“Yesu Klisto Azali Liziba ya ‘Elikya ya Bomoi,’ ‘ya Malamu,’ mpe ‘ya Kitoko Koleka,’” Liahona, Sanza ya Zomi na mibale 2024.
Etinda ya Sanza ya Liahona , Sanza ya Zomi na mibale 2024
Yesu Klisto Azali Liziba ya “Elikya ya Bomoi,” “ya Malamu,” mpe “ya Kitoko Koleka”
Na eleko oyo ya ntina mingi ya kosepela mbotama ya mwana na Beteleme, tika ete tomikundola ntango nyonso ete Yesu Klisto ayaki na mokili mpo na kozala Mobikisi mpe Mosikoli na biso.
Mbotama, na Sharlotte Andrus
Ntoma Petelo mpe baprofeta ya Buku ya Mormon Yakobo mpe Moroni babetaka nsete na likabo ya molimo ya elikya na Klisto na mateya ya ndenge moko.
Ndakisa, Petelo asakolaki, “Tika ete Nzambe, Tata ya Yesu Klisto, Nkolo na biso, apambolama, oyo kati na mawa monene na Ye, apesi biso bomoi ya sika, mpo na elikya ya bomoi solo na nzela ya lisekwa ya Yesu Klisto uta na bakufi” (1 Petelo 1:3; nsete ebakisami). Nasengi botala lolenge ya kosalela liloba “Bomoi” mpo na kolimbola “elikya.”
Yakobo asakolaki, “Yango wana, bandeko balingami, zongisani boyokani epayi na ye na botumbolami ya Klisto, Mwana Mobali Mobotami se Moko wa ye, mpe bokoki kozwa bosekwi, engebene na nguya ya bosekwi boye bozali na Klisto, mpe lakisamani lokola mbuma-ya-yambo ya Klisto epai ya Nzambe, kozalaka na bondimi, mpe kozwaka elikya elamu ya nkembo na ye yambo amimonisa yemei o mosuni” (Yakobo 4:11; nsete ebakisami). Nasengi botala lolenge ya kosalela liloba “malamu” mpo na kolimbola “elikya.”
Mpe Moroni alobaki, “Mpe lisusu namikundoli ete yo olobi ete olengeli ndako yoko mpo ya moto, iyo, kutu o ntei ya mboka ya Tata wa yo, o yango moto akoka kozala na elikya eluti elamu; yango wana moto asengeli kozala na elikya; to akoki te kozwa lisango lyoko o esika eye olengeli” (Etele 12:32; nsete ebakisami). Nasengi botala lolenge ya kosalela liloba “kitoko” mpo na kolimbola “elikya.”
Elikya kati na Klisto Ezali nini?
Likabo ya molimo ya elikya na Klisto ezali kozela ya esengo ya bomoi ya seko na nzela ya “matomba, mpe ngolu, mpe boboto ya Masiya Mosantu” (2 Nefi 2:8) mpe mposa makasi mpo na mapamboli elakama ya bosembo. Maloba “na bomoi,” “malamu,” mpe “kitoko koleka” na biteni oyo ezali kopesa likanisi ya kondimisama ya makasi mpe oyo ezali se kobakisama ya Lisekwa mpe ya bomoi ya seko na nzela ya bondimi na Yesu Klisto.
Profeta Mormon alimbolaki:
“Mpe lisusu, bandeko balingami ba ngai, nalingi koloba epayi ya bino na oyo etali elikya. Boniboni bokoki kokoma na bondimi, longola se soko bozali na elikya?
“Mpe mpo ya nini ete bokozala na elikya? Tala nalobi epayi ya bino ete bokozala na elikya na nzela ya botumbolami ya Klisto mpe na nguya ya bosekwi na ye, mpo na kosekwisama epayi ya bomoi ya seko, mpe yango na ntina ya bondimi na bino na ye engebene na elaka.
“Yango wana, soko moto moko azali na bondimi esengeli mpenza azala na elikya; mpo na bozangi bondimi, ekoki te kozala elikya” (Moroni 7:40–42).
Mwango ya Esengo ya Tata
Elikya na Klisto oyo ezali na bomoi, ezali malamu, mpe ya kitoko koleka ebandi na boyebi ete Nzambe Tata ya Seko azali na bomoi. Azali Tata na biso, mpe tozali bana na Ye ya molimo. Tozali mpenza bana mibali mpe basi ya molimo ya Nzambe mpe tozwa bizaleli ya bonzambe epayi na Ye.
Tata azali mokeli ya mwango ya esengo (tala Abalayama 3:22–28). Lokola bana mibali mpe basi ya Nzambe ya molimo, “tondimaki mwango na Ye oyo na nzela na yango bana na Ye bakokaki kozwa nzoto ya mosuni mpe kozwa boyebi awa na mabele mpo na kokende liboso kino na bobongi nie mpe nsukansuka kososola atandele na bango ya bozambe lokola basangoli ya bomoi ya seko.” Na makomi, toyekolaka ete “Tata azali na nzoto ya mosuni mpe mikuwa lokola moto nyonso; Mwana mpe. (talaMalongi mpe Mayokani 130:22). Na yango, kozwa nzoto ya mosuni ezali na ntina na ntango tozali kokende liboso mpo na kokokisama ya atandele na biso ya bonzambe.
Tozali na banzoto mibale. Milimo na biso, eteni na biso ya seko, elatisami na nzoto ya mosuni oyo ezali na bamposa mpe mposa ya kolia ya bomoi ya kufa. Mwango ya esengo ya Tata ebongisami mpo na kopesa bokambi mpo na bana na Ye, mpo na kosunga bango bazonga na kimya na ndako epayi na Ye na nzoto ya kosekwa, ya konetolama, mpe kozwa mapamboli ya esengo ya seko mpe bosepeli.
Mwana Klisto, na Sharlotte Andrus
Mosala ya Bosikoli ya Yesu Klisto na Mwango ya Tata
Yesu Klisto azali Mwana Mobotami Se Moko ya Tata ya Seko. Ayaki na mokili mpo na kosala bolingi ya Tata na Ye (tala 3 Nefi 27:13). Yesu Klisto azali moto oyo apakolami na Tata mpo na kozala momonisi na Ye moko na makambo manso matali lobiko ya bato. Azali Mobikisi mpe Mosikoli na biso mpo Alongaki liwa mpe lisumu.
Alma asakolaki epayi ya bato ya Gideon maye etali mosala ya kobikisa ya Masiya:
“Mpe akokende, koyokaka mpasi ya bolozi mpe mitungisi mpe masenginia ya lolenge na lolenge; mpe eye ete liloba ekoka kokokisama likolo ya ye bolozi mpe bokono ya bato na ye.
“Mpe akokamata likolo lya ye liwa, ete akoka kokangola nkanga ya liwa liye lizali kokanga bato ba ye; mpe akokamata likolo lya ye bokono bwa bango, ete nsopo ya ye ekoka kotonda na ngolu, engebene na mosuni, ete akoka koyeba engebene na mosuni boniboni kosalisa bato ba ye engebene na bokono bwa bango.
“Sikawa Molimo ayebi makambo manso; nzokande Mwana Mobali wa Nzambe akoyoka mpasi engebene na mosuni ete akoka kokamata likolo lya ye masumu ma bato ba ye, ete akoka kolongola bobuki mobeko bwa bango engebene na nguya ya libiki lya ye” (Alma 7:11–13).
Mobeko ya yambo ya nsango malamu ezali bondimi na Nkolo Yesu Klisto. Bondimi ya solo ekangamaka kati mpe likolo ya Mobikisi mpe epesaka biso likoki ya kotyela Ye motema mpe kozala na elikya mobimba na nguya na Ye ya kobikisa biso uta na liwa, kopetola biso uta na masumu, mpe kopambola biso na makasi oyo eleki makasi na biso moko.
Moroni atatolaki, “Mpe na ntina ya bosikoli bwa moto, boye boyaki na Yesu Klisto, bamememi mpo ya kozonga o kati ya miso mya Nkolo; iyo, eye ezali na wapi bato banso basikolami, zambi liwa lya Klisto limemi esalema bosekwi, boye bomemi esalema bosikoli boko uta o mpongi ezanga nsuka, uta o yango mpongi bato banso bakolamuka na nguya ya Nzambe, ekoyokana mondule; bakoya, bake mpe banene, mpe banso bakoteleme liboso lya esika ya ye, kosikolamaka mpe kokangolamaka uta o nsinga ya seko ya liwa, eye liwa ezali liwa lya ntango” (Mormon 9:13).
Natatoli ete Mobikisi akataki nkanga ya liwa. Asekwaki, Azali na bomoi, mpe Azali liziba se moko ya elikya ya bomoi, ya malamu, mpe ya kitoko koleka.
Longo na Molimo
Profeta Etele atatolaki, “Yango wana, oyo andimi na Nzambe akoki solo kolikia mpo ya mokili moko molamu mingi, iyo, kutu esika yoko o loboko la mobali la Nzambe, eye elikya eyei na bondimi, esali longo loko mpo ya bozo bwa bato, loye lokosala bango ba solo mpe ba sikisiki, ntango inso kozalaka na misala milamu beboo, mpe kokambemaka na nkembo ya Nzambe.” (Etele 12:4; nsete ebakisami).
Na eleko oyo ya ntina mingi ya kosepela mbotama ya mwana na Beteleme, tika ete tomikundola ntango nyonso ete Yesu Klisto ayaki na mokili mpo na kozala Mobikisi mpe Mosikoli na biso. Apesi biso makabo ya molimo ya motuya mingi ya bomoi, pole, bozongisi sika, bolingo, kimya, botali, esengo, mpe elikya.
Nabengisi bino boluka na lolenge ebongi likabo ya molimo ya elikya na Mobikisi na koyekolaka mateya mpe matatoli ya baprofeta ya kala mpe ya mikolo oyo etali bomikabi mpe Lisekwa ya solosolo na Ye. Ntango bozali kosala bongo, nalaki ete litatoli na bino ya bonzambe ya Mosikoli ekolendisama, mbongwana na bino epayi na Ye ekokomamakasi koleka, mposa mpe ekateli na bino ya kotelema lokola batatoli na Ye ya ya mpiko ekokolisama, mpe bokopambolama na longo na molimo na bino—mpe elikya ya bomoi, ya malamu, mpe ya kitoko koleka.
Elongo na Bapostolo oyo bapesaki litatoli na Ye na bowumeli ya bileko, nazali kosakola na esengo nyonso litatoli na ngai ete Yesu Klisto azali Mwana na bomoi ya Nzambe na bomoi. Azali Mosikoli na biso oyo asekwi na nzoto ya nkembo, ya mosuni mpe mikuwa oyo ezali komonana. Mpe na ntina ya bosikoli mpe boyokani na Nzambe oyo Nkolo azali kokokisa mpo na bato banso, tokoki kozwa bondimisi ya molimo mpe elikya ya bomoi, ya malamu, mpe ya kitoko koleka ete “bato nyonso bakozwa bomoi kati na Klisto” (1 Bakolinto 15:22).
© 2024 by Intellectual Reserve, Inc. All rights reserved. Ebetami na USA. Bondimami na lokota ya Angele: 6/19. Bondimami ya bobongoli: 6/19. Bobongoli ya Monthly Liahona Message, December 2024. Lingala. 19296 639