Ang Garment sang Balaan nga Priesthood

Ni Pangulong Jeffrey R. Holland

Akting nga Pangulo sang Korum sang Dose ka Apostoles

Bilang kabahin sang endowment sa templo, ginhatagan kita sang sagrado nga pisikal nga pahanumdom sang aton mga kasugtanan—ang simbolo sang Manluluwas mismo.

Si Adan kag si Eva nga upod nga nagalakat

Wala sapayan sang preparasyon nga wala duda ginhatag sa ila kag sa mga pasalig nga gintinguhaan nila nga dumdumon, sigurado nakibot gid si Adan kag Eva sang ginbayaan nila ang paraisuhanon nga Hardin sang Eden kag nagtapak sa nahulog nga kalibutan.

Upod ang seryoso nga pagtalupangod, narealisar nila kon ano ang buot silingon nga ibaylo ang ila malinong, wala-libog nga kabuhi sa kalibutan nga puno sang oposisyon kag pagpangabudlay, mga kasakit kag kasubo—nga pagasundan sa ulihi sang ginatawag nga kamatayon. Wala nila mahibal-i sa umpisa kon ano ang buot silingon sini tanan, pero natun-an nila dayon nga ang kada adlaw pwede magdala sang bag-o nga kasakit. Ang matuod, ang pinakamasakit sa tanan amo ang realisasyon nga atubangon nila ini tanan nga nahilayo sa ila Amay sa Langit—“gintabog sila halin sa iya presensya,” ginsulat sang ulihi ni Moises.

Sa sining pagkahilayo kag kasubo sa matugnaw, mamingaw nga kalibutan, daw ano ayhan nga kasulhay kay Adan kag Eva nga panumdumon ang isa ka butang: nga may ginhimo nga mga promisa—nga sagrado kag wala katapusan nga ginatawag mga kasugtanan. Ginpromisa nila nga tumanon nila ang Amay sa bilog nila nga mga kabuhi, kag ginpromisa Niya nga hatagan sila sang Manluluwas, nga magapaumpaw sang ila kasakit kag kasubo, magbayad para sa ila mga kasaypanan, kag dalhon sila nga hilway pabalik sa Iya presensya.

Pero paano madumduman sining mga mortal ang ila ginpromisa? Paano nila madumduman pirme ang ila delikado nga sitwasyon—madumduman sa tanan nga oras, adlaw kag gab-i?!

Pahanumdum sang Ila mga Kasugtanan

Bilang pahanumdom ginhatagan Niya sila sang “mga kunop nga panit.” Kanami sini nga regalo kag husto gid sa panahon. Pagkatapos nga magkaon sang ginadilian nga bunga, natalupangdan dayon ni Adan kag Eva nga wala sila sang biste. Una, gintilawan nila nga tabunan ang ila lawas sang mga dahon sang higera. Dayon, kay pamatyag nila kulang pa ato, nanago sila sa Ginuo. (Ining kabos nga pagtinguha isa ka ebidensya nga nagaepekto na ang mortalidad!) Sugod sadto mismo hasta subong, ginahagad sang mapinalanggaon nga Amay ang Iya kabataan nga magpalapit, maggwa sa ila ginapanaguan, pakadto sa Iya. Kag pareho sang mga kunop nga panit sadto kag pila pa ka klase sang biste halin sadto, Sia sa Iya kaluoy wala magbiya sa aton nga hublas kundi ginpabayuan ang mga masinulundon sang “bayo sang pagkamatarong,” isa ka pahanumdom sang aton mga promisa kag mga kasugtanan. Ining “mga bayo sang kaluwasan” nagasimbolo sang pinakadako nga regalo sa tanan, Ang Pagbayad-Sala ni Jesucristo.

Ang Garment Simbolo sang Manluluwas

Ti, ining pagpanumdom parte kay Adan kag Eva kag sa mga kasugtanan kag bayo, siyempre labaw pa sangsa paghanas sang panghunahuna. Indi mabudlay panumdumon kon ano ayhan ang nabatyagan ni Adan kag Eva, tungod kita man nagaatubang sang mga kabudlayan sa sining nahulog nga kalibutan. Kita man nahilayo sa presensya sang Dios, kag mas ginapalayo naton ang aton mga kaugalingon tagsa nga makasala kita. Pareho kay Adan kag Eva, ginhatagan kita sang amo man nga Manluluwas, si Jesucristo sang Nazaret, ang Alfa kag ang Omega, ang Anak sang buhi nga Dios. Pareho kay Adan kag Eva, naghimo kita sang mga kasugtanan upod sa Dios. Kag, bilang kabahin sang endowment sa templo, ginhatagan kita sang sagrado nga pisikal nga pahanumdom sinang mga kasugtanan—isa ka simbolo sang Manluluwas Mismo. Sa aton dispensasyon ginatawag ini nga garment sang balaan nga priesthood.

Ginasuksok naton ining garment sa idalom sang aton bayo. Bisan ano ang akon mga responsibilidad, bisan ano ang akon mga papel sa kabuhi, bisan ano ang ginapahimo sa akon sa adlaw-adlaw, sa idalom sini tanan amo ang akon mga kasugtanan—sa karon kag sa katubtuban. Sa idalom sini tanan ang sagrado nga mga promisa nga hugot ko nga ginauyatan. Ang garment wala ginapadayaw ukon ginapakita-kita sa kalibutan, amo man ang akon mga kasugtanan. Pero ginahuptan ko ini sila nga duha nga hugot sa akon—kutob sa akon masarangan. Personal ini kaayo sa akon kag sagrado katama.

Sa pagdumdom sinang mga kasugtanan, inang promisa sa tunga sang duha ka partido, ginasuksok naton ang garment sa bilog naton nga mga kabuhi. Ang paghimo sini nagapakita sang aton handum nga mangin dalayon nga impluwensya ang Manluluwas sa aton mga kabuhi. Ang iban nga ginapakamahal nga mga simbolo ginasulit kon san-o lang. Kis-a lang kita ginabunyagan sa aton kabuhi. Nagaambit kita sang sakramento kis-a kada semana. Nagakadto kita sa templo kon itugot sang sirkumstansya. Pero ang garment sang balaan nga priesthood lain: ini nga simbolo ginatahod naton kada adlaw kag gab-i.

Kag amo gid sina ang mga kasugtanan—wala ginapahigad tungod indi kombeniente ukon tungod sa kakulang sang paghalong kag wala ginabag-o para magbagay sa estilo kag moda sang sosyedad. Sa kabuhi sang disipulo ni Jesucristo, ang pamaagi sang kalibutan ang kinahanglan liwaton para magbagay sa aton mga kasugtanan, indi baliskad.

Kon ginasuksok naton ang garment, sa ginatudlo sang Unang Pangulohan, ginasuksok naton ang sagrado nga simbolo ni Jesucristo. Kon amo sina, ngaa mangita kita sang rason para kakson ina nga simbolo? Ngaa kaksan naton ang aton kaugalingon sang ginpromisa nga gahum, proteksyon, kag kaluoy nga ginasimbolo sang garment? Sa baylo, kon kinahanglan nga temporaryo naton nga ubahon ang garment, dapat isuksok naton ini liwat, sa gilayon kon mahimo, tungod ginadumdom naton ang mga promisa kag ang mga peligro nga nagahatag kahulugan sa aton mga kasugtanan. Labaw sa tanan, ginadumdom naton ang krus kag ang wala na unod nga lulubngan ni Cristo.

Masiling ang iban, “May iban ako nga pamaagi para dumdumon si Jesus.” Kag ang sabat ko, maayo gid ina. Mas damo nga pamaagi, mas maayo. Panumdumon naton tanan ang madamo nga paagi nga matuman naton ang aton pangako nga “dalayon nga magdumdum sa iya.” Pero sa paghimo sini, mangin butigon kita kon hungod naton nga patumbayaan ang pahanumdom nga ginhatag sang Ginuo Mismo sa mga na-endow na, ang garment sang balaan nga priesthood.

Si Jesucristo kag ang Iya ebanghelyo amo ang tanan para sa akon. Ang tanan ko nga paglaum kag handum sa wala katapusan, tanan nga ginapakamahal ko, nasandig sa Iya. Sia ang “bato sang akon kaluwasan,” ang akon alagyan padulong sa akon Amay nga Langitnon, ang solo nga paagi pabalik sa kon ano nga ara na sa akon sadto kag gusto nga malab-ot liwat sa karon, upod sa madamo pa kaayo nga iban. Ang Iya regalo sa aton amo ang pinakaalwan ko nga nabaton, ang pinakaalwan nga ginhatag—ginbakal paagi sa wala tupong nga pag-antos, gintanyag sa indi maisip nga kadam-an, ginhatag nga may wala dulonan nga gugma. Ang mga tunok kag mga hilamon, ang kasakit kag pag-antos, ang kasubo kag sala sining nahulog nga kalibutan tanan “nadaug tungod kay Cristo.”

Gani ginasuksok ko ang garment sang balaan nga priesthood—kada adlaw kag gab-i sing nagakadapat halin sang gin-endow ako 64 katuig ang nagligad, sa edad nga 19—tungod palangga ko Sia kag tungod kinahanglan ko ang mga promisa nga ginasimbolo sini.

Mga Pamangkot parte sa Pagsuksok sang Garment?

Ang iban sa inyo nagabasa sini nga artikulo nga nagapaabot nga basi sabton ko ang isa ka partikular nga pamangkot parte sa garment. Basi nagapaabot kamo sang “Amo ini ang ginasiling sang Ginuo”—ukon indi gani “Amo ini ang ginasiling sang Iya mga alagad”—sa butang nga importante sa inyo. Ang inyo pamangkot basi naghalin sa isa ka personal nga sirkumstansya may angot sa trabaho, pag-ehersisyo, katinlo sang lawas, klima, pamayo, banyo, ukon bisan gani medikal nga kondisyon.

Ang iban nga sabat sa sining klase sang mga pamangkot makita sa temples.ChurchofJesusChrist.org kag sa seksyon 38.5 sang Pangkabilogan nga Pagsulundan. Ang masaligan nga mga miyembro sang pamilya kag mga lider pwede man konsultahon parte sa personal nga mga butang. Pero, maathag kaayo ang instruksyon nga ginhatag sa initiatory nga ordinansa, kag ara sa wala katubtuban ang inyo Amay sa Langit, nga nakakilala kag nagapalangga sa inyo kag nakaintiendi sang tanan parte sa inyo mga sirkumstansya. Malipay Sia kon ipamangkot ninyo ini sa Iya sing personal.

Palihog indi paghangpa sing lain. Kon magpangayo kamo sang diosnon nga giya, ang Espiritu indi magtulod sa inyo nga maghimo sing mas manubo sangsa pagsunod sang instruksyon nga nabaton sa templo kag sa laygay sang propeta nga ginhatag sang Unang Pangulohan sa ila pahayag sining nagligad lang. Ang mapinalanggaon nga Amay indi magbulig sa inyo nga rasonan ang paghimo sang mas manubo sangsa pagsunod sang Iya sulundan sang debosyon kag pamayo nga magabugay sa inyo karon kag sa katubtuban. Pero naintiendihan bala Niya ang inyo mga pamangkot, kag buligan bala Niya kamo nga mabaton ang mga bugay sang pagrespeto sang garment kag pagtuman sang inyo mga kasugtanan? Huo! Dapat bala kamo magpakonsulta sa masaligan nga mga propesyunal sa medikal kag ikaayong-lawas kon kinahanglan? Siyempre! Dapat bala ninyo bale-walaon ang kaalam ukon magtulok nga lapaw sa tanda? Ginapangamuyo ko nga indi ninyo paghimuon ina.

Indi ko masabat ang tagsa ninyo ka pamangkot. Indi ko gani masabat ang tagsa ko ka pamangkot. Pero mapasalig ko sa inyo, bilang Apostoles sang Ginuong Jesucristo, nga buligan kamo sang mapinalanggaon nga Dios nga nagahandum sang tagsa ninyo ka kadalag-an kag bugay, sa pamaagi nga indi ninyo subong matungkad ukon makita, samtang ginatuman ninyo ang mga kasugtanan nga ginhimo ninyo upod sa Iya.

Pahayag sang Unang Pangulohan parte sa Garment

Ang garment sang balaan nga priesthood nagapadumdom sa aton sang belo sa templo, kag inang belo nagasimbolo kay Jesucristo. Kon ginasuksok ninyo ang garment, ginasuksok ninyo ang sagrado nga simbolo ni Jesucristo.

Ang pagsuksok sini isa ka panggwa nga pagpakita sang inyo pangsulod nga pangako nga sundon Sia. Ang garment isa man ka pahanumdom sang inyo mga kasugtanan sa templo. Dapat ninyo suksukon ang garment adlaw kag gab-i sa bilog ninyo nga kabuhi. Kon kinahanglan ini ubahon para sa aktibidades nga indi gid mahimo nga nagasuksok sang garment, tinguhai nga suksukon ini dayon balik kon posible. Sa pagtuman ninyo sang inyo mga kasugtanan, dala ang sagrado nga pribelihiyo sa pagsuksok sang garment nga ginsugo sa initiatory nga mga ordinansa, mas malab-ot ninyo ang kaluoy, proteksyon, kusog, kag gahum sang Manluluwas.

© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, September 2024. Hiligaynon. 19295 861