Molimo o Tla re Ts′ehetsa le ho re Boloka

Ka Elder Dale G. Renlund

Oa Lekhotla la Baapostola ba Leshome le Metso e ´Meli

Joaloka Molaoli oa Lebotho Moroni, re ka fumana thuso ea bomolimo le matla bakeng sa lintoa tseo re tobanang le tsona bophelong ba rona.

Molaoli oa Lebotho Moroni o ts′oere folakha ea tokoloho

Ha ke qala ho bala Buka ea Mormone, ke ne ke natefeloe ke nalane ea lintoa lipakeng tsa Ba-Nefi le Ba-Lamane. Ke ile ka khahloa ke tumelo, bohlale, le maqheka a neng a sebelisoa ke Molaoli oa Lebotho Moroni, molaoli oa sesole ea neng a khethiloe ho ba moetapele oa mabotho oohle a Ba-Nefi ha a le lilemo tse 25 feela. O ne a le bohlale, a le matla a bile a le masene. O ne a itlamme ka botlalo tokolohong le boiketlong ba bathoba hae. (Bona Alma 48:11–12.)

Ho e-na le ho inkela tlotla ea katleho ea sesole, Moroni o ile a amahanya katleho eo le e tsoang ho Molimo le ts′ehetso e halalelang eo mabotho a hae a e fumaneng ho tsoa ho basali le bana ba sa loaneng. O ile a bolella moetapele oa sera ea hlotsoeng: “Morena … o nehelane ka lona matsohong a rona. ´Me joale ke rata hore u tle u utloisise hore sena ke … ka lebaka la bolumeli ba rona le tumelo ea rona ho Kreste.” Eaba Moroni o arolelana temohiso ena ea boporofeta: “Molimo o tla ts′ehetsa, le ho boloka, le ho re baballa, ha feela re mo ts´epahalla, le tumelo ea rona, le bolumeli ba rona.” (Alma 44:3, 4).

Ha nako e ntse e ea, ke ile ka elelloa hore Moroni o ile a etsa mohlala oa litaba tsa motheo tseo re ka li sebelisang ho re thusa ho tobana le liphephetso tsa bophelo ba rona ba kajeno. Ha re bonts′a tumelo ho Jesu Kreste, Mopholosi oa lefats′e, O tla re hlohonolofatsa ka matla a Hae. Empa bakeng sa hore a etse joalo le hore re hlokomele lihlohonolofatso tsa hae, re lokela ho utloisisa sepheo sa rona, re etse meralo ea katleho, le ho itokisetsa lintoa tsa moea tseo re tobaneng le tsona, joalo feela ka ha Moroni a ile a itokisa le ho tobana le lintoa bophelong ba hae. Ha re etsa joalo, Ntate ea Maholimong le Jesu Kreste ba tla re ts´ehetsa le ho re boloka.

Kutloisiso ea Sepheo sa Rona

Moroni o ile a hopotsa batho khafetsa hore na ke bo mang (majalefa a selekane sa Abrahama), bao e neng e le ba mang (bana ba Molimo ba ratehang), le lebaka leo ba ileng ba le loanela (lelapa, tumelo, le tokoloho). Moroni o ile a ruta batho ba hae hore ba ne ba loanela ho phela ha bona le tokoloho ho khatello le ho ba litlamong. Ka lehlakoreng le leng, lira tsa bona li ne li loanela ho iphahamisa le matla ka ho hatella ba bang.

Ha Ba-Nefi ba bang ba ne ba batla ho inkela bolaoli molemong oa ho ithuisa, Moroni o ile a tabola seaparo sa hae ′me a ngola karolong ea sona litaba tsa mantlha tsa molaetsa oa hae: “Sehopotsong sa Molimo oa rona, bolumeli ba rona, le tokoloho ea rona, le khotso ea rona, basali ba rona le bana ba rona.” O ile a phahamisa folakha ena, eo a ileng a e bitsa “folakha ea tokoloho,” pheletsong ea palo le ho e sebelisa ho hopotsa batho hore na ntoa e ne e le mabapi le eng le ho ba bokella ho ea tseleng. (Bona Alma 46:12–13, 19–20.)

Lintoeng tsa moea tsa bophelo,“ha re loane le nama le mali, empa re loana khahlanong le … babusi ba lefifi … [le] khahlanong le bokhopo ba moea” (Ba-Efese 6:12). Le rona, re hloka ho hopotsoa hore na ntoa e mabapi le eng. Moholo Neal A. Maxwell (1926–2004), setho sa mehleng sa Lekhotla la Baapostola ba Leshome le Metso e ′Meli, o ile a hlalosa mohopolo ona ka puisano e hlakileng, leha e ne e le o mokhuts′oanyane.

Ka 2004, ke ile ka chakela Moholo Maxwell phaposing ea hae ea sepetlele nako e seng kae pele a timela. O ne a le mosa hoo ho bohle ba neng ba mo etela kapa ho mo thusa. Basebetsi ba tsa bophelo ba ne ba kena ka phaposing ea hae ′me ba tsoa ba lla. Ka re ho eena, “Moholo Maxwell, sena se thata haholo.” A ts′eha ′me a re, “Oho, Dale, re libopuoa tsa ka ho sa feleng tse phelang lefats′eng la ba shoang. Re tsoile maemong a rona, joaloka lihlapi ha li tsoile metsing. Ke feela ha re e-na le pono ea ka ho safeleng moo eng kapa eng ea sena e tla ba le moelelo o mong.”

Re lokela ho se hlole re lahleheloa ke pono ea sehlopha se seholo sa tlholeho ea rona ea bomolimo le qetello ea ka ho safeleng le matla a diabolose a re hanyetsang. Ho utloisisa ka nepo morero oa Ntate ea Maholimong ho tla re susumetsa ho lula re loanela poloko ea rona ea ka ho sa feleng le tokoloho ea rona litlamong tsa moea.

Ho Rala Katleho

Hara lintoa tseo mabotho a hae a li loanneng, Moroni o ile a rala e le ho netefatsa katleho. O ile a sebelisa lihloela ho sibolla mesebetsi le merero ea lira tsa hae. O ile a batla tataiso ho moporofeta, Alma. Eaba Moroni o sebelisa tlhahiso eo e bululetsoeng mokhoeng oa hae oa ntoa. O ile a romela lisebelisoa ho ea ka tlhokahalo, a beha masole a mangata metseng e neng e se na liqhobosheane. Ka ho rala o ile a beha merero ea ts′ebetso e thehiloeng tlhahiso-leseling ea morao-rao.

Ka tsela eo o ile a fumana melemo holim′a mabotho a lira. Ha ho mohla a kileng a khotsofalla litlholo tsa nako e fetileng; ho e-na le hoo, o ile a tsoela pele ho ntlafatsa bokhoni ba hae le ba mabotho a hae ho sebetsana le mathata a kamoso.

Re ka sebelisa mekhoa e ts´oanang ho sebetsana le bahanyetsi ba moea. Re ka qala ka ho hlokomela seo Satane a lekang ho se etsa bophelong ba rona. O leka ho re sitisa morerong oa rona. Ha re tobana le teko, re lokela ho ipotsa:

Ketso ee ka lehlakoreng la ka e khahlanong joang le lentsoe le senotsoeng la Molimo?
Litla-morao tsa ho nka khato ee ke life?
Na ketso ee e tla nthusa ho phethahatsa sepheo saka lefats′eng?

Hape re lokela ho hlokomela phello ea ho inehela esita le ho liteko tse nyenyane. Ha re inehela molekong, re ja “chefo ka lipallo” (Alma 47:18), moralo o sebetsang ka ho fetisisa o sebelisoang ke matla a bokhopo o ka lebisang liphellong tse bolaeang moeeng.

Re ka ipha matla khahlanong le meleko ea Satane ka ho latela tataiso eo re e fumanang ho tsoa ho moporofeta oa rona oa matsatsi a ho qetela. Ho etsa joalo ho re thusa ho boloka pono ea ka ho sa feleng eo ka eona re ka hlahlobang liketso tsa rona. Ho rala kamoo re tla tobana le meleko e hlahang likarolong tse fapaneng tsa bophelo ba rona ho tla re thusa ho etsa liqeto tse nepahetseng nakong ena. Meralo le mekhoa e reruoeng esale pele e tla re thusa ho its′ireletsa khahlanong le lits′itiso tse tsoang sepheong sa rona sa ka ho sa feleng.

Mohlala ke oa thekhenoloji. Thekhenoloji e ka ba sabole e sehang ka ntlha tse peli, e molemo le e kotsi, ho its′etlehile ka hore na re e sebelisa joang. Ho re thusa ho etsa liqeto tse bohlale mabapi le lisebelisoa tsa rona, ba banyenyane le ba baholo ba ka bua ho “Ho Nka Taolo ea Thekhenoloji” le Bakeng sa Matlafalo ea Bacha: Tataiso ea Ho Etsa Liqeto. Tsena li re hopotsa sepheo sa rona, li re supisa ho Jesu Kreste, le ho re thusa ho memela Moea o Halalelang bophelong ba rona. Ho rera hore na re tla sebelisa thekhenoloji joang, neng, le hokae ho tla re matlafatsa khahlanong le maqheka a mabe, a lefats′e.

Ho Lokisetsa Lintoa Tsa Moea

Ka ho lebella lintoa tse tlang, Moroni o ile a lokisetsa batho ba hae ka bo mong ka lits′ireletso tsa sefuba, lithebe, lihelemete, le liaparo tse teteaneng. O ile a lokisa bathoba hae e le sehlopha ka ho pota-pota metse e nang le liqhobosheane, a phunya lerōle ho e pota-pota.

Moeeng, re itokisa ka bo mong ka ho boloka litaelo tsa Molimo. Re etsa le ho boloka lilekane le Molimo tse tlisang matla a Jesu Kreste bophelong ba rona. Re etsa liketso tsa botho, tsa lekunutu tsa boinehelo, joaloka ho rapela, ho itima lijo, le ho batlisisa mangolo a halalelang. Re boetse re etsa lintho ka tumelo, re arabela tataiso ea moea eo re e fumanang. Re itokisetsa ka hloko le ho nka selallo ka nepo. Ha re etsa joalo, Mopholosi o fetoha ho ba oa sebele bophelong ba rona, joaloka ha A bile oa sebele ho Moroni, ea neng a tiile tumelong ea hae ho Jesu Kreste. Moroni o ne a tseba hore a ka its′etleha ka Mopholosi bakeng sa tataiso le topollo (bona Alma 48:16). Le rona, re ka its′etleha ka Jesu Kreste bakeng sa tataiso le topollo.

Re ka tsoela pele ho itokisetsa ka ho matlafatsa malapa a rona. Ntate oa rona ea Maholimong o re hlophisitse ka malapa ho re thusa ho thaba le ho ithuta ho khutlela ho Eena. Malapa a rona e ka ba mohloli oa thuso ho rona. Kaofela re ka utloa thabo le lerato ka ho hopola hore re karolo ea lelapa le leholo la Molimo, ho sa natsoe maemo a motho ka mong a malapa a rona.

Ka kopanelo re ka fumana matla le ho itokisetsa lintoa tsa rona tsa moea ha re ntse re ikopanya le lichaba tsa Bahalaleli. Literekeng tse ikemetseng le litereke tsa rona li fana ka sebaka se joalo sa sets′abelo le ts′ireletso. Re ka fepana moeeng, ra thusana ho boloka litaelo tsa Molimo, le ho khothatsana ho its′etleha ka Kreste, kamehla, haholo-holo linakong tsa mathata. Ha re bokana hammoho, re hlokomela hore ha re loane lintoa tsa rona re le bang. Re na le metsoalle, litichere le baetapele ba ka re thusang le ho re sireletsa. Kaofela re ba matla ha re itokisetsa hammoho.

Ka ho tsoteha Moroni o ile a amahanya thabo eohle ea batho ba hae ho ho ba le ′nete ho tumelo ea bona ho Molimo le ho bolumeli ba bona. Joaloka Moroni, re lokela ho elelloa hore thabo e tla ka lebaka la Ntate ea Maholimong le morero oa Hae le ka lebaka la Jesu Kreste le Topollo ea Hae. Ha re ntse re utloisisa sepheo sa rona, re rala katleho, ′me re itokisetsa lintoa tsa moea, re fumana thuso ea bomolimo le matla.

Joaloka Moroni, kea tseba hore Ntate ea Maholimong le Jesu Kreste ba tlisa tokoloho ea ho qetela ho tsoa bokhobeng—tokoloho lefung le sebeng. Ba re hlohonolofatsa ka matla a bona ha re talima ho bona linthong tsohle.

© 2024 by Intellectual Reserve, Inc. All rights reserved. E hatisitsoe USA. Tumello ea Senyesemane: 6/19. Tumello ea Phetolelo: 6/19. Phetolelo ea Monthly Liahona Message, August 2024. South Sotho. 19294 739