“Anij Enaaj Rejetake im Kōjparok Kōj,” Liaona, O̧kw. 2024.
Ennaan eo an Liaona Kajjojo Allōn̄, O̧kwōj 2024
Anij E naaj Rejetake im Kōjparok Kōj
Āinwōt Kiaptin Moronai, jemaron̄ bōk jipan̄ eo ekwojarjar im kajoor eo n̄an tariņae ko jej jelmai ilo mour in.
Pija jān Eric Chow
Jinoin aō kar riiti Bok in Mormon, ekar em̧m̧an ippa bwebwenato in pata ko ikōtaan Rinipai ro im Rilamen ro. Ikar eppaļ kōn tōmak, lo̧ļe, im kōttōbalbal ko kar kōjerbali jān Kiaptin Moronai, juon ritōl in jarin tariņae eo em̧ōj jitōn̄ n̄an juon ritōl an aolep rūtariņae ro an Rinipai ke ekar 25 wōt iiō dettan. E ekar māletlet, dipen, im mājdik. Ekar kanooj in wujlepļo̧k n̄an anemkwoj im jeraam̧m̧an eo an armej ro doon. (Lale Alma 48:11–12.)
Ijello̧kin kar nebare tōprak eo an jarin tariņae n̄an e make, Moronai ekar leļo̧k aolep nebar n̄an Anij im kōn rejtak eo ekwojarjar rūtariņae ro an raar bōke jān kōrā ro im ajri ro. Ekar jiron̄ ritōl eo an jarin tariņae eo ekar luuj: “Irooj … eaar letok kom̧ ilo peim Im kiiō ikōņaan bwe kom̧in meļeļe bwe men in … kōnke kabun̄ eo am im am tōmak ilo Kraist.” Innām Moronai ekar kwaļo̧k kōļmenļo̧kjeņ in rikanaan eo an: “Anij Enaaj rejtake, im oņaake, im kōjparok kōm, toun wōt am m̧ool n̄an e, im n̄an tōmak eo am, im n̄an tōmak eo am” (Alma 44:3, 4).
Ālikin elōn̄ iien , ikar kile bwe pedped in katak ko kar ļōmi an Moronai me jemaron̄ kōjerbali n̄an jipan̄ kōj anjo̧ ioon apan̄ ko an mour ko ad rainin. Ilo ad kōjerbal tōmak ilo Jisōs Kraist, Rilo̧mo̧o̧r eo an laļ in, E enaaj kōjeraam̧m̧an kōj kōn An kajoor. Bōtaab n̄an An kōm̧m̧ane āindein im n̄an ad kile kōjeraam̧m̧an ko An, jej aikuj in meļeļe jibadbad eo ad, kōm̧m̧an karōk n̄an ļe, im m̧aanjabpopo n̄an tariņae ko jej jelm̧ai, ejja wōt an Moronai kar m̧aanjabpopo n̄an im kar jelm̧ae m̧ool in tariņae ko ilo mour eo an. Ilo ad kōm̧m̧ane āindein, Jemādwōj Ilan̄ im Jisōs Kraist renaaj rejtake im kōjparok kōj.
Meļeļe Jibadbad Eo Ad
Moronai ekar āliji im bar āliji n̄an kakeememej armej ro wōn er (rijolet ro an bujen eo an Ebream), ro me raar (ajri ro jitōnbōro nejin Anij), im un eo raar tariņae kake(baam̧le, tōmak, im anemkwoj). Moronai ekar katakin armej ro doon bwe raar ire bwe ren mour im kōn anemkwoj eo jān mour in kakure im kōm̧akoko. Ilo wāween eo juon, rikōjdāt ro aer raar ire n̄an kajoor eļap an juon make im kajoor kōn anjo̧ ioon ro jet.
Ke jet Rinipai raar kappukot n̄an bōk mālim eo n̄an an juon make jeraam̧m̧an, Moronai ekar potake kopā eo an im je ioon juon nuknuk m̧ōttan ko reaorōk ilo kenono eo an: “Ilo ememej ad Anij, ad kabun̄, im anemkwōj, im ad aenōm̧m̧an, kōrā ro pāleed, im ro nejid.” Ekar kotak būļāāk eo, eo ekar ņa etan “unin tōl in anemkwōj,” ilo jem̧ļo̧k in aļaļ eo im kar kōjerbale n̄an kakeememej armej ro unin tariņae eo im n̄an kōllowetak er n̄an un eo. (Lale Alma 46:12–13, 19–20.)
Ilo tariņae ko an jetōb ilomour in, “adwōj oktak e jab ippān bōtōktōk im kanniōk, a ippān … irooj in marok … [im] ippān jaran jetōb re nana” (Epesōs 6:12). Kōj, barāinwōt, aikuj in keememej kōn ta eo jej ire kake. Elder Neil A. Maxwell (1962–2004), juon kar uwaan Doulul eo an Jon̄oulruo Rijjilōk ro, kar kwaļo̧k ļōmņak in ilo juon iien bwebwenato, ijoke, ewājepedik.
Ilo 2004 eo, ikar loļo̧k Elder Maxwell ilo ruum̧ eo an ilo aujpitōļ m̧okta jān an jako. Ekar kanooj jouj n̄an aolep ro raar loļo̧k ak kar jipan̄ e. Rijerbal ro an aujpitōļ raar delon̄ ilo ruum̧ eo an im jan̄ ilo aer diwōjtok. Ikar ba n̄an e, “Elder Maxwell, menin elukkuun pen.” Ekar māidikdik im kar ba, “O, Dale, jej armej indeeo ilo juon mour wabanban. Jej jab pād ijo jikid, āinwōt an ek ko jab jād ilo dān. Ejjōb wōt n̄e ewōr ippād juon kōļmenļo̧kjeņ eo kōn indeeo innem aolepān menkein naaj alikkar.”
Jej aikuj jab jerwane aolep men kar aini ippān doon n̄an piktok kwojarjar ko ad im mejān kajjiik eo ad indeeo im kajoor ko renana me rej jum̧ae kōj. Ilo an jim̧we ad meļeļe karōk eo an Jemādwōj Ilan̄ enaaj ļujur ad n̄an tariņae kōn lo̧mo̧o̧r eo an indeeo im n̄an anemkwoj eo ad jān kōm̧akoko an jetōb.
Kōttōbalbal n̄an Jeraam̧m̧an
Ilo aolepān pata ko jarin tariņae eo an raar tariņae, Moronai ekar kōttōbalbal n̄an kanooj lale bwen ren jeraam̧m̧an. Ekar kōjerbal riwatwat ro n̄an wate m̧akūtkūt ko im jibadbad ko an rikōjdāt ro an. Ekar pukot tōl jān rikanaan eo, Alma. Innām Moronai ekar kōjerbal ļōmņak eo kar im̧we ilo wāween an etal in tariņae. Ekar kōjerbal kein jipan̄ ko ekkar n̄an aikuj, likūt elōn̄ļo̧k rūtariņae ro ilo jikin kweilo̧k ko me raar dik aer kajoor. Ekar kōttōbalbal ilo an kōm̧m̧ani karōk ko pedped ioon meļeļe ko rekāāl tata.
Kōn menin ekar bōk eļap jeraam̧m̧an ioon jarin tariņae ko an rikōjdāt ro. Ekar jab pedped ioon anjo̧ ko etto; ijoke, ekar wōnm̧aanļo̧k wōt n̄an kōkōm̧anm̧anļo̧k maron̄ ko an im jarin tariņae ko an n̄an ņa mejļan apan̄ ko ilju im jekļaj.
Jemaron̄ kōjerbal ejja ļamļam kein wōt n̄an ņa mejļan rijum̧ae ro an jetōb. Jemaron̄ jino kōn ad kile ta eo Setan ej kajjieon̄ kōm̧m̧ane ilo mour ko ad. Ej kajjieon̄ in kōm̧ad kōj jān jibadbad eo ad. N̄e jelm̧ae kōn kapo, jej aikuj kajjitōk ippād make:
-
Ekōjkan an kālet in aō nej jutak ņae naan eo Anij em̧ōj litok ?
-
Ta kaje ko n̄an bōk m̧akūtkūt in?
-
M̧akūtkūt in enaaj ke jipan̄ eō kakūrm̧ool jibadbad eo aō ioon laļ in?
Jej aikuj kile tōprak in jokālōt eo n̄an ron̄jake jekdo̧o̧n kapo ko reddik. Ilo ad ron̄jake kapo, jej bōk “unokan mej ilo jidikjidik” (Alma 47:18), juon kōl eļap an wājepedik kar kōjerbal jān kajoor ko an nana me maron̄ tōlļo̧k n̄an tōprak ko renanan ilo jetōb.
Jemaron̄ kōkajoorļo̧k kōj make ņae kapo ko an Setan ilo ad ļoor tōl eo jej bōke jān rikanaan eo ad raan kein. Ilo ad kōm̧m̧ane āindein ej jipan̄ kōj dāpij mājen kajjik eo an indeeo ilo ad etale jerbal ko ad. Kōttōbalbal ekōjkan ad jelm̧ae kapo ko renaaj waļok ilo elōn̄ eria ko ilo mour kein ad naaj jipan̄ kōj kōm̧m̧ane elōn̄ļo̧k kāālet ko rejim̧we ilo tōre en. Kōm̧m̧ani kōttōbalbal ko im ļamļam ko im̧aanļo̧k naaj jipan̄ kōj jutak ņae kapo ko jān jibadbad eo adindeeo.
Juon waanjon̄ak ej kōn technology. Technology emaron̄ erom juon jāje ruo mejān, ej jipan̄ im kakkure, pedped ioon wāween ad kōjerbale. ̄N̄an jipan̄ kōj kōm̧m̧ani kāālet ko rem̧m̧an kōn device ko ad, ro reddik im ro rōrūtto maron̄ etal n̄an “Taking Charge of Technology” im N̄an Kōkajoorļo̧k Jodikdik ro : Juon Unin Tōl n̄an Kōm̧m̧ani Kāālet ko. Men kein rej kakeememej kōj kōn jibadbad eo ad, ba kajjien Jisōs Kraist, im jipan̄ kōj karuwaineneiktok Jetōb Kwojarjar n̄an mour ko ad. Karōk ekōjkan, n̄aat, im ia eo jenaaj kōjerbal technology eo ad n̄an kōkajoorļo̧k kōj ņae men ko rejej tokjāer, kōl ko an laļ in.
M̧aanjabpopo n̄an Pata ko
Kōtmene pata ko rej itok, Moronai ekar kōpooj armej ro doon kajjojo kōn kein kattōrak ko an ob, pā, at, im nuknuk mijel. Ekar kōpooj armej ro doon ilo aer jepooļ jikin kweilo̧k ko kōn oror ko, kibwij laļ bwe en utiej tōrerein ipeļakier.
Ilo jetōb, jej kōpooj kōj kajjojo ilo kōjparok kein ko an Anij. Jej kōm̧m̧an im kōjparok bujen ko ippān Anij me ej letok kajoor eo an Jisōs Kraist n̄an mour ko ad. Jej bōk koņaad, ilo jerbal in wiujlepļok ko an juon make an , ko āinwōt jar, jitlo̧k, im lūn̄ūri jeje ko rekwojarjar. Jej barāinwōt jerbal kōn tōmak, uwaake tōl eo jej boke ilo jetōb . Jej reimaanļok ilo ad kōppopo n̄an bōk kwojkwoj eo ilo erreo. Ilo ad kōm̧m̧ane āindein, Rilo̧mo̧o̧r ej waļok ilo mour ko ad, ejja wōt An kar waļok n̄an Moronai, eo tōmak eo an ekar pen ilo Jisōs Kraist. Moronai ekar jeļā emaron̄ kar pedped ioon Rilo̧mo̧o̧r eo kōn tōl im o̧ņaake(lale Alma 48:16). Kōj, barāinwōt, maron̄ pedped ioon Jisōs Kraist kōn tōl im o̧ņaake.
Jemaron̄ kōļapļo̧k kōppopo in ilo ad kōkajoorļo̧k baam̧le ko ad. Jemādwōj Ilan̄ ekar karōk kōj n̄an baam̧le ko n̄an jipan̄ kōj m̧ōņōņō im katak ekōjkan bar ro̧o̧l n̄an E. Baam̧le ko ad remaron̄ juon kein jipan̄ n̄an jipan̄ kōj. Jemaron̄ aolep en̄jake lan̄lōn̄ im iakwe eo jān ad keememej bwe jej m̧ōttan baam̧le eo eļap an Anij, jekdo̧o̧ņ jekjek ko ilo baam̧le ko ad.
Ippān doon jemaron̄ bōk kajoor im kōppopo n̄an tariņae ko ad ilo jetōb ilo ad kobaļok ilo jukjuk in pād ko an ro Rikwojarjar. Stake im district ko ad rej letok kain jikin kone im kattōrak kein. Jemaron̄ naajdik doon ilo jetōb, jipan̄ doon n̄an kōjparok kien ko an Anij, im kōketak doon n̄an pedped ioon Kraist, aolep iien eļap tata ilo iien ko reppen. N̄e jej ippān doon, jej kile bwe jejjab tariņaik pata ko ad make. Ewōr ro m̧ōttad, rūkaki ro, im ritōl ro me rej jipan̄ im kōjparok kōj. Jekajoorļok n̄e jej m̧aanjabpopo ippān doon.
Lukkun kabwilōn̄lōn̄, Moronai ekar ajeļo̧k aolep m̧ōņōņō eo an armej ro an n̄an m̧ool n̄an aer tōmak ilo Anij im kabun̄ eo aer. Āinwōt Moronai, jej aikuj kile bwe lan̄lōn̄ eo ej itok kōn Jemādwōj Ilan̄ im karoōk eo An im kōn Jisōs Kraist im Pinmuur eo An. Ilo ad itok n̄an meļeļe jibadbad eo ad, kōttōbalbal n̄an jeraam̧m̧an, im m̧aanjabpopo n̄an tariņae ko, jej bōk jipan̄ eo ekwojarjar im kajoor.
Āinwōt Moronai, ijeļā bwe Jemādwōj Ilan̄ im Jisōs Kraist ej bōktok anemkwoj im jem̧ļok eo jān kōm̧akoko—anemkwoj jān mej im jerawiwi. Rej kōjeraam̧m̧an kōj kōn kajoor eo Aer n̄e jej reilo̧k n̄an Er ilo aolep men.
© 2024 jān Intellectual Reserve, Inc. All rights reserved. Buriin ilo USA. Kōmālim ilo kajin In̄lij: 6/19. Kōmālim ukook eo: 6/19. Ukok eo an Monthly Liahona Message, August 2024. Marshallese. 19294 874