“Karment en Prihsduhd Sarawio,“ Liahona, Septempe 2024.
Padahk en Sounpwong kan en Liahona, Septempe 2024
Karment en Prihsduhd Sarawio
Me wia kisehn endaumen en tehnpas sarawi, kitail alehdaher mehn kataman ong atail inou kan ni paliwar—kilel ehu en Soundoaro.
Kilel sang Adam oh Ihp, Sang Douglas M. Fryer
Mendahte wehn kaunop me re udahn alehdiher oh pepehm mwahu kan me ren tamataman, e mwein wia mehkot kopwuriamwei mehlel ong Adam oh Ihp ni ara pekeusang ehr nan Mwetuel Lingan en Ihden oh doulahng sampah pwupwidi wet.
Ni ara wehwehkier mwahu, ira apw kasawihada ia wehwehn ara pilipil, kahreieng ira en kohsang ara mour mengei ong mour en kasongosong oh lokolok, mehn tehtik oh patou—iangahki mehkot me adahniki mehla. Irail sohte kak ese ni tapio ia wehwehn mehpwukat, ahpw ira mwadahngete esehla me ehu ehu rahn kak wahdo medek kapw. Mehlel, me keieu kamedek iei wehwehn ara pahn sohpeihong mehpwukat koaros ni ara tohrohrsang Samara Nanleng—“Koht ketin sohpeisang ira,“ Moses ntingidi mwuri.
Ni ara tohrohrsang oh kelepwalahr nan wasa lemwlemwur, oh sonseud, ia uwen kansenamwahu ong Adam oh Ihp en tamataman mehkot ehu: me inou kan wiawihdahr—mehkot sarawi oh poatopoat me kadahniki inou kesempwal akan. Ira inoukihdahr me ira pahn peikihong Sahmo erein ara mour, oh E ketin inouki me E pahn ketkihong ira Soundoar emen, me pahn kamwahuihala ara medek oh patou, tomwkihla ara sapwung kan, oh kapwure irahla Reh.
Ahpw ia mwomwen aramas pwukat arail pahn tamataman dahme re inoukiher? Ia mwomwen ara pahn tamatamante udahn mwohmwara—oh pohnese ansou koaros, nih rahn oh nih pwong?!
Mehn Katamanpen Ara Inou kan
En wia mehn kataman E ketkihong ira “likou en kilin kouht.“ Kisakis mwahu wet oh pil kohdo nan ansou mwahu. Mwurin ara tungoale wahntuhke irairdio, Adam oh Ihp esehda ansouohte me ira kilisou. Ni tapio, ira song en pwainkin irahdi tehn tuhke. Mwuhr, ira apw masepwehngki me eh sohte itar, ira apw songen rukila sang Kauno. (Soahngen pweipwei wet, iei kasansalpen udahn aramaso me kipehiradiher!) Sang ansouo kohdo, Sahm limpoak men kin ketin lukluke Sapwellime serihkan en kohdo, kohieisang rukuruk, oh kohdo Reh. Oh rasehng likou en kilin kouht nan ansouo oh soangesoangen likou kan leledo met, Sapwellime kupwur mwahu sohte kin mweidehng kitail en kiilisou ahpw E kalikouih me peik kan nan “likou en wiewia pwung,“ me wia mehn kataman pen atail inou kesempwal akan. “Karment en komour“ pwukat wia kilel en kisakis me keieu lapo, Tomwpen Sises Krais.
Karmento kin wia mehn kilel en Soundoaro
Eri, madamadau pwukat duwen Adam oh Ihp oh inou kan oh likou kan iei, udahn, laudsang madamadaute ehu. E sohte apwal en medewehda pepehm en Adam oh Ihp, pwe kitail pil kin sohpeihong kasongosong nan sampah pwupwudi wet. Kitail pil kin tohrohrsang rehn Koht, oh kitail kin kadohwan kitailla pak koaros me kitail wiahda dihp. Duwehte Adam oh Ihp, kitail alehdiehr Soundoar ohte, Sises Krais en Nasaret, Alpa oh Omeka, Iehros en Koht ieiaso. Duwehte Adam oh Ihp, kitail wiahdahr inou kan rehn Koht. Oh, kisehn pali en endaumen en nan tehnpas sarawi, kitail alehdi mehn kataman sarawi ehu en inou pwukat—mehn kilel en Soundoaro. Nan dih wet e kahdaniki karment en prihsduhd sarawio.
Ire sang Ketido Keriauo, sang Harry Anderson
Kitail kin likawih karment wet pahn atail likou en liki kan. Pwukoah kan me I ahniki, doadoahk me I wia nan mour wet, soangosoangen pwukoah kan me anahnepe nan mour wet, ni mehkoaros iei ei inou kan—ansou koaros oh kohkohlahte. Ni mehkoaros iei inou sarawi pwuko me I kin tengedihong. Karmento sohte kin wia mehn kala de sansal mwohn sampah, oh e kin duwehte ei inou kan. Ahpw Ih kin kihirahdo karanih ie—uwen keren me I kak. Re inenen kesempwal oh sarawi ong ie.
Ni atail pahn kin tamataman inou pwukat, me wia inou ehu nan pwungen aramas riemen, kitail en kin likawih karmento nan atail mour unsek. Wiewia wet kin kasalehda atail ineng en Soundoaro pwe en wia mehn kaweid nan atail mour. Mehn kilel teikan kin wiawi ehu ansou. Kitail pepdaisla pak ehu nan atail mour. Kitail kin tungoale kamadihpw sarawi wihk koaros. Kitail kin iang kohla nan tehnpas sarawi ansou koaros me kitail kak. Ahpw karment en prihsduhd sarawio weksang: kilel wet kitail kin wahuniki ni rahn oh ni pwong koros.
Oh iei ih mwomwen wiepen inou kan—sohte kin kohsang pwehki e mengeihsang de seukautihla oh sohte wiawihda duehte dahme aramas leliki. Nan mour en tohnpadahk en Sises Krais, wiepen sampah en kin idahwehn atail inou kan, kaiden atail inou kan en kin idawehn wiepen sampah.
Ni atail kin likawihkida karmento, kitail kin, iei me Presedensi Keieu padahngkiehr, likawihki mehn kilel sarawi ehu en Sises Krais. Ma ih mwomwehumwo, dahme kahrehda kitail kin kilangki kahrehpe kan pwe kitail en kihsang mehn kilelo? Dahme karehda kitail kin soikala inou en manaman kan, porepetail, oh mahk me karmento wiliandi? Udahn weksang, ansou kan me kitail pahn anahne kihsang karmento, kitail en inengieng mwadahngete kapwurehieng, ni ansou me konehng, pwe kitail en tamataman inou oh kapwal akan koaros me kieng kahrepeh kan ong atail inou kesempwal kan. Mwohn mehkoaros, kitail kin tamataman lohpwuho oh sousou en Krais.
Ekei pahn nda, “Mie songen wiepe teikan me ih pahn tamatamaniki Sises.“ Oh I pahn sapengki, men mwahu. Me tohto me mwahu. Kitail en medewe wiepe tohto me kitail kak pwe kitail en kolokol atail inou kan en “tamataman Ih ansou koaros.“ Ahpw ni atail pahn kin wia met, e pahn wia likamw ehu en soikala mehn kataman me pein Kauno ketkihong mehn endau ko, karment en prihsduhd sarawio.
Sises Krais oh Sapwellime rongamwahu wia mehkot kesempwal ong ie. Ei kopwoaropwoar kan oh ahi nannantih kan, mehkoaros me Ih kesempwaliki, mihmi Reh. Ih me “wia paip en ei men komour,“ wiepen ahi kak lelohng Semei Nanleng, ihte ahl me pahn kapwureiehla ong dahme Ih ahnikiher oh met men pwurehng ahniki, iangahki me laudsang. Sapwellime kisakis ong kitail iei me keieu kadek me I alehdi, me keieu sapan en ketkihdo—me pwainkihdi lokolok poatopoat, kohlahng aramas ngeder, me ketkihdohsang limpoak poatopoat. Tuhke kengkeng kan oh tuhke kamedek kan, medek oh lokolok, patou oh dipen sampah pwupwidi wet koros “kolahngehr Krais.“
Eri I likawiher karment en prihsduhd sarawio—rahn oh pwong koaros me konehng sang ansou me I tepin alehdi ei endaumen sounpar 64 samwalahr, ni soupar 19—pwe I poakong Ih oh pwe I anahne inou kan me e wiliandi.
Peidek kan duwen Likawih Karmento?
Ekei kumwail pahn wadwadek ire wet koapwoaroapwoariki me ih pahn sapeng peidek ehu duwen karmento. Mwein ke kopwoaropwoarki song ehu “Ihme Kauno mahseniher“—de “Ihme Sapwellimen ladu kan mahseniher“—duwen mehkot me karanih amw mohngiong en. Ahmw peidek nek kohsang ehu irair me pid doadoahk, kakehlailpen paliwar, kamwakelpen paliwar, karakarpen sahpw, kasansalpen paliwar, mwakelekelpen wasa kan, de pil roson en paliwar.
Ekei pasapeng en peidek pwukat kak dierekda ni temples.ChurchofJesusChrist.org oh pil nan ire 38.5 en Pwuhk en Kaweid Doadoahk. Tohn peneinei likilik kan oh sounkaweid kan nek sewesehkin uhk duwen ahmw peidek teikan. Ah miehier, kaweid sansal nan tiahk en inisadori, oh mie ansou koaros Semomw Nanleng, me kin mwahngih uhk oh kin ketin poakohng uhk oh kin wehwehki soahng koaros oh irairpomw. E pahn ketin kupwuriki ken pein peidek ong Ih peidek pwukat.
Kilel en spire en St. George Utah Temple
Menlau dehr sawehwehki. Ni ahmw pahn rapahki kaweid sarawi, Ngehno pahn sohte kaweidkinuhk en wia tiksang kaweid me ke alehdi nan tehnpas sarawi oh kaweid mwahu me sang rehn Presidensi keieu nan arail padahk. Sahm limpoak men sohte pahn sewese kin uhk en medewe me ke pahn wia me tikitiksang dahme ke kak wia pwe en pahrekiong Sapwellime koasoandi en wahu oh kasansalpen paliwar me pahn kapaihukada met oh kohkohlahte. Ahpw mehlel me E kin ketin wehwehki ahmw peidek kan, oh E pahn ketin seweseiuhk alehdi kapai kan sang ahmw pahn wahuniki karmento oh kolokol ahmw inou kan? Ei! E pil konehng ken koasoieng tohkte loalokong kan oh souhn sawas en paliwar kan nan ansou me anahnepe? Uhdahn! E konehng ken soikala madamadau sansalo de kilangweisang me pwungo? I kapakapki me kumwail sohte pahn wia.
I sohte kak sapeng ahmw peidek kan koaros. I sohte kak sapeng peidek koaros me I ahniki. Ahpw I kak, ni ahi wia Wahnpoaron en Kaun Sises Krais, inoukihong uhk sawas sang Koht limpoak men, me kin ketin rapahki ahmw pweida oh kapai kan koaros, ni wiepe ehu me ke sohte kak wehwehki, ni ahmw pahn kolokol inou kan me ke wiahdahr Reh.
© 2024 sang Intellectual Reserve, Inc. Kolokol pwuhng koaros. Intingda nan Wehin Amerika. Kamanaman ong ni Lokaiahn Wai: 6/19. Kamanaman ong kawehwe: 6/19. Kawehwehpen Padahk en nan Ehu Ehu Sounpwong kan, Septempe 2024.Pohnpeian.19295 885