ເສື້ອຜ້າສັກສິດ ຂອງ ຖານະປະໂລຫິດສັກສິດ

ໂດຍ ແອວເດີ ແຈັບຟະຣີ ອາ ຮໍແລນ

ປະທານກຸ່ມອັກຄະສາວົກສິບສອງແທນຊົ່ວຄາວ

ໃນຖານະເປັນສ່ວນໜຶ່ງຂອງພິທີຮັບຂອງປະທານສັກສິດໃນພຣະວິຫານ, ເຮົາໄດ້ຮັບສິ່ງເຕືອນໃຈອັນສັກສິດທີ່ສຳຜັດໄດ້ ເຖິງພັນທະສັນຍາຂອງເຮົາ—ສັນຍາລັກຂອງພຣະຜູ້ຊ່ວຍໃຫ້ລອດພຣະອົງເອງ.

ເຖິງແມ່ນວ່າເຂົາເຈົ້າໄດ້ກຽມພ້ອມຢ່າງບໍ່ຕ້ອງສົງໄສ ແລະ ຮັບປະກັນວ່າເຂົາເຈົ້າພະຍາຍາມຈື່ຈຳຫລາຍປານໃດ, ແຕ່ກໍຄົງເປັນໜ້າຕົກໃຈຫລາຍທີ່ສຸດສຳລັບອາດາມ ແລະ ເອວາ ທີ່ຕ້ອງອອກຈາກສວນເອເດນ ທີ່ເປັນສະຫວັນຂອງເຂົາເຈົ້າ ແລະ ກ້າວເຂົ້າສູ່ໂລກທີ່ຕົກ.

ດ້ວຍຄວາມຮັບຮູ້ຢ່າງຈິງຈັງ, ເຂົາເຈົ້າຍອມຮັບວ່າ ການແລກປ່ຽນຊີວິດທີ່ງຽບສະຫງົບ ແລະ ບໍ່ກັງວົນ ກັບໂລກແຫ່ງການຕໍ່ຕ້ານ ແລະ ຢາດເຫື່ອ, ໜາມ ແລະ ຄວາມໂສກເສົ້າ—ຕາມມາດ້ວຍບາງສິ່ງທີ່ເອີ້ນວ່າ ຄວາມຕາຍ. ເຂົາເຈົ້າບໍ່ສາມາດຮູ້ໄດ້ໃນຕອນຕົ້ນວ່າ ທັງໝົດນີ້ໝາຍເຖິງຫຍັງ, ແຕ່ບໍ່ດົນເຂົາເຈົ້າໄດ້ຮຽນຮູ້ວ່າ ແຕ່ລະມື້ສາມາດນຳຄວາມເຈັບປວດໃໝ່ມາໃຫ້. ແທ້ຈິງແລ້ວ, ຄວາມເຈັບປວດທີ່ສຸດຄືການຮັບຮູ້ວ່າ ເຂົາເຈົ້າຈະປະເຊີນກັບສິ່ງທັງໝົດເຫລົ່ານີ້ໂດຍທີ່ຖືກແຍກຕົວຈາກພຣະບິດາຜູ້ສະຖິດຢູ່ໃນສະຫວັນ—“ຖືກປິດຈາກທີ່ປະທັບຂອງພຣະອົງ,” ໂມເຊໄດ້ບັນທຶກໃນຕອນຕໍ່ມາ.

ຍ້ອນການແຍກຕົວ ແລະ ຄວາມໂດດດ່ຽວຢູ່ໃນໂລກທີ່ໜາວເຢັນ, ເປັນຕາຢ້ານ, ຄົງເປັນການປອບໂຍນສຳລັບອາດາມ ແລະ ເອວາ ທີ່ໄດ້ຈື່ຈຳສິ່ງໜຶ່ງ ນັ້ນຄື: ຄຳສັນຍານັ້ນທີ່ໄດ້ເຮັດໄວ້—ບາງສິ່ງທີ່ສັກສິດ ແລະ ນິລັນດອນ ທີ່ເອີ້ນວ່າ ພັນທະສັນຍາ. ເຂົາເຈົ້າໄດ້ສັນຍາວ່າ ເຂົາເຈົ້າຈະເຊື່ອຟັງພຣະບິດາຕະຫລອດວັນເວລາໃນຊີວິດຂອງເຂົາເຈົ້າ, ແລະ ພຣະອົງໄດ້ສັນຍາວ່າຈະຈັດຕຽມພຣະຜູ້ຊ່ວຍໃຫ້ລອດ, ຜູ້ຈະບັນເທົາຄວາມເຈັບປວດ ແລະ ຄວາມໂສກເສົ້າຂອງເຂົາເຈົ້າ, ຊົດໃຊ້ແທນຄວາມຜິດພາດຂອງເຂົາເຈົ້າ, ແລະ ນຳເຂົາເຈົ້າກັບຄືນສູ່ທີ່ປະທັບຂອງພຣະອົງຢ່າງປອດໄພ.

ແຕ່ມະນຸດເຫລົ່ານີ້ຈະເຮັດສິ່ງທີ່ເຂົາເຈົ້າໄດ້ສັນຍາໄວ້ແນວໃດ? ເຂົາເຈົ້າຈະຮູ້ເຖິງສະຖານະການທີ່ເປັນອັນຕະລາຍຂອງເຂົາເຈົ້າໄດ້ແນວໃດ—ຮູ້ຕະຫລອດເວລາ, ທັງກາງເວັນ ແລະ ກາງຄືນໄດ້ແນວໃດ?!

ການເຕືອນໃຈກ່ຽວກັບພັນທະສັນຍາຂອງເຂົາເຈົ້າ

ເພື່ອເປັນການເຕືອນໃຈເຊັ່ນນັ້ນ ພຣະອົງຈຶ່ງໄດ້ປະທານ “ເສື້ອໜັງສັດ” ໃຫ້ເຂົາເຈົ້າ. ຊ່າງເປັນຂອງຂວັນທີ່ຍອດຍ້ຽມ ແລະ ທັນເວລາແທ້ໆ. ຫລັງຈາກໄດ້ຮັບສ່ວນໝາກໄມ້ທີ່ຕ້ອງຫ້າມແລ້ວ, ອາດາມ ແລະ ເອວາເກືອບຮູ້ຕົວທັນທີວ່າ ຕົນເອງເປືອຍກາຍ. ທຳອິດ, ເຂົາເຈົ້າໄດ້ພະຍາຍາມປົກປິດຄວາມເປືອຍເປົ່າດ້ວຍໃບໝາກເດື່ອ. ແລ້ວ, ດ້ວຍຄວາມຢ້ານກົວວ່າ ຈະບໍ່ພຽງພໍ, ເຂົາເຈົ້າຈຶ່ງພະຍາຍາມລີ້ຊ່ອນຕົວຈາກພຣະຜູ້ເປັນເຈົ້າ. (ຄວາມພະຍາຍາມທີ່ໂງ່ຈ້າເຊັ່ນນີ້ ເປັນຫລັກຖານວ່າ ຄວາມມະຕະໄດ້ຄືບຄານເຂົ້າມາ!) ນັບແຕ່ເວລານັ້ນຈົນເຖິງປະຈຸບັນ, ພຣະບິດາທີ່ຊົງຮັກໄດ້ເຊື້ອເຊີນລູກໆຂອງພຣະອົງໃຫ້ມາ, ອອກຈາກການລີ້ຊ່ອນຕົວ, ມາຫາພຣະອົງ. ແລະ ເຊັ່ນດຽວກັບເສື້ອໜັງສັດ ແລະ ເຄື່ອງແຕ່ງກາຍນັບແຕ່ນັ້ນມາ, ພຣະອົງໃນຄວາມເມດຕາຂອງພຣະອົງບໍ່ໄດ້ປະໃຫ້ເຮົາເປືອຍກາຍ ແຕ່ໄດ້ນຸ່ງ “ເສື້ອຄຸມແຫ່ງຄວາມຊອບທຳ,” ໃຫ້ຄົນທີ່ເຊື່ອຟັງ ເປັນການລະນຶກເຖິງຄຳສັນຍາ ແລະ ພັນທະສັນຍາຂອງເຮົາ. “ເສື້ອຜ້າແຫ່ງຄວາມລອດ” ເຫລົ່ານີ້ ເປັນສັນຍາລັກເຖິງຂອງປະທານຍິ່ງໃຫຍ່ທີ່ສຸດ ໃນຂອງປະທານທັງໝົດ, ການຊົດໃຊ້ຂອງພຣະເຢຊູຄຣິດ.

ເສື້ອຜ້າສັກສິດເປັນສັນຍາລັກຂອງພຣະຜູ້ຊ່ວຍໃຫ້ລອດ

ແນ່ນອນວ່າ, ການຄິດທັງໝົດນີ້ກ່ຽວກັບອາດາມ ແລະ ເອວາ ແລະ ພັນທະສັນຍາ ແລະ ເສື້ອຜ້າສັກສິດ ແມ່ນມີຄວາມໝາຍຫລາຍກວ່າການຝຶກຈິດ. ມັນບໍ່ຍາກທີ່ຈະຈິນຕະນາການວ່າ ອາດາມ ແລະ ເອວາຮູ້ສຶກແນວໃດ, ເພາະວ່າເຮົາກໍປະເຊີນກັບບັນຫາໃນໂລກທີ່ຕົກນີ້ຄືກັນ. ເຮົາກໍເຊັ່ນກັນ ຖືກແຍກຕົວອອກຈາກທີ່ປະທັບຂອງພຣະເຈົ້າ, ແລະ ເຮົາກໍຫ່າງໄກຫລາຍຂຶ້ນທຸກຄັ້ງທີ່ເຮົາລ່ວງລະເມີດ. ເຊັ່ນດຽວກັບອາດາມ ແລະ ເອວາ, ເຮົາໄດ້ຮັບພຣະຜູ້ຊ່ວຍໃຫ້ລອດອົງດຽວກັນນັ້ນ, ພຣະເຢຊູຄຣິດແຫ່ງນາຊາເຣັດ, ອາລະຟາ ແລະ ໂອເມຄາ, ພຣະບຸດຂອງພຣະເຈົ້າຜູ້ຊົງພຣະຊົນຢູ່. ເຊັ່ນດຽວກັບອາດາມ ແລະ ເອວາ, ເຮົາໄດ້ເຮັດພັນທະສັນຍາກັບພຣະເຈົ້າ. ແລະ, ໃນຖານະເປັນສ່ວນໜຶ່ງຂອງພິທີຮັບຂອງປະທານສັກສິດໃນພຣະວິຫານ, ເຮົາໄດ້ຮັບສິ່ງເຕືອນໃຈອັນສັກສິດທີ່ສຳຜັດໄດ້ ເຖິງພັນທະສັນຍາຂອງເຮົາ—ສັນຍາລັກຂອງພຣະຜູ້ຊ່ວຍໃຫ້ລອດພຣະອົງເອງ. ໃນສະໄໝຂອງເຮົາ ມັນຖືກເອີ້ນວ່າ ເສື້ອຜ້າສັກສິດຂອງຖານະປະໂລຫິດສັກສິດ.

ເຮົານຸ່ງເສື້ອຜ້າສັກສິດນີ້ຢູ່ລຸ່ມເສື້ອຊັ້ນນອກຂອງເຮົາ. ບໍ່ວ່າໜ້າທີ່ຮັບຜິດຊອບໃດກໍຕາມທີ່ຂ້າພະເຈົ້າມີ, ບໍ່ວ່າບົດບາດໃດກໍຕາມທີ່ຂ້າພະເຈົ້າມີໃນຊີວິດ, ບໍ່ວ່າໜ້າທີ່ການດຳເນີນຊີວິດປະຈຳວັນຈະຮຽກຮ້ອງສິ່ງໃດກໍຕາມ, ໃຕ້ມັນທັງໝົດລ້ວນແລ້ວແຕ່ເປັນພັນທະສັນຍາຂອງຂ້າພະເຈົ້າ—ສະເໝີ ແລະ ຕະຫລອດໄປ. ໃຕ້ມັນທັງໝົດແມ່ນຄຳສັນຍາອັນສັກສິດເຫລົ່ານັ້ນ ຊຶ່ງຂ້າພະເຈົ້າຍຶດໝັ້ນຢ່າງສິ້ນເຊີງ. ບໍ່ໄດ້ອວດອ້າງເສື້ອຜ້າສັກສິດ ຫລື ສະແດງໃຫ້ໂລກເຫັນ, ແລະ ພັນທະສັນຍາຂອງຂ້າພະເຈົ້າກໍເຊັ່ນກັນ. ແຕ່ຂ້າພະເຈົ້າຮັກສາທັງສອງຢ່າງໄວ້ໃກ້ຕົວຂ້າພະເຈົ້າ—ໃຫ້ໃກ້ທີ່ສຸດເທົ່າທີ່ຈະສາມາດເຮັດໄດ້. ມັນເປັນສິ່ງສ່ວນຕົວຢ່າງເຂັ້ມງວດ ແລະ ສັກສິດທີ່ສຸດ.

ໃນການລະນຶກເຖິງພັນທະສັນຍາເຫລົ່ານັ້ນ, ຄຳສັນຍາສອງທາງເຫລົ່ານັ້ນ, ເຮົາໄດ້ນຸ່ງເສື້ອຜ້າສັກສິດໄປຕະຫລອດຊີວິດ. ການປະຕິບັດນີ້ສະທ້ອນໃຫ້ເຫັນຄວາມປາດຖະໜາຂອງເຮົາສຳລັບພຣະຜູ້ຊ່ວຍໃຫ້ລອດ ທີ່ຈະເປັນອິດທິພົນສະເໝີໄປໃນຊີວິດຂອງເຮົາ. ສັນຍາລັກທີ່ຊົງຮັກອື່ນໆແມ່ນເປັນແຕ່ລະໄລຍະ. ເຮົາໄດ້ຮັບບັບຕິສະມາຄັ້ງດຽວໃນຊີວິດຂອງເຮົາ. ເຮົາຮັບສ່ວນສິນລະລຶກໜຶ່ງຄັ້ງຕໍ່ອາທິດ. ເຮົາໄປພຣະວິຫານຕາມທີ່ສະຖານະການຈະເອື້ອອຳນວຍ. ແຕ່ເສື້ອຜ້າສັກສິດຂອງຖານະປະໂລຫິດສັກສິດແມ່ນແຕກຕ່າງ: ສັນຍາລັກນີ້ເຮົາໃຫ້ກຽດທຸກໆວັນ ແລະ ຄືນ.

ແລະ ນັ້ນຄືວິທີຂອງພັນທະສັນຍາ—ບໍ່ແຍກຈາກຄວາມສະດວກ ຫລື ຄວາມບໍ່ສະບາຍໃຈ ຫລື ບໍ່ໄດ້ຖືກດັດແປງໃຫ້ເໝາະສົມກັບຮູບແບບ ແລະ ການນຸ່ງຖືຂອງສັງຄົມ. ໃນຊີວິດຂອງສານຸສິດຂອງພຣະເຢຊູຄຣິດ, ວິທີທາງຂອງໂລກຈະຕ້ອງໄດ້ຮັບການດັດແປງໃຫ້ສອດຄ່ອງກັບພັນທະສັນຍາຂອງເຮົາ, ບໍ່ແມ່ນໃນທາງກົງກັນຂ້າມ.

ເມື່ອເຮົາສວມເສື້ອຜ້າສັກສິດ, ເໝືອນດັ່ງທີ່ຝ່າຍປະທານສູງສຸດໄດ້ສິດສອນ, ເຮົາໄດ້ສວມສັນຍາລັກສັກສິດຂອງພຣະເຢຊູຄຣິດ. ດ້ວຍເຫດນັ້ນ, ເປັນຫຍັງເຮົາຈຶ່ງຊອກຫາຂໍ້ແກ້ຕົວ ເພື່ອຈະເອົາສັນຍາລັກນັ້ນອອກ? ເປັນຫຍັງເຮົາຈຶ່ງຈະຕ້ອງພາກຕົນເອງຈາກຄຳສັນຍາເຖິງອຳນາດ, ການປົກປ້ອງ, ແລະ ຄວາມເມດຕາ ທີ່ເສື້ອຜ້າສັກສິດເປັນຕົວແທນ? ກົງກັນຂ້າມ, ເມື່ອໃດກໍຕາມທີ່ເຮົາຕ້ອງຖອດເສື້ອຜ້າສັກສິດຊົ່ວຄາວ, ເຮົາຄວນກະຕືລືລົ້ນທີ່ຈະໄດ້ນຸ່ງມັນຄືນ, ໃຫ້ໄວເທົ່າທີ່ຈະເປັນໄປໄດ້, ເພາະເຮົາຈື່ຈຳທັງຄຳສັນຍາ ແລະ ຄວາມອັນຕະລາຍທີ່ໃຫ້ຄວາມໝາຍກັບພັນທະສັນຍາຂອງເຮົາ. ເໜືອສິ່ງອື່ນໃດ, ເຮົາຈື່ຈຳໄມ້ກາງແຂນ ແລະ ອຸບມຸງທີ່ວ່າງເປົ່າຂອງພຣະຄຣິດ.

ບາງຄົນອາດຈະເວົ້າວ່າ, “ຂ້ອຍມີວິທີອື່ນທີ່ຈະຈື່ຈຳພຣະເຢຊູ.” ແລະ ຂ້າພະເຈົ້າຈະຕອບວ່າ, ມັນວິເສດຫລາຍ. ຫລາຍເທົ່າໃດຍິ່ງດີ. ຂໍໃຫ້ທຸກຄົນຄິດເຖິງຫລາຍວິທີເທົ່າທີ່ຈະສາມາດເຮັດໄດ້ ເພື່ອຮັກສາຄຳໝັ້ນສັນຍາ ທີ່ຈະ “ລະນຶກເຖິງພຣະອົງຕະຫລອດເວລາ.” ແຕ່ໃນການເຮັດແບບນັ້ນ, ມັນຈະເປັນການບໍ່ຊື່ສັດ ຖ້າຫາກຈົງໃຈລະເລີຍຄຳເຕືອນທີ່ພຣະຜູ້ເປັນເຈົ້າເອງໄດ້ປະທານເສື້ອຜ້າສັກສິດຂອງຖານະປະໂລຫິດສັກສິດ ໃຫ້ຜູ້ຮັບຂອງປະທານສັກສິດ.

ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ ໝາຍເຖິງທຸກສິ່ງທຸກຢ່າງສຳລັບຂ້າພະເຈົ້າ. ຄວາມຫວັງ ແລະ ຄວາມປາດຖະໜານິລັນດອນທັງໝົດຂອງຂ້າພະເຈົ້າ, ທຸກສິ່ງທີ່ຂ້າພະເຈົ້າຮັກ, ແມ່ນຂຶ້ນກັບພຣະອົງ. ພຣະອົງເປັນ “ສີລາແຫ່ງຄວາມລອດ,” ວິທີຂອງຂ້າພະເຈົ້າໃນການເຂົ້າເຖິງພຣະບິດາເທິງສະຫວັນ, ວິທີດຽວຂອງຂ້າພະເຈົ້າກັບໄປຫາສິ່ງທີ່ຂ້າພະເຈົ້າເຄີຍມີ ແລະ ຕອນນີ້ຢາກມີອີກ, ພ້ອມດ້ວຍສິ່ງອື່ນໆອີກຢ່າງຫລວງຫລາຍ. ຂອງປະທານຂອງພຣະອົງແກ່ເຮົາຖືວ່າເອື້ອເຟື້ອເພື່ອແຜ່ທີ່ສຸດທີ່ຂ້າພະເຈົ້າເຄີຍໄດ້ຮັບມາ, ເອື້ອເຟື້ອເພື່ອແຜ່ທີ່ສຸດທີ່ເຄີຍມອບໃຫ້—ໄດ້ຊື້ມາດ້ວຍຄວາມທຸກທໍລະມານອັນບໍ່ມີຂອບເຂດ, ຂະຫຍາຍອອກໄປເປັນຈຳນວນບໍ່ສິ້ນສຸດ, ມອບໃຫ້ດ້ວຍຄວາມຮັກອັນເປັນນິດ. ໜາມ ແລະ ພືດທີ່ມີໜາມ, ຄວາມເຈັບປວດ ແລະ ຄວາມທຸກທໍລະມານໃຈ, ຄວາມໂສກເສົ້າ ແລະ ບາບຂອງໂລກທີ່ຕົກນີ້ ລ້ວນແຕ່ “ຖືກກືນເຂົ້າໄປໃນພຣະຄຣິດ.”

ສະນັ້ນຂ້າພະເຈົ້າຈຶ່ງນຸ່ງເສື້ອຜ້າສັກສິດຂອງຖານະປະໂລຫິດສັກສິດ—ທຸກໆວັນ ແລະ ຄືນ ຕາມຄວາມເໝາະສົມ ນັບຕັ້ງແຕ່ຂ້າພະເຈົ້າໄດ້ຮັບຂອງປະທານສັກສິດເມື່ອ 64 ປີກ່ອນ, ຕອນອາຍຸ 19 ປີ—ເພາະຂ້າພະເຈົ້າຮັກພຣະອົງ ແລະ ເພາະຂ້າພະເຈົ້າຕ້ອງການຄຳສັນຍາທີ່ມັນເປັນຕົວແທນ.

ມີຄຳຖາມກ່ຽວກັບການນຸ່ງເສື້ອຜ້າສັກສິດບໍ?

ພວກທ່ານບາງຄົນອາດອ່ານບົດຄວາມນີ້ຫວັງວ່າ ຂ້າພະເຈົ້າຈະຕອບຄຳຖາມສະເພາະໃດໜຶ່ງກ່ຽວກັບເສື້ອຜ້າສັກສິດ. ທ່ານອາດຫວັງໃຫ້ “ພຣະຜູ້ເປັນເຈົ້າໄດ້ກ່າວດັ່ງນີ້”—ຫລື ແມ່ນແຕ່ “ຜູ້ຮັບໃຊ້ຂອງພຣະອົງໄດ້ກ່າວດັ່ງນີ້”—ໃນເລື່ອງທີ່ຢູ່ໃກ້ໃຈຂອງທ່ານ. ຄຳຖາມຂອງທ່ານອາດເກີດຈາກສະຖານະການສ່ວນຕົວທີ່ກ່ຽວຂ້ອງກັບວຽກງານ, ການອອກກຳລັງກາຍ, ສຸຂະອະນາໄມ, ສະພາບອາກາດ, ຄວາມສຸພາບຮຽບຮ້ອຍ, ສະຖານທີ່ສາທາລະນະທີ່ອຳນວຍຄວາມສະດວກດ້ານສຸຂາພິບານ, ຫລື ແມ່ນແຕ່ສະພາບທາງການແພດ.

ບາງຄຳຕອບຕໍ່ຄຳຖາມປະເພດເຫລົ່ານີ້ສາມາດພົບເຫັນທີ່ temples.ChurchofJesusChrist.org ແລະ ໃນພາກ 38.5 ຂອງ ຄູ່ມືທົ່ວໄປ. ສະມາຊິກຄອບຄົວ ແລະ ຜູ້ນຳທີ່ເຊື່ອຖືໄດ້ອາດປຶກສາກ່ຽວກັບເລື່ອງສ່ວນຕົວ. ເຖິງຢ່າງໃດກໍຕາມ, ມີທິດທາງທີ່ຊັດເຈນຫລາຍ ທີ່ໄດ້ມອບໃຫ້ຢູ່ໃນພິທີການຂັ້ນຕົ້ນ, ແລະ ມີພຣະບິດາຜູ້ສະຖິດຢູ່ໃນສະຫວັນຕະຫລອດການ ແລະ ຕະຫລອດໄປ, ຜູ້ທີ່ຮູ້ຈັກທ່ານ ແລະ ຮັກທ່ານ ແລະ ເຂົ້າໃຈທຸກສິ່ງກ່ຽວກັບສະຖານະການຂອງທ່ານ. ພຣະອົງຈະຕື່ນເຕັ້ນຫລາຍຖ້າທ່ານຖາມຄຳຖາມເຫລົ່ານີ້ເປັນການສ່ວນຕົວ.

ກະລຸນາຢ່າເຂົ້າໃຈຜິດ. ເມື່ອທ່ານເອື້ອມອອກໄປຂໍການຊີ້ນຳຈາກສະຫວັນ, ພຣະວິນຍານຈະ ບໍ່ ດົນໃຈທ່ານໃຫ້ເຮັດໜ້ອຍກວ່າຄຳແນະນຳທີ່ໄດ້ຮັບໃນພຣະວິຫານ ແລະ ຄຳແນະນຳຂອງສາດສະດາທີ່ໄດ້ແບ່ງປັນໂດຍຝ່າຍປະທານສູງສຸດ ໃນຄຳຖະແຫລງເມື່ອບໍ່ດົນມານີ້. ພຣະບິດາທີ່ຊົງຮັກຈະ ບໍ່ ຊ່ວຍໃຫ້ທ່ານຫາເຫດຜົນໃນການເຮັດໜ້ອຍກວ່າທີ່ທ່ານສາມາດເຮັດໄດ້ ເພື່ອໃຫ້ສອດຄ່ອງກັບມາດຕະຖານຂອງຄວາມອຸທິດຕົນ ແລະ ຄວາມສຸພາບຮຽບຮ້ອຍຂອງພຣະອົງ ທີ່ຈະເປັນພອນໃຫ້ແກ່ທ່ານໃນເວລານີ້ ແລະ ຕະຫລອດໄປ. ແຕ່ພຣະອົງເຂົ້າໃຈຄຳຖາມຂອງທ່ານບໍ, ແລະ ພຣະອົງຈະຊ່ວຍໃຫ້ທ່ານໄດ້ຮັບພອນຂອງການເຄົາລົບເສື້ອຜ້າສັກສິດ ແລະ ຮັກສາພັນທະສັນຍາຂອງທ່ານບໍ? ແມ່ນແລ້ວ! ທ່ານຄວນປຶກສາກັບຜູ້ຊ່ຽວຊານດ້ານການແພດ ແລະ ສຸຂະພາບ ທີ່ມີຄວາມສາມາດໃນເວລາທີ່ຈຳເປັນບໍ? ແນ່ນອນ. ທ່ານຄວນເສີຍເມີຍກັບຄວາມຮູ້ສຶກທົ່ວໄປ ຫລື ເບິ່ງຂ້າມເຄື່ອງໝາຍບໍ? ຂ້າພະເຈົ້າອະທິຖານວ່າທ່ານຈະບໍ່ເຮັດ.

ຂ້າພະເຈົ້າບໍ່ສາມາດຕອບທຸກຄຳຖາມທີ່ທ່ານມີ. ຂ້າພະເຈົ້າກໍບໍ່ສາມາດຕອບທຸກຄຳຖາມທີ່ຂ້າພະເຈົ້າມີ. ແຕ່ຂ້າພະເຈົ້າສາມາດ, ໃນຖານະອັກຄະສາວົກຂອງອົງພຣະເຢຊູຄຣິດເຈົ້າ, ສັນຍາກັບທ່ານເຖິງຄວາມຊ່ວຍເຫລືອຈາກພຣະເຈົ້າທີ່ຊົງຮັກ, ຜູ້ສະແຫວງຫາຄວາມສຳເລັດ ແລະ ພອນທຸກປະການຈາກທ່ານ, ໃນແບບທີ່ທ່ານບໍ່ສາມາດເຂົ້າໃຈ ຫລື ຫລິງເຫັນໄດ້ໃນເວລານີ້, ຂະນະທີ່ທ່ານຮັກສາພັນທະສັນຍາທີ່ທ່ານໄດ້ເຮັດໄວ້ກັບພຣະອົງ.

ຄຳຖະແຫລງຂອງຝ່າຍປະທານສູງສຸດກ່ຽວກັບເສື້ອຜ້າສັກສິດ

ເສື້ອຜ້າສັກສິດຂອງຖານະປະໂລຫິດສັກສິດເຕືອນໃຈເຮົາເຖິງຜ້າກັ້ງໃນພຣະວິຫານ, ແລະ ວ່າຜ້າກັ້ງນັ້ນເປັນສັນຍາລັກຂອງພຣະເຢຊູຄຣິດ. ເມື່ອທ່ານນຸ່ງເສື້ອຜ້າສັກສິດຂອງທ່ານ, ທ່ານໄດ້ນຸ່ງສັນຍາລັກສັກສິດຂອງພຣະເຢຊູຄຣິດ.

ການນຸ່ງຖືມັນເປັນການສະແດງອອກເຖິງຄວາມມຸ່ງໝັ້ນພາຍນອກ ທີ່ຈະຕິດຕາມພຣະອົງ. ເສື້ອຜ້າສັກສິດກໍເປັນສິ່ງເຕືອນໃຈເຖິງພັນທະສັນຍາພຣະວິຫານຂອງທ່ານນຳອີກ. ທ່ານຄວນນຸ່ງເສື້ອຜ້າສັກສິດທັງກາງເວັນ ແລະ ກາງຄືນ ຕະຫລອດຊີວິດຂອງທ່ານ. ເມື່ອຕ້ອງຖອດເສື້ອຜ້າສັກສິດອອກສຳລັບກິດຈະກຳທີ່ບໍ່ສາມາດນຸ່ງເສື້ອຜ້າສັກສິດຕາມທີ່ເຫັນສົມຄວນ, ແລ້ວໃຫ້ພະຍາຍາມນຸ່ງມັນຄືນໃຫ້ໄວເທົ່າທີ່ສາມາດເຮັດໄດ້. ເມື່ອທ່ານຮັກສາພັນທະສັນຍາຂອງທ່ານ, ລວມທັງສິດທິພິເສດສັກສິດໃນການນຸ່ງຖືເສື້ອຜ້າສັກສິດ ຕາມຄຳແນະນຳໃນພິທີການຂັ້ນຕົ້ນ, ທ່ານຈະເຂົ້າເຖິງຄວາມເມດຕາ, ການປົກປ້ອງ, ຄວາມເຂັ້ມແຂງ, ແລະ ອຳນາດຂອງພຣະຜູ້ຊ່ວຍໃຫ້ລອດທີ່ຍິ່ງໃຫຍ່ກວ່າ.

© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, September 2024. Laotian. 19295 331