“Jisōs Kraist Ej Unjen ‘Mour,’ ‘Em̧m̧an,’ im ‘Kōjatdikdik Em̧m̧an,’” Liaona, Tij. 2024.
Ennaan eo an Liaona Kajjojo Allōn̄, Tijem̧ba 2024
Jisōs Kraist Ej Unjen “Mour,” “Em̧m̧an,” im “Kōjatdikdik Em̧m̧an,”
Ilo jijōn in ejenolo̧k n̄an keememe ļotak eo an nin̄nin̄ eo ilo Betlem, kōm̧m̧an bwe jen aolep iien keememej bwe Jisōs Kraist eaar itok n̄an laļin bwe en ad Rilo̧mo̧o̧r im Ripinmuur.
Iien Ļotak Eo, jān Sharlotte Andrus
Rijilōk Piter im rikanaan ro ilo Bok in Mormon Jekab im Moronai raar kobaik mennin letok ko an jetōb ilo kōjatdikdik ilo Kraist ilo ejja jekjek in wōt.
N̄an waanjon̄ak, Piter ekar kwaļo̧k, “En m̧ōņōņō Anij Jemān ad Irooj Jisōs Kraist, eo, ilo An tūriaṃokake eḷap, Ear bar keotak kōj ñan, kōjatdikdik e mour kōn jerkakpeje an Jisōs Kraist jān ro re mej” (1 Piter 1:3; naan ko kar kobaiktok). Jouj im lale an naan in jerbal “mour” n̄an kōmeļeļeik “kōjatdikdik.”
Jekab ekar kwaļo̧k, “Kōn menin, ro jeiū im jatū rejitōnbōro, kom̧win kōllaajrak kom̧ n̄an e kōn pinmuur eo an Kraist, eo Nejin Eaar Keotake, im kom̧win maron̄ bōk juon jerkakpeje, ekkar n̄an kajoor in jerkakpeje eo ej ilo Kraist, im jakem̧aanļo̧k kom̧ āinwōt leen ko m̧oktata an Kraist n̄an Anij, kōn ami tōmak, im ālikin bōk juon kōjatdikdik in aiboojoj em̧m̧an ilo E m̧okta jān An kwaļo̧ke ilo kanniōk” (Jekab 4:11; naan ko kar kobaiktok). Juoj im lale an naan in jerbal “em̧m̧an” n̄an kōmeļeļeik “kōjatdikdik.”
Im Moronai ekar kwaļo̧k, “Im ij barāinwōt keememej bwe Kwaar ba bwe Kwaar kōpooj juon jikin n̄an armej, aaet, em̧ool ilubwiljin jikin ko rem̧m̧an an Jemām, eo ilo e armej remaron̄ wōr; juon kōjatdikdik em̧m̧anļo̧k; kōn menin armej rej aikuj kōjatdikdik, n̄e jab e jamin bōk jolōt ilo jikin eo Kwaar kōpooje” (Ether 12:32; naan ko kar kobaiktok). Jouj im lale an naan in jerbal “em̧m̧anļo̧k” n̄an kōmeļeļeik “kōjatdikdik.”
Ta In Kōjatdikdik ilo Kraist?
Mennin letok eo an jetōb kōn kōjatdikdik ilo Kraist ej m̧ōņōņō eo an mour indeeo kōn “tōllo̧ke, im tūriam̧okake, im jouj an Messaia Ekwōjarjar” (2 Nipai 2:8) im ikdeelel eļap kōn kōjeraam̧m̧an ko kar kallim̧ur kaki kōn mour jim̧we. Naan kein “mour,” “em̧m̧an,” im “kōjatdikdik em̧m̧an” ilo eoon kein rej kwaļo̧k juon jeļā eo kōn Jerkakpeje im kōn mour indeeo kōn tōmak ilo Jisōs Kraist.
Rikanaan eo Mormon eaar kōmeļeļeiki:
“Im bar juon alen, ro jeiū im jatū rejitōnbōro, ikōņaan kōnono n̄an kom̧ kōn kōjatdikdik. Ekōjkan ami naaj tōpar tōmak, ijello̧kun n̄e naaj ejjeļo̧k ami kōjatdikdik?
“Im ta eo kom̧ naaj kōjatdikdik kake? Lo ij ba n̄an kom̧ bwe kom̧ naaj kōjatdikdik kōn pinmuur eo an Kraist im kajoor in An jerkakpeje, n̄an naaj jerkak n̄an mour indeeo, im men in kōnke ami tōmak ilo E ekkar n̄an kallim̧ur eo.
“Kōn menin, eļan̄n̄e armej ewōr an tōmak eaikuj wōr an kōjatdikdik; bwe n̄e ejjeļo̧k tōmak e jamin wōr jabdewōt kōjatdikdik” (Moronai 7:40–42).
Karōk in M̧ōņōņō eo an Jemedwōj Ilan̄.
Kōjatdikdik ilo Kraist ej juon mour, em̧m̧an, im juon kōjatdikdik em̧m̧anļo̧k kōn juon jeļāļo̧kjeņ bwe Anij ej Jemed Indeeo ej mour. E ej Jemād, im jej ro Nejin ilo Jetōb. Jej lukkuun jetōb ļaddik im leddik ro nejin Anij im kar kōjolet kōj kōn m̧wiļ ko rekwojarjar jān E.
Jemād ej unjen karōk in m̧ōņōņō eo (lale Ebream 3:22–28). Āinwōt jetōb ļaddik im leddik ro nejin Anij, jaar “bōk karōk eo An me jān bōk juon ānbwinin kanniōk im mour ioon laļ n̄an aer eddōkļok n̄an aer wāppen im kile jemļo̧k eo aer ekwojarjar āinwōt rijolete mour indeeo.” Ilo jeje ko rekwojarjar, jej ekkatak: “Jemān ewōr ānbwinnin kanniōk im di ko āinwōt maron̄ un̄n̄ūr wōt ānbwinnin armej” (Katak im Bujen Ko 130:22). Aaet, bōk ānbwinnin kanniōk in eaorōk ilo ad jibadōk mejān kajjik eo ad ekwojarjar.
Kōj ewōr ruo m̧ōttad. Jetōb ko ad, m̧ōttan eo ad indeeo, raar kapelpel ānbwinin kanniōk kōn tokjen ikdeelel im mour wabanban in. Karōk eo elem̧ōņōņō an Jemād kar āje n̄an letok tōl n̄an ro Nejin, n̄an jipan̄ er jepļaakļo̧k n̄an Ippān kōn ānbwin jerkakpeje, indeeo, im n̄an bōk kōjeraam̧m̧an in lan̄lōn̄ im lemōņōņō eo indeeo.
Kraist Nin̄nin̄ Eo, jān Sharlotte Andrus
Jerbal in Pinmuur eo an Jisōs Kraist ilo Karōk eo an Jemād.
Jisōs Kraist ej Nejin Emake kar Keotak an Jemān Indeeo. E eaar itok n̄an laļin n̄an kōm̧m̧ane ankilaan Jemān (lale 3 Nipai 27:13). Jisōs Kraist ej eo kar kapiti jen Jemād bwe Ripineje jenkwan ilo aolep men otemjeļo̧k ekkar n̄an lo̧mo̧o̧r eo an aolep armej. E ej ad Rilo̧mo̧o̧r im Ripinmuur kōnke Eaar anjo̧ ioon jim̧or mej im jerawiwi.
Alma eaar kanaan n̄an armej in Gideon ro kōn jerbal in lo̧mo̧o̧r eo an Messaia eo:
“Im Enaaj ilo̧k, en̄taan kōn metak ko im kaen̄tanaan ko im kapo ko otemjeļo̧k; im menin bwe naan eo en maron̄ kūrm̧ool eo kar ba Enaaj bōk ioon metak ko im nan̄inmij ko an armej ro an.
“Im e enaaj bōk ioon mij, bwe en maron̄ kōtļo̧k to ko an mij eo eaar likwōj armej ro an; im e enaaj bōk ioon mōjno ko aer, bwe mōttan ko ilo lojen ren maron̄ obrak kōn jouj, ekkar n̄an kanniek, bwe e en maron̄ jelā ekkar n̄an kanniek ekōjkan an jiban̄ armej ro an ekkar n̄an mōjno ko aer.
“Kiō Jetōb in ejelā men otemjej; mekarta eo Nejin Anij ej en̄taan ekkar n̄an kanniek bwe e en bōk ioon jerawiwi ko an armej ro an, bwe e en maron̄ jeorļo̧k bōd ko aer ekkar n̄an kajoorōn in lo̧mo̧ren eo an; im kiō lo,en̄in ej kam̧ool eo ej ilo ņa” (Alma 7:11–13).
Pedped eo m̧okta ilo gospel in ej tōmak ilo Irooj Jisōs Kraist. Tōmak eo em̧ool ej mijeļo̧k wōt Rilo̧mo̧o̧r n̄an kōmaron̄ kōj n̄an leke ilo E n̄an bōk juon leke eo edipio ilo kajoor eo An n̄an lo̧mo̧o̧ren kōj jān mej, karreoik kōj jān jerawiwi, im kōjeraam̧m̧an kōj kōn kajoor jen maron̄ eo ad make.
Moronai ekar kam̧ool, “Im kōnke lo̧mo̧o̧ren eo an armej, eo eaar itok jān Jisōs Kraist, kar bar bōktok er ilo im̧aan mejān Irooj; aaet, en̄in ej ijo aolep armej rej bōk lo̧mo̧o̧r, kōnke mej eo an Kraist ej kakūrm̧ool jerkakpeje, eo ej kakūrm̧ool lo̧mo̧o̧ren jān kiki indeeo, jān kiki eo armej naaj kōjerkak er jān e jān kajoor eo an Anij n̄e jilel eo enaaj jan̄; im renaaj wōnm̧aantak, jim̧or rittā im riutiej, im aolep naaj jutak im̧aan jikin ekajet An, kōnke kar lo̧mo̧o̧ren er im kōtļo̧k er jān to in mej ejjeļo̧k jem̧ļo̧kin, mej eo ej mej ilo kanniōk” (Mormon 9:13).
Ij kam̧ool bwe Rilo̧mo̧o̧r eaar rubwe to ko an mej. Eaar jerkakpeje, E ej mour, im E ej unjen mour, em̧m̧an, im juon kōjatdikdik em̧m̧anļo̧k.
Juon Em̧jak n̄an Jetōb eo
Rikanaan Ether ekar kam̧ool, “Kōn menin, jabdewōt eo ej lōke Anij emaron̄ kōjatdikdik ilo m̧ool kōn laļ eo em̧m̧anļo̧k, aaet, em̧ool jikin eo ianbwijmaron̄ in pein Anij, kōjatdikdik eo ej itok jān tōmak, kōm̧m̧an juon em̧jak n̄an jetōb ko an armej, n̄an jetōb ko an armej, eo en kar kōm̧m̧an bwe ren pen im dim, iien otemjej kōjatdikdik ilo jerbal ko rem̧m̧an, bōk tōl n̄an kaiboojoj Anij” (Ether 12:4; naan ko kar kobaiktok).
Ilo jijōn in ejenolo̧k n̄an keememe ļotak eo an nin̄nin̄ eo ilo Betlem, kōm̧m̧an bwe jen aolep iien keememej bwe Jisōs Kraist eaar itok n̄an laļin bwe en ad Rilo̧mo̧o̧r im Ripinmuur. Ej letok n̄an kōj menin letok eo ejjeļo̧k wōnāān kōn mour, meram, kōkāāl, iakwe, aenōm̧m̧an, inem̧m̧an, m̧ōņōņō, im kōjatdikdik.
Ij karuwaineneik ko n̄an pukot mennin letok ko an jetōb kōn kōjatdikdik ilo Rilo̧mo̧o̧r n̄an ekkatak katak ko im naan in kam̧ool ko an rikanaan ro etto im raan kein kōn en̄taan in pinmuur eo im Jerkakpeje eo An. Ilo am̧ kōm̧m̧an āindein, ij kallim̧ur bwe naan in kam̧ool eo am̧ kōn Ripinmuur enaaj kajoorļo̧k, am̧ oktak n̄an E enaaj penļo̧k, am̧ ikdeelel im kije n̄an juon āinwōt juon rikam̧ool kōn E enaaj ļapļo̧k, im kwonaaj jeraam̧m̧an kōn juon em̧jak n̄an jetōb eo am̧—n̄an mour, em̧m̧an, im juon kōjatdikdik em̧m̧anļo̧k.
Jān Rijilōk ro raar kwaļo̧k naan in kam̧ool kōn E ilo aolep iien, ij m̧ōņōņō in kwaļo̧k aō naan in kam̧ool bwe Jisōs Kraist ej Nejin Anij eo emour. E ej ad Ripinmuur em̧ōj an jerkakpeje ilo aiboojoj, kōn ānbwinin kannōk im di eaiboojoj. Im kōn wōt pinmuur im kōlaajrak eo ippān Anij bwe Irooj ej kapidodoik aolep men n̄an aolep armej, jemaron̄ bōk jeļā kōn men ko an jetōb n̄an mour, em̧m̧an, im juon kōjatdikdik em̧m̧anļo̧k “ilo Kraist ro otemje re naaj mour” (1 Korint 15:22).
© 2024 jān Intellectual Reserve, Inc. All rights reserved. Buriin ilo USA. Kōmālim ilo kajin In̄lij: 6/19. Kōmālim ukook eo: 6/19. Ukook eo an Monthly Liahona Message, December 2024. Marshallese. 19296 874