Mokgwa wa Tshwaragano mo go Jeso Keresete

Ka Poresidente Russell M. Nelson

Poresidente ya Kereke ya ga Jeso Keresete ya Baitshepi ba Malatsi a Bofelo

Jaaka re tshwaragana mo go Jeso Keresete jaaka batho ba ba mo go 4 Nefi, keletso ya rona go nna bangwefela e feta dipharologanyo tsa rona le go re gogela mo boitumelong.

Re tshela mo nakong e tlhoka kutlwisisano le dikgogakgogano di anamang go ralala lefatshe. Ka thuso ya maranyane le thotloetso ya batho ba ba dipelo di maswe, maatla a a kgogakgogano a gomagometsa go tlatsa dipelo tsa rona ka lenyatso a bo a kgotlhelela puisano ya rona ka kgotlhang. Ditshwaragano tse di tlwaelesegileng di a thubega. Dintwa di a gakala.

Kgatlhanong le mokgele o, balatedi ba boammaaruri ba ga Jeso Keresete ba eletsa kagiso e bile ba tlhaga mo keletsong ya go aga tšhaba e e farologanyeng—e e thaetsweng mo dithutong tsa ga Jeso Keresete. Ka jalo, Morena o re laetse gore “nnang bangwefela; mme fa lo se bangwefela ga lo ba me” (Dithuto le Dikgolagano 38:27). E le ruri, tshwaragano ke letshwao la Kereke ya ga Jeso Keresete ya boammaaruri.

Re ka bereka kgatlhanong le maatla a kgaogano le kgotlhang jang? Re fitlhelela tshwaragano jang?

Ka lesego, 4 Nefi mo Bukeng ya ga Momone e re fa sekai. Kgaolo e e gatisa ka bokhutshwane tsela e batho ba tshidileng ka yone morago ga ba etelwa ke Mmoloki, a ba ruta, a bo a tlhoma Kereke ya Gagwe gareng ga bone. Polelo e e supa ka fa batho ba fitlheletseng tshwaragano e e segofatseng le kagiso, gape e re neela mokgwa o re ka o salang morago go amogela tshwaragano e e tshwanang eo le rona.

Go sokologa

Mo 4 Nefi 1:1, re a bala: “Barutwana ba ga Jeso ba ne ba tlhomamisitse kereke ya ga Keresete mo mafatsheng otlhe a a mo tikologong. Mme [batho] ba ne ba tla kwa go bone, e bile ba ikwatlhaela dibe tsa bone ka boammaaruri.”

Re dikologa Morena le Mmoloki Jeso Keresete ka tshwaragano. Jaaka motho mongwe le mongwe a ithuta ka ga Jeso Keresete, efangele ya Gagwe, le Kereke ya Gagwe, Mowa o o Boitshepo o fa bosupi jwa boammaaruri mo pelong ya mongwe le mongwe. Mongwe le mongwe wa rona ke gone a ka amogelang taletso ya Mmoloki go nna le tumelo mo go Ene le go mo sala morago ka go ikwatlhaya.

Jaana go simolola loeto la motho la go sokologa—go tswa mo bopelotshetlheng le dikeletso tsa boleo go ya kwa go Mmoloki. Ke Ene motheo wa tumelo ya rona. Mme jaaka mongwe le mongwe wa rona a leba kwa go Ene ka kakanyo nngwe le nngwe (bona Dithuto le Dikgolaganyo 6:36), O nna maatla a tshwaragano mo matshelong a rona.

Dikgolagano

Polelo e e mo go 4 Nefi e tswelela ka go bolela gore bao ba ba tlileng go Kereke le go ikwatlhaela dibe tsa bone “ba ne ba kolobediwa mo leineng la ga Jeso; mme le gone ba ne ba amogela Mowa o o Boitshepo” (4 Nefi 1:1). Ba ne ba tsene mo kgolaganong—botsanalo jo bo kgethegileng, jo bo bofang—le Modimo.

Fa re dira re bo re tshegetsa dikgolagano, re tsaya leina la Morena mo go rona ka bongwe. Mo godimo ga seo, re itseela leina la Gagwe go rona re le batho. Botlhe ba ba dirang dikgolagano ba bo ba leka go di tshegetsa ba nna batho ba Morena, letlotlo la Gagwe le le kgethegileng (bona Ekesosdo 19:5). Jaana, re tsaya loeto la kgolagano re le nosi le re le setlhopha. Botsalano jwa rona jwa kgolagano le Modimo bo re neela ntlha e e tshwanang le popego e e tshwanang. Jaaka re itshwaraganya go Morena, O re thusa go nna le “ka dipelo tse di tshwaraganeng le mo go rataneng” (Mosia 18:21).

Tekatekano, le go Thusa Bahumanegi

Polelo e e mo 4 Nefi e a tswelela: “Mme gone go sena dikganetsanyo le dikganetsano mo gare ga bone, mme motho mongwe le mongwe o ne a dirisanya ka tshiamo mongwe le yo mongwe.

“Mme ba ne ba tlhakanetse dilo tsotlhe mo gare ga bone; ke gone ka moo go ne go sena bahumi le bahumanegi, bagolegwi le ba ba gololesegileng, mme botlhe ba ne ba gololesegile, le batlhakanedi ba neo ya legodimo”. (4 Nefi 1:2–3).

Mo ditirong tsa rona tsa senama, Morena o batla re siame le go lekalekana mongwe go yo mongwe mme re se tsietsane kgotsa go gatelelana (bona 1 Bathesolonika 4:6). Jaaka re gola ka go atumalana le Morena, ga re “kitla lo nna le tlhaloganyo ya go golafatsana, mme le tshele ka kagiso, le go neela motho mongwe le mongwe go yeng ka seo se se mo tshwanetseng” (Mosia 4:13).

Morena o re laetse go tlhokomela bahumanegi le batlhoki. Re tshwanetse “go abelana thoto tse [re] nang le tsone” go ba thusa, go yeng ka bokgoni jwa rona go dira jalo, re sa ba atlhole (bona Mosia 4:21–27).

Mongwe le mongwe wa rona o tshwanetse a “tlotle mokaulengwe wa gagwe jaaka a itlotla” (Dithuto le Dikgolagano 38:24). Fa ele gore re tla nna batho ba Morena gape re tshwaragane, ga re a tshwanela go tsaana ka tekatekano fela, mme re tshwanetse go leba ba bangwe ka tekatekano le go utlwa mo dipelong tsa rona gore re a lekalekana—re lekalekana fa pele ga Modimo, re lekalekana ka boleng le ka se re ka se fitlhelelang.

Kobamelo

Thuto e e latelang go tswa mo 4 Nefi e tla ka tsela e e motlhofo jaana: “Ba ne ba tsamaya ka fa ditaelong tse ba neng ba di amogetse mo Moreneng wa bone le Modimo wa bone” (4 Nefi 1:12).

Morena o ne a rutile batho ba dithuto tsa Gagwe, a ba neetse ditaelo, mme a biditse batlhanka go ba direla. Lengwe la maikaelelo a gagwe mo go direng se e ne e le go rurifatsa gore go se nne le dikganetsanyo mo gare ga bone (bona 3 Nefi 11:28–29; 18:34).

Kobamelo ya rona mo dithutong tsa Morena le batlhanka ba gagwe e botlhokwa mo go tshwaraganeng ga rona. Mo go akaretsa maitlamo a rona a go obamela ditaelo go ikwatlhaya gangwe le gape fa re tlhaela le go thusana jaaka re leka go dira botoka le go nna botoka letsatsi le letsatsi.

Go Phuthega Mmogo

Mo go latelang, re ithuta gore batho ba ba mo 4 Nefi “[ba tswelela] ka go ikitsa dijo le thapelo, le mo go kopaneng gantsi gotlhe go rapela le go utlwa lefoko la Morena” (4 Nefi 1:12).

Re tlhoka go phuthega mmogo. Go phuthega ga kobamelo ya rona ga beke le beke ke sebaka se se botlhokwa go bona nonofo, gotlhe re le esi le re le mmogo. Re ja sakaramente, re ithuta, re rapela, re opela mmogo, e bo re thusana. Diphuthego tse dingwe le tsone di thusa go gatelela maikutlo a mowa wa boleng, botsalano, le maikaelelo a abelanwang.

Lorato

Polelo e e mo 4 Nefi gape e re neela mo e ka tswang e le selotlele se se golo go tsotlhe tse—selo se e reng se seyo tshwaragano ya nnete e pale go fitlhelelwa: “Go ne go sena kganetsanyo mo lefatsheng, ka ntlha ya lorato lwa Modimo le le neng le nna mo dipelong tsa batho” (4 Nefi 1:15).

Kagiso ya motho e fitlhelelwa fa re ineela ka boikokobetso, ka boammaaruri re rata Modimo. E ke yone taolo e kgolo le ya ntlha. Go rata Modimo go feta motho ope kgotsa sengwe fela sepe ke seemo se se tlisang kagiso ya nnete, kgomotso, tshepo, le boitumelo. Fa re godisa lorato la Modimo le Jeso Keresete, lorato la lelwapa le baagisanyi jalo le tlaa latela.

Boitumelo jo bogolo jo re ka bo lemogang ke go apesiwa ke lorato la Modimo le bana botlhe ba Gagwe.

Lorato, lorato le le itshekileng lwa ga Keresete, ke molemo wa kganetsanyo. Ke molawana wa mokgwa wa balatedi ba boammaaruri ba ga Jeso Keresete. Fa re ikoba fa pele ga Modimo mme re rapela ka maatla otlhe a dipelo tsa rona, O tlaa re neela lorato (bona Moroni 7:48).

Jaaka rotlhe re batla go nna le lorato la Modimo le nna mo dipelong tsa rona, kgakgamatso ya tshwaragano e tlaa nna ekete selo sa tlholego mo go rona.

Boleng jwa Selegodimo

La bofelo, batho ba ba mo 4 Nefi ba ne ba na le sesupo sa tshwaragano e e tlhokang gore re e ele tlhoko: “Go ne go sena dirukutlhi, le fa e le babolai, le fa e le Balamane, le fa e le mofuta ope wa Ba-; mme ba ne ba le seoposengwe, bana ba ga Keresete, le barua boswa jwa bogosi jwa Modimo” (4 Nefi 1:17).

Dikao tse di neng di kgaogantse batho dingwaga tse di makgolo di ne tsa boela kwa morago pele ga boitshupo jo bo itshokileng le jo bo molemo. Ba ne ba ipona—le mongwe le mongwe—go yeng ka botsalano le Rara wa Legodimo le Jeso Keresete.

Kabakanyo le dipharologanyo di ka siama e bile di nne botlhokwa mo go rona. Mme botlhokwa jo bo bogolo jwa boleng jwa rona ke tseo tse di amanang le tlholego ya rona ya selegodimo le maikaelelo.

Sa ntlha tota, mongwe le mongwe wa rona ke ngwana wa Modimo. Sa bobedi, ka go nna leloko la Kereke, mongwe le mongwe wa rona ke ngwana wa kgolagano. Mme sa boraro, mongwe le mongwe wa rona ke morutwana wa ga Jeso Keresete. Ke kopa mongwe le mongwe wa rona gore a seka a letlelela ope o o ikayang ka sengwe se sele “go sa re baya, go emisetsa, kgotsa go tsaya monyetla wa diphitlhelo tsa boitshokelo tse tharo tse.”

Nnang Bangwe

Modimo o re laleditse botlhe go tla kwa go Ene. Go na le bonno jwa mongwe le mongwe. Re ka farologana ka setso, sepolotiki, semorafe, tatso, le ka ditsela tse dingwe tse dintsi. Mme fa re tshwaragana mo go Jeso Keresete, dipharologanyo tse di a nyelela ka boleng jwa tsone mme di fetwa ke keletso ya rona e e kgolo ya go nna bangwe—gore re nne ba Gagwe.

Tsenya mo pelong thuto e e rutilweng mo 4 Nefi. Jaaka rotlhe re leka go tshwaraganya dintlha tse di botlhokwa tse tsa tshwaragano mo matshelong a rona, go ka buiwa ka ga rona, jaaka bone, “Ruri go ne go ka se nne batho ba ba itumetseng mo gare ga batho botlhe ba ba bopilweng ka seatla sa Modimo” (4 Nefi 1:16).

© 2024 ka Intellectual Reserve, Inc. All rights reserved. E gatisitswe ko USA. Tetla ya Sekgoa: 6/19. Tetla ya thanolo: 6/19. Thanolo ya Molaetsa wa Liahona wa Kgwedi le kgwedi, Phalane 2024. Tswana. 19359 763