Bail er a Chedaol Priesthood

Mla er a President Jeffrey R. Holland

Ometechei el President er a Chelechad er a Teruich me a terung el Apostol

A tara telengtengil a klengeltengat er a templo, e kede mla nguu a uleklatk el kirel a telbiil—el olengchelel a Osobel.

Ng diak el iior ra kedmeklir le te ngilai a tekoi er a uleklatk, locha mlo mechas a rengrir ngii a Adam ma Eva el tilobed er a klebokel el Sers er a Eden e soiseba er a robeta er a klengit el beluulechad.

Te mocha medengelii, a belkul sel mle klebokel, e ungil klengar le bla er ngii e mocha kiei er a meringel klengar el mo kesib, e mo chemau a ringel—lokiuellel sel domekedong er ngii el kmo ng kodall. Te dimlak lodengei er a uchelel el kmo aika ngera belkul, eng di te mlo medengei el uase a bek el sils a ngarngii a ringel le chelbangel. E merang, le sel kot el meringel er ngii el rokui a sera bo lodengei el kmo te mocha chacheroid tir me a Chedam er a Babeluades—“el mo dibus er medal,” el Moses a milluches el kirel ruriul.

Tiaikid el klechacheroid el ngara mekelekolt, e milkolk el beluulechad, eng locha mle selebchakl a rengul a Adam me a Eva el medengelii a chimol tekoi: a yaksok a mla mekedmokl—el ngii a chedaol e diak a ulebengelel tekoi lokedongal el telbiil. Te mla yaksok el kmo te mo oltirakl er a Chedam er a rokir el klengar tir, e Ngii a mla yaksok el mo mesterir Osobel, el mo sobechekelterir er a ringel me a klengitelreng, e mo tngakireng el kirel a kngterir, e lmuut el ngoiteterir el mo er a Rngedel.

Eng di te mekera tirka el di chad e dobedebek aikal blal yaksok? Te mekerang e melemolem el medengelii a teletael el tir a ngara chelsel—er a bek el taem, a le llomes me a le klebesei?!

Ulekltak er a Telbilir

Sel mo omeklatk er tir eng milsterir a bilir el “budel a charm.” Ng meral klou el sengk er a ulterekokl taem. Uriul er a lekelii sel mekull el rodech, e a Adam me a Eva di mle mereched el mo medengei el kmo te di meau. A kot, e te milasm lomart er tir lolab a meklou llel a kerrekar. Ea, lomdasou eng diak el sal ungil luldasou, me te mocha omart er tir er a Rubak. (Tiaikid el klebelung el teletael a olchotel a kmo a teletael er a beluulechad a omechelang!) Seikid el mei er chelechal taem, e a Chedam er a Babeluades a mla olengit er a Rengelekel el me, tuobed er a ikel leberrotel er ngii, el mei er Ngii. Ma ikel budel a charm er sel taem me a kakerous el teletelel a bail el mei er chelechang, e Ngii lokiu a Chubechub a dirkak a ta me lebechikid me di de meau ng bai mla omail er a remekedung er a “bail er a llemalt,” lomeklatk er kid er a ikel telbiled. Aikal “bail er a mo suobel” a olengchelel sel ngarbab el sengk er ngii el rokui, el Tngakireng er a Jesus Kristo.

A Garment a Olangch er a Osobel

Aika, el rokui el uldasou el kirel a Adam ma Eva ma telbiil me a bail, a diak, di el ngara uldasou el merekong. Ng diak el meringel a domtab a blo lolchesiu a Adam ma Eva, le kid me kede chelbangel a ringel er tial beluulechad. Kid a dirrek el mla mocheroid er a rengedel a Dios, e melemolem el mo cheroid ra bek el taem sel derebet er a klengit. Me kede uaia a Adam ma Eva el bla beskid a osisiu el Osobel, el Jesus Kristo er a Nazareth, el Alpha e Omega, el ngelekel a ngar el Dios. Kede uaia a Adam ma Eva el mla soiseb er a telbiil lobengkel a Dios. Ma telengtengil, a klengeltengat er a templo, e kede mla ngmai a bail lomeklatk er kid ra ikal telbiil—el olengchelel a Osobel. Chelechal taem eng okedongall el bail er a chedaol priesthood.

Kede oubail aikal grament er a chelsel a biled. Ngii dil ngerachel kubang, tekoi el kuruul er a klengar ngak, ma ikel ngerchelek er a bek el sils, e sel ngaruchei er ngii el rokui a telbilek—el di melemolem el mora ulebongel. Ea ngaruchei er ngii el rokui aikel chedaol yaksok el ngak a urrekodel. A garment a diak dolecholt el mora beluulechad, ma telbilek meng diak kulecholt. Ngii el erung el kurrekodel—el bereked er ngak. Ng kmal bereked er ngak e kmal chedaol mei er ngak.

A omeklatk er kid ra ikal telbiil, aikal erul el yaksok, e kede oubail a grament er a bek el sils. Tial teletael olchotel a blakereng er kid el nguu Osobel el mo kot er a klengar kid. Ng blechoel mekreos er a rengud aikal olangch. Ng di tal de metecholb. Kede melai er a sakrament el tang er a tal sandei. Kede mora templo sel bol sebeched. Eng di a bail er a chedaol priesthood a ngodech: tia doltirakl er ngii ra bek el sils.

E tiaikid a teletelel a telbiil—ng diak domechei el mo er sel soad ma diak dolodech a teletelel loltirakl a loruul a beluu. A klengar er a roltirakl er a Jesus Kristo, e a teletael er a beluulechad a kirel mo chatter ra telbiled, ng diak el blitokl.

Sel de bleiull ra garment, e kid, a uai kel tekingel a First Presidency el kmo, kede bleiull er a chedaol olangch er a Jesus Kristo. A leuaisei, e ngera me kede osiik rolel el melubet? Ngere me kede mengeroid er kid er a yaksok el kirel a klisiich, ucheliu, me a chubechub el ngara garment? Eng di a lsekum, eng kired el nguubet a garment, eng kired el mereched lochang, er sel kot el recheded, le kede melbedebek a yaksok me a belkul a telbiil el bla deruul. E sel ngaruchei, kede melbedebek er a kerus mesel bechachau el debellel a Kristo.

A rebebil a locha kmo, “Ngarngii a kuk ngodech el rolel eak melatk er a Jesus.” Ea kmu el kmo, ng kmal ungil. A lebetok el rolel e ngungil. Bo domtab a bek el rolel eng mo blak a rengud el “blechoel melbedebek er ngii.” Eng di a bo deuaisei, eng sebeched el kuk obes er sel ulekltak el Ruabk a milskid, el ngii a bail er a chedaol priesthood.

A Jesus Kristo me a ebangkelio er ngii a klou a ultutelel er a rokui el tekoi er ngak. Aikel rokui el kumdasou ma kuruul, aikel mekreos er a renguk, e di ultuil er Ngii. Ngii a “bedul a klengar ngak,” el rolek el mora Demak er a Babeluades, el di chimol rael el kluut el mor sel kblarngii el ngii a soak el mo nguu, lobengkel a lmuut el bebil. A sengk er ngii el mer kid a kot el ngaruchei el blekerurau el blak nguu, sel kot el blekerurau—el mlochar er a ngarbab el char, el mora rokui el chad, lokiu a dmolech el beltikelreng. A olibesongel, ringel ma berraod, klengitelreng me a klengit er tial mla ruebet el beluulechad a rokui “el bla lengai a Kristo.”

Mak mla bleiull er a bail er a chedaol priesthood er a bek el sils er a llomes ma klebesei—ra chelsel okolem ma eua el rak ra kngai a klengeltengat er a templo, ra leteruich me a etiu—a rekik leng betik a renguk er Ngii e ngak ousbech a yaksok er ngii.

Ker el Kirel a Doubail a Garment?

A bebil er kemiu a locha menguiu er tial klumech e omddasou el kmo ak mo onger a kermiu el kirel a bail er a templo. Kom locha omdasou el kmo “A Rubak a dilu el kmo”—a lechub a “Mesiungel a dilu el kmo”—e melekoi aikel ngara rengmiu. A keremiu a locha melutk el kirel a teletael omngarngii er a chelsel a ureor, undo, kedmeklel a bedengiu, kleald er a beluu, teletael ma moubail, a kedmeklel a basio el mngarngii, a lechub a teletael er a ukeruul.

A bebil ra nger ra ikal ker a sebeched el metik ra temples.ChurchofJesusChrist.org er sel bliongel 38.5 ra General Handbook. A rchedal a telungalek ma remerredel a sebechiu mengedecheduch er tir el kirel. Eng di, ngarngii, a kmal bleketakl tekoi er sel taem el molai a klengeltengat er a chelsel a templo, e ngarngii a diak a ulebengelel Chedam ra Babeluades, el medengelkau e betik a rengul er kau e medengei a rokui el teletael el mngara chelsel. Ng kmal dmeu a rengul a moker a ker ngii.

Lak bol rrau a rengum. Sel mosiik chedaol ulekrael, e a Chedaol Reng a diak bol du er kau el mo mengesadel aikel kau a mla suub er a chelsel a templo ma ulaoch el tekingir a First Presidency el mla medung. A oubeltikereng el Chedam a diak bo lolngeseu er kau el mengesadel a llach el chatter er a Llechul kirel a blakelreng er kau el mo omekngeltengat er kau er chelechang el mo cherechar. Eng di Ngii ng medengei a kerim, e Ngii ng mo ngosukau el ngmai a klengeltengat sel mongull a moltirakl a telbiil kirel a bail er a templo? Oi! Ng locha kirem el mengedecheduch er a resemmong el chad er a ukeruul a lsekum eng kirem? Ochoi! Ng kirem el diak moltirakl a ungil uldasou a lechub e komes lengelakl ra olangch? Ak meluluuch el kmo ng diak obong.

Ng diak el sebchek longer a bek el kerim. Dirrek el diak sebechek longer a bek el kerik. Eng di ng sebechek, ngak el Apostol er a Jesus Kristo, el yaksok er kemiu a ngesou er a Dios, el ngii osiik a bek el klungiaol ma klengeltengat el chelechal taem eng diak mues, sel moltirakl a telbiil el bla mruul el mo er Ngii.

Tekingel a First Preisdency el kirel a Bail er a Templo

A garment ra chedaol priesthood omeklatk er kid a teletael ra chelsel a templo, el ngii olangch el bedul a Jesus Kristo. Sel motuu a bail ra templo, e kotungii a chedaol olangch el kirel a Jesus Kristo.

Sel moubail er ngii eng olchotel a blakereng er kau loltirakl er Ngii. A bail ra templo a dirrek el uleklatk ra telbiil el mruul er a chelsel a templo. Ng kirem loubail er bail er a templo a le llomes ma klebesei er a bek el sils er a klengar kau. Alsekum eng kirem el nguubet le kemeruul er a kmo ngerang e diak el sebechem el bleiull er ngii, eng kirem lochang er sel kot el rechedem. Sel moltirakl a telbilem, luldimukl oubail a bail ra templo el uai ikel mla medung er a chelsel a templo, eng mo klou a techellem el nguu a chubechub, ucheliu, klisiich me a olisiich er a Osobel.

© 2024 lokiu Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Klumech er a bek el buil Liahona, Ongetiu el buil 2024. Palauan. 19295 881