Rogon ko Ta’arebnag Uta’abang ufithik’ Yesus Kristus,

Thin ku President Russell M. Nelson

President ko Fare Galasia Ku Yesus Kristus ni Fan ko Gidiiʼen Got ko Tin Tomur e Rran

Napan ni ngad ta’reb nag uta’abang ulan Yesus Kristus woed fapi gidii’ u 4 Nephi, e ba’adag ningad ta’reb nag rodad nira gelnag e pi’nen nib thilthil rodad nge powi’iydad nga falfalaen’.

Gadad be fasgad ulan e ngiyal’ napan bay bo’or pi’nen nima thilyegdad ufithik’ e feyleng. Be fek e ayuw ko technology nge bochi gidii’ bay e gum’ircha’rad kar almarin ko kirebaen’, pi’nen me sug e gum’ircha’dad ko damomuw nge kirebnag e thin ko togopluw. Pi’nen nibe tay e ulungi gidii’ uta’abang niba puth. Bay bo’or e mael.

U fithik’ pi’ney, gidii’en rok’ Yesus Kristus ba’adag e gapas nge guyed rogon ni ngar fal’eged reb e ulungi gidii’—e ulungni bay e tay e dayif nga dakaen e machib rok’ Yesus Kristus. Arayfan, fare Somoel nike gichig nagdad ni ngad “ta’reb nag uta’abang, nge fa’an dabda ta’reb nag uta’abang gamed e gathi e gidii’ rog” (Doctrine and Covenants 38:27). Riyul’, ta’abang ir e yang ko fare Galasia nib riyul’ rok’ Yesus Kristus.

Urogon ni ngad gelnag e gelingin ko kii’ nge togopluw? Urogon ni ngad thapeged e ta’abang?

Be rib mangil, 4 Nephi ulan fare Babyor ko Mormon me pii’ e susun. Biney e guruy me weliy boch mornga’agen e rogon e gidii’ kar fasgad tomuren fare Somoel ni ke yib ngorad, machib ngorad, nge sunmiy e Galasia Rok’ ufithik’dad. Cheppin ney me dag urogon e pi’in ni kar thapeged e ta’abang nib fel’ nib gapas, nge nira pii’ ngodad e susun rayog ni ngad folgad ni ngad thapeged ta’abrogon e ta’abang.

Thilyeg

Ulan 4 Nephi 1:1, gadadma bi’eged: “fapi gachalpen Yesus e kar sunmiyed ba galasia rok’ Kristus u lan gubin yang e pi nam nib liyeg e ginn’em. Ma [e pi’in] ni rabaed ngoraed, nriyul’ ni kar kalgaed ngaen’raed ko pi denen roraed.”

Gadad ma ta’abang dad udakaen fare Somoel nge Tathapeg ni Yesus Kristus. Napan gubin gidii’ ra filed mornga’agen Yesus Kristus, gospel Rok’, nge Galasia Rok’, fare Kan ni Thothup nima pii’ e m’ag nib riyul’ ngak gubin e gum’ircha’dad. Gadad gubin e rayog ni ngad thapeged e pinning rok’ Somoel ni ngad thapeged e mich Ngak nge leked En udakaen e kalgaen ngaen’dad.

Me tabab e milekag rok’ e baa’ ko thilyeg—me chuweg e tin ba’adag nib kireb nge fapi denen nge yib nga Tathapeg. I’ir e dayif ko mich rodad. Nge napan gadad gubin ma sap Ngak ufithik’ gubin e tafney (muguy ko Doctrine and Covenants 6:36), ir ba mang e gelngin ko ta’abang ulan e yafos rodad.

Fapi m’ag

Ba ul’ul’ e chepin u 4 Nephi me weliy’ e pi’in ni kar uned fare Galasia nge kalgaed ngaen’raed ko pi denen rorad “e ni tawfe nagraed u fithingan Yesus; mar thapeged fare Kan ni Thothup.” (4 Nephi 1:1). Kar fal’eged e m’ag—e m’ag ni rib special—u thilmed Got

Napan ni ngad fal’eged nge fol e pi m’ag, gadad ma feked e fithingan Somoel nga dakaendaed. Nge, ma ngad feked fithingan nga dakeandaed ni gadaed e gidii’ rok’. Gubin pi’in nima fal’eged e pi m’ag nge guyed rogon ni ngar foled pi’nem nira manged e gidii’en Somoel, e treasure nib special (muguy ko Exodus 19:5). Ere, gadaed ma milekag ulan e gali kanawo’ ney ko tin fan ngom nge tin ni fan ngodad u ta’abang. Tha’ rodad ko m’ag ngak Got ma pii’ e muruwel’ ngodad nib ta’abrogon. Napan gadad ma pethdad ngak fare Somoel, Ir ma ayuwegdad ni ngad “ta’areb gum’ircha’dad u ta’abang ngo fithik’ e t’ufeg rodad ngodad.” (Mosiah 18:21).

Rogon nib Mat’aw, Ta’abrogon nge Ayuweg e Gidii’ ni Gafgow

Me ul’ul’ e chepen u 4 Nephi: “Me yaeni aw ni dariy e togopluw nge male’eg thin u fithik’raed, ma gubin e gidii’ nra bee’ ma be rin’ gubin ban’en nib mat’aw ngak’ bee’.

“Ma bay roraed gubin ban’en ni ta’areb rogon; ere dariy e fala’ab nge gafgow, kalbus nge gathi kalbus, ere yaed gubin nib puf rograed, ma yaed e pi’in nra yib nga pa’araed e tawa’ath nu tharmiy” (4 Nephi 1:2–3).

Ufithik e ngongol rodad, fare Somoel ma ba’adag ni ngad riin’ed e tin nib mat’aw ngak reb e gidii’ nge gathi guyrogon ni ngad gelgaed riy ko reb e bee’ (muguy ko 1 Thessalonians 4:6). Napan gadad ra chuchugur gad ngak fare Somoel, gadad ra “dabi yib ngaenʼmed ni ngam gafgow niged gimed, machane ngam pired u fithikʼ e gapas, mi gimed piiʼ ngomed ni gimed gubin nra beeʼ ma rogon nib tʼuf rokʼ” (Mosiah 4:13).

Fare Somoel ni ke gichig nagdad ni ngad ayuweg e pi’in ni gafgow nge bat’uf e pi’nen. Thingarda “pii’ed boech ban’en [rodad]” nima ayuweg rad, fa’anra rayog romed, nge dabi pufthin nag rad (muguy ko Mosiah 4:21–27).

Gadad gubin thingarda “ba’adag e walagen ni woed gadad ma ba’adag dad ” (Doctrine and Covenants 38:24). Fa’anra gadad thingarda manged e girdii’en Somoel nge ta’areb nagdad, dabiyog ni ngad ba’adag kemus gamed, machane thingarda ba’adagdad gubin e gidii’ nge thamey ulan e gum’ircha’dad ni ngad ma ta’areb dad-ta’areb u p’oewchen Got, ta’abrogn e angin rodad nge ta’abrogon e ko pi’nen raoyg ni ngad rin’ed.

Mafol

Bin magid e fil bay yib ko 4 Nephi me yib ulan ta’areb e thin nib moem: “Mar leaked fapi motochiyel ni ke thap ngoraed rok’ e Somoel roraed nge Got roraed” (4 Nephi 1:12).

Fare Somoel nike fil e gidii’ ney e machib rok’, ke pii’ e fapi motochiyel, nge pinning e pi tapigpig ni ngar ayuwegrad. Ta’areb e fan nike riin’ biney nira chuw e togopluw nga fithik’rad (muguy ko 3 Nephi 11:28–29; 18:34).

Fol rodad ngak fapi’ mamchib rok’ Somoel nge pi tapigpig e baga’fan ni ngad ta’arebnag dad. Biney ni tay e bu’un e ba’adag rodad ni ngad foled e pi motochiyel ko kalgaed ngaen’dad napan gadad ra rin’ e oloboch nge ayuweg ngak e gidii’ napan gadad ma guyed rogon ni ngad rin’ e tin nib mangil urngin e rran.

Mada’ Uta’abang

Bin magid, gadad ba fil’ed e gidii’ ulan 4 Nephi “be [ululiy] i baley nag e abich nge meybil, ma yaed be mo’olung nga ta’abang nga ur meybil gaed ma yaed be motoyil ko thin rok’ Somoel.” (4 Nephi 1:12).

Thingarda mu’ulung gad uta’abong. Mu’ulung ko liyor nima buch urngin e wiik e ba ga’fan ngodad ere ni ngad pir’yeged e gelngin, nifan e bee’ nge ulungi gidii. Gadad ma thapeged fare sacrament, fil’ed, meybil, tang gad, nge ayuwegdad. Boch reb e pi mu’ulung nima ga’nag e ta’abrogon nag, tha’ ko fagar, nge fan rodad nib ta’abrong.

T’ufeg

Fare chepin ulan 4 Nephi me pii’ e fil nib thabi’ga’ nifan gubin pi’nen-fa’an dakiriy e biney dabiyog ni ngad thapeged e ta’arebnag: “Dariy e male’eg thin u lan fare nam, ni bachan e fare t’ufeg rok’ Got ni bay u lan gum’ircha’en fapi gidii’.” (4 Nephi 1:15).

Ra yib e gapas ngodad napan ni ngad, ufithik’ e sobutaen’, t’ufeg Got u polo’. Iraray e bin somm’on nge bin falel’ e motochiyel. Tʼufeg Got ko urngin gubin banʼen e arram kanawoʼen nra fek i yib e bin riyulʼ e gapas, pagaenʼ, passig, nge falfalaen. Napan ni ngad tugul e t’ufeg ngak Got nge Yesus Krisuts, t’ufeg ko tabinaw nge buguliyoror ni ra yib nib moem’.

Bin thʼabi gaʼ e falfalaenʼ ni garam thamiy e arram fare tʼufeg ni gara thamiy e t’ufeg ngak Got nge gubin pifak.

T’ufeg, e fare adag rok’ Kristus nib machalbog, ir e falaay ko pi male’eg thin. T’ufeg ir e papngin nib ga’fan ngak e gidii’ ku Yesus Kristus. Napan ni ngad sobut’ nagdad u mit Got nge meybil u gubin e gelngin gum’ircha’dad, Ir ma pii’ e t’ufeg nga dakeandad (muguy ko Moroni 7:48).

Napan gadad be guyed rogon ni ngad thapeged e t’uf rok’ Got nga langin e gum’ircha’dad, fare ma’ang’ang ko ta’abrogon nag ra mang nib moem ngodad.

Rogon nib Thothup

Bin tomour, Gidii’ ulan 4 Nephi kar daged e pow ko ta’abrogon thingarda sapgad: “Dariy e moro’ro’, ara pi’in ni tamathang pogofan, ara bay reb fapi Lamanites, ara bee’ u ba ulung ni-(ites); ya yaed ba ta’areb, ni fapi bitir rok’ Kristus, nge pi’in taferaed fare gil’ilungun Got.” (4 Nephi 1:17).

Pi fithingan ni ke kii’ e gidii’ ko bo’or biyu’ e duw ke chuw ko reb e rogon nib mangil nge fel’ rogon. Kar sap raed—nge gubin reb e gidii’—ufithik’ e tha’ rorad ngak Chitimangiy nu Tharmey nge Yesus Kristus.

Tin nib thil rodad e mangil nge ni ra ayuwegdad. Machane ni rib th’abi ga’ e pi rogon rodad ir e fan ko e tafen nge fan rodad nib thouthup.

Bin somm’on, gadad gubin e bitir ku Got. Bin la’agruw, bachane gadad e chon ko Galasia, gadad gubin e bitir ko m’ag. Nge bin dalip, gadad gubin e gachelpen ku Yesus Kristus. Gube pinningdad ni dabda pii’ e gelngin ngak reb e rogon ni ngar “fek, thilyeg, fa gaa’nag biney e dalip e rogon nib gaa’.”

Mang ni Ta’areb

Got nike pinning dad ni ngad dared Ngak. Ga’angin e fan ngak e gidii’ ni gubin. Gadad gubin e be thilthil ko yalen, am, nam, tin ni gadad ba’adag, nge bo’or reb e pi’nen. Bachane napan ni ngad ta’abrogon nag dad ulan Yesus Kristus, fapi ga’fan ko tiney ra chuw ko fare ba’adag rodad ningad ta’abrogon nag—ere gadad ra manged e gidii’en.

Mu feked nga dakaen e gum’ircha’dad e pi machib ulan 4 Nephi. Napan ni ngad guyed rogon e rayog rodad me foled e fapi rogon ko ta’arebnag ulan e yafos rodad, bay e weliy morunga’agen dad, woed ngorad, “Ma rriyul’ ni dakuriy ba ulung i gidii’ ni aram fini falfalaen’ ngab yang u fithik’ gubin e pi gidii’ ni sunmiy Got nga pa’” (4 Nephi 1:16).

© 2024 ko Intellectual Reserve, Inc. Gubin nibay mat’won. Kan yoloey u USA. Kan micheg nag ko thin nu Ngalis: 6/19. Micheg i pilyeg: 6/19. Pilyegthin ko Fare Mulwon nifan e Liahona ko biney e pul, ko October 2024. Yapese. 19359 905