕິສຸກຂອງພວກເຮົາ, ແລະ ເມຍຂອງພວກເຮົາ, ແລະ ລູກຂອງພວກເຮົາ.” ເພິ່ນໄດ້ຍົກທຸງນີ້ຂຶ້ນ, ຊຶ່ງເພິ່ນເອີ້ນວ່າ “ປ້າຍແຫ່ງເສລີພາບ,” ທີ່ສົ້ນໄມ້ ແລະ ໃຊ້ມັນເພື່ອຢໍ້າເຕືອນຜູ້ຄົນວ່າ ການຕໍ່ສູ້ນັ້ນແມ່ນກ່ຽວກັບຫຍັງ ແລະ ເພື່ອລະດົມພວກເຂົາສູ່ອຸດົມການນັ້ນ. (ເບິ່ງ ແອວມາ 46:12–13, 19–20.)

ໃນການສູ້ຮົບທາງວິນຍານຂອງຊີວິດ, “ພວກເຮົາບໍ່ໄດ້ຕໍ່ສູ້ກັບເລືອດ ແລະ ເນື້ອໜັງ, ແຕ່ຕໍ່ສູ້ກັບ … ບັນດາຜູ້ມີອຳນາດ ແລະ ບັນດາເຫລົ່າວິນຍານຜີຊົ່ວຮ້າຍ” (ເອເຟໂຊ 6:12). ເຮົາ, ເຊັ່ນດຽວກັນ, ກໍຕ້ອງຮັບການຢໍ້າເຕືອນວ່າ ການຕໍ່ສູ້ນັ້ນແມ່ນກ່ຽວກັບຫຍັງ. ແອວເດີ ນຽວ ເອ ແມ໊ກສະແວວ (1926–2004), ອະດີດສະມາຊິກແຫ່ງກຸ່ມອັກຄະສາວົກສິບສອງ, ໄດ້ສະແດງຄວາມຄິດຂອງເພິ່ນໃນການສົນທະນາທີ່, ເຖິງຈະສັ້ນ, ແຕ່ກໍມີຄາລົມຄົມຄາຍ.

ໃນປີ 2004, ຂ້າພະເຈົ້າໄດ້ໄປຢ້ຽມຢາມແອວເດີ ແມ໊ກສະແວວໃນຫ້ອງໂຮງໝໍ ບໍ່ດົນກ່ອນທີ່ເພິ່ນຈະເສຍຊີວິດ. ເພິ່ນໃຈດີກັບທຸກຄົນທີ່ໄປຢ້ຽມຢາມ ຫລື ຊ່ວຍເຫລືອເພິ່ນ. ເຈົ້າໜ້າທີ່ສາທາລະນະສຸກໄດ້ເຂົ້າໄປໃນຫ້ອງຂອງເພິ່ນ ແລະ ໄຫ້ອອກມາ. ຂ້າພະເຈົ້າເວົ້າກັບເພິ່ນວ່າ, “ແອວເດີ ແມ໊ກສະແວວ, ມັນຍາກແທ້.” ເພິ່ນຫົວຂຶ້ນເບົາໆ ແລະ ກ່າວວ່າ, “ໂອ, ແດວ, ເຮົາເປັນສິ່ງມີຊີວິດນິລັນດອນທີ່ກຳລັງໃຊ້ຊີວິດໃນໂລກມະຕະ. ເຮົາຢູ່ນອກບ່ອນຂອງເຮົາ, ເໝືອນປາຂາດນໍ້າ. ພຽງແຕ່ເມື່ອເຮົາມີມຸມມອງນິລັນດອນເທົ່ານັ້ນ ສິ່ງເຫລົ່ານີ້ຈຶ່ງຈະສົມເຫດສົມຜົນ.”

ເຮົາບໍ່ຄວນລືມອົງປະກອບອັນໃຫຍ່ຫລວງຂອງທຳມະຊາດແຫ່ງສະຫວັນ ແລະ ຈຸດໝາຍປາຍທາງນິລັນດອນ ແລະ ກຳລັງຮ້າຍກາດທີ່ຕໍ່ຕ້ານເຮົາ. ການເຂົ້າໃຈແຜນຂອງພຣະບິດາເທິງສະຫວັນຢ່າງຖືກຕ້ອງ ຈະກະຕຸ້ນໃຫ້ເຮົາສູ້ຕໍ່ໄປ ເພື່ອຄວາມລອດນິລັນດອນຂອງເຮົາ ແລະ ເພື່ອອິດສະລະພາບຂອງເຮົາຈາກຄວາມເປັນທາດທາງວິນຍານ.

ວາງຍຸດທະສາດສູ່ຄວາມສຳເລັດ

ຕະຫລອດການສູ້ຮົບທີ່ກອງທັບຂອງເພິ່ນໄດ້ຕໍ່ສູ້, ໂມໂຣໄນໄດ້ວາງຍຸດທະສາດເພື່ອຮັບປະກັນຄວາມສຳເລັດ. ເພິ່ນໄດ້ໃຊ້ນັກສືບເພື່ອຈະໄດ້ຮູ້ຈັກກິດຈະກຳ ແລະ ຄວາມຕັ້ງໃຈຂອງສັດຕູຂອງເພິ່ນ. ເພິ່ນໄດ້ສະແຫວງຫາການຊີ້ນຳຈາກສາດສະດາ, ແອວມາ. ແລ້ວໂມໂຣໄນກໍໄດ້ໃຊ້ຄຳແນະນຳທີ່ດົນໃຈນັ້ນໃນແນວທາງການສູ້ຮົບຂອງເພິ່ນ. ເພິ່ນໄດ້ຈັດກຳລັງຊັບພະຍາກອນຕາມຄວາມຕ້ອງການ, ໂດຍວາງທະຫານເພິີ່ມໃນຕົວເມືອງທີ່ມີປ້ອມປ້ອງກັນໜ້ອຍກວ່າ. ເພິ່ນໄດ້ຕັ້ງແຜນປະຕິບັດການຢ່າງເປັນຍຸດທະສາດ ອີງຕາມຂໍ້ມູນປະຈຸບັນ.

ດ້ວຍເຫດນີ້, ເພິ່ນຈຶ່ງໄດ້ປຽບກອງທັບຂອງສັດຕູ. ເພິ່ນບໍ່ເຄີຍດີໃຈກັບໄຊຊະນະໃນອະດີດ; ແທນທີ່ແລ້ວ, ເພິ່ນໄດ້ສືບຕໍ່ປັບປຸງສະມັດຕະພາບຂອງເພິ່ນເອງ ແລະ ຂອງກອງທັບຂອງເພິ່ນ ເພື່ອຈັດການກັບຄວາມທ້າທາຍໃນອະນາຄົດ.

ເຮົາສາມາດໃຊ້ແນວທາງທີ່ຄ້າຍຄືກັນນີ້ ເພື່ອຈັດການກັບປໍລະປັກທາງວິນຍານ. ເຮົາສາມາດເລີ່ມຕົ້ນໂດຍການຮູ້ຈັກສິ່ງທີ່ຊາຕານກຳລັງພະຍາຍາມເຮັດໃນຊີວິດຂອງເຮົາ. ມັນພະຍາຍາມທີ່ຈະດຶງເອົາຄວາມສົນໃຈຂອງເຮົາໄປຈາກຈຸດປະສົງຂອງເຮົາ. ເມື່ອປະເຊີນກັບການລໍ້ລວງ, ເຮົາຄວນຖາມຕົນເອງວ່າ:

ການກະທຳໃນສ່ວນຂອງເຮົານີ້ ຂັດແຍ້ງກັບພຣະຄຳຂອງພຣະເຈົ້າທີ່ໄດ້ຮັບການເປີດເຜີຍແນວໃດ?
ຜົນສະທ້ອນຂອງການກະທຳນີ້ແມ່ນຫຍັງ?
ການກະທຳນີ້ຈະຊ່ວຍໃຫ້ເຮົາບັນລຸຈຸດປະສົງຂອງເຮົາເທິງແຜ່ນດິນໂລກບໍ່?

ເຮົາຍັງຄວນຮູ້ຈັກຜົນໄດ້ຮັບທ້າຍທີ່ສຸດຂອງການຍອມຕໍ່ແມ່ນແຕ່ການລໍ້ລວງທີ່ນ້ອຍທີ່ສຸດ. ເມື່ອເຮົາຍອມຕໍ່ການລໍ້ລວງ, ເຮົາກໍກິນ “ຢາພິດ … ເທື່ອລະໜ້ອຍ” (ແອວມາ 47:18), ຍຸດທະສາດທີ່ມີປະສິດທິພາບທີ່ສຸດທີ່ນຳໃຊ້ໂດຍອຳນາດຂອງຄວາມຊົ່ວຮ້າຍທີ່ສາມາດນຳໄປສູ່ຜົນທາງວິນຍານທີ່ຮ້າຍແຮງ.

ເຮົາສາມາດສ້າງປ້ອມປ້ອງກັນຕົວເອງຈາກການລໍ້ລວງຂອງຊາຕານ ໂດຍການເຮັດຕາມຄຳຊີ້ນຳທີ່ເຮົາໄດ້ຮັບຈາກສາດສະດາຍຸກສຸດທ້າຍຂອງເຮົາ. ການເຮັດເຊັ່ນນັ້ນ ຊ່ວຍໃຫ້ເຮົາຮັກສາມຸມມອງນິລັນດອນ ເພື່ອປະເມີນການກະທຳຂອງເຮົາ. ການໃຊ້ຍຸດທະສາດເຖິງວິທີທີ່ເຮົາຈະປະເຊີນກັບການລໍ້ລວງທີ່ເກີດຂຶ້ນໃນຫລາຍໆດ້ານຂອງຊີວິດເຮົາ ຈະຊ່ວຍໃຫ້ເຮົາເລືອກໄດ້ຢ່າງຖືກຕ້ອງຫລາຍຂຶ້ນໃນຂະນະນັ້ນ. ຍຸດທະສາດ ແລະ ແນວທາງທີ່ມີການວາງແຜນໄວ້ລ່ວງໜ້າ ຈະຊ່ວຍໃຫ້ເຮົາຕ້ານທານກັບສິ່ງລົບກວນຄວາມສົນໃຈຈາກຈຸດປະສົງນິລັນດອນຂອງເຮົາ.

ຕົວຢ່າງໜຶ່ງແມ່ນກ່ຽວກັບເທັກໂນໂລຈີ. ເທັກໂນໂລຈີ ສາມາດເປັນດາບສອງຄົມ, ທັງມີປະໂຫຍດ ແລະ ໂທດ, ຂຶ້ນກັບວ່າເຮົາຈະໃຊ້ມັນແນວໃດ. ເພື່ອຊ່ວຍໃຫ້ເຮົາເລືອກຢ່າງມີສະຕິປັນຍາກ່ຽວກັບອຸປະກອນຂອງເຮົາ, ທັງຄົນໜຸ່ມ ແລະ ຜູ້ອາວຸໂສ ສາມາດອ້າງອີງໃສ່ “Taking Charge of Technology” ແລະ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ. ສິ່ງເຫລົ່ານີ້ຢໍ້າເຕືອນເຮົາເຖິງຈຸດປະສົງຂອງເຮົາ, ຊີ້ເຮົາໄປຍັງພຣະເຢຊູຄຣິດ, ແລະ ຊ່ວຍເຮົາເຊື້ອເຊີນພຣະວິນຍານບໍລິສຸດມາສູ່ຊີວິດຂອງເຮົາ. ການວາງແຜນວ່າ ເຮົາຈະໃຊ້ເທັກໂນໂລຈີແນວໃດ, ເມື່ອໃດ, ແລະ ບ່ອນໃດ ຈະສ້າງປ້ອມປ້ອງກັນໃຫ້ເຮົາຕ້ານຍຸດທະວິທີທາງໂລກທີ່ຕໍ່າຊ້າໄດ້.

ການກຽມພ້ອມສຳລັບການສູ້ຮົບທາງການປຽບທຽບ

ໂດຍຕັ້ງຕາຖ້າການສູ້ຮົບທີ່ຈະມາເຖິງ, ໂມໂຣໄນໄດ້ກຽມຜູ້ຄົນຂອງເພິ່ນເປັນສ່ວນບຸກຄົນ ດ້ວຍເກາະປ້ອງກັນເອິກ, ໂລ່, ໝວກເກາະ, ແລະ ເສື້ອຜ້າທີ່ໜາ. ເພິ່ນໄດ້ກຽມຜູ້ຄົນຂອງເພິ່ນເປັນກຸ່ມຮ່ວມກັນ ໂດຍລ້ອມເມືອງຕ່າງໆດ້ວຍປ້ອມ, ຄູນດິນອ້ອມຮອບເມືອງໄວ້.

ໂດຍທາງວິນຍານແລ້ວ, ເຮົາກຽມພ້ອມເປັນສ່ວນບຸກຄົນ ໂດຍການຮັກສາພຣະບັນຍັດຂອງພຣະເຈົ້າ. ເຮົາເຮັດ ແລະ ຮັກສາພັນທະສັນຍາກັບພຣະເຈົ້າ ທີ່ດຶງດູດພະລັງຂອງພຣະເຢຊູຄຣິດເຂົ້າມາສູ່ຊີວິດຂອງເຮົາ. ເຮົາເຂົ້າຮ່ວມໃນການກະທຳທີ່ສ່ວນຕົວແຫ່ງການອຸທິດຕົນ, ດັ່ງເຊັ່ນ ການອະທິຖານ, ການຖືສິນອົດເຂົ້າ, ແລະ ການຄົ້ນຄວ້າພຣະຄຳພີ. ເຮົາຍັງກະທຳໃນສັດທາ, ໂດຍຕອບສະໜອງຕໍ່ການຊີ້ນຳທາງວິນຍານທີ່ເຮົາໄດ້ຮັບ. ເຮົາກຽມຕົວທີ່ຈະຮັບສ່ວນສິນລະລຶກດ້ວຍຄວາມຮູ້ສຶກທີ່ມີຄ່າຄວນ. ເມື່ອເຮົາເຮັດເຊັ່ນນັ້ນ, ພຣະຜູ້ຊ່ວຍໃຫ້ລອດຈະເປັນຈິງຫລາຍຍິ່ງຂຶ້ນໃນຊີວິດຂອງເຮົາ, ດັ່ງທີ່ພຣະອົງຊົງເປັນຈິງຕໍ່ໂມໂຣໄນ, ຜູ້ທີ່ໝັ້ນຄົງໃນສັດທາຂອງເພິ່ນໃນພຣະເຢຊູຄຣິດ. ໂມໂຣໄນຮູ້ວ່າ ເພິ່ນສາມາດເພິ່ງອາໄສພຣະຜູ້ຊ່ວຍໃຫ້ລອດໄດ້ ເພື່ອການຊີ້ນຳ ແລະ ການຊ່ວຍກູ້ (ເບິ່ງ ແອວມາ 48:16). ເຮົາກໍສາມາດເພິ່ງອາໄສພຣະເຢຊູຄຣິດເພື່ອການຊີ້ນຳ ແລະ ການຊ່ວຍກູ້ໄດ້ເຊັ່ນກັນ.

ເຮົາສາມາດກຽມພ້ອມໄດ້ເພີ່ມເຕີມ ໂດຍການເພີ່ມຄວາມເຂັ້ມແຂງໃຫ້ແກ່ຄອບຄົວຂອງເຮົາ. ພຣະບິດາເທິງສະຫວັນຂອງເຮົາໄດ້ຈັດໃຫ້ເຮົາເຂົ້າມາສູ່ຄອບຄົວ ເພື່ອຊ່ວຍໃຫ້ເຮົາມີຄວາມສຸກ ແລະ ຮຽນຮູ້ວິທີທີ່ຈະກັບຄືນໄປຫາພຣະອົງ. ຄອບຄົວຂອງເຮົາສາມາດເປັນແຫລ່ງແຫ່ງຄວາມຊ່ວຍເຫລືອສຳລັບເຮົາໄດ້. ເຮົາທຸກຄົນສາມາດຮູ້ສຶກເຖິງຄວາມຊື່ນຊົມ ແລະ ຄວາມຮັກໄດ້ ໂດຍການຈື່ວ່າ ເຮົາເປັນສ່ວນໜຶ່ງຂອງຄອບຄົວທີ່ຍິ່ງໃຫຍ່ຂອງພຣະເຈົ້າ, ບໍ່ວ່າສະພາບການຄອບຄົວສ່ວນບຸກຄົນຂອງເຮົາຈະເປັນແນວໃດກໍຕາມ.

ເຮົາສາມາດຮັບກຳລັງເປັນກຸ່ມ ແລະ ກຽມພ້ອມສຳລັບການຕໍ່ສູ້ທາງວິນຍານຂອງເຮົາ ເມື່ອເຮົາເຂົ້າຮ່່ວມຊຸມຊົນຂອງໄພ່ພົນ. ສະເຕກ ແລະ ທ້ອງຖິ່ນຂອງເຮົາ ໃຫ້ສະຖານທີ່ແຫ່ງການຫລົບໄພ ແລະ ການປ້ອງກັນເຊັ່ນນັ້ນ. ເຮົາສາມາດບຳລຸງລ້ຽງກັນແລະກັນທາງວິນຍານ, ຊ່ວຍເຫລືອກັນແລະກັນໃຫ້ຮັກສາພຣະບັນຍັດຂອງພຣະເຈົ້າ, ແລະ ຊຸກຍູ້ກັນແລະກັນໃຫ້ເພິ່ງອາໄສພຣະຄຣິດ, ຢູ່ສະເໝີ ແລະ ໂດຍສະເພາະໃນເວລາແຫ່ງຄວາມທ້າທາຍ. ເມື່ອເຮົາເຕົ້າໂຮມກັນ, ເຮົາກໍຮູ້ຈັກວ່າ ເຮົາບໍ່ໄດ້ຕໍ່ສູ້ກັບການສູ້ຮົບຂອງເຮົາພຽງລຳພັງ. ເຮົາມີໝູ່ເພື່ອນ, ຄູສອນ, ແລະ ຜູ້ນຳ ທີ່ສາມາດຊ່ວຍ ແລະ ປົກປ້ອງເຮົາ. ເຮົາທຸກຄົນເຂັ້ມແຂງຂຶ້ນ ເມື່ອເຮົາກຽມພ້ອມນຳກັນ.

ດ້ວຍຄວາມປະເສີດ, ໂມໂຣໄນໄດ້ຖືວ່າ ຄວາມສຸກ ທັງໝົດ ຂອງຜູ້ຄົນຂອງເພິ່ນ ແມ່ນການຊື່ສັດຕໍ່ສັດທາຂອງພວກເຂົາໃນພຣະເຈົ້າ ແລະ ສາດສະໜາຂອງພວກເຂົາ. ເຊັ່ນດຽວກັບໂມໂຣໄນ, ເຮົາຄວນຮູ້ຈັກວ່າ ຄວາມຊື່ນຊົມຍິນດີມີມາຍ້ອນພຣະບິດາເທິງສະຫວັນ ແລະ ແຜນຂອງພຣະອົງ ແລະ ຍ້ອນພຣະເຢຊູຄຣິດ ແລະ ການຊົດໃຊ້ຂອງພຣະອົງ. ເມື່ອເຮົາເລີ່ມເຂົ້າໃຈຈຸດປະສົງຂອງເຮົາ, ວາງຍຸດທະສາດສູ່ຄວາມສຳເລັດ, ແລະ ກຽມພ້ອມສຳລັບການສູ້ຮົບທາງການປຽບທຽບແລ້ວ, ເຮົາຈະໄດ້ຮັບຄວາມຊ່ວຍເຫລືອ ແລະ ພະລັງຈາກສະຫວັນ.

ເຊັ່ນດຽວກັບໂມໂຣໄນ, ຂ້າພະເຈົ້າຮູ້ວ່າ ພຣະບິດາເທິງສະຫວັນ ແລະ ພຣະເຢຊູຄຣິດ ນຳອິດສະລະພາບສຸດທ້າຍຈາກຄວາມເປັນທາດ—ອິດສະລະພາບຈາກຄວາມຕາຍ ແລະ ຄວາມບາບມາໃຫ້. ພວກພຣະອົງອວຍພອນເຮົາດ້ວຍອຳນາດຂອງພວກພຣະອົງ ເມື່ອເຮົາຫວັງເພິ່ງພວກພຣະອົງໃນທຸກສິ່ງ.

© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, August 2024. Laotian. 19294 331