“Nuknuk Muhtahl luhn Pristut,” Liahona, Sept. 2024.
Mwe Fahkwack ke Liahona Mahlwem Nuhkwewa, Septempuh 2024
Nuknuk luhn Pristut Muhtahl
Sie ip ke mwe sang muhtahl tempuhl, utuckuh nuh sesr sie mwe acsmakihn ke olwelah lasr—mwe akucl se kacl Mwet Lahngo Sifacna.
Mwe ahkuhtweyac kacl Adam ac Eve, sel Doughlas M. Fryer
Fine fuhkah luhpan ahkoo ma ituckyang nuh selos ac kahs in ahkkweye ma elos srihke in esam, sahp mwe lut se nuh sel Adam ac Eve suhlahlahlfongi lah elos in som liki Imac Eden ac ilyak nuhke sie facl keok.
Elos kahlwemack, lah meac kalmeyac elos in ahollah moul se met lalos ah nuhke sienna facl ac fioh, mwe fakfuck ac ahsor—ahksahfye ke ma se pahngpahng misac. Elos tiac kuh in etuh ke muhtwacwacackiyac ah lah meac kalmeacn ma inge kewa, tuhsruhk elos fah konwacack tok kuhtuh lah kais sie lwen use kweok sasuc. Pwacyena, lah ma se ma kweok seltal emet uh pa ke elos etwacack lah eltahl e puhlakihn ma upac inge kwewa ac Pahpah Inkuhsrao elac fah tiac weluhltahl—“sisilac ye muhtahl,” sihmlac tok sel Moses.
Ituckyang fahsrelihk ac muhkwelacna se ke facl ohu, suhpwacr, fuhkah luhpan wolacna elos puhlakihn in esam ma se inge: lah oasr olwelah oreklac—sie olwelah muhtahl ac wacngihn sahflahiyac. Elos olwelah muh elos e fah ahkos Pahpah ke lusen moul lahltahl kwewa, ac El olwelah in sang sie Mwet Lahngo, suc e fah ahkwoyelah ngal ac kweok, molwelah tahfonglac lalos, ac fohlohkohnohltahlma nuh ke wolacna Lal.
Tuhsruhktuh elos ac esam fuhkah ma elos olwelah uh? Elos e akihlen fuhkah elyah ma elos oasr kac—akihlen ke pacl nuhkewa, lwen ac fong?
Mwe Acsmakihn ke Olwelah Lalos
El sang “mwe lweyuhk nuhke mahno” tuh in mwe acsmakihn nuh selos. Fuhkah fallacna luhn mwe sang se inge nuhke pacl uh. Tukun na Adam ac Eve elos ipeis ke fukunsahk se ma tiac fihlfihllac elos in kang ah, in pacl sac na elos etwacack lah elos kohflufohl. Ma se met, elos srihke in okanlah kohfluhfohl lalos ke sra. Tohkohyang, elos sensen muh tiacna fal ma elos nukum ah, pwacnwacng elos srihke in wihkkuhnuhl Leum. (Kain mukwikwi afu inge ahkkahlwemye lah moul suhkawihl el sikyak oasr tari!) Ke pacl se ingacn fahfahsruh nuhke pacl misenge uh, oasr sie Pahpah yohk luhngse suli tuhlihk Nahtuhl in tuhkuh, liki acn in wihkwihk, nuh Yohrohl. Ac nuhke mwe lweyuck nuhke mahno an ke pacl sac ac kain in atac ke nuknuk, ke pahkotwen lal Leum El tiacna fuhlwelah tuh kuht in kohflufohl tuh El nokomwacng elos suc ahkostwen ke sie “nuknuk in suwohswohs” in sie mwe acsmakihn ke olwelah ac wuhlweacng lasr. “Nuknuk in molwelah” inge el mwe akucl se nuhke mwe sang se ma yohk emeet, suc pa Iwaclah luhn Jisus Kraist.
Karmacn kuh nuknuk se inge el Akucl se luhn Mwet Lahngo
Oruh, mwe nuhnak nuhkewa kacl Adam ac Eve ac wuhlweacng ke nuknuk, pwacye, yohk srihpac liki na nuhnak nuhkewa sahyac. Tiacna upac kuht in motko ke ma Adam ac Eve puhlakihn ah, ke sripen kuht puhlakihn pac ma upac fin facl se inge. Kuht oacyacpac tiac muhta yohrohl God, ac kuht ahkloesye kuht luhkwel ke pacl nuhkwewa kuht oruh ma koluk uh. Oacna Adam ac Eve, utuckuh pac nuh sesr Mwet Lahngo se pacna ingacn, Jisus Kraist luhn ac Nazareth, Alpha ac Omega, Wen nuhtin God moul. Oacna Adam ac Eve, kuht oacyacpac oraclah olwelah lasr nuh sin God. Ac, sie ip ke mwe sang muhtahl tempuhl, utuckuh nuh sesr sie mwe acsmakihn ke olwelah lasr—mwe akucl se kacl Mwet Lahngo Sifacna. Ke pacl se lasr inge el pahngpahng nuknuk luhn pristut muhtahl.
Mwe ahkuhtweyac ke Tuhkuh Ahkluo, sel Harry Anderson
Kuht nukum karmacn se inge ye nuknuk lasr uh. Lah kunohkohn fuhkah oasr luhk uh, lah meac kunuhk ke moul se inge, lah meac nga enenuh in oruh lwen nuhkwewa uh, ye ma inge kwewa pa olwelah luhk sin God—ingenalac ac ne tok ma pahtpaht. Ye ma inge nuhkwewa pa olwelah muhtahl luhk ma nga sruokyac ac tu na kuh kac. Karmacn kuh nuknuk se inge tiac nukumyuck liyeuck kuh kahlwem ye muhtuhn facluh, weacng pacna olwelah luhk uh. Tuhsruhk nga sruokyac kewa fototo nuh yuruk—srihke in sruokyac ke kuhiyuck nohfohn. Ma inge lukme ac arulacna muhtahl.
In esam ke wuhlweacng inge, inmahsrlosr ac God, kuht nukum karmacn inge ke lusen moul lasr nohfohn. Ohiyac se inge el ahkkahlwemye luhngse lasr kacl Mwet Lahngo elan wi kuht ac kahsrwe kuht pacl nuhkwewa in moul lasr. Kuhtuh akucl sacohklacna inge sikyak ke puhluhn pacl. Kuht pacptais ke pacl se fanna in moul lasr. Kuht eis kuhfa luhn Leum pacl se ke wik se. Kuht som nuhke tempuhl fin lwelah. Tuhsruhk nuknuk luhn pristut muhtahl el siena: akucl se inge kuht ahkfuhlwactye ke lwen nuhkwewa ac fong nuhkwewa.
Ac pa ingacn ohiyacn wuhlweacng uh— tiac srweyuhklac nuhke pacl fal kuh pihlesruh ac tiac ikihlyuhklac in fal nuhke atac kuh style orek ohrohr ke acn se. Ke moul luhn mwet tuhma lutlut lal Jisus Kraist, ohiyac luhn facluh enenuh in ikihlyuhklac in tuhkweni na fahsr wi wuhlweacng lasr, tiac atac se sahyac ah.
Ke kuht nokomwacng karmacn se, oacna ke Prestuhnsi Se Met luti uh, kuht, eis nuh facsr akucl muhtal se luhn Jisus Kraist. Ke pa inge kalmeyac uh, efuh kuht in sukok sripac in eslah akucl se inge? Efuh kuht in sifacna eslah liki kuht olwelah ke kuh, karihngihnyuck, ac pahkotwen ma karmacn kuh nuknuk se inge use uh? Fin oasr pacl se kuht enenuh in sahruhklah karmacn lasr uh ke kihtin pacl, kuht enenuh in silahklahk sifilpac nokomwacng, ke pacl na sa, ke sripen kuht esam kwewa olwelah ac ma upac ma ahkuhtweyac wuhlweacng lasr uh. Yohk liki nuhkwewa, kuht esam sahksin ac kuhlyuck alal se lal Kraist ah.
Kuhtuh kuh in fahk, “Oasr inkacnek sahyac luhk in esamuhl Jisus.” Ac nga e topuk fahk muh, wo na pwacye. Fin puhkantwen e wo liki na met ah. Lwelah kuht nuhkewa in nuhnkuh ke inkacnek puhs in sruokyacna olwelah lasr in “esamuhl pacl nuhkwewa.” Tuhsruhk ke kuht oruh ohinge uh, e tiacna wo kuht fin ac sulaclah in tari muhlkuhnlah mwe acsmakihn suc Leum el sang nuh selos suc orwaclah akwuck lun tempuhl lalos, suc pa karmacn kuh nuknuk luhn pristut muhtahl.
Jisus Kraist ac wosasuc Lal pa ma nuhkwewa sihk. Finsrak ac kena ma pahtpaht luhk nuhkewa, ma sacohk nuhkewa nga sruok, acn Yacl. El pa “yot in molwelah,” inkacnek luhk nuh yohrohl Pahpah Luhng, inkacnek se fana luhk in sifilpac fohlohklac nuhke ma tuh oasr luhk met ac sifilpac kena tuh in oasr luhk ingena, weacng pac ma puhs pac sahyac. Mwe sang Lal nuh sesr pa mwe sang se ma yohk emeet nga eis, pa yohk emeet sin mwe sang ma kihteyuhklac— moullac ke kweok wacngihn sahflahiyac, ahkyohkyelihk nuhke pacl foko wacngihn sahflahiyac, ac utuckuh nuh sesr ke luhngse wacngihn sahflahiyac. Mwe fakfuhk ac kohsroh, ngal ac kweok, ahsor ac ma koluk luhn facl fohs se inge nohfohn “ukumyucklac sel Kraist.”
Pwacnwacng nga nukum nuknuk luhn pristut muhtahl—ke lwen ac fong nuhkwewa e ke pacl se nga orwaclah akwuck muhtahl luhk lun tempuhl ke yac 64 somlah ah, ke nga tuh yac 19 ah—ke sripen nga luhngse El ac ke sripen nga enenuh olwelah ma tuhkuh kac uh.
Kihsensiyuck ke Nukumyacn Karmacn?
Kuhtuh suwohs sahp e riti ma inge finsraki tuh nga in tohpohklah kihsensiyuck lowos ke karmacn. Sahp kom finsraki nuhke “Tuh Leum el fahk ohinge”—kuh finne — “Ohinge mwet kuhlwacnsap Lal fahk”—tuh tuhngalyac na pwacye ma an insiom uh. Kihsensiyuck lom uh kuh in ma tuhkuh ke ma sikyak nuh sum ke orekma lom, ahsrosr lom, nwacsnwacs luhn monum, puhluhn pacl uh, ohiyac wo, lohm in ono, kuh finne mas lom.
Kuhtuh top nuhke kain in kihsensiyuck inge kuh in sukokyak ke temples.ChurchofJesusChrist.org ac ke sacksrihn 38.5 ke General Handbook. Kom kuh in sun sucu lom ma kom luhlahlfongi ac mwet kol ke alu uh ac sramsramkihn elyah lom uh. Tuhsruktuh, oasr tari inkacnek na kahlwem se ma utuhkot nuh sum ke akwuck se emeet lom, ac oasr Pahpah Inkuhsrao se lom ne tok ma pahtpaht suc etwekom ac luhngse kom ac kahlwem ke ma nuhkwewa ma kom oasr kac uh. El ac arulacna engan kom fin siyuck Sel sifacna kihsensiyuck inge.
Petsac ke spire ke St. George Utah Temple
Nuhnak muhnahs nimet fohswack kac. Ke kom suk kolyuck wolacna lal Leum, Nguhn ac fah tiacna tulokihn kom in ukwe mwe sap kom eis lun tempuhl ac kahs in kahsruh ma ahkkahlwemyeyuck sin Prestuhnsi Se Met ke mwe fahkwack lalos ingena. Pahpah luhngselacna tuhmasr fah tiacna lwelah kom in orekma tuh fototolac nuhke ma kom kuh in oruh in fal nuhke masap Lal ac kampare ac ohiyac wo lom ma ac ahkinsewowoye kom ingenalac ne tok ma pahtpaht. Tuh yac El kahlwem ke kihsensiyuck lom, ac yac El ac kahsrwe kom in eis mwe insewowo ke kom ahkfuhlwactye nukumyacn karmacn lom ac liyacacng olwelah lom uh? Ahok! Yac kom enenuh in suk kahsruh luhn mwet orekma ke lohm ono ke pacl enenuh uh? Ahok! Kuh kom ac lohacng nuhke ma oasr kalmeyac kuh ngwetlah liki ma pwacye? Nga pruhe tuh kom in tiac.
Nga tiac kuh in tohpohklah nohfohn kihsen siyuck lom an. Nga tiac kuh pac in tohpohklah nohfohn kihsen siyuck luhk uh. Tuhsruhk nga kuh, ekihn sie Mwet Sap lal Jisus Kraist , in olwelah nuh sum kahsruh luhn God pahkotwen lasr, suc suk oraclah wo nuhkwewa lom ac mwe insewowo lom, ke inkacnek ma kom tiac kuh in kahlwem kac kuh lie, ke kom liacacng olwelah ma kom oraclah nuh Sel.
© 2024 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac ke lweng: 6/19. Lwenglah luhn Mahlwem Nuhkwewa Liahona Mwe Fahkwack, Septempuh 2024.Kosraean.19295,868