Mohlala oa Kopano ho Jesu Kreste Liahona Liahona, Mphalane 2024.
Molaetsa oa Khoeli le Khoeli Liahona Mphalane 2024
Mohlala oa Kopano ho Jesu Kreste
Ha re ba ba bonngoe ho Jesu Kreste joaloka batho ba ka ho 4 Nefi, takatso ea rona ea bonngoe e feta likhohlano tsa rona ´me e isa ho thabo.
Re phela mehleng eo ho eona ho nang le likhohlano le likhang tse ntseng li ata lefats´eng lohle. Ka thuso ea tekhenoloji le batho ba tletseng bokhopo, matla ana a arolang a ts´osa ka ho tlatsa lipelo tsa rona ka nyeliso le ho senya lipuisano tsa rona ka likhohlano. Likamano tsa sechaba lia khaoha. Lintoa lia kupa.
Khahlanong le boemo bona, balateli ba ´nete ba Jesu Kreste ba tsetselela khotso ´me ba batla ho aha sechaba se fapaneng—se theuoeng ho lithuto tsa Jesu Kreste. Ho fihlela sena, Morena o batla re “be bonngoe; ´me ha le se bonngoe ha le baka” (Lithuto tsa Tumelo le Lilekane 38:27). Kannete, bonngoe ke lets´oao la ´nete la Kereke ea Jesu Kreste.
Re sebetsa khahlanong le matla a karohano le khohlano joang? Re fihlela bonngoe joang?
Ka lehlohonolo, 4 Nefi ka Bukeng ea Mormone e re fa mohlala. Khaolo ena e tlaleha ka bokhuts´oanyane tsela eo batho ba ileng ba phela ka eona kamor´a hore Mopholosi a ba etele, a ba rute, ´me a thehe Kereke har´a bona. Litaba tsena li bonts´a kamoo batho ba ileng ba fihlela bonngoe ka thabo le khotso ´me, e re fa mohlala oo re ka o latelang ho fihlela kopano ena e ts´oanang le rona.
Ts´okoloho
Ka ho 4 Nefi 1:1, re bala: “Barutuoa ba Jesu ba thehile kereke ea Kreste mafats´eng ohle ho pota. ´Me batho ba ile ba tla ho bona ´me ba ile ba baka libeng tsa bona e le kannete.”
Re kopana ka ho pota-pota ho Morena le Mopholosi Jesu Kreste. Ha motho e mong le e mong a ithuta ka Jesu Kreste, evangeli ea Hae, le Kereke ea Hae, Moea o Halalelang o netefatsa ´nete pelong ea motho e mong le e mong. E mong le e mong oa rona o amohela memo ea Mopholosi ea ho ba le tumelo ho Eena le ho mo latela ka ho baka.
Hoo ke qaleho ea leeto la botho la ts´okoloho—hole le boichebo le litakatso tsa sebe ´me ho leba ho Mopholosi. Ke motheo oa tumelo ea rona. ´Me ha e mong le e mong oa rona a sheba ho Eena ka maikutlo ohle (bona Lithuto tsa Tumelo le Lilekane6:36), O fetoha matla a kopanyang bophelong ba rona.
Lilekane
Tlaleho ka ho 4 Nefi e tsoelapele ho bonts´a hore ba tlileng Kerekeng ´me ba bakile libeng tsa bona ba ile “ba kolobetsoa ka lebitso la Jesu; ´me ba ile ba amohela Moea o Halalelang” (4 Nefi 1:1). Ba ile ba kena selekaneng—kamano e ikhethang, e tlamang—le Molimo.
Ha re etsa ´me re boloka lilekane, re inkela lebitso la Morena ho rona ka bo mong. Ho tlatseletsa, re inkela lebitso la Morena ho rona re le batho. Bohle ba etsang lilekane ´me ba loanela ho li boloka ba fetoha batho ba Molimo, letlotlo la Hae le ikhethileng (bona Exoda 19:5). Ka hona, re tsamaea tsela ea selekane ka bo mong le ka bongata. Kamano ea rona ea selekane le Molimo e re fa sepheo le boitsebiso bo ts´oanang. Ha re itlama ho Morena, O re thusa ho ba le “lipelo tsa rona li lohiloe hammoho ka bonngoe le ka lerato e mong ho isa ho e mong” (Mosaia 18:21).
Ho Hloka Leeme, Tekatekano, le Ho Thusa Bahloki
Litaba tsa 4 Nefi li tsoelapele: “Ho ne ho se likhohlano le likhang har’a bona, ’me motho e mong le e mong o ne a sebetsana ka toka e mong ho e mong.
“´Me ba ne ba na le lintho tsohle tse ts´oanang har´a bona; ka baka leo, ho ne ho sena morui kapa mofutsana, ba litlamong le ba lokolohileng, empa bohle ba ne ba lokolotsoe, ´me e le ba nkang karolo ea mpho ea leholimo” (4 Nefi 1:2–3).
Lits´ebelisanong tsa rona, Morena o batla re se ke ra ba leeme ´me re be le toka ho ba bang ´me re se qhekanyetse le ho nka monyetla ka ba bang. (bona 1 Thessalonia 4:6). Ha re atamela ho Morena, ha re na “ho ba le kelello ea ho lematsana, empa ho phela ka khotso, ’me le ho nehela ho motho e mong le e mong ho latela se mo loketseng” (Mosaia 4:13).
Morena o re laetse ho hlokomela ba hlophehileng le bahloki. Re lokela ho fana ka seo re nang le sona ho ba thusa ho latela bokhoni ba rona ba ho etsa joalo, re sa ba ahlole (bona Mosaia 4:21–27).
E mong le e mong oa rona o lokela “ho bona ngoan´abo joaloka ha a ipona” (Lithuto tsa Tumelo le Lilekane 38:24). Haeba re batla ho ba batho ba Morena ´me re be le kopano, ha rea lokela feela ho ts´oarana ka ho lekana, empa re lokela hape ho bonana ka ho lekana ´me re utloe le lipelong tsa rona hore rea lekana—re lekana pel´a Molimo, ka boemo bo lekanang le bokhoni bo lekanang.
Kutlo
Thuto e latelang ho tsoa ho 4 Nefi e tla ka polelo ena e bonolo: “Ba ile ba tsamaea ka litaelo tseo ba li fumaneng ho tsoa ho Morena oa bona le Molimo oa bona”4 Nefi 1:12).
Morena o ne a rutile batho bana thuto ea Hae, a ba file litaelo, ´me a bitsitse basebeletsi ho ba tsamaisa. E ´ngoe ea sepheo sa Hae ka ho etsa sena ke ho netefatsa hore ha ho be le likhohlano pakeng tsa bona (bona 3 Nefi 11:28–29; 18:34).
Ho mamela lithuto tsa Morena le basebeletsi ba hae ha rona ho bohlokoa hore re fetohe ba kopaneng. Sena se kenyeletsa ho mamela taelo ea ho baka kamehla ha re fosa ´me le ho thusa ba bang ha re ntse re loanela ho etsa botle le ho ba hantle letsatsi le letsatsi.
Kopanang Hammoho
Hape, re ithuta hore batho ba ka ho 4 Nefi ba ile ba “tsoelapele ka ho itima lijo le ho rapela, le ho kopana hammoho khafetsa ho rapela le ho utloa lentsoe la Morena” (4 Nefi 1:12).
Re lokela ho kopana hammoho. Likopano tsa rona tsa khumamelo tsa beke le beke ke monyetla oa rona oa ho fumana matla, ka bo mong le ka bongata. Re ja selallo, rea ithuta, rea rapela, re bina hammoho ´me rea ts´ehetsana. Likopano tse ling li re thusa hape ho susumetsa maikutlo a ho ba setho, setsoalle, le sepheo se arolelanoang.
Lerato
Tlaleho ka ho 4 Nefi e re fa seo mohlomong e leng senotlolo se seholo ho tsena tsohle—ntho eo ntle ho eona bonngoe ba ´nete bo ke keng ba fihleloa: “Ho ne ho sena likhohlano lefats´eng leo ka lebaka la lerato la Molimo le neng le lutse lipelong tsa batho” (4 Nefi 1:15).
Khotso ea botho e fihleleha ha ka boikokobetso re rata Molimo e le kannete. Molao ona ke o moholo oa pele. Ho rata Molimo ho feta mang kapa mang kapa eng kapa eng ke boemo bo tlisang khotso ea ´nete, mats´eliso, boits´epo, le nyakallo. Ha re ba le lerato la Molimo le Jesu Kreste, lerato la lelapa le baahisane le tla latela ka tlholeho.
Thabo e kholo-kholo eo re tlang ho e utloa e hlaha ha re tletse ka lerato ho Molimo le ho bana ba Hae bohle.
Lerato, lerato le hloekileng la Kreste, ke pheko ea khohlano. Ke ts´obotsi ea mantlha ea molateli oa ´nete oa Jesu Kreste. Ha re ikokobetsa kapele ho Molimo´me re rapela ka matla a lipelo tsa rona tsohle o tla re fa lerato le hloekileng.(bona Moroni 7:48).
Ha bohle re batla lerato la Molimo le lule lipelong tsa rona, mohlolo oa kopano o tla bonahala e le tlholeho ho rona.
Boitsebiso ba Bomolimo
Ea ho qetela, batho ba ka ho 4 Nephi ba ile ba bonts´a lets´oao la bonngoe leo re lokelang ho le elelloa: “Ho ne ho se na lisenyi, kapa babolai, le Ba-Lamane, kapa ka mokhoa ofe kapa ofe; empa ba ne ba le bonngoe, bana ba Kreste, le bajalefa ba ´muso oa Molimo” (4 Nefi 1:17).
Mabitso a neng a arotse batho ka liketekete tsa lilemo a ile a fokotseha pele ho boitsebiso bo ts´oarellang le bo matlafatsang. Ba ile ba ipona—le ba bang bohle—ho ea ka kamano ea bona le Ntate ea Maholimong le Jesu Kreste.
Karohano le liphapang li ka ba hantle le ho ba molemo ho rona. Empa boitsebiso ba bohlokoa ke bo amanang le ts´imoloho ea rona ea bomolimo le sepheo.
Pele ho tsohle e mong le e mong oa rona ke ngoana oa Molimo. Ea bobeli, joaloka setho sa Kereke, e mong le e mong oa rona ke ngoana oa selekane. Ea boraro, e mong le e mong oa rona ke morutuoa oa Jesu Kreste. Ke khothalletsa hore kaofela ha rona re se ke ra lumella boitsebiso bofe kapa bofe ho “tlosa, sebaka, kapa ho nka sebaka sa pele ho feta mabitso ana a mararo a qollang, a ts´oarellang.
E-bang Bonngoe
Kreste o mema bohle ho tla ho Eena. Sebaka se teng bakeng sa bohle. Re ka fapana ka meetlo ea rona, lipolotiki, merabe, likhetho, le litsela tse ling tse ngata. Empa ha re kopana ho Jesu Kreste, liphapang tse joalo lia fela ka bohlokoa ba tsona ´me li nkeloa sebaka ke takatso ea rona e fetisisang ea ho ba bonngoe—e le hore re ke re be ba Hae.
Nahana ka botebo lithuto tse rutiloeng ka ho 4 Nefi. Ha e mong le e mong oa rona a loanela ho kenyeletsa lintlha tsena tsa bohlokoa tsa bonngoe bophelong ba rona, ho ka thoe ka rona, joaloka ha ho iloe ha etsoa ho bona, “Kannete ho ne ho ke ke ha e-ba le batho ba thabileng har´a batho bohle ba bopuoeng ka letsoho la Molimo” (4 Nefi 1:16).
© 2024 by Intellectual Reserve, Inc. All rights reserved. E hatisitsoe USA. Tumello ea Senyesemane: 6/19. Tumello ea Phetolelo: 6/19. Phetolelo ea Monthly Liahona Message, October 2024. South Sotho. 19359 739