“Jesu Kreste ke Mohloli ‘o Phelang,’ ‘o Molemo,’ le ‘Ts´epo e Khabane Haholo,’” Liahona, Ts′itoe. 2024.
Molaetsa oa Khoeli Liahona Ts´itoe 2024
Jesu Kreste ke Mohloli o“Phelang,” “o Molemo,” le “Ts´epo e Khabane Haholo”
Nakong ena e khethehileng ea ho keteka tsoalo ea lesea Bethlehema, ha re hopoleng kamehla hore Jesu Kreste o tlile lefats´eng ho ba Mopholosi le Molopolli oa rona.
Tsoalo, ka Sharlotte Andrus
Moapostola Petrose le baporofeta ba Buka ea Mormone Jakobo le Moroni ba tiisa mpho ea moea oa ts´epo ho Kreste ka litsela tse rutang tse ts´oanang.
Mohlala, Petrose o itse,“Ho bokoe Molimo le Ntat´a Morena oa rona Jesu Kreste, eo ka boholo ba mohau oa oona o re tsoetseng hape ho isa ts´epong e phelang ka tsoho ea Jesu Kreste bafung” (1 Petrose 1:3; khatiso e ekelitsoe). Ka kopo hlokomela ts´ebeliso ea lentsoe “phela” ho hlalosa “ts´epo.”
Jakobo o ile a phatlalatsa, “Ka hona, bana b’eso ba ratehang, le boelane le eena ka topollo ea Kreste, Mora oa Hae ea tsoetsoeng a inots´i, ´me le ka fumana tsoho, ho ea ka matla a tsoho e leng ho Kreste, ´me ba hlahisoe pela Molimo e le lithakangoaha tsa Kreste, ka tumelo, ´me a fumana ts´epo e ntle e molemo ea khanya ho eena pele a iponahatsa nameng” (Jakobo 4:11; khatiso e ekelitsoe). Ka kopo hlokomela ts´ebeliso ea lentsoe “molemo” ho hlalosa “ts´epo.”
´Me Moroni a re, “Ke hopola hape hore o itse o lokiselitse motho ntlo, ee, le hara matlo a maholo a Ntate, ao motho a ka bang le ts´epo e khabane haholo; ka hona motho o tlameha ho ts´epa, kapa a ke ke a amohela lefa sebakeng seo o se lokisitseng” (Ether 12:32; khatiso e ekelitsoe). Ka kopo hlokomela ts´ebeliso ea lentsoe “khabane” ho hlalosa “ts´epo.”
Ts´epo ho Kreste ke Eng?
Mpho ea moea oa ts´epo ho Kreste ke tebello e thabisang ea bophelo bo sa feleng ka “makhabane, le mosa, le mohau oa Messia ea Halalelang” (2 Nefi 2:8) le takatso e matla ea lihlohonolofatso tse ts′episitsoeng tsa ho loka. Lihokelo “phelang,” “molemo,” le “khabane haholo” litemaneng tsena li fana ka maikutlo a tiisetso e ntseng e hola le e matla ea Tsoho le bophelo bo sa feleng ka tumelo ho Jesu Kreste.
Moporofeta Mormone o hlalositse:
“Hape, bana b′eso ba ratehang, ke tla bua le lona mabapi le ts´epo. Ho tla joang hore le fihlele tumelo, ntle le hore le be le ts′epo?
“Hape ke eng eo le ka bang le ts′epo ho eona? Bonang ke re ho lona le tla ba le ts′epo ka topollo ea Kreste le ka matla a tsoho ea hae, ho tsosetsoa bophelong bo sa feleng, ′me sena ke ka baka la tumelo ea lona ho eena ho ea ka pallo.
“Ka lebaka leo, ha motho a na le tumelo o ts′oanetse ho ba le ts′epo; hobane kantle ho tumelo, ho ke ke ha e-ba le ts′epo” (Moroni 7:40–42).
Morero oa Ntate oa Thabo
Ts′epo ho Kreste e phelang, e molemo, le e khabane e qala ka tsebo ea hore Molimo Ntate oa Bosafeleng oa phela. Ke Ntat´a Rona, ´me re bana ba Hae ba moea. Ka sebele re bara le barali ba Molimo ba moea ’me re futsitse makhabane a bomolimo ho Eena.
Ntate ke mongoli oa morero oa thabo (bona Abrahama 3:22–28). Joaloka bara le barali ba moea ba Molimo, re ile ra “amohela morero oa Hae oo ka oona bana ba Hae ba ka fumanang ′mele oa nama le ho fumana boiphihlelo ba lefats′eng ho hatela pele ho ea phethehong ′me qetellong ba hlokomele qetello ea bona ea bomolimo e le majalefa a bophelo bo sa feleng.” Mangolong, re ithuta: “Ntate o na le ′mele oa nama le masapo o bonahalang joaloka oa motho; le Mora hape” (Lithuto tsa Tumelo le Lilekane 130:22). Kahoo, ho fumana ′mele oa nama ho bohlokoa ts′ebetsong ea ho hatela pele ho ea pheletsong ea rona ea bomolimo.
Re libopuoa tse peli. Moea oa rona, karolo ea ka ho sa feleng ea rona, e apesitsoe ka ′mele oa nama o tlasa litabatabelo le litakatso tsa nama. Morero oa Ntate oa thabo o etselitsoe ho fana ka tataiso bakeng sa bana ba Hae, ho ba thusa ho khutlela hae ho Eena ka polokeho, ka ′mele e tsohileng, e phahamisitsoeng, le ho amohela mahlohonolo a nyakallo le thabo e sa feleng.
Ngoana Kreste, ka Sharlotte Andrus
Karolo ea Topollo ea Jesu Kreste Morerong oa Ntate
Jesu Kreste ke Mora oa Molimo ea Nots′i. O tlile lefats′eng ho etsa thato ea Ntat´ae (bona 3 Nefi 27:13). Jesu Kreste ke eena ea tlotsitsoeng ke Ntate hore e be moemeli oa Hae linthong tsohle tse amanang le poloko ea moloko oa batho. Ke Mopholosi le Molopolli oa rona hobane o hlotse lefu le sebe.
Alma o ile a porofetela batho ba Gideone mabapi le mosebetsi o pholosang oa Messia:
“′Me o tla tsamaea, a mamelle mahloko le mahlomola le liteko tsa mefuta eohle; ’me sena hore lentsoe le tle le phethahatsoe le reng o tla inkela ho eena bohloko le bokulo ba batho ba hae.
“′Me o tla inkela ho eena lefu, hore a tle a tlamolle litlamo tsa lefu tse tlammeng batho ba hae; ’me o tla inkela ho eena mefokolo ea bona, hore maikutlo a hae a ke a tlale ka mohau, ho latela nama, hore a tle a tsebe ho latela nama ke joang a ka thusang batho ba hae ho latela mefokolo ea bona.
“Joale Moea o tseba lintho tsohle; leha ho le joalo Mora oa Molimo o sotleha ho latela nama hore a tle a inkele ho eena libe tsa batho ba hae, hore a tle a hlakole litlolo tsa bona ho latela matla a hae a topollo” (Alma 7:11–13).
Motheo oa pele oa evangeli ke tumelo ho Morena Jesu Kreste. Tumelo ea ′nete e tsepamisitse maikutlo ho Mopholosi ′me e re nolofalletsa ho mo ts′epa ′me re be le ts′epo e tletseng matleng a hae a ho re pholosa lefung, ho re hloekisa sebeng, le ho re hlohonolofatsa ka matla a fetang a rona.
Moroni o ile a paka, “′Me hobane topollo ea motho, e tlile ka Jesu Kreste, ba khutlisetsoa ponts´eng ea Morena; ee, sena ke sona seo batho bohle ba lopolloang ka sona, hobane lefu la Kreste le tlisa tsoho, e tlisang topollo borokong bo sa feleng, borokong boo batho bohle ba tlang ho tsosoa ke matla a Molimo mohla terompeta e llang; ′me ba tla tsoa, ba banyenyane le ba baholo, ′me bohle ba tla ema pela mokoallo oa hae, ho lopolloa le ho lokolloa lerapong lena la ka ho sa feleng la lefu, leo lefu e leng lefu la nakoana” (Mormone 9:13).
Ke paka hore Mopholosi o ile a khaola marapo a lefu. O ile a tsosoa, O oa phela, ′me ke Eena feela mohloli oa ts′epo e phelang, e molemo, le e khabane haholo.
Sets´ehetso sa Moea
Moporofeta Ethere o ile a paka, “Ka hona, mang kapa mang ea lumelang ho Molimo a ka ts′epa ka tieo bakeng sa lefats′e le molemo, ee, le sebaka se letsohong le letona la Molimo,e leng ts′epo e tsoang tumelong, e etsang sets´ehetso ho moea oa batho, e leng se neng se tla ba netefalletsa, ba tie, ba ateloe ke mesebetsi e metle kamehla, ba tle ba tlotlise Molimo” (Ethere 12:4; khatiso e ekelitsoe).
Nakong ena e khethehileng ea ho keteka tsoalo ea lesea Bethlehema, ha re hopoleng kamehla hore Jesu Kreste o tlile lefats´eng ho ba Mopholosi le Molopolli oa rona. O re fa limpho tsa bohlokoa tsa moea tsa bophelo, leseli, nchafalo, lerato, khotso, pono, nyakallo, le ts′epo.
Ke le mema ho batla ka nepo mpho ea moea oa ts′epo ho Mopholosi ka ho ithuta lithuto le bopaki ba baporofeta ba khale le ba kajeno mabapi le sehlabelo sa Hae sa topollo le Tsoho ea sebele. Ha u etsa joalo, ke ts′episa hore bopaki ba hao ba bomolimo ba Molopolli bo tla matlafatsoa, ts′okoloho ea hau ho Eena e tla teba, takatso ea hau le boikemisetso ba ho ema u le paki e sebete ea Hae li tla eketseha, ′me u tla hlohonolofatsoa ka sets´ehetso sa moea oa hau—esita le ts′epo e phelang, e molemo, le e babatsehang haholo.
Le Baapostola ba faneng ka bopaki ba Hae ka lilemo-lemo, ka nyakallo, ke phatlalatsa bopaki baka hore Jesu Kreste ke Mora ea phelang oa Molimo ea phelang. Ke Molopolli oa rona ea tsohileng bafung ka ′mele o khanyang, o ts´oarehang oa nama le masapo. ′Me ka lebaka la topollo le poelano le Molimo tseo Morena a li entseng hore li khonehe bakeng sa moloko oohle oa batho, re ka fumana tiisetso ea moea le ts′epo e phelang, e molemo, le e khabane haholo ea hore “bohle ba tla phelisoa ka Kreste.” (1 Corinthians 15:22).
© 2024 by Intellectual Reserve, Inc. All rights reserved. E hatisitsoe USA. Tumello ea Senyesemane: 6/19. Tumello ea Phetolelo: 6/19. Phetolelo ea Monthly Liahona Message, December 2024. South Sotho. 19296 739