Koryɛ Nhwɛdo wɔ Jesus Christ mu

President Russell M. Nelson ne Kasaa

Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne President.

Sɛ yɛbɔmu wɔ Jesus Christ mu tse dɛ nkorɔfo no a wɔwɔ 4 Nephi mu no a, hɛn pɛ dɛ yɛbɛyɛ kor no bɛtra hɛn nsonsonee na oegya dze akɔ enyigye mu.

Yɛtse mber bi mu a menntse moho ase asoɛr na wentwiwentwi retserɛw wɔ wiadze nyina. Tɛknɔlɔgye roboa na nkorɔfo a hɔn akoma ayɛ nwin no, nkyekyɛmu tum yinom dze enyimtsia ehunahuna hyɛ hɛn akoma mã na ɔdze wentwiwentwi sɛɛ hɛn nkɔmbɔdzi. Kwasafoyɛ nkitahodzi mu retsetsew. Akõkoekõ ruhur.

Iyi saso ntsi, Jesus Christ nokwar akadofo no per hwehwɛ asomdwee na ahokekã mu ara hwehwɛ dɛ wɔbɛkyekyer kuw soronko bi—dza wɔkyekyeer no wɔ Jesus Christ ne nkyerɛkyerɛ do. Dɛm ntsi, Ewuradze ahyɛ hɛn dɛ, “Hom nyɛ kor, na sɛ hom annyɛ kor a, nna hom nnyɛ medze’’ (Nkyerɛkyerɛ na Ahyɛmudzi 38:27). Nokwar, koryɛ nye Jesus Christ no nokwar Asɔr ahyɛnsewdze.

Yesi dɛn yɛ edwuma dze tsĩa nkyekyɛmu na wentwiwentwi tum horow? Yebesi dɛn benya koryɛ?

Enyigye mu ara, 4 Nephi wɔ Mormon Nwoma mu no ma hɛn mfatoho. Tsir yi kyerɛw kwan a nkorɔfo a wɔtsenaa ase wɔ ber a Agyenkwa no seraa hɔn ekyir no, kyerɛkyerɛɛ hɔn, na ɔkyekyeer N’Asɔr wɔ hɔn ntamu ho asɛm tsiabaa. Asɛm yi kyerɛ mbrɛ nkorɔfo yinom sii nyaa ahotɔ na asomdwee koryɛ, na ɔma hɛn nhwɛdo a hɛnankasa yebotum edzi do dze enya koryɛ yi dɛmara.

Nsakyer

4 Nephi 1:1 mu no, yɛ kenkan dɛ: “Nna Jesus n’esuafo no akyekyer Christ N’Asɔr wɔ asaase a ɔabɔ hɔn ho aprɔw no nyinara do. Na [nkorɔfo] baa hɔn nkyɛn, na wonuu hɔnho wɔ hɔn bɔn ho nokwar mu no.’’

Yɛyɛ kor twa hyia Ewuradze na Agyenkwa Jesus Christ ho. Sɛ nyimpa kor biara sũa Jesus Christ, N’asɛmpa, na N’Asɔr ho asɛm no, Sunsum Krɔnkrɔn no dzi nokwar no ho dase ma nyimpa kor biara n’akoma mu. Nkyii hɛn mu kor biara botum agye Agyenkwa ne nsato no dɛ obenya gyedzi wɔ No mu na ɔakã No do ber a onu noho.

Dɛm ntsi ankorankor nsakyer akwantu hyɛ ase—fi pɛsankonya na bɔn apɛdze horow ho na ɔkɔ Agyenkwa no hɔ. Ɔno nye hɛn gyedzi ne fapem. Na sɛ hɛn mu kor biara hwɛ No wɔ adwendwen biara mu a (hwɛ Nkyerɛkyerɛ na Ahyɛmudzi 6:36), Ɔbɛyɛ nkabɔmu tum wɔ hɛn abrabɔ mu.

Ahyɛmudzi horow

Nkyerɛwee no a ɔwɔ 4 Nephi no kɔ do kã dɛ hɔn a wɔbaa Asɔr no na wonuu hɔnho wɔ hɔn bɔn ho no “wonumaa hɔn wɔ Jesus ne dzin mu; na hɔn so nyaa Sunsum Krɔnkrɔn no (4 Nephi 1:1). Wodzii ahyɛmu—nkyekyeree nkitahodzi, soronko bi a—wɔnye Nyankopɔn dzii.

Sɛ yɛyɛ na yesie ahyɛmudzi horow no a, yɛfa Ewuradze ne dzin to hɛn do dɛ ankorankor. Dza ɔkã ho no, yɛfa Ne dzin to hɛn do dɛ ɔman. Obiara a ɔyɛ ahyɛmudzi horow na ɔper sie no bɛyɛ Ewuradze no nkorɔfo, No soronko egyapadze (hwɛ Exodus 19:5). Dɛm ntsi, yetwa ahyɛmu anamɔn kwan no dɛ ankorankor na dɛ asɔr no nyina. Hɛn nye Nyankopɔn ahyɛmudzi nkitahodzi ma hɛn botae kor na suban a ɔsɛ. Sɛ yɛkyekyer hɛnho fam Ewuradze a, Ɔboa hɛn ma yenya hɛn “akoma a wɔabɔmu wɔ koryɛ mu na wɔ ɔdɔ mu ma hɛnho nkorkor’’ (Mosiah 18:21)

Pɛrpɛr, Pɛryɛ, na Yɛroboa Abɔbɔnfo no

Asɛm a ɔwɔ 4 Nephi mu no kɔ do dɛ: “Na wentwiwentwi nye aperdzi biara ennsi hɔn ntamu, na obiara nye no nua dzii no pɛpɛɛpɛr.

“Na hɔn ndzɛmba nyina bɛyɛɛ kwasafodze, dɛm ntsi nna wonnyi ahonyafo na ehiafo, ndɔnkɔfo nye adehye, hɔn nyina nyaa fahodzi, na wonyaa adom akyɛdze kor” (4 Nephi 1:2–3).

Hɛn honandua nkitahodzi mu no, Ewuradze pɛ dɛ yɛnye hɛnho dzi no pɛrpɛr na yennsisi anaa yenntwa hɛnho hɛnho abrɔdɔ (hwɛ 1 Thessalonicafo 4:6). Sɛ yɛtwe bɛn Ewuradze yie a, “hom rinnya adwen biara dɛ obi bepira ne nyɛnko, mbom hom bɛtsena asomdwee mu, na wɔdze ɔdasanyi biara dza odzi wɔ no no ama no’’ (Mosiah 4:13).

Ewuradze ahyɛ hɛn mbra dɛ yɛnhwɛ ehiafo na abɔbɔfo no. Ɔwɔ dɛ “yɛdze [hɛn] ahodze ma’’ dze boa hɔn , dɛ mbrɛ hɛn ahom a yɛdze bɛyɛ tse, a yerummbu hɔn atsɛn (hwɛ Mosiah 4:21–27).

Hɛn mu kor biara wɔdɛ “obu no nua dɛ nankasa noho’’ (Nkyerɛkyerɛ na Ahyɛmudzi 38:24). Sɛ yebotum abɛyɛ Ewuradze no nkorɔfo na yɛayɛ kor a, nnyɛ dɛ yebobu hɛnho nkorkor dɛ yɛyɛ pɛr nko, mbom otwar dɛ yɛsan so nokwar mu ara yehu hɛnho dɛ etsipɛnfo na yɛtse nkã wɔ hɛn akoma mu dɛ yɛyɛ pɛr—pɛr wɔ Nyankopɔn n’enyim, yɛsom bo pɛr na yɛwɔ ndaamba pɛrpɛr.

Setsie

Adzesũadze a odzi do a ofi 4 Nephi ba no ba wɔ asɛnsin yi mu: “Wodzii mbrasɛm a hɔn nsa kãa fii hɔn Ewuradze nye hɔn Nyankopɔn nkyɛn no do’’ (4 Nephi 1:12).

Ewuradze dze Ne nkyerɛkyerɛ akyerɛkyerɛ nkorɔfo yinom, ama hɔn mbrasɛm, na ɔafrɛ asomfo ma wɔasom hɔn. No botae horow no mu kor a Ɔdze yɛɛ dɛm no nye dɛ ɔhwɛ no pefee dɛ ekyingye biara mmba hɔn mu (hwɛ 3 Nephi 11:28–29; 18:34).

Hɛn setsie ma Ewuradze na No nkowaa hɔn nkyerɛkyerɛ yɛ adze tsitsir ma hɛn nkabɔmu. Hɛn enyimpisi dɛ yɛbɛyɛ setsei ama mbrasɛm dɛ yennu hɛnho mber biara a yɛbɔtɔ sin na yɛmboa hɛnho nkorkor ber a yɛper dɛ yɛbɛyɛ yie na yɛayɛ yie da biara no kã ho.

Yɛrobɔ Mu Ehyia

Odzi do no, yesũa dɛ nkorɔfo a wɔwɔ 4 Nephi mu no “[kɔɔr do] wɔ akɔnkye nye mpaabɔ mu, na wohyiaa mu mpɛn pii wɔ mpaabɔ nye Ewuradze n’asɛm ne ntsiei mu” (4 Nephi 1:12).

Yehia dɛ yɛbɔ mu hyia Hɛn dapɛn dapɛn asɔryɛ nhyiamu horow no yɛ kwan a ohia ma hɛn dɛ yenya ahoɔdzen dɛ ankorankor na dɛ asɔr. Yedzi sacrament no, yesũa, yɛbɔ mpaa, yɛbɔmu tow ndwom, na yɛboa hɛnho nkorkor. Mboaboano bi so san boa hɛn ma yekenyan yɛkã ho nkãtse, anyɛnkoyɛ, na botae kor.

Ɔdɔ

Nkyii nkyerɛwee a ɔwɔ 4 Nephi mu ma hɛn ebia dza ɔkrɔn koraa wɔ iyi nyinara ho—adze a sɛ ɔnnka ho a yennkenya nokwar koryɛ: “Wentwiwentwi biara ammba asaase no do, osian Nyankopɔn no ho dɔ a ɔtse nkorɔfo no hɔn akoma mu no ntsi” (4 Nephi 1:15).

Hɛn nsa kã ankorankor asomdwee sɛ ahobrɛadze mu ara yegyaa hɛn mu ma a, nna nokwar mu ara yɛdɔ Nyankopɔn. Iyi nye mbra no mu asɛm kɛse a odzi kan na ɔsõ. Yɛrodɔ Nyankopɔn akyɛn obiara anaa biribiara nye gyinabew a ɔdze nokwar asomdwee, awerɛkyekye awerɛhyɛmu, na enyigye brɛ hɛn. Sɛ yetu Nyankopɔn na Jesus Christ ho dɔ mpon a, ɔdɔ ma ebusua na fipamfo rennyɛ dzen.

Ehurusi kɛse a yebenya ho sũahu da bi nye ber a yɛbɛma Nyankopɔn na Ne mba nyinara hɔnho dɔ bekitsa hɛn ara yie.

Ayamuyie, Christ no dɔ mapã no, nye wentwiwentwi n’ano edur. Ɔno nye Jesus Christ no nokwar kadofo no suban tsitsir. Sɛ yɛbrɛ hɛnho adze wɔ Nyankopɔn enyim na yɛdze hɛn akoma mu ahoɔdzen nyina bɔ mpaa a, Ɔdze ayamuyie bɛma hɛn(hwɛ Moroni 7:48).

Ber a hɛn nyinara hwehwɛ dɛ yebenya Nyankopɔn no dɔ ma ɔatsena hɛn akoma mu no, koryɛ awanwadze bɛyɛ awosu koraa ama hɛn.

Awosu Krɔnkrɔn

Ewiei no, nkorɔfo a wɔwɔ 4 Nephi no daa koryɛ sɛnkyerɛdze edzi a ɔfata hɛn asokyɛn: “Edwotwafo, anaa ewudzifo biara nnyi hɔn mu, nna Lamanfo, anaa nkyerɛkyerɛmu biara nnyi hɔn mu; mbom hɔn nyina yɛɛ adze kor, Christ ne mba, Nyankopɔn n’ahendzi mu adzedzifo’’ (4 Nephi 1:17).

Ahyɛnsewdze horow a wɔakyekyɛ nkorɔfo mu mfe ɔha pii no saan ekyir ansaana enyimnyam awosu a otsim yie reba. Wohun hɔnho—na obiara—dɛ mbrɛ hɔn nye Ɔsor Egya na Jesus Christ nkitahodzi tse.

Nkyekyɛmu na nsonsonee botum ayɛ papa na adze tsitsir ama hɛn. Mbom hɛn awosu a ohia dodow nye dza ɔfa hɛn fibea na botae krɔnkrɔn ho.

Dza odzi kan na ohia papaapa, hɛn mu kor biara yɛ Nyame ne ba. Otsĩa ebien, dɛ eyɛ Asɔrba no, hɛn mu kor biara yɛ ahyɛmudzi ba. Na otsĩa ebiasa, hɛn mu kor biara yɛ Jesus Christ osuanyi. Mehyɛ hɛn nyinara dɛ mma yɛmma awosu biara kwan ma “ombeyi, ɔmbɛhyɛ, anaa ondzi kan wɔ gyinabew horow yinom a wotsim no do.’’

Hom Nyɛ Kor

Nyankopɔn ato nsa afrɛ obiara dɛ ɔmbra No hɔ. Kwan da hɔ ma obiara. Ebia hɛn nsonsonee bɛyɛ hɛn kusum, amanyɛsɛm, ebusuakuw, akɔndɔdze, na wɔ akwanhorow pii mu. Naaso sɛ yɛbɔmu wɔ Jesus Christ mu a, nsonsonee a ɔtsetse dɛm no pa wɔ hɔn tsitsiryɛ mu na hɛn pɛ ɔbordo dɛ yɛbɛyɛ kor no hyɛ hɔn do—ama yeetum ayɛ Ne dze.

Ma adzesũadze a wɔkyerɛkyerɛɛ no wɔ 4 Nephi no nhia wo. Ber a hɛn mu kor biara per dɛ ɔdze koryɛ ndzɛmba yinom a wohia tsitsir no bɛkã hɛn abrabɔ ho no, wobotum akã no wɔ hɛn ho, dɛ mbrɛ wɔkãa wɔ hɔnho no dɛ, “Na nokwar, nyimpa biara nnyi hɔ a Nyankopɔn dze ne nsa abɔ hɔn a wonyaa ahomka tse dɛ dɛm nyimpa yi’’ (4 Nephi 1:16).

© 2024 by Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, October 2024. ne nkyerɛasee Fante. 19359 502