“Yesus Kristus e Ir Gekngin e ‘Tin Nib Fos,’ ‘Manggil,’ nge ‘Athapeg Ni Y’or’” Liahona, ko Dec. 2024.
Milwol ni Ngan Thapeg ko biney e Pul nifan e Liahona ko, December 2024
Yesus Kristus e Ir Gekngin e “Tin Nib Fos,” “Manggil,” nge “Athapeg Ni Y’or”
U lane re ran ney ni gadaed be madnom nag fare gargeleg nin tay ko fare tir u Bethlehem, migad lemniged ni Yesus Kristus ni yib nga fayleng ninge mang e Tathapeg nge Tabiyul rodad.
Fare Nativity, ni yoloey Sharlotte Andrus
Fare Apostle ii Peter nge Jacob nge Moroni ni fare profet u lane fare Babiyor Ku Mormon e ii ga’ayiyog nag mornga’agen e tow’ath ko athapeg ngak Kristus nib chuchgur rogon ngay.
Nb’aray e n’en nike buch, Peter e ii yoeg, “Ngad pininged e magaer ngak Got ni ir e Chitamngin e Somol rodad i Jesus Kristus! Ya bochan e ri be runguydad me pi’ e yafos nib be’ech ngodad ni fan e faseg Jesus Kristus ko yam’. Ireray fan ni kad nanged ni tin ke l’agan’dad ngay e bay yib i m’ug nib riyul’,” (1 Peter 1:3; uneg boch ngay). Wenig mu yoloeg ni fare bugithin nikanoeg e “nrib fas ngay” e be yip’fan e “athapeg”.
Ere arfan, “Pi iwalageg, nib tʼuf rog, ni ngam falʼeged thilmed u dakean e bayul rokʼ Kristus, ni Maʼagirag Rokʼ ni Fak, me yog e foskoyamʼ ngomed, u rogon fare gelingin fare foskoyamʼ niʼir e bay rokʼ Kristus, min fekmed ni gimed e tin sommʼon-i waʼamngin Kristus iyaen ngakʼ Got, nifan e mich romed, ma ke yog ngomed ba athap ko rir rokʼ nib mangil u mʼon ni nge yibi mʼug ni gidiiʼ.” (Jacob 4:11; uneg boch ngay). Wenig mu yoloey ni fare bugithin ni “mangil” e be weliy mornga’agen e “athapeg”.
Maki g’ar Moroni, “Ma ku gumnang ni gur e kamoeg faram ni gur e kam falʼeg ba naʼun ni fan ko gidiiʼ, arragon, u fithikʼ e pi naʼun rokʼ e Chitamam, niʼir e rayog riy ngakʼ e gidiiʼ e athap nib felʼ; ere gidiiʼ e thingari athap, ara dangay ma dabiyog ni nge yog bang e tagilʼ ngakʼ ko rengi nʼen ni kam falʼeg rogon” (Ether 12:32; uneg boch ngay). Wenig mu guy ni fare bugithin ni “Tin Rib Manggil” e be yip’fan e “athapeg.”
Mang e Athapeg ngak Yesus?
Fare tow’ath ko thothup u lan Kristus e ma pi’ a falfalaen’ ko tin fan e yofas ni manemus “u gelngin, e murnguy, rok fare Messiah ni Thothup” (2 Nephi 2:8) nge gelngin e tin nyibe athapeg e m’ag ko tow’ath ni fan e yul’yul’. Fare “tin nib fas,” “manggil,” nge “y’or ni manggil” u lane gubin yang e pi guruy ney e yibe pagowran ngodad fare Fas Ko Yam’ nge fare yofas ko manemus u fathik e mich u lan Yesus Kristus.
Fare profet ii Mormon e ii weliy:
“Ere bayay, pi walageg nib tʼuf rog, gu baʼadag ni nggu non ngomed ni morngaʼagen e athap. Buʼuw rogon me yog e mich ngomed, gathi kemus ni faʼanra bay e athap romed?
“Ma mang e ngam athapeged? Musap gaed gube yoeg ngomed ni ngam athapeged u dakean fare bayul rokʼ Kristus nge fare gelingin e foskoyamʼ ni tay, ni nge yog e yafos ni manechubog ngomed, ma biney e aray rogon ni bachan e mich romed ngakʼ ni boed ni michmicheg ngomed.
“Ere, faʼanra bay e mich rokʼ beeʼ ma thingar ni bay e athap rokʼ; ya faʼanra dariy e mich ma dariy e athap” (Moroni 7:40–42).
Fare Wo’en e Thap ko Falfalean’ Rok E Chitamangindad
Athapeg ngak Kristus e rib fas, manggil, mabfal’ m’amngin e tin ni yimnang rok Got fare Chitamangin u lane yofas rodad ni Manemus. Ir e Chitamangindad, ma gadaed e pi fak nib thothup. Mrigdad pfak Got ni bpin nge pagal ni thothup nikad feked papngin urnginyang Rok.
Fare Chitamangindad e ir e fare wo’en fare falfalaen’ (muguy ko Abraham 3:22–28). Pfak Got ni bpin nge pagal ni thothup, e kad “feked m’amngin e murwel rok ni gadad e bitir Rok ninge yog e dowef nge wo’en e par u fayleng ningad m’onogad min pagowran ngodad e fane yofas rodad ni manemus.” U lan fare chep ni thothup, e kad filed ni: “Fare Chitamangindad e bay fare downgin nge yil’ ni woed be’ nib m’on; niku t’aborgon ko fare Pagal ni fak” (Doctrine and Covenants 130:22). Machane, doewef ningeyog e rib t’uf ko tin ningan m’onog ngay nf’anra nge yoeg e yofas ni manemus ngodad.
Gadgubin ni l’agrow yangdad. Thothup rodad, fare bin ni manemus ngodad, e bay e doewef riy nibay papngin nge gelngin e tin nib fas riy. Fare m’amngin e murwel ko falfalean’ e kan fal’agin ninge p’owiy pfak e bitir Rok, ningan ayuwegrad ngar suled Ngak nga tabinaw, nge doewrad, me yoeg e tow’ath nge falfalaen’ ni manemus.
Fare Kristus ni Bitir, yib rok Sharlotte Andrus
Fare Murwel ko fare Tabiyul rok Yesus Kristus u fathik e Murwel rok E Chitamangin
Yesus Kristus e kemus ni yigo’ir e Bitir ni Pagal ni fak e Chitamangiy ni Manemus. Ni yib nga fayleng ninge rinʼ fiti laniyaenʼ e Chitamangin, ni bachan e ke lʼegeg. (muguy u 3 Nephi 27:13). Yesus Kristus e ir e ke m’eleg e Chitamangin ninge yip’fan m’amngin e murwel rok ni gubin yang nfan yalan e yofas ko gubin e girdi’ ni manemus. Ir e Tathapeg nge tabiyul ni bochane dariy e denen nge yam’ Rok.
Alma e ii weliy ngak pi girdi’en Gideon ko mornga’agen e faseg e yafos ko murwel rok fare Messiah:
“Ma bay iyaen, ni be gafgow ko pi amith nge kirbaenʼ nge pi lumel ni gubin mit; ma biney e aray rogon ni fan ko fare thin ni gomanga muguʼul ni yoeg nra fek nga dakean e pi amith nge pi mʼar ko gidiiʼ rokʼ.
“Ma yamʼ e ire rafek nga dakean, ni nge yog ni thang e pi wolan e yamʼ niʼir e be mʼag e gidiiʼ rokʼ; ma rafek nga dakean e pi moʼowaer ko gidiiʼ rokʼ, ni nge yog ni sug lan ngorngoren ko murnguy, u rogon e dagur, ni nge yog ni nang ko dagur u rogon ni nge ayuweg e gidiiʼ rokʼ u rogon e pi moʼowaer roraed.
“Chiney e fare Kan ni Thothup e manang gubin banʼen; machane fachaʼ ni Fak Got e gafgow nrogon e dowef ni gomanga yog ni fek nga dakean e pi denen ko gidiiʼ rokʼ, ni nge yog ni chuweg e pi ngongol roraed nib kireb u rogon fare gelingin e thap rokʼ; ere chiney e musap gaed, ireray e re mich ni bay rog” (Alma 7:11–13).
Bin So’omon ea machib ko gospal ea mich ngak fare Somoel Yesus Kristus. Mich ni yulyul’ ngak fare Tathapeg era pag rogondad ninge michan’dad Ngak fa michmichan’dad ko gelngin nibay Rok ninge chuweg e yam’, nge denen, me tow’athiydad nge gelnagdad.
Moroni e i g’ar, “ma bachan e bayul ko gubin e gidiiʼ, ni yib u dakean Yesus Kristus, min sulwegraed nga pʼoewchen Somoel; arragon, ireray woʼen e bayul ko gubin e gidiiʼ, ya bachan e yamʼ ni tay Kristus me yib e foskoyamʼ, niʼir e bayul nigey u ba mol ni dariy napʼan, ni ba mol ni gubin e gidiiʼ ni ra od riy u gelingin Got u napʼan ni kan thoey e yabul; ma bay rabaed nga wean, ni gubin e gidiiʼ nib sobutʼ nge tolang, ma gubin ni nge sakʼiy nga mʼon u gilʼ e pufthin rokʼ, ni kan bayul nagraed ma kan pithig roraed gafan luben e yamʼ, ni ba yamʼ ni yamʼ ko dagur” (Mormon 9:13).
Ri gube weliy ni fare Tathapeg e ke th’ab fare gaf ko yam’. Ke fas ko fare yam’, ma Kab Fas, ni kemus ni yigo’ Ir ni fas, ni manggil, nga athapeg nibe pi’ rib fel’ rogon.
Duguliy rogon Amithngin
Fare profet ii Either e ii g’ar, “Ere, en ra michaenʼ ngakʼ Got e riyulʼ ni rayog ni nge athapeg rebe fayleng nib felʼ, arragon, ni boed rogon bangi banʼen u baʼani matʼaw i paʼ Got, nib athap ni ma yib u dakean e mich, ni ma yuluuy e yaʼel ko gidiiʼ, niʼir ra tay raed ni yaed bagael ma yaed ba miyuluy, ni gubin e ngiyalʼ ma yaed be rinʼ e tin nib felʼ e muruwel, me wawliyraed ngar liyoer gaed ngakʼ Got” (Ether 12:4; un boch ngay).
U lane biney e ran nigad be madnom nag fare bitir u Bethlehem, mirigad lamniged Yesus Kristus ni yib nga fayleng nge mang e Tathapeg rodad nge Tabiyul. Ke pi’ ngodad e tow’ath ko thothup ko yafos, magal, bin nib bi’ech, adag, gapas, reb rogon ningan sap ngay, falfalaen’ nge athapeg.
Ri gube piningem ningam ning e ayuw ko tow’ath ko fare thothup u lan fare Tathapeg u lane study roem nge testimonies roem ko mornga’agen e profet ko tiney a ran ni mornga’agen e bayul Rok ni tay nga maligach ko fas ko yam’. Ni npan nigarin’, ma rugube micheg nag ngom ni mich roem ko fare Tabiyul e rab gelngin ni almarin, ni minon roem Ngak e rab gelngin nib gel, ni adag rom ningam un Ngak ko biroek e murwel e ra’i m’onog ii yan, ni ran tow’ath nigem ko amithngin—nrib fas, mab manggil, nga boch ningan athapeg nrib fal’.
Ko gubin e Apostles rok ni michmichan’ rad Ngak ko gubin yang u kakrom, rugube micheg nag ni Yesus Kristus e ir e Pagal nfak fare Got nib fas. Ni ra’ir e Tabiyul rodad nibay fal’ngin, nibay e dowef ni girdi’ nge yil’ rok. Ni bochan fan fare angin e tabiyul nge filag’ e thil rok Got ni fare Somoel e thapeg ni fan gubin e girdi’, nrayog ningeyog fal’ngin e thothup nrib fal’, mab manggil, nge athapeg ni manemus rogon “ni lan Kristus e kad fas gad” (1 Corinthians 15:22).
© 2024 ko Intellectual Reserve, Inc. Gubin nibay mat’won. Kan yoloey u USA. Kan micheg nag ko thin nu Ngalis: 6/19. Micheg i pilyeg: 6/19. Thiliyeg e thin Gubin E Puul Ko Fare Thin Ko Liahona, December 2024. Yapese. 19296 905