“Seaparo sa Boprista bo Halalelang,” Liahona, Loetse 2024.
Molaetsa oa Khoeli Liahona, Loetse 2024
Seaparo sa Boprista bo Halalelang
E le karolo ea hlohonolofatso ea tempele, re fuoe khopotso e halalelang e ts´oarehang ea lilekane tsa rona—e leng lets´oao la Mopholosi ka Bo-Eena.
Lintlha ho tsoa ho Adama le Eva, ka Douglas M. Fryer
Ho sa natsoe tokisetso eo ba ileng ba e fuoa ntle le pelaelo le tiisetso eo ba ileng ba leka ho e hopola, e tlameha ebe e bile ntho e makatsang haholo ho Adama le Eva ho tloha serapeng sa bona sa parateise sa Edene le ho kena lefats´eng le oeleng.
Ka tlhokomeliso e tiileng, ba ile ba elelloa hore na ho bolela eng ho rekisa bophelo ba bona bo khutsitseng, bo sa ts´oenyeng bakeng sa lefats´e la khanyetso le mofufutso, meutloa le mahlomola—pheletsong bo lateloa ke ntho e bitsoang lefu. Ba ne ba ke ke ba tseba qalong hore na sena sohle se bolela eng, empa kapele ba ile ba hlokomela hore letsatsi ka leng le ka tlisa bohloko bo bocha. Ka sebele, ntho e bohloko ka ho fetisisa e ne e le ho elelloa hore ba tla tobana le tsena tsohle ba arohane le Ntate oa bona ea Maholimong—“ba koalletsoe kantle ho ponts´eng sa hae,” Moshe o ile a tlaleha hamorao.
Ka lebaka la karohano ena le bolutu lefats´eng le batang, le ts´oenyehileng, ho ile ha ts´elisa ho joang ho Adama le Eva ho hopola ntho e le ´ngoe: hore lits´episo li entsoe—ntho e halalelang ´me e sa feleng e bitsoang lilekane. Ba ne ba ts´episitse hore ba tla mamela Ntate ka matsatsi ‘ohle a bophelo ba bona, ‘me o ne a ts′episitse ho fana ka Mopholosi, ea neng a tla imolla bohloko le masoabi a bona, a lokise liphoso tsa bona, ′me a ba khutlisetse ka polokeho ponts´eng ea Hae.
Empa batho baa ba shoang ba ne ba tla hopola joang seo ba se ts´episitseng? Ba ne ba tla lula ba hlokomela boemo ba bona bo kotsi joang—ka linako tsohle, bosiu le mots´eare?!
Khopotso ea Lilekane tsa Bona
Bakeng sa khopotso e joalo O ile a ba fa “liaparo tsa matlalo.” A mpho e joang e tlileng ka nako e nepahetseng. Ka mor´a ho ja tholoana e thibetsoeng, Adama le Eva ba ile ba hlokomela hang-hang hore ba feela. Pele, ba ile ba leka ho koahela bofeela ba bona ka makhasi a feie. Joale, ka ho ts´aba hore ha baa lekana, ba leka ho ipatela Morena. (Boiteko bo joalo bo booatla e ne e le ho fihla ha bopaki ba hore batho ba shoa!) Ho tloha motsotsong oo ho fihlela joale, Ntate ea lerato o memme bana ba Hae ho tsoa moo ba ipatileng, ho tla ho Eena. ´Me joaloka liaparo tsa letlalo nakong eo le liaparo tse fapa-fapaneng ho tloha ka nako eo, Eena mohaung oa Hae ha aa re siea re hlobotse empa o apesa ba mamelang “kobo ea ho loka,” e leng khopotso ea lits´episo le lilekane tsa rona. “Liaparo tsena tsa poloko” li ts´oants´isoa le mpho e kholo ka ho fetisisa, Topollo ea Jesu Kreste.
Seaparo ke Lets´oao la Mopholosi
Hantle-ntle, monahano oona oohle ka Adama le Eva le lilekane le liaparo, ehlile, ke ntho e fetang feela boikoetliso ba kelello. Ha ho thata ho nahana hore na Adama le Eva ba ile ba ikutloa joang, hobane le rona re tobana le mathata lefats´eng lena le oeleng. Le rona re arohane ho ponts´eng ea Molimo, ´me re tsoela-pele ho ikarola nako le nako ha re etsa liphoso. Joaloka Adama le Eva, re fuoe eena Mopholosi eo, Jesu Kreste oa Nazaretha, Alfa le Omega, Mora oa Molimo o phelang. Joaloka Adama le Eva, re entse lilekane le Molimo. ´Me, joaloka karolo ea tlhohonolofatso ea tempele, re fuoe khopotso e halalelang e ts´oarehang ea lilekane tseo—lets´oao la Mopholosi ka Bo-eena. Mokhahlelong oa nako ea rona e bitsoa seaparo sa boprista bo halalelang.
Lintlha ho tsoa ho Ho Tla Lekhetlo la Bobeli, ka Harry Anderson
Re apara seaparo sena ka tlas´a liaparo tsa rona tsa ka ntle. Ho sa tsotellehe hore na ke na le boikarabello bofe, likarolo life kapa life tseo ke li bapalang bophelong, ho sa tsotellehe hore na ke mesebetsi efe ea bophelo ba letsatsi le letsatsi e hlokehang, tlas´a tsona kaofela ke lilekane tsa ka—ka mehla le ka ho sa feleng. Ka tlas´a tsohle ke lits´episo tse halalelang tseo ke li khomarelang ka tieo. Seaparo seo ha se bonoe kapa ha se bonahatsoe ka pel´a lefats´e, ´me le lilekane tsaka li joalo. Empa bobeli ke li boloka haufi le ´na—haufi kamoo nka khonang. Ke tsa botho ka ho teba le ka ho halalela ka ho fetisisa.
Ha re hopola lilekane tseo, lits´episo tseo tsa litsela tse peli, re apara seaparo bophelo bohle ba rona. Tloaelo ena e bonts´a takatso ea rona ea hore Mopholosi e be ts´usumetso e sa feleng bophelong ba rona. Mats´oao a mang a ratoang ke a nako le nako. Re kolobetsoa ha ´ngoe bophelong ba rona. Re ja selallo hang ka beke. Re ea tempeleng ha maemo a re lumella. Empa seaparo sa boprista bo halalelang se fapane: lets´oao lena re le hlompha letsatsi le letsatsi le bosiu.
Ke kamoo lilekane li leng ka teng—ha li behelloe ka thoko ka lebaka la boiketlo kapa bohlasoa ´me ha li fetoloe hore li lumellane le mekhoa le lifeshene tsa sechaba. Bophelong ba morutuoa oa Jesu Kreste, mekhoa ea lefats´e e tlameha ho fetoloa hore e ikamahanye le lilekane tsa rona, eseng ka tsela e ´ngoe.
Ha re apara seaparo, joaloka ha Boetapele ba Pele bo rutile, re apera lets´ao le halalelang la Jesu Kreste. Ha ho le joalo, ke hobaneng ha re ka batla lebaka la ho tlosa lets´oao leo? Ke hobaneng ha re ka ikamoha ts´episo ea matla, ts´ireletso, le mohau tseo seaparo se li emetseng? Ho fapana le hoo, neng kapa neng ha re tlameha ho hlobola seaparo seo ka nakoana, re lokela ho chesehela ho se apara hape, kapele kamoo ho ka khonehang, hobane re hopola lits´episo le likotsi tse fanang ka moelelo oa lilekane tsa rona. Ka holimo ho tsohle, re hopola sefapano le lebitla le se nang letho la Kreste.
Ba bang ba ka re, “Ke na le litsela tse ling tsa ho hopola Jesu.” ´Me ke ne ke tla arabela, ho ea babatseha. Ha holoanyane ho molemo. A re nahaneng ka litsela tse ngata kamoo re ka khonang ho boloka boitlamo ba rona ba ho “mo hopola ka mehla.” Empa ka ho etsa joalo, e ne e tla ba ho se ts´epahalle le ho se hlokomele ka boomo khopotso eo Morena ka Bo-eena a ileng a e fa ba hlohonolofalitsoeng tempeleng, seaparo sa boprista bo halalelang.
Jesu Kreste le evangeli ea Hae o bolela ntho e ´ngoe le e ´ngoe ho ´na. Lits´epo tsohle tsaka tsa ka ho sa feleng le litabatabelo, ntho e ´ngoe le e ´ngoe eo ke e ts′´oereng e le ea bohlokoa, e its´oarellelitseho Eena. Ke “lefika la poloko eaka,” tsela eaka ea ho fihlella ho Ntate ea Maholimong, tsela eaka feela ea ho khutlela ho seo nkileng ka ba le sona ´me joale ke batla ho ba le sona hape, ´moho le tse ngata haholo. Mpho eo a re fileng eona ke ekholo ka ho fetisisa ho eo nkileng ka e fuoa, e kholo ka ho fetisisa ea ho fanoa—e rekuoeng ka mahlomola a sa feleng, e atoloselitsoeng ho palo e sa feleng, e fanoeng ka lerato le se feleng. Meutloa le hlabahlabane, bohloko le masisa-pelo, masoabi le sebe tsa lefats´e lena le oeleng kaofela li koenyeletsoa holimo ho Kreste.
Kahoo ke apere seaparo sa boprista bo halalelang—letsatsi le bosiu ka tsela e loketseng ho tloha ha ke ne ke hlohonolofatsoa tempeleng lilemong tse 64 tse fetileng, ha ke ne ke le lilemo li 19—hobane kea Mo rata le hobane ke hloka lits′´episo tseo se li emetseng.
Lipotso ka ho Apara Seaparo?
Ba bang ba lona ba bala sehlooho sena ka ts´epo ea hore ke tla araba potso e itseng mabapi le seaparo. U ka ts´epa ho utloa “Joana ho bolela Morena”—kapa esita le “Joana ho bolela bahlanka ba Hae”—tabeng e haufi le pelo ea hau. Potso ea hau e ka bakoa ke boemo ba botho bo amanang le mosebetsi, boikoetliso, bohloeki, boemo ba leholimo, boitlhompho, libaka tse hloekileng esita le boemo ba bophelo.
Likarabo tse ling tsa lipotso tsa mofuta ona li ka fumanoa ho temples.ChurchofJesusChrist.org le karolong ea 38.5 ea buka. Bukana ea Kakaretso. Litho tsa lelapa tse ts´eptjoang le baetapele ba ka botsoa ka taba ea botho. Leha ho le joalo, ho na le tataiso e hlakileng haholo e fanoeng lits´ebeletsong tse qalang, ´me ka ho sa feleng o teng Ntat´a lona ea Maholimong, ea le tsebang le ea le ratang le ea utloisisang tsohle ka maemo a lona. A ka thabela hore ebe le mo botsa lipotso tsena ka bo-lona.
Sets´oants´o sa mofika oa St. George Utah
Ka kopo le se ke la utloella. Ha le ntse le nanabela tataiso ea bomolimo, Moea o ke ke oa susumelletsa ho etsa ho fokolang ho feta ho latela thuto e amohetsoeng ka tempeleng le keletso ea boporofeta e arolelanoang ke Boetapele ba Pele polelong ea bona ea morao rao. Ntate ea lerato a ke ke a le thusa hore le ikemisetse ho etsa se fokolang ho feta seo le ka se khonang ho lumellana le litekanyetso tsa Hae tsa boinehelo le boinyenyefatso tse tla le hlohonolofatsa joale le ka ho sa feleng. Empa na O utloisisa lipotso tsa hau, ´me na O tla u thusa ho amohela lihlohonolofatso tsa ho hlompha seaparo le ho boloka lilekane tsa hau? Ee! Na hape u lokela ho buisana le lingaka tse nang le tsebo le litsebi tsa bophelo bo botle ha ho hlokahala? Ehlile! Na u lokela ho se tsotelle se utloahalang kelellong kapa ho talima ka ´nqane ho lets´oao? Ke rapela hore u se ke ua etsa joalo.
Ha ke khone ho araba potso e ´ngoe le e ´ngoe eo u nang le eona. Ha ke khone le ho araba potso e ´ngoe le e ´ngoe eo ke nang le eona. Empa, joaloka Moapostola oa Morena Jesu Kreste, nka u ts´episa thuso ea Molimo ea lerato, ea batlang katleho le mahlohonolo a hau kaofela, ka litsela tseo u ke keng ua li utloisisa kapa ho li bona pele, ha u ntse u boloka lilekane tseo u li entseng le Eena.
© 2024 by Intellectual Reserve, Inc. All rights reserved. E hatisitsoe USA. Tumello ea Senyesemane: 6/19. Tumello ea Phetolelo: 6/19. Phetolelo ea Monthly Liahona Message, Loetse 2024. South Sotho. 19295 739