Tiseba
O Jisu Karisito na Luve ni Kalou.
“Raica koi au ko Jisu Karisito, na Luve ni Kalou. Koi au na vu-ni-bula kei na rarama kei vuravura” (V&V 11:28).
Kuria ki na veivakasama oqo na nomu o sa vakarautaka. Ena veimacawa, mo tuvanaka na sala me (1) kilai na vunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala cava meu vukei ira kina me ra vakila na Yalotabu?”
iMatai ni Macawa: Sa Tala mai na Luvena ki Vuravura na Tamada Vakalomalagi.
Me kilai na vunau (cavuti e dua na tiki ni itaviqaravi): Me cavuti vata vakavica kei ira na gone na tiki ni itaviqaravi oqo:
Sa tala mai na Luvena ki vuravura na Tamada Vakalomalagi.
A yaco mai ni se gone. (keveliga)
A tubu cake vakataki iko kei au. (lolou sobu ka tucake vakamalua)
Baleta ni lomani keda, (tara na utomu) A mate baleti keda. (dabe sobu)
Baleta ga ni sa tucaketale, eda na bula tale! (tucake tale)
Vakamacalataka ni tukuni ena ivolanikalou, ni kaya vei keda o Jisu ni o Koya na Luveni Kalou. Wilika vata e cake na Vunau kei na Veiyalayalati 11:28. (Sa rawa mo sureti ira na gone sobu mera cavuta ga “na Luve ni Kalou” ni ko wilika na tikina o ya mai na ivolanikalou.)
Era na vakarorogo vagumatua na gone ka umanaki tiko ni ra vakaitavi na gone ena tukuni italanoa.
Vakauqeta me kilai vakavinaka (droini kei na vakarorogo italanoa): Mera qai droinitaka na gone yadua e dua na ivakaraitaki se dua na tamata mai na italanoa ni nona sucu o Jisu Karisito (me vakataki, Meri, Josefa, se ivakatawa ni sipi). Tokaruataka na italanoa mai na Luke 2:4–17 kei na Maciu 2:1–12. Sureti ira na gone mera taura cake na nodra iyaloyalo ena gauna veidonui ena gauna ni italanoa. Sa rawa mo lagata na sere ni Siganisucu mai na Children’s Songbook ena gauna ni itaviqaravi oqo (raica na tabana 34–54). Me baleta na vakatutu ni vakayagataki na sere ena gauna ni veivakavulici, raica na VMLB, 199–200.
iKarua ni Macawa: A tubu cake o Jisu ena vuku kei na ituvaki vakayago ka sa taleitaki mai vua na Kalou kei ira na tamata.
Me kilai na vunau (lagati e dua na sere ka cavuqaqataki ni dua na ivolanikalou): Vakaraitaka eso na iyaloyalo i Karisito mai na gauna a sucu mai kina me yacova ni sa laki tamata bula. Me lagati vata na “Jesus Once Was a Little Child” (CS, 55), ka tarogi ira na gone mera vakamacalataka na veika e vakavulica tiko na sere baleti Jisu. Vukei ira na gone mera cavuqaqataka na Luke 2:52 ena nodra matanataka vakarawarawa eso na sala a tubu cake kina o Jisu: ena vuku (dusia na ulumu), ena ituvaki vakayago (vakaukauwataka na nomu masela), ka sa taleitaki mai vua na Kalou (roqo liga) kei na tamata (yaloyalo vua e dua na itokani).
Vakauqeta mera vakayacora (ena wili ivolanikalou ka vakaitavi ena itaviqaravi): Wasea vakava na rumu, ka biuta na ivakatakilakila yadua oqo ki na wase yadua ni rumu: A tubu cake o Jisu ena vuku—V&V 88:118; A tubu cake o Jisu ena ituvaki vakayago—V&V 89:20; A tubu cake o Jisu ka sa taleitaki Koya na Kalou—V&V 88:63; A tubu cake o Jisu ka taleitaki mai vei ira na tamata—Na Vosa Vakaibalebale 18:24. Vakarautaka e dua na itaviqaravi rawarawa ki na wase yadua, me vakataka na taro e veiganiti ki na yabaki ni bula baleta na Tamada Vakalomalagi kei na Nona vunau (“vuku”), me dua na tepi me vakarautaki kina na balavu ni dua na gone kei na pepa me droinitaki kina na kakana bulabula (“ituvaki vakayago”), kei na italanoa mai na Friend se Liaona me baleta na ivakadinadina kei na veitokani (“sa vinakati koya vakalevu cake tikoga na Kalou” kei “ira talega na tamata”). Vakamacalataka ni da sa tubu talega vakaoqo me vakataki Jisu—“ena vuku kei na yagona talega, a sa vinakati koya vakalevu cake na Kalou kei ira talega na tamata” (Luke 2:52). Wasei ira na gone me va na ilawalawa, ka kerea e dua na uabula me liutaka na ilawalawa yadua ki na dua vei ira na ivakatakilakila, mera na laki wilika vata kina na ivolanikalou o ya ka vakaitavi ena itaviqaravi. Me rogo malua na ivakatagi ni sa gauna mera toso kina na gone ki na dua tale na ivakatakilakila.
A tubu vakakina na ituvaki vakayago i Jisu Karisito
Sa taleitaki Jisu vakalevu cake na Kalou
Sa rawa vei ira na gone ena itaviqaravi oqo, mera raici Jisu Karisito ni a tubu cake talega vakataki ira.
iKatolu ni Macawa: Sa rarama ka vunibula kei vuravura o Jisu Karisito.
Me kilai na vunau (vakayacori e dua na itaviqaravi ni ivolanikalou): Vakabira na iyaloyalo ni nona sucu kei na mate na Karisito ena rua na yasa ni rumu veibasai. Tukuna vei ira na gone ni ko na wilika eso na ivolanikalou me baleta tiko na ivakatakilakila ni sucu i Jisu se ivakatakilakila ni Nona mate. Kerei ira na gone mera gole ka raica yani na iyaloyalo e salavata kei na ivolanikalou o wilika. (Ke ra lewe lailai na nomu Lalai, sa rawa me ra taubale yani na gone ki na iyaloyalo.) Wilika na 3 Nifai 1:15, 19, 21; 8:20, 22–23. Me veivosakitaki na nona kauta mai na rarama o Jisu Karisito ki vuravura. Kerei ira na gone mera tabonaka na matadra ka vakasamataka eso na bolebole era rawa ni sotava kevaka mera na bula voli ni sega na rarama. Vakatauvatana na bolebole oqo kivei ira eda na sotava kevaka e sega ni tu vei keda na kosipeli i Jisu Karisito. Wilika na Joni 8:12, ka sureti ira na gone mera vakarogoca na ka meda cakava meda kakua kina ni lako voli ena butobuto.
Vakauqeta me kilai vakavinaka (vakayacori e dua na qito ni kilakila mada): Vakamacalataka ni vuqa sara na ivakatakilakila e vukei keda meda nanuma tiko ni o Jisu na rarama kei vuravura; eso vei ira na ivakatakilakila era dau vakayagataki ena gauna ni Siganisucu. Biuta eso na ivakatakilakila oqo (me vakataka na kadrala, kalokalo pepa, se cina) ki na dua na beqi. Kerea e dua na gone me tatara ki na beqi, vakayamoca e dua vei ira na iyaya ka me kakua ni raica, me vakilakila se cava o ya, ka me qai vakaraitaka vei ira na gone. Kerea vua na gone me wasea e dua na ka a vakayacora o Jisu me kauta mai kina na rarama ki na noda bula. Vakayacora vakakina ki na vo ni iyaya.
Vakauqeta mera vakayacora (rokataki ni dua na iyaloyalo): Mera yadua na gone na pepa matanisiga. Mera qai vola se droinitaka e dua na iyaloyalo ni dua na sala era na muria kina na rarama i Jisu Karisito. Vakayaloqaqataki mera wasea na nodra pepa vei ira na nodra matavuvale.
Sa vakarautaki tu na droini matanisiga ena sharingtime.lds.org
iKava ni Macawa: A raici Jisu Karisito o Josefa Simici ka vakadinadinataki Koya.
Vakauqeta me kilai vakavinaka (ena dolavi ni iloloma): Ologa e dua na iyaloyalo ni iMatai ni Raivotu me dua na iloloma. Vakamacalataka ni vuqa era dau soli iloloma mera marautaka vata kina e dua na siganisucu. Taroga na siganisucu nei cei eda dau marautaka ena gauna ni Siganisucu. Vakamacalataka ni dua tale na tamata rogolevu e nona siganisucu tiko ena Tiseba. Sureta e dua na gone me dolava na iloloma me raica kina o cei na tamata o ya. Tukuna vei ira na gone ni ika 23 ni Tiseba e siganisucu tiko nei Josefa Simici. Me veivosakitaki na iMatai ni Raivotu, ka vakamacalataka ni sa soli vei keda na iloloma bibi eso ni sa mai raici Jisu Karisito o Josefa Simici ka vakadinadinataki Koya. Vola ena papanivolavola, “Na iloloma sa soli mai vei keda baleta ni a raici Jisu Karisito o Josefa Simici ka vakadinadinataki Koya.” Vakarautaka e va na tikini pepa lelevu, mo qai vola ki na pepa yadua e dua vei ira na iloloma oqo: “Sa tu vei keda na iVola i Momani.” “Sa tu vei keda nikua e vuravura na Lotu dina.” “Sa tu vei keda na matabete.” “Eda kila ni sa dau rogoca ka sauma na noda masu na Tamada Vakalomalagi.”
Sa vakarautaki tu na tikinipepa ni vosa ena sharingtime.lds.org
Wase ira na gone ki na va na ilawalawa. Solia mera yadua na pepa oqo, ka kerei ira mera droinitaka na iloloma o ya. Kerei ira mera laki solia na nodra iloloma oqo ki na dua tale na ilawalawa. Sureta na ilawalawa yadua mera vakaraitaka ka vakamacalataka na nodra iloloma kivei ira na gone ka vakabira na iyaloyalo o ya ki na papanivolavola.
Vakauqeta mera vakayacora (ena vakadinadinataki Jisu Karisito): Mera qai bobo na gone ka vakasamataka e dua mera laki wasea kina na nodra iloloma o ya na kosipeli. Tukuna vei ira ni sa rawa mera vakataki Josefa Simici ka vakadinadinataki Jisu Karisito.