Etinda ya sanza ya Liahona Sanza ya zomi 2024

Oyo Ndakisa mpo na Bomoko kati na Yesu Klisto

Na Mokambi Russell M. Nelson

Mokambi ya Eklezia ya Yesu Klisto ya Basantu ba Mikolo mya Nsuka

Lokola tozali na bomoko kati na Yesu Klisto lokola bato kati na 4 Nefi, mposa na biso ya kozala moko eleki babokeseni na biso mpe ememaka na esengo.

Tozali na eleko oyo boweli mpe bokeseni ezali se kobakisama na mokili mobimba. Na lisalisi ya bamasini mpe bolendisi ya bato oyo mitema na bango ezali lisusu na bolingo te, nguya wana ya bokabwani ekoki kotondisa mitema na biso na koyinana mpe na kobebisa boyokani na biso na boweli. Bokangami ya bato ya mboka ezali kobeba. Bitumba ezali kongala.

Na likambo oyo, balandi ya solo ya Yesu Klisto bazali na mposa makasi ya kimia mpe bazali koluka na molende kotonga lolenge mosusu ya lisanga—oyo euti na mateya ya Yesu-Klisto. Mpo na yango, Nkolo apesi biso etinda ya “kozala moko; mpe soki bozali moko te bozali ya ngai te” (Malongi mpe Mayokani 38:27). Na bongo, bomoko ezali elembo ya Eklezia ya solo ya Yesu Klisto.

Ndenge nini tosalaka mpo na kobundisa nguya ya bokabwani mpe ya boweli? Ndenge nini tokoki kozala na bomoko?

Likambo ya esengo, 4 Nefi na Buku ya Mormon epesi biso ndakisa moko. Mokapo oyo ekomi na mokuse lolenge bato babikaki nsima ya Mobikisi kotala bango, koteya bango mpe kotia Eklezia na Ye kati na bango. Lisolo oyo ezali kolakisa lolenge nini bato wana bazwaki bomoko ya esengo mpe ya kimia, mpe epesi biso ndakisa tokoki kolanda mpo na kozwa bomoko wana kaka biso moko.

Mbongwana

Kati na 4 Nefi 1:1, totangi: “Bayekoli ya Yesu basalaki eklezia ya Klisto na mikili nyonso ya zingazinga. Mpe [bato] bayaki epayi na bango, mpe solo bayambolaki solo masumu ma bango.”

Tozali na bomoko nzinganzinga ya Nkolo mpe Mobikisi Yesu Klisto. Lokola moto na moto azali koyekola oyo etali Yesu Klisto, nsango malamu na Ye, mpe Eklezia na Ye, Molimo Mosantu azali kotatola bosolo na motema ya moto na moto. Moko moko na biso akoki bongo kondima libyangi ya Mobikisi ya kozala na bondimi na Ye mpe kolanda Ye na koyambolaka.

Boye ebandi mobembo ya moto ye moko ya mbongwana—mosika na bamposa ya moimi mpe ya masumu mpe epayi ya Mobikisi. Azali moboko ya bondimi na biso. Mpe lokola moko na moko na biso atalaka epayi na Ye na makanisi nyonso (tala Malongi mpe Mayokani 6:36), Akomi nguya oyo esangisaka na bomoi na biso.

Mayokani

Lisolo na 4 Nefi ezali kokoba koloba ete baoyo bayaki na Eklezia mpe bayambolaki na masumu na bango “babatisamaki na nkombo ya Yesu; mpe bazwaki lisusu Molimo Mosantu” (4 Nefi 1:1). Basilaki kokota na boyokani moko—bondeko moko ekeseni, ya bokangami—na Nzambe.

Ntango tosalaka mpe tobatelaka mayokani, tokamataka nkombo ya Nkolo likolo na biso lokola moto na moto. Lisusu, tozwaka nkombo na Ye likolo na biso lokola bato moko. Baoyo banso basalaka mayokani mpe bazali kosala makasi mpo na kobatela yango bakomaka bato ya Nkolo, bomengo na Ye ekesena (tala Esode 19:5). Na yango, totambolaka na nzela ya boyokani na moto na moko mpe na lisanga lokola. Bondeko na biso ya boyokani na Nzambe epesi biso ntina moko mpe bomoto ya bomoko. Wana tozali komikangisa na Nkolo bisomei, Asalisaka biso tozala na “mitema na biso ekangisami esika moko na bomoko mpe na bolingo moko epayi ya mosusu” (Mosiya 18:21).

Bondeko na biso ya boyokani na Nzambe epesi biso ntina moko mpe bomoto ya bomoko.

Bosembo, Bokokani, mpe Kosalisa Babola

Lisolo na 4 Nefi ekobi: “Ezalaki na boweli mpe boswani te o ntei na bango, mpe moto na moto asalaki na boyengebene elongo na mosusu”

“Mpe bazalaka na biloko nyonso na lisanga na kati na bango; boye ezalaki na mozwi mpe mobola te, moumbu mpe monsomi, kasi bakomisamaki nyonso nsomi, mpe bakaboli ya likabo ya lola.(4 Nefi 1:2–3).

Na misala na biso ya ntango, Nkolo alingi biso tozala bosembo epayi ya moko na mosusu mpe tomikosa to kozwa litomba te ya moko na mosusu (tala 1 Batesaloniki 4:6). Mpe lokola tozali kokola mpembeni ya Nkolo,biso “tokozala na likanisi lyoko te ya kosala mabe moko na mosusu, kasi kozala na kimia, mpe kopesa na moto na moto engebene na eye esengeli na ye“ (Mosiya 4:13).

Nkolo atindaki biso lisusu tosunga babola mpe bazangi. Tosengeli “kokabola biloko [na biso]” mpo na kosalisa bango, engebene na makoki na biso ya kosala yango, na kozanga kosambisa bango (tala Mosiya 4:21–27).

Moko na moko na biso asengeli “kozwa ndeko na ye lokola ye moko” (Malongi mpe Mayokani 38:24). Soki tosengeli kozala bato ya Nkolo mpe kozala na bomoko, tosengeli te kotalelana bobele lokola bato oyo bakokani, kasi tosengeli mpe kotalana moko na mosusu solo lokola tokokani mpe koyoka na mitema na biso ete tokokani—tokokani liboso ya Nzambe, ya motuya tokokani mpe makoki ya kokokana.

Botosi

Liteya elandi uta na 4 Nefi eyei na liloba oyo ya pete: “Batambolaki nsima ya mitindo miye bazwaki uta na Nkolo na bango mpe Nzambe na bango” (4 Nefi 1:12).

Nkolo ateyaki bato oyo malongi na Ye, apesaki bango mitindo, mpe abengaki basali mpo na kosalisa bango. Moko ya bantina na Ye na kosalaka boye ezalaki ya kosala ete matata ezala te kati na bango (tala 3 Nefi 11:28–29; 18:34).

Botosi na biso na mateya ya Nkolo mpe basaleli na Ye ezali na ntina mpo na kokoma na biso na bomoko. Yango esangisi bomipesi na biso ya kotosa motindo ya koyambola ntango nyonso tokweyi mpe kosalisana moko na mosusu ntango tozali kosala makasi mpo na kosala malamu koleka mpe kozala malamu koleka mikolo nyonso.

Koyangana Elongo

Na nsima, toyekoli ete bato kati na 4 Nefi “[bakobaki] na kokila bilei mpe losambo, mpe na koyangana elongo mbala mingi mpo na kosambela mpe koyoka liloba ya Nkolo” (4 Nefi 1:12).

Tosengeli koyangana elongo. Makita na biso ya losambo ya poso na poso ezali libaku ya moyuya mpo na biso tozwa makasi, ezala mpo na moto yemoko mpe na lisanga lokola. Toliaka elambo, toyekolaka, tosambelaka, toyembaka elongo, mpe tosunganaka moko na mosusu. Makita mosusu ekolisaka lisusu na kolendisa liyoki ya kozala bato kati, boninga, mpe ya kozala na mokano moko.

Bolingo

Na nsima lisolo na 4 Nefi epesi biso oyo ezali mbala mosusu fungola monene mpo na nyonso oyo—eloko oyo kozanga bomoko ya solo ekoki kokokisama te: “Ezalaki na boweli te na mboka, na ntina ya bolingo ya Nzambe oyo efandaki na mitema ya bato” (4 Nefi 1:15).

Kimia ya moto ye moko ezwamaka ntango biso, na botosi ya komikitisa, tolingaka Nzambe solo. Oyo ezali motindo ya yambo mpe ya monene. Kolinga Nzambe mingi koleka moto to eloko songolo ezali lolenge oyo ememaka kimia ya solo, libondi, elikya, mpe esengo. Lokola tozali kokolisa bolingo ya Nzambe mpe Yesu Klisto, bolingo ya libota mpe bazalani ekolanda yango moko.

Esengo monene mpenza oyo tokoyoka libela eyaka ntango tozali kosalela bolingo mpo na Nzambe mpe mpo na bana na Ye nyonso.

Bolingani, bolingo ya peto ya Klisto, ezali nkisi ya boweli. Ezali ezalela ya liboso ya molandi ya solo ya Yesu Klisto. Ntango tomikitsi liboso ya Nzambe mpe tosambeli na bokasi nyonso ya mitema na biso, Nzambe akopesa biso bolingani.(tala Moroni 7:48).

Lokola biso banso tozali koluka kozala na bolingo ya Nzambe efanda na mitema na biso, likamwisi ya bomoko ekomona lokola likambo ya pete mpo na biso.

Bomoto ya Bonzambe

Na nsuka, bato na 4 Nefi balakisaki elembo ya bomoko oyo ebongi na likebi na biso: “Ezalaki te bayibi, to babomi te, mpe ezalaki na Balamani te, to lolenge moko te ya -songolo; kasi bazalaki na kati ya bomoko, bana ya Klisto, mpe basangoli ya libula ya bokonzi ya Nzambe” (4 Nefi 1:17).

Makambo oyo ezalaki kokabola bato na boumeli ya bikeke mingi elimwaki liboso ya bomoto ya sika oyo ezalaki koumela mpe kopesa lokumu. Bamitalelaki bangomei—mpe moto nyonso mosusu—engebene na bondeko na bango na Tata na Lola mpe Yesu Klisto.

Ndenge mpe bokeseni ekoki kozala malamu mpe na ntina mpo na biso. Kasi bomoto na biso ya motuya mingi ezali oyo etali ebandeli mpe ntina na biso ya bonzambe.

Ya liboso mpe ya ntina mingi, moko na moko na biso azali mwana ya Nzambe. Ya mibale, lokola mondimi ya Eklezia ya Yesu Klisto, moko na moko na biso azali mwana ya boyokani. Mpe ya misato, moko moko na biso azali moyekoli ya Yesu Klisto. Nalendisi biso nyonso ete totika te nkombo mosusu “elongola, ezwa esika na yango, to ezwa esika ya liboso na esika ya nkombo yango misato ya libela”

Bozala Moko

Nzambe abengisi banso baya epayi na Ye. Ezali na esika mpo na moto nyonso. Tokoki kokesana na mimeseno na biso, na makambo ya politiki, na bikolo na biso, na makambo oyo tolingaka, mpe na makambo mosusu mingi. Kasi ntango tosangani kati na Yesu Klisto, bokeseni ya boye esili na ntina na yango mpe ezwami na esika ya mposa na biso ya koleka ya kozala moko—mpo ete tokoka kozala ya Ye.

Botya na motema mateya oyo eteyami na 4 Nefi. Lokola moko na moko na biso azali kosala makasi mpo na kokotisa biloko oyo ya ntina ya bomoko kati na bomoi na biso, ekoki bato bakoloba etali biso, lokola ezalaki mpo na bango, “Solo ekokaki kozala te bato ya esengo koleka kati na bato banso oyo bakelamaki na loboko ya Nzambe”(4 Nefi 1:16).

© 2024 by Intellectual Reserve, Inc. All rights reserved. Ebetami na USA. Bondimami na lokota ya Angele: 6/19. Bondimami ya bobongoli: 6/19. Bobongoli ya Monthly Liahona Message, Sanza ya zomi 2024. Lingala. 19359 639

Matangi

1. Mpo na koyeba makambo etali ndimbola ya mapamboli ya kosala mayokani elongo na Nzambe, tala Russell M. Nelson, “Boyokani ya Libela,” Liahona, Sanza ya zomi 2022, 4–11.

2. Russell M. Nelson, “Choices for Eternity” losambo ya mokili mobimba mpo na bilenge minzemba, Sanza ya mitano 15, 2022), Gospel Library.