Etinda ya sanza ya Liahona, Sanza ya libwa 2024

Garma ya Bonganganzambe Bosantu

Na Mpaka Jeffrey R. Holland

Mokitani ya Mokambi ya Lisanga Likoki ya Bapostolo Zomi na Mibale

Lokola eteni ya dotasio ya tempelo, topesami likundoli ya nzoto ya mayokani na biso—elembo ya Mobikisi Ye moko.

Bokuse uta na Adama mpe Eva, na Douglas M. Fryer

Kolongola bolengeli oyo epesamelaki bango na tembe te mpe elikya oyo bamekaki komikundola, Adama mpe Eva bayokaki mpasi makasi na motema kotika Elanga na bango ya Edena ya paladizo mpe kokota na mokili ya mpasi.

Na likanisi ya sikisiki, bamonaki oyo elakisaki kobongola bomoi na bango ya kimya mpe ezanga mitungisi, ekoma mokili ya botelemeli mpe ya motoki, ya basende mpe mawa—elandisami na nsuka na eloko moko babengi nkufa. Bakokaki te koyeba ndimbola ya nyonso oyo, kasi kala te bayekolaki ete mokolo moko na moko nyonso ekokaki komema mpasi ya sika. Ya solo, moko ya bampasi nyonso ezalaki boyebi ete bakokaki kokutana na nyonso oyo kokabwana na Tata na bango ya Lola—“kolongolama liboso na ye,” ekomaki Mose.

Na kotalaka bokabwani mpe bobele oyo na mokili ya malili, ya mawa, boniboni libondisi esengelaki kozala mpo na Adama mpe Eva komikundola likambo moko: ete bilaka esalemaki—eloko moko ya bule mpe ya seko oyo babengi mayokani. Balakaki ete bakotosa Tata mikolo nyonso ya bomoi na bango, mpe Alakaki kopesa Mobikisi moko, oyo akolongola mpasi mpe mawa na bango, akomikaba mpo na mabunga na bango, mpe akozongisa bango na kimia na miso na Ye.

Kasi ndenge nini bato wana ya nkufa bakomikundola oyo balakamaki? Ndenge nini balingaki kotikala koyeba ezalela na bango ya likama—koyeba ntango nyonso, butu mpe moyi?!

Bokundoli ya Mayokani na Bango

Mpo na bokundoli wana Apesaki bango “bakazaka ya mposo.” Ezalaki mpenza likabo ya motuya mpe eyaki na ntango ebongi. Nsima ya kolya mbuma oyo epekisamaki, Adama mpe Eva bayebaki mbala moko ete bazalaki bolumbu. Ya liboso, bamekaki kozipa bolumbu na bango na nkasa ya figi. Na nsima, lokola bazalaki kobanga ete yango ekoka te, bamekaki kobombana liboso ya Nkolo. (Molende ya bozoba boye ezalaki elembeteli ete bokufi ezalaki kofanda na kati!) Uta ngonga wana kino lelo, Tata moko ya bolingo abengisi bana na Ye baya, libanda ya kobombana, epayi na Ye. Mpe lokola na bakazaka ya mposo na ntango wana mpe bilamba ya ndenge na ndenge banda wana, Ye na ngolu na Ye atikaki biso bolumbu te kasi alatisaki batosi “elamba ya boyengebene,” bokundoli ya bilaka mpe mayokani na biso. “Bagarma oyo ya lobiko” elakisi elembo ya likabo monene koleka nyonso, Bomikabi ya Yesu Klisto.

Garma Ezali Elembo ya Mobikisi

Malamu, makanisi oyo nyonso na ntina ya Adama mpe Eva mpe mayokani mpe bilamba ezali, ya solo, mingi koleka kaka ngalasisi ya makanisi. Ezali mpasi te kokanisa lolenge nini Adama mpe Eva bayokaki, mpo ete biso mpe tokutanaka na mikakatano na mokili oyo ekweya. Biso mpe tokabwani na miso ya Nzambe, mpe tomilongolaka lisusu ntango nyonso oyo tosalaka lisumu. Lokola Adama mpe Eva, topesameli Mobikisi wana kaka, Yesu Klisto ya Nazalete, Alfa mpe Omega, Mwana ya Nzambe na bomoi. Lokola Adama mpe Eva, tosalaki mayokani na Nzambe. Mpe, lokola eteni ya dotasio ya tempelo, topesami likundoli moko ya bule ya nzoto ya mayokani wana—elembo ya Mobikisi Ye moko. Na eleko na biso ebengami garma ya bonganganzambe bosantu.

Bokuse ya likambo uta na Boyei ya Mibale, na Harry Anderson

Tolataka garma oyo na nse ya bilamba na biso ya libanda. Atako mikumba nini nazali na yango, atako misala nini nasalaka na bomoi, atako mikumba nini ya mokolo na mokolo esengi, na nse na yango nyonso ezali na mayonakani na ngai—ntango nyonso mpe libela. Na nse na yango nyonso ezali na bilaka wana ya bule oyo nakangami na yango na mposa makasi. Garma yango emonisami te to elakisami te liboso ya mokili, mpe mayokani na ngai mpe lolenge moko. Kasi nazali kobatela yango mibale penepene na ngai—mpenza lokola nakoki. Ezali mpenza ya moto ye moko mpe ya bule koleka.

Na komikundolaka mayokani wana, bilaka wana ya nzela mibale, tolataka garma na bomoi na biso mobimba. Momesano oyo ezali kolakisa mposa na biso mpo na Mobikisi azala ndakisa ya ntango nyonso na bomoi na biso. Bilembo mosusu oyo tolingaka ezalaka mbala na mbala. Tobatisami mbala moko na bomoi na biso. Toliaka elambo mbala moko na poso. Tokendaka na tempelo soki mabaku epesi nzela. Kasi garma ya bonganganzambe bosantu ekeseni: elembo oyo totosaka butu nyonso mpe moyi.

Mpe yango nde lolenge mayokani ezali—etiamaki pembeni te mpo na bopeto to bozangi bokebi mpe ebongisami te mpo na kokokana na mitindo mpe elateli ya lingomba ya bato. Na bomoi ya moyekoli ya Yesu Klisto, banzela ya mokili esengeli kobongolama mpo na kokokana na mayokani na biso, kasi ndenge mosusu te.

Ntango tolataka garma, tozali, lokola Bokambi ya Yambo eteyaki, kolata elembo ya bule ya Yesu Klisto. Lokola ezali bongo, mpo na nini tokoluka kosenga ntina ya kolongola elembo wana? Mpo na nini tokomilongola elaka ya nguya, libateli mpe mawa oyo elamba yango ezali kolimbola? Na ngambo mosusu, ntango nyonso oyo tosengeli kolongola garma mpo na mwa ntango, tosengeli kozala na mposa makasi ya kolata yango lisusu, nokinoki lokola ekoki, mpo ete tozali komikundola bilaka mpe makama oyo epesaka ntina na mayokani na biso. Likolo ya nionso, tomikundolaka ekulusu mpe lilita ya mpamba ya Klisto.

Bato mosusu bakoki koloba ete, “Nazali na banzela mosusu ya kokanisa Yesu.” Mpe nalingaka koyanola, wana ezali malamu. Mbala mingi ezali malamu. Tokanisa banso banzela mingi lokola tokoki mpo na kobatela bomipesi na biso ya “kokanisa ye ntango nyonso.” Kasi na kosalaka boye, ekozala kozanga bosembo koboya na nko bokundoli oyo Nkolo Ye moko apesaki na baye basali dotasio, garma ya bonganganzambe ya bosantu.

Yesu Klisto mpe nsango malamu na Ye ezali na ntina nyonso mpo na ngai. Elikya mpe bamposa na ngai nyonso ya seko, nyonso oyo nasimbaka na bolingo, ekangami na Ye. Azali “libanga ya lobiko na ngai,” nzela na ngai ya kokota epayi ya Tata na ngai ya Lola, nzela na ngai se moko ya kozonga na oyo nazalaki na yango kala mpe sikawa nalingi kozala na yango lisusu, elongo na mingi mpenza. Likabo na Ye epayi na biso ezali ya bokabi koleka oyo nazwaki naino te, ya bokabi koleka oyo epesami naino te—esombami lokola ezalaki na mpasi ya nsuka te, etandami kino na motango moko ezanga nsuka, epesami na bolingo oyo ezanga nsuka. Basende mpe nzube, mpasi mpe bwale, mawa mpe lisumu ya mokili oyo ekweya, nyonso “emelami kati na Klisto.”

Bongo nalataka garma ya bonganganzambe bosantu—mikolo nyonso mpe butu lokola elongobani uta nazwaki dotasio mibu 64 eleki, na mibu 19—mpo ete nalingaka Ye mpe mpo ete nazali na mposa ya bilaka oyo yango ezali komonisa.

Mituna na ntina ya Kolata Garma?

Basusu kati na bino bakoki kozala kotanga lisolo oyo na elikya ete nakoyanola na motuna moko ya sikisiki na ntina ya garma. Okoki kolikya “Nkolo alobi boye”—to kutu “Basali na Ye balobi boye”—na likambo oyo ezali penepene na motema na yo. Motuna na yo ekoki kowuta na ezaleli na yo moko na oyo etali mosala, ngalasisi, bopeto, klima, bopolo, bisika ya bopeto, to ata maladi.

Biyano mosusu na lolenge ya mituna oyo ekoki kozwama na temples.ChurchofJesusChrist.org mpe na eteni 38.5 ya Buku Monene. Bakoki kotuna bato ya libota mpe bakambi oyo batielaka motema mpo na likambo moko ya moto ye moko. Ezali, nzokande, bokambi ya polele mpenza epesami na makuli ya bobandi, mpe ezali na libela mpe libela Tata na bino na Lola, oyo ayebaka bino mpe alingaka bino mpe asosolaka makambo nyonso na ntina ya ezalela na bino. Akosepela mingi soki okotuna Ye mituna oyo yo moko.

Foto ya spire ya St. Tempelo ya George Utah

Tosengi bososola mabe te. Ntango ozali kosembola loboko mpo na bokambi ya bonzambe, Molimo akofula yo te mpo na kosala moke koleka kolanda malako oyo ezwamaki na tempelo mpe toli ya episikopo oyo ekabolamaki na Bokambi ya Yambo na maloba na bango ya sika. Tata ya bolingo akosalisa yo te okanisa kosala moke koleka oyo okoki mpo na koyokanisa na mibeko na Ye ya komipesa mpe bopolo oyo ekopambola yo sikawa mpe mpo na libela Kasi Asosolaka mituna na yo, mpe akosalisa yo ozwa mapamboli ya komemya garma mpe kobatela mayokani na yo? Iyo! Osengeli mpe kosolola na bato ya mayele na makambo ya monganga mpe ya kolongono ya nzoto soki esengeli? Ya solo! Esengeli yo koboya kotalela mayele ya malamu to kotala makambo oyo eleki ndelo? Nasambeli ete osala bongo te.

Nakoki koyanola na motuna nyonso oyo bozali na yango te. Nakoki ata koyanola na motuna nyonso oyo nazali na yango te. Kasi nakoki, lokola Apostolo ya Nkolo Yesu Klisto, kolaka bino lisalisi ya Nzambe ya bolingo, oyo azali koluka elonga mpe lipamboli na bino nyonso, na banzela oyo bokoki sikawa te kososola to komona liboso, ntango bozali kobatela mayokani oyo bosalaki na Ye.

Esakola ya Bokambi ya Yambo na ntina ya Garma

Garma ya bonganganzambe bosantu ekundolisaka biso elamba na kati ya tempelo, mpe elamba wana ezali elembo ya Yesu Klisto. Ntango olati garma na yo, olati elembo ya bule ya Yesu Klisto.

Kolata yango ezali emoniseli ya libanda ya bomipesi na yo ya kati mpo na kolanda Ye. Elamba yango ezali mpe bokundoli ya mayokani na yo ya tempelo. Osengeli kolata garma yango butu mpe moyi na bomoi na yo mobimba. Ntango esengeli kolongola yango mpo na misala oyo ekoki kosalema te ntango olati garma yango, luka kozongisa yango nokinoki. Ntango ozali kobatela mayokani na yo, bakisa mpe litomba ya bule ya kolata garma lokola elakisami na makuli ya ebandeli, okozala na nzela boyingeli na ngolu, libateli, makasi, mpe nguya ya Mobikisi.

© 2024 na Intellectual Reserve, Inc. All rights reserved. Ebetami na USA. Bondimami na lokota ya Angele: 6/19. Bondimami ya bobongoli: 6/19. Bobongoli ya Monthly Liahona Message, September 2024. Lingala. 19295 639

Matangi

1. Mose 5:4.

2. Mose 4:27.

3. Tala Mose 4:13–14.

4. Tala Yisaya 61:10; 2 Nefi 9:14; tala lisusu Emoniseli 19:8; 2 Nefi 4:33; Mormon 9:5; Malongi mpe Mayokani 109:76.

5. Emonani ete garma oyo tozali kolata lelo ekokani te na bakazaka ya mposo oyo bapesaki Adama mpe Eva. Garma yango ebongwanaki na makambo ndenge na ndenge na bowumeli ya mibu, kozwa na biloko mpe ndenge oyo esalemi. Kasi makambo oyo ezali mpenza na ntina—lolenge ya bule ya garma, mayokani oyo yango ezali komonisa—ebongwanaka te.

6. Nkombo oyo mobimba ya garma, lokola nkombo mobimba ya Eklezia, ezali koteya. Bonganganzambe ezali nguya ya Nzambe, mpe kolata garma ezali bokundoli ya nguya ya bonzambe oyo ezali mpo na biso ntango tozali kosala mpe kobatela mayokani elongo na Nzambe.

7. Moroni 4:3; 5:2

8. 2 Nefi 4:30.

9. Mosiya 16:8; tala lisusu Alma 31:38.