Juon Jon̄ak n̄an Juon Wōt ilo Jisōs Kraist

Jān Būreejtōn Russell M. Nelson

Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata

Ilo ad juon wōt ilo Jisōs Kraist āinwōt armej ro ilo 4 Nipai, ikdeelel eo ad n̄an erom̧ juon ej bōk jikin oktak ko ad im ej tōlļo̧k n̄an m̧ōņōņō.

Jej mour ilo juon tōre eo im juon bōkā in kipel ekajoor in jum̧ae im iakwelel ej ajeded aolepān laļ in. Ilo an ļapļo̧k technology im an armej im būruwier jino m̧ōļoļo̧k, kipel in n̄an kobrak būruōd kōn akkōjdāt im kakkure jukjuk in pād eo ad kōn akweel. Kōtaan ko ilo jukjuk in pād ko rej rub. Pok ko rej waļok.

Ņae jekjek in, rikaļoor ro rem̧ool an Jisōs Kraist rej pukot aenōm̧m̧an im niknik kappukot n̄an kalōk juon jukjuk in pād eo em̧m̧an—juon eo im ej pedped ioon katak ko an Jisōs Kraist. N̄an tōpar jibadbad in, Irooj ekar kapppeik kōj n̄an “juon; im eļan̄n̄e kom̧ij jab juon kom̧ij jab Aō” (Katak im Bujen Ko 38:27). Ilo m̧ool, juon wōt ej juon kakōļļe in Kabun̄ eo em̧ool an Jisōs Kraist.

Ekōjkan ad jerbal ņae kajoor ko an jepel boro im iakweleel? Ekōjkan ad juon wōt?

Em̧ool, 4 Nipai ilo Bok in Mormon ej letok n̄an kōj juon waanjon̄ak. Jebta in ej ļo̧o̧ke ilo tukadu in wāween an armej ro kar mour ālkin an Rilo̧mo̧o̧r kar loļo̧k er, kar katakin er, im kar kajutak Kabun̄ eo An ibwilijier. Bwebwenato in ej kwaļo̧k ekōjkan an armej rein kar juon wōt ilo jeraam̧m̧an im aenōm̧m̧an, im ej letok n̄an kōj juon jon̄ak eo jemaron̄ ļoore n̄an bōk ejja juon wōt in n̄an kōj make.

Oktak

Ilo 4 Nipai 1:1, jej riit: “Rikaļooran Jisōs raar ejaake kabun̄ eo an Kraist ilo aolepān jikin ko ipeļaakin ijo. Im [armej] eaar itok n̄an er, im kar m̧ool in ukeļo̧k jān jero̧wiwi ko aer.”

Jej juon wōt ipeļaakin Irooj im Rilo̧mo̧o̧r Jisōs Kraist. Ilo an kajjojo armej katak kōn Jisōs Kraist, gospel eo An, im Kabun̄ eo An, Jetōb Kwojarjar ej kam̧ool kōn m̧ool eo n̄an kajjojo būruōn armej. Innām kajjojo iaad emaron̄ bōk kūr eo an Rilo̧mo̧o̧r eo n̄an bōk tōmak ilo E im ļoor E kōn ukweļo̧k.

Kōn menin ej jinoin iaļ in oktak eo an juon make—ettoļo̧k jān ļōmņak kōn e make im ikdeelel ko rejerawiwi im oktakļo̧k n̄an Rilo̧mo̧o̧r. E ej pedped in tōmak ko ad. Im ilo an kajjojo iaad reilo̧k n̄an E ilo ļōmņak otemjeļo̧k (lale Katak im Bujen Ko 6:36), E ej erom̧ juon kajoor in juon wōt ilo mour ko ad.

Bujen ko

Ļook eo ilo 4 Nipai ej wōnm̧aanļo̧k wōt in ba bwe ro im raar itok n̄an Kabun̄ eo im ukweļo̧k jān jerawiwi ko aer “raar peptaij ilo etan Jisōs; im raar barāinwōt bōk Jetōb Kwōjarjar” (4 Nipai 1:1). Raar deļo̧n̄e juon bujen—juon jemjerā ejenolo̧k, juon eo ej liāp—ippān Anij.

N̄e jej kōm̧m̧ani im kōjparok bujen ko, jej bōk etan Irooj iood āinwōt kajjojo armej ro. Ilo kakkobaba, jej bōk Etan iood āinwōt juon armej. Aolep ro im rej kōm̧m̧ani bujen ko im kajjieon̄ kōjparoki rej erom̧ armej ro an Irooj, mennin aorōk ko An rein juon (lale Exodus 19:5). Kōn menin, jej ilo̧k ilo iaļ in bujen eo jim̧or āinwōt kajjojo armej ak ippān doon. Bujen jemjerā eo ad ippān Anij ej letok n̄an kōj juon wōt wun im juon wōt kadkadid. Ilo ad kor kōj n̄an Irooj, E ej jipan̄ kōj kōm̧m̧an bwe “burueer ren kuk ippān doon ilo bōrokuk im ilo iakwe n̄an doon” (Mosaia 18:21).

Jab Kalijōkļo̧k, Jokkun Wōt Juon, im Jipan̄ Rijeram̧ōl ro

Bwebwenato eo ilo 4 Nipai ej wōnm̧aanļo̧k wōt: “Im eaar ejjeļo̧k akwāālel ko im epelon̄lon̄ ko ilubwiljier, im armej otemjej eaar kōm̧m̧an jim̧we n̄an eo juon.

“Im eaar aer men otemjej ilo ejjeļo̧k kalijekļo̧k; kōn menin eaar ejjeļo̧k rim̧weie im rijeram̧ōl, kōm̧akoko im anemkwōj, a raar aolep anemkwōj, im ribōk mennin letok in lan̄ eo” (4 Nipai 1:2–3).

Ilo jerbal in kanniōk ko ad, Irooj ej kōņaan bwe jen jab kalijōkļo̧k im jen jim̧we n̄an doon im jab ko̧o̧t ak kōmattōre ro jet (lal 1 Tessalonika 4:6). Ilo ad epaakeļo̧k Irooj, “jeban kar kōņaan n̄an kōmetak bar juon, ak n̄an mour ilo aenōm̧m̧an, im n̄an leļo̧k n̄an aolep armej ekkar n̄an men eo ej tōllo̧ke im ej an” (Mosaia 4:13).

Irooj ekar barāinwōt kakien kōj n̄an lale ro rijeram̧ōl im riaikuj. Jej aikuj “ajeji men ko [m̧weied]” n̄an jipan̄ er, ekkar n̄an maron̄ eo ad n̄an kōm̧m̧ane aindein, ilo ejjeļo̧k ekajet er Mosaia 4:21–27).

Kajjojo iaad ej n̄an “kautiej ļeo jein im jatin āinwōt e make” (Katak im Bujen Ko 38:24). Eļan̄n̄e jej aikuj in erom̧ armej ro an Irooj ilo juon wōt, jejjab aikuj in wōt kōm̧m̧an em̧m̧an n̄an doon āinwōt jokkin wōt juon, ak jej aikuj barāinwōt kalimjōk ro jet āinwōt kōj make im en̄jake ilo būruwōd bwe rej juon wōt ipped—juon wōt im̧aan Anij, kōn juon wōt aorōk im juon wōt kōjatdikdik.

Pokake

Katak eo tok juon jān 4 Nipai ej itok ilo en̄jake in ealikkar eļem waan: “Raar etetal ilo̧kan kien ko rekar būki jān aer Irooj im aer Anij” (4 Nipai 1:12).

Irooj ekar katakin armej rein katak eo An, kar leļo̧k n̄an er kien ko, im kar kūr rijerbal ro n̄an kōm̧m̧ani n̄an er. Juon iaan jibadbad ko An ilo an kōm̧m̧ane menin kar n̄an kanooj lale bwe en ejjeļo̧k akweel ko ibwilijier (lale 3 Nipai 11:28–29; 18:34).

Pokake eo ad n̄an katak ko an Irooj im ro Rikarejeran ej menin aikuj n̄an ad juon wōt ippān doon. Menin ekitbuuj kallim̧ur eo ad n̄an pokake kien eo n̄an ukweļo̧k jabdewōt iien jej likjab im n̄an jipan̄ doon ilo ad kajjieon̄ in kōm̧m̧an em̧m̧anļo̧k im em̧m̧anļo̧k aolep raan.

Kweilo̧k Ippān Doon

Eo tok juon, jej katak bwe armej ro ilo 4 Nipai “[raar wōnm̧aanļo̧k wōt] ilo jitlo̧k im jar, im ilo kwelo̧k ippān doon emakijkij ilo jim̧or n̄an jar im n̄an ron̄jake naan eo an Irooj” (4 Nipai 1:12).

Jej aikuj kweilo̧k ippān doon. Kweilo̧k in kabun̄jar ko ad wiik otmejeļo̧k rej juon iien em̧m̧an im aorōk n̄an kōj n̄an bōk kōkajoorļo̧k, jim̧or ilo kajjojo iaad im aolep. Jej bōk m̧ōttan kwojkwoj eo, katak, jar, al ippān doon, im rie doon. Ippān doon ko jet rej barāinwōt jipan̄ kaddōkļo̧k juon en̄jake in joņak, jemjera, im ippān doon ilo juon wōt jibadbad.

Iakwe

Innām ļo̧o̧k eo ilo 4 Nipai ej letok n̄an kōj ta eo ej bōlen ki eo eļap tata n̄an aolepān menin—men eo ilo an jako eo ej lukkuun juon wōt jab maron̄ bōke: “Eaar ejjeļo̧k jum̧ae doon ilo āneo, kōnke iakwe eo an Anij eo eaar pād ilo būruōn armej ro” (4 Nipai 1:15).

Aenōm̧m̧an eo an juon make ej tōprak n̄e jej, ilo ettā ajeļo̧k, ilo m̧ool iakwe eo ad n̄an Anij. En̄in ej kien eo eļap im m̧oktata. Iakwe Anij eļapļo̧k jān jabdewōt armej im jabdewōt men otemjeļo̧k ej men eo ej bōktok aenōm̧m̧an eo em̧ool, jokane, lōke, im lan̄lōn̄. Ilo ad kōļapļo̧k iakwe eo an Anij im Jisōs Kraist, iakwe an baam̧le eo im ro rūturid naaj bōk jikin.

Lan̄lōn̄ eo eļap tata jenaaj en̄jake ej n̄e jej obrak kōn iakwe n̄an Anij im n̄an aolep ajri ro Nejin.

Iakwe eo em̧ool, iakwe eo erreo an Kraist, ej juon unokan akweel. Ej juon paaktok eo eaorōktata an juon rikaļoor em̧ool an Jisōs Kraist. N̄e jej kōttāik kōj make im̧aan Anij im jar kōn aolepān kajoor an būruōd, E enaaj letok n̄an kōj iakwe eo em̧ool (lale Moronai 7:48).

Ilo ad aolep kappukot n̄an iakwe eo an Anij jokwe ilo būruōd, mennin bwilōn̄ eo an bōro kuk enaaj āinwōt lukkuun bōk jikin ilo kōj.

Kadkad Eo Ad Ekwojarjar

Āliktata, armej ro ilo 4 Nipai raar kwaļo̧k juon kakōļļe in juon im ej aikuj mije eo ad: “Eaar jab wōr riko̧o̧t ro, ak riuror ro, im eaar ejjeļo̧k riLeman, ak jabdewōt riAelōn̄, ak raar juon, ro nejin Kraist, im rijolōt e aelōn̄ in Anij” (4 Nipai 1:17).

Lebōļ ko im raar kōjepel armej ro ium̧win buki iiō ko kar jako aer aorōk āinwōt kar m̧okta im eļap aer kar kajoorļo̧k im karbōb. Raar watōk er make—im aolep ro jet—ekkar n̄an kadkad eo aer ippān Jemādwōj Ilan̄ im Jisōs Kraist.

Oktak jān doon im oktak ko remaron̄ in em̧m̧an im aorōk n̄an kōj. Ak kadkad eo ad ej aorōktata ej eo eiookļo̧k ijjino eo ad ekwojarjar im jibadbad eo.

Men eo im̧aan tata im aorōk tata, kajjojo iaad ej juon ajri nejin Anij. Eo kein karuo, āinwōt juon membōr an Kabun̄ in, kajjojo iaad ej juon ajri in bujen. Im jilu, kajjojo iaad ej juon rikaļoor an Jisōs Kraist. Ij kōketak kōjwōj aolep n̄an jab kōtļo̧k jabdewōt riba kajjien ro jet n̄an “kōjbwābwe, bōk jikin, ak bōkļo̧k aorōk eo ioon men kein jilu aitok kitier.”

Erom Juon Wōt

Anij ekar kūr aolep n̄an itok n̄an E. Ewōr jikin n̄an aolep. Jemaron̄ oktak ilo m̧anit ko ad, politic ko, won kōj, kōņaan ko, im elōn̄ bar wāween ko. Ak ilo ad bōro kuk ilo Jisōs Kraist, kain oktak kein rej makunļo̧k ilo aer jenolo̧k im rej bōk jikier kōn ikdeelel eo ad n̄an juon—bwe ren maron̄ in An.

Kanooj ļōmņak ilo m̧ool kōn katak ko kar katakin ilo 4 Nipai. Ilo an kajjojo iaad kajjieon̄ kobaik m̧ōttan kein raorōk n̄an juon wōt ilo mour ko ad, emaron̄ in ba n̄an kōj, āinwōt an kar ba n̄an er, “Em̧ool eaar ejjeļo̧k bar armej rem̧ōņōņōļo̧k ilubwiljin armej ro otemjej kar ejaake jān pein Anij” (4 Nipai 1:16).

© 2024 jān Intellectual Reserve, Inc. All rights reserved. Buriin ilo USA. Kōmālim ilo kajin In̄lij: 6/19. Kōmālim ukook eo: 6/19. Ukook eo an Monthly Liahona Message, October 2024. Marshallese. 19359 874