“Ni Jesucristo ti Pagtaudan ti ‘Sibibiag,’ ‘Naimbag,’ ken ‘Nabilbileg a Namnama,’” Liahona, Dis. 2024.
Binulan a Mensahe ti Liahona , Disiembre 2024
Ni Jesucristo ti Pagtaudan ti “Sibibiag,” “Naimbag,” ken “Nabilbileg a Namnama”
Iti daytoy naisangsangayan a panawen ti panangrambak iti pannakayanak ti maladaga idiay Betlehem, laglagipentayo koma a kanayon nga immay ni Jesucristo ditoy lubong tapno agbalin a Mangisalakan ken Mannubbottayo.
Ti Pannakayanak ni Jesus, ni Sharlotte Andrus
Ipaganetget da Apostol Pedro ken dagiti propeta iti Libro ni Mormon a da Jacob ken Moroni ti naespirituan a sagut ti namnama ken ni Cristo kadagiti makaisuro nga umasping a wagas.
Kas pagarigan, indeklara ni Pedro, “Madaydayaw koma ti Dios ken Ama ni Apotayo a Jesucristo, isu a mayalubog iti dakkel nga asina, binaliwannatay nga inyanak a maipaay iti maysa nga inanama a sibibiag gapu iti panagungar ni Jesucristo kadagiti natay” (1 Peter 1:3; nainayon ti panangyunay-unay). Kitaenyo koma ti pannakausar ti sao a “sibibiag” a mangiladawan iti “namanama.”
Inwaragawag ni Jacob, “Gapuna, patpatgek a kakabsat, makitunoskayo kenkuana babaen ti pannubbot ni Cristo, ti Bugbugtong nga Anakna, ket magun-odyo ti panagungar, babaen ti bileg ti panagungar nga adda ken ni Cristo, ket maidatag iti Dios a kas dagiti umuna-a-bunga ni Cristo, nga addaan iti pammati, ken nakagun-od iti naimbag a namnama iti ngayedna sakbay ti panangipakitana iti bagina iti lasag” (Jacob 4:11; nainayon ti panangyunay-unay). Kitaenyo koma ti pannakausar ti sao a “naimbag” a mangiladawan iti “namnama.”
Ket kinuna ni Moroni, “Ken kasta met a malagipko nga imbagam nga insaganam ti balay ti tao, wen, uray pay dagiti dakkel ken nadaeg a balay ti Amam, a pakagun-odan ti tao iti nabilbileg a namnama; gapuna nasken a mangnamnama ti tao, wenno saanna a maawat ti tawidna iti lugar nga insaganam” (Ether 12:32; nainayon ti panangyunay-unay). Kitaenyo koma ti pannakausar ti sao a “nabilbileg” a mangiladawan iti “namnama.”
Ania ti Namnama ken Kristo?
Ti naespirituan a sagut ti namnama ken Cristo ket ti naragsak a panangsegsegga iti biag nga agnanayon babaen ti “pammateg, ken panangngaasi, ken parabur ti Nasantuan a Mesias” (2 Nephi 2:8) ken ti napigsa a tarigagay kadagiti naikari a bendision ti kinalinteg. Dagiti pangiladawan a sao a “sibibiag,” “naimbag,” ken “nabilbileg a namnama” kadagitoy a bersikulo ipamatmatda ti agtultuloy a rumangrang-ay ken nabiag a pammatalged iti Panagungar ken iti biag nga agnanayon babaen ti pammati ken ni Jesucristo.
Inlawlawag ni propeta Mormon:
“Ket manen, ay-ayatek a kakabsatko, kayatko nga ibaga kadakayo ti maipapan iti namnama. Kasano a magun-odyo ti pammati, malaksid no adda namnamayo?
“Ket ania ti namnamaenyo? Adtoy kunak kadakayo nga addanto namnamayo gapu iti panangsubbot ni Cristo ken ti pannakabalin ti panagungarna, nga agungar iti biag nga agnanayon, ket daytoy gapu iti pammatiyo kenkuana babaen iti kari.
“Gapuna, no adda pammati ti tao masapul nga adda namnamana; ta no awan ti pammati awan ti uray ania a namnama” (Moroni 7:40–42).
Ti Plano ti Ama iti Kinaragsak
Ti namnama ken Cristo a sibibiag, naimbag, ken nabilbileg ket mangrugi iti pannakaammo a sibibiag ti Dios nga Agnanayon nga Ama. Isu ti Amatayo, ket datayo dagiti naespirituan nga annakna. Literal a datayo dagit naespirituan nga annak a lallaki ken babbai ti Dios ket natawidtayo dagiti nadiosan a galad manipud Kenkuana.
Ti Ama ti autor ti plano ti kinaragsak (kitaen iti Abraham 3:22–28). Kas espiritu nga annak a lallaki ken babbai ti Dios, “inawattayo ti planona a pakagun-odan dagiti annakna iti nagtagilasag a bagida ken pakaaddaanda iti padas iti daga tapno dumur-as nga agturong iti pannakaan-anay ket iti kamaudiananna maragpatda ti nadiosan a pagtungpalanda a kas agtawid iti agnanayon a biag.” Kadagiti nasantuan a kasuratan, maadaltayo: “Nagtagilasag ken nagtagitulang ti Ama a marikna a kas iti tao; kasta met ti Anak” (Doktrina ken Katulagan 130:22). Gapuna, nasken ti pananggun-od iti pisikal a bagi iti proseso ti panagrang-ay nga agturong iti nadiosan a pagtungpalantayo.
Dua a paset ti kinataotayo (naespirituan ken pisikal a parsua). Dagiti espiritutayo, ti agnanayon a pasettayo, ket nakawesan kadagiti pisikal a bagi a makapasar kadagiti tarigagay wenno panaggartem ti mortalidad. Nadisenio ti plano ti Ama iti kinaragsak a mangipaay iti panangiturong kadagiti annakna, tapno matulonganna ida nga agsubli a sitatalged Kenkuana nga addaan kadagiti napagungar, naitan-ok a bagi, ken umawat kadagiti bendision ti agnanayon a rag-o ken kinaragsak.
Ti Cristo nga Ubing, ni Sharlotte Andrus
Ti Mannubbot nga Akem ni Jesucristo iti Plano ti Ama
Ni Jesucristo ti Bugbugtong nga Anak ti Agnanayon nga Ama. Immay Isuna ditoy lubong a mangaramid iti pagayatan ti Amana (kitaen iti 3 Nephi 27:13). Ni Jesucristo ti dinutokan ti Ama nga agbalin a personal a pannakabagina iti amin a banag a mainaig iti pannakaisalakan ti sangataw-an. Isu ti Mangisalakan ken Mannubbottayo gapu ta naparmekna nga agpadpada ti ipapatay ken basol.
Impadto ni Alma kadagiti tattao ni Gideon maipapan iti mangisalakan a trabaho ti Mesias:
“Ket mapanto, nga agitured iti saem ken rigat ken amin a kita ti sulisog; ket daytoy tapno matungpal ti balikas a nagkuna a sagabaennanto ti saem ken saksakit dagiti taona.
“Ket awatennanto ni patay, tapno mawarwarna ti begkes ni patay a nangpungo kadagiti taona; ken awatenna ti pagkuranganda, tapno mapno ti lalaemna iti kaasi, a maibatay iti lasag, tapno maammuanna a maibatay iti lasag no kasano nga alawenna dagiti taona a maibatay kadagiti pagkuranganda.
“Ita ammo ti Espiritu ti amin a banag; nupay kasta agitured ti Anak ti Dios maibatay iti lasag tapno sagabaenna ti basbasol dagiti taona, tapno mapunasna dagiti nagbasolanda a maibatay iti bileg ti pannakaisalakanna” (Alma 7:11–13).
Ti umuna a pagbatayan ti ebanghelio ket pammati ken ni Apo Jesucristo. Ti pudno a pammati ipamaysana ti atension iti Mangisalakan ken mangpabalin kadatayo nga agtalek Kenkuana ken maaddaan iti naan-anay a panagtalek iti pannakabalinna a mangisalakan kadatayo manipud iti ipapatay, mangdalus kadatayo manipud iti basol, ken mangbendision kadatayo iti pigsa a nalablabes ngem iti kabaelantayo.
Pinaneknekan ni Moroni, “Ket gapu iti pannakasubbot ti tao, nga immay babaen ken ni Jesucristo, naisublida iti imatang ti Apo; wen, daytoy ti nakasubbotan ti amin a tao, napasamak ti panagungar gapu iti ipapatay ni Cristo a mangyeg iti pannakatungpal ti panagungar, manipud iti awan patinggana a turog, manipud iti dayta a turog mariing amin a tao babaen ti bileg ti Dios inton aguni ti tangguyob; ket rummuardanto, dagiti babassit ken dadakkel, ket maisaklang amin a tao iti pangukoman, a nasubbot ken naruk-atan manipud iti agnanayon a pannakaadipenna iti patay, isu ti pannakatay a saan nga agnanayon” (Mormon 9:13).
Paneknekak a pinugsat ti Mangisalakan dagiti bedbed ti ipapatay. Isu ket nagungar, Isu ket sibibiag, ken Isu laeng ti pagtaudan ti sibibiag, naimbag, ken nabilbileg a namnama.
Maysa nga Angkla iti Kararua
Pinaneknekan ni propeta Ether, “Gapuna, dakkel ti namnama ti mamati iti Dios iti nasaysayaat a lubong, wen, uray pay iti lugar iti makanawan ti Dios, a yeg ti pammati dayta a namnama, a mangaramid iti angkla a lumansad iti kararua dagiti tao, a mangikkat iti duaduada ken mamatibker kadakuada, a kanayon a mangsursurot kadagiti naimbag nga aramid, ta naibagnosda a mangigloria iti Dios” (Ether 12:4; nainayon ti panangyunay-unay).
Iti daytoy naisangsangayan a panawen ti panangrambak iti pannakayanak ti maladaga idiay Betlehem, laglagipentayo koma a kanayon nga immay ni Jesucristo ditoy lubong tapno agbalin a Mangisalakan ken Mannubbottayo. Ipaayna kadatayo dagiti di magatadan a naespirituan a sagut ti biag, lawag, pannakapabaro, ayat, talna, panirigan, rag-o, ken namnama.
Awisenkayo a mangsapul a siuumiso iti naespirituan a sagut ti namnama iti Mangisalakan babaen ti panangadal kadagiti pannursuro ken pammaneknek dagiti nagkauna ken moderno a propeta maipanggep iti pangsubbot a sakripisiona ken literal a Panagungarna. Bayat ti panangaramidyo iti dayta, ikarik a mapatibkerto ti pammaneknekyo iti kinadios ti Mannubbot, mapauneg ti pannakapasurotyo (conversion) Kenkuana, dumakkelto ti tarigagay ken determinasionyo nga agtakder a kas natured a saksi Kenkuana, ken mabendisionankayto iti angkla iti kararuayo—iti sibibiag, naimbag, ken nabilbileg a namnama.
Kaduak dagiti Apostol a nangiburay iti pammaneknekda Kenkuana iti amin a tiempo, siraragsak nga ideklarak ti pammaneknekko a ni Jesucristo ket sibibiag nga Anak ti sibibiag a Dios. Isu ti napagungar a Mannubbottayo nga addaan iti nadayag, bagi a nagtagilasag ken nagtagitulang. Ket gapu iti pannakasubbot ken pannakikappia iti Dios nga ipalubos ti Apo iti amin a sangataw-an, maawattayo ti naespirituan a pammatalged ken sibibiag, naimbag, nabilbileg a namnama a “mabiagdanto amin ken Cristo.” (1 Taga-Corinto 15:22).
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, December 2024. Ilokano. 19296 864