“Ehu Wiepen Ehupene Rehn Sises Krais,” Liahona, Oct. 2024.
Padahk en Sounpwong kan LiahonaOakotohpe 2024
Ehu Wiepen Ehupene Rehn Sises Krais
Ni atail pahn ehupene rehn Sises Krais duehte aramas akan nan [kapahieu] en 4 Nihpai, atail inengieng en wiahla ehu pahn weliandi atail wekpeseseng kan oh pahn kahluwaikitailahng nan popohl.
Kitail mihmi nan ansou ehu me mwekmwekid en sawehwe oh akupwung wie lalaudla me kipedier sampah. Sang ni sawas en pelien technology oh aramas akan me arail mongiong kekeluwakalahr, mehn kepingiping pwukat kak oh audehkihla loaletail pepehm en laumwaumw oh kahrehieng pingiping ah kin kipehdi atail koasoakoasoaipene kan. Ehupenehn nan wasahn kousoan kan solahr wiawi. Mahwin wihwiawi.
Nan eilepen soahng pwukat ah wiewiawi, Irail akan me mehlelki arail idawehn Sises Krais kin inangih en mie meleilei oh kin nantiheng wiahda pwihn akan—me poahsonkihda sapwellimen Sises Krais padahk. Pwe met en kak pweida, Kauno ketin poahngokih kitail en wiahla ehu; oh ma kitail sohte wiahla ehu, kitail sohte wia Sapwellime (Doctrine and Covenants 38:27). Ni mehlel, ehupene wia ehu kasalepen Sapwellimen Sises Krais Mwomwohdiso mehlel.
Ia mwomwen atail pahn kak pelianda mehn katohrohr oh kepingiping kan? Ia mwomwen atail pahn kak alehdi ehupene?
Paiete nan [kapahieu] en 4 Nihpai nan Pwuken Mormon kiheng kitail karasaras ehu. Iralaud wet ekis kasalehda duen mour en aramasko mwurin Sounkomouro Ah ketin pwaralahng irail, padahk ong irail, kawada Sapwellime Mwomwohdiso rehrail. Me wet kasalehda duen aramas pwukat arail alehdi ehupene ehu me direkihla popohl oh meleilei, oh e pil kiheng kitail wiepe ehu me kitail kak idawehn oh alehieng kitail soangen ehupene wo.
Weliakapwala
Nan [kapahieu] en 4 Nephi 1:1, e nda: “Tohnpadahk en Sises kan wiadahr mwomwohdisohn Krais nan sahpwo pwon. Oh [aramas ko] kohdo rehrail, oh koluhkihla mehlel diparail kan,”
Kitail ehupene rehn Kauno oh Sounkomour Sises Krais. Ni emen emen aramas pahn esehla duen Sises Krais, Sapwellime rongamwahuo, oh Sapwellime Mwomwohdiso, Neghn Sarawio kin kadehdehieng loalen emen emen aramaso duen mehlelo. Emen emen kitail apw pahn kakehr alehda Sapwellimen Sounkomouro luhk ong kitail; kitail en pwoson Ih oh idawehn Ih ki atail pahn koluhla.
Met kin elehda tepin en aramas emen ah seiloak en weliakapwala—sang ineng suwed akan me oangete pein irail oh dihp oh kolahng Sounkomouro. Ih me wia poahson en atail pwoson. Oh ni emen emen kitail pahn kin kilenglahng Ih nan atail madamadau koaros (kilang Doctrine and Covenants 6:36), E pahn wiahla mehn kihkitailpene nan atail mour.
Inou Sarawihkan
Rekohd en nan [kapahieu] en 4 Nihpai doula oh koasoaia me irail akan me kohdohng mwomwohdisou oh koluhkihla diparail kan “kin papidaisla ni mwaren Sises; oh irail ahpw alehdi Ngehn Sarawio.” (4 Nephi 1:1). Irail alehda inou me sarawi—wiepe kesempwal ehu, me kin katengepene atail ehu—ong Koht.
Ni atail kin wiahda oh kapwaiada inou me sarawi kan, emen emen kitail kin alehieng kitail mwaren Kauno. Oh pwe en pil patehng met, kitail pil alehda Mware pohtail nin duen atail wia pwihn en aramas ehu. Koaros me kin wiahda inou me sarawi kan oh kapwaiada kin wiahla Sapwellimen Kauno aramas, Sapwellime me keneinei (kilang Eksodus 19:5). Pwehki met, kitail kin seilok pohn ahl en inouo ni atail wia aramas emen oh pil ni atail wia kisehn pwihn ehu. Inou sarawi me kitail ehukiong Koht kiong kitail en kak ehupene oh kasalehda ihs kitail. Ni atail kin katengteng ohng Kauno, E pahn soweseikitail katengepene loaletail ka en ehupene oh poakong emen emen” (Mosaia 18:21).
Mehlel, Pahrek, oh Sowese me Semwehmwe kan
Koasoaiepe kan nan [kahpahieu] en 4 Nihpai doula oh koasoaia: “sohte pingiping oh akamai nan pwungarail, oh aramas koaros kin doadoahkpene mwahu.
“Oh irail kin ehukipene soahng koaros nan pwungarail; ihme karehda sohte me kepwehpwe oh semwehmwe, de me kalidu oh saledek, ahpw irail kaoros kasaledeklahr, oh alehdier kisakis en nanleng.” (4 Nihpai 1:2–3).
Nan atail doadoahkpene kan, Kauno kupwurki kitail en mehlelpene oh wia me pwung oh dehr pitih de kawehla pwung en emen emen(see 1 Deselonika 4:6). Ni atail pahn karkaraniala Kauno, kitail “sohte pahn ahneki madamadau en kamedekehla emen, ahpw momour ni popohl, oh kihong emen emen aramas uhdahn pwaise.” (Mosiah 4:13).
Kauno keting poahngokiheng kitail kitail en apwalih me somwehmwe kan oh me mihlahr nan anahn kan. Kitail en “kisekisehki mehteikan [atail] dipwisou kan” pwe en sowesehda irail, uen me kitail kakehng, oh dehr kadeik irail (kilang Mosaia 4:21–27).
Emen emen kitail pahn kin kesempwalki mehteikan duehte pein kitail (Doctrine and Covenants 38:24). Ma kitail pahn wiahla sapwellimen Kauno aramas oh ehupene, atail wiawia ong emen emen en kin pahrek, oh ni atail pahn kilang mehteikan, kitail anahne udahn kilang oh kehn nan atail mohngiong me kital koaros pahrek—pahrek rehn Koht, soangen kesempwaltehieu oh uen me kital kekke pil uehtehieu.
Peik
Ehu kasukuhl sang nan [kapahieu] en 4 Nihpai e sang nan lepin mahsen wet: “irail kin weweidiki kosonned kan me irail alehdier sang rehn Kauno oh arail Koht,” (4 Nihpai 1:12).
Kauno ketin padahkihengehr aramas pwukat Sapwellime padahk, ketkiheng irail kosonned akan, oh poaronehier Sapwellime ladu kan ren apwallih irail. Ehu kahrepen Eh ketin wia met iei pwe en dehr mie akupwung nan pwungarail (kilang 3 Nihpai 11:28–29; 18:34).
Atail peik ong sapwellimen Kauno padahk kan oh Sapwellime ladu kan inenen kesempwal ong atail pahn ehupene. Met pil iangahki atail inou en kapwaiada kosonned en koluhla ni ansou me kitail kin pwupwidi oh sawaspene ni atail kin nannantiheng kamwauihala atail wiewia kamwauihla pein kitail rahn koaros.
Tuhpene
Mwuri, kitail esehla me aramas akan nan [kapahieu]4 Nihpai kin [wenwenlahte] nan arail kin kalapw kaisihsol oh kapakap, oh kalapw ehupene wielamalamki arail kapakap oh rongorongo mahsen en Kauno. (4 Nihpai 1:12).
Kitail anhne kitail en kin tuhpene. Atail kaudok en nan ehu ehu week kan kin kesempwalehng kakehlepen pein emen emen kitail oh kakehlepen kitail ni atail wia pwihn ehu. Kitail kin ale kamadipw sarawi, kasukuhl, kapakap, koulpene, oh sawaspene. Atail patpene teikan kin kakehlaka atail pepehm en me kitail wia kisehn pwihn ehu, me mie iengetail, oh me kitail ehukipene kahrepe ehu.
Limpoak
Mahsen en nan 4 Nihpai apw uhd kiheng kitail mehkot me pwein keiou kesempal nan pwungen mepwukat—mehkot me ma sohte, ah ehupene mehlel sohte pahn kak alahldi: “Sohte pingiping nan sahpwo, pwehki limpoak en Koht me mihmi nan mohngiong en aramas kan.” (4 Nihpai 1:15).
Meleilei ong emen emen kitail kin alahldi ni ansou me kitail kin, ni atail kin kihkitaildi oh aneki karakarahk, poakoahng Koht ni mehlel. Ih met kosonned me keieu oh kesempwal. Poakoahng Koht laudsang emen aramas de mehkot sohte lipilipil iei mwekid ehu me pahn wahdo popohl mehlel, kaloalamwahu, koapwoaroapwoar, oh popohl. Ni atail pahn ahneki limpoak ong Koht oh Sises Krais, limpoak ong atail peneinei oh mehn mpatail kan pahn pein iangedo.
Popohl keieu laud me kumwail pahn ahnikihdi iei ansou me kumwail pahn direkihla limpoak ong Koht oh ong Sapwellime serih kan koaros.
Limpoak mehlel en Krais iei me wia winien pingiping. Iei met me wia kasalepen soun kahlmang mehlel en Sises Krais men. Ansou me kitail kin karakarahkala mwohn sihlangin Koht oh kapakap nan atail mohngiong unsek, Koht pahn ketkiong kitail limpoak limpoak mehlel en Krais (kilang Moronai 7:48).
Ni atail pahn kin nantiheng audehki loaletail limpoak ong Koht, mwekid kapwuriamwei me iei ehupene pahn wia mehkot me mengei ong kitail.
Sohso Sarawi
Keimwsekla, aramas akan nan 4 Nihpai ahneki kasalepen ehupene me kitail anahne tehk: “Sohte aramas lipirap, de kamaramas, de pil Mehn Leimen kan, de pil ehu pwihn tohrohr; ahpw irail koaros ehute, sapwellimen Krais aramas, oh me pahn sohsohki wehin Koht.” (4 Nihpai 1:17).
Eden pwihn akan me katohrepeseng aramas akan ki sounpar epwiki kei sohrala pwehki mie ehu pwihn me poatoapoat oh waun. Irail kin kilang pein irail—oh mehteikan—nin duen ahneki nanpwung ehu ong Sahm Nanleng oh Sihses Krais.
Atail wekpeseng kan kak wia mehkot mwahu oh kesempwal ong kitail. Apw kadehdepetail me keioun kesempwal iei meh kan me pid udahn ihs kitail oh atail kahrepe sarawi.
Keieu oh keieu kesempwal, emen emen kitail wia sapwellimen Koht seri men. Keriau, ni atail wia tohn Mwomwohdisoht, emen emen kitail wia seri en inou me sarawi. Oh kesiluh, emen emen kitail wia iangahng en Sises Krais. I men kangoange kitail koaros en dehr mweidehng pali teikan en “kamwakid, weliandi, de kesempwalsang kadehdepetail poatoapoat siluh pwukat.”
Wiala Ehu
Koht ketin lukehier koaros en kohdohng Reh. Mie dewen koaros. Kitail kakete wekipeseng ni atail tiahk kan, pelien politik kan, wasa kitail kohsangie kan, dahme kitail kin kang, oh pil soahng tohto. Apw ni atail ehupene rehn Sises Krais, kesempwalpen wekpeseng pwukat kin sohla nohn kesempwal oh kin kihrdi pahn atail inengki mehlel kitail en wiahla ehu—pwe kitail en wia Sapwellime.
Loalehdi padahk kan me mih nan 4 Nihpai. Ni emen emen kitail pahn nantiheng momourki iren ehupene kesempwal pwukat, koasoaiepetail, kak duehte koasoaieperail, me nda me, “mehlel sohte aramas peren nan pwungen aramas koaros me Koht ketin kapikada duwehte irail.” (4 Nihpai 1:16).
© 2024 sang Intellectual Reserve, Inc. Kolokol pwuhng koaros. Intingda nan Wehin Amerika. Kamanaman ong ni Lokaiahn Wai: 6/19. Kamanaman ong kawehwe: 6/19. Kawehwehpen Padahk En Sounpwong Kan nan Liahona, Oakotohpe 2024. Pohnpeian. 19048 885