Tīsema
ʻOku Ou ʻIlo ʻe Toe Hāʻele ʻAngaua Mai ʻa Sīsū Kalaisi
“He ʻoku ou ʻilo ʻoku moʻui ʻa hoku Huhuʻí, pea ʻe tuʻu ia ʻi māmani ʻi he ʻaho fakamuí” (Siope 19:25).
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻi he uike takitaha ʻa e ngaahi founga ke (1) fakamahinoʻi ai ʻa e tokāteliné, (2) tokoni ke mahino ia ki he fānaú, pea (3) tokoni ke nau moʻui ʻaki ia. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: Naʻe kikiteʻi ʻe he kau palōfitá ʻe haʻele mai ʻa Sīsū Kalaisi ki māmani.
Poupouʻi ke mahino (lau e ngaahi potufolofolá): Fakaʻaliʻali ha fakatātā ʻo ʻIsaia, Nīfai, Tuʻi ko Penisimaní, ʻApinatai, ʻAlamā, mo Samuela ko e Tangata Leimana mei he Tohi Fakatātā ʻo e Ongoongoleleí pea mo e Palaimeli 4 sila fakatātaá. Vahevahe e fānaú ki ha ngaahi kulupu pea ʻoange ki he kulupu takitaha ʻa e taha ʻo e ngaahi potufolofola ko ʻení ke nau kumi hake: (1) ʻIsaia 7:14; 9:6; (2) 1 Nīfai 11:14–15, 20–21; (3) Mosaia 3:5–8; (4) Mosaia 15:1; (5) ʻAlamā 7:10–12; mo (6) Hilamani 14:1–3. Kole ange ki he fānaú ke nau sio pe ko hai ʻa e palōfita ʻoku leá pea ko hai ʻoku kikite ki aí. Kole ange ki he kulupu takitaha ke nau fakaʻaliʻali ʻa e fakatātā ʻo e palōfitá pea nau talaange ki he toenga ʻo e fānaú ko hai ia pea ko e hā naʻá ne lea ʻakí. (Ki he fānau iiki angé, tokoni ki ha fānau ʻe toko ono ke ʻai hanau teunga faingofua pē ke fakatātaaʻi ʻa e kau palōfita ʻe toko onó. Fai ha kiʻi fakamatala nounou fekauʻaki mo e palōfita takitaha pea ko e hā ha meʻa naʻa nau lea ʻaki fekauʻaki mo e ʻaloʻi mo e misiona ʻo Sīsū Kalaisí). Fakamatalaʻi ange naʻe kikiteʻi ʻe he palōfita takitaha ʻe hāʻele mai ʻa Sīsū Kalaisi ki māmani. Hivaʻi ʻa e “Samuel Tells of the Baby Jesus” (CS, 36). Fakamoʻoni naʻe hāʻele mai ʻa Sīsū Kalaisi ki māmani ʻo hangē ko hono toumuʻa tala ʻe he kau palōfitá.
Uike 2: ʻE toe hāʻele mai ʻa Sīsū Kalaisi ki māmani.
Fakamahinoʻi ʻa e tokāteliné: Fakaʻaliʻali ha fakatātā ʻo e Hāʻele ʻAngaua Maí (TFO, no. 66). Fakamanatu ki he fānaú ne ʻuluaki hāʻele mai ʻa Sīsū Kalaisi ki māmani ko ha pēpē ʻi Pētelihema. Fakamatalaʻi ange ʻoku tau ako ʻi he folofolá te Ne toe hāʻele mai ki māmani.
Poupouʻi ke mahino (fai ha vaʻinga fakatauhoa): ʻAi ha seti fakatauhoa ʻe ua ʻo e ngaahi potufolofola ko ʻení, ‘ai ha ngaahi laʻipepa kehekehe ‘o hiki takitaha ki ai ‘eni: Mātiu 16:27; Mātiu 24:30, 36, 42; Ngāue 1:9–11; T&F 36:8; T&F 45:57–59; T&F 88:95–98. Fakafoʻohifoʻi ʻa e laʻipepá ʻi hono fakapipiki ki he palakipoé. Tuku ki he fānaú ke nau taufetongi atu ki he palakipoé ʻo fili ha ongo laʻipepa. Fulihi hake ʻa e ongo laʻipepá ke sio pe ʻokú na tauhoa. Kapau ʻoku ʻikai te na hoa, pea toe fakafoʻohifoʻi pē. Kapau ʻokú na tauhoa, pea tuku peheʻi ai pē ke ʻasi mai ʻa e potufolofolá mo kole ange ki he fānaú ke nau sio ki he tohi ko iá ke nau ʻiloʻi ʻa e meʻa ʻoku akoʻi mai ʻo fekauʻaki mo Kalaisi mo e hāʻele ʻangaua maí. Toutou fai pehē pē kae ʻoua leva ke fakatauhoa kotoa.
Uike 3: Te u teuteu atu ke toe nofo fakataha mo e Tamai Hēvaní mo Sīsū Kalaisi.
Fakamahinoʻi ʻa e tokāteliné (fai ha foʻi vaʻinga mateʻi): Fakaafeʻi ha fānau ʻe toko tolu ke nau fakatātaaʻi haʻanau teuteu ke ʻalu ʻo mohe, ki he lotú, pe ko ha fononga lōlōa. Kole ange ki he toenga e fānaú ke nau mateʻi mai ʻa ʻenau meʻa ʻoku faí. Aleaʻi mo e fānaú pe ko e hā ʻa e meʻa naʻe mei hokó kapau naʻe ʻikai te nau teuteu ke fai ʻa e ngaahi meʻa ko ʻení. Fakamatalaʻi ange ko e meʻa mahuʻinga taha ʻoku totonu ke nau teuteu ki aí ko e toe nofo fakataha mo e Tamai Hēvaní mo Sīsū Kalaisi.
Ko e ʻekitivitī tohoakiʻi e tokangá, hangē ko e fakatātāʻí, ʻe lava ke fakamānako pea tokoni ki he fānaú ke tukutaha ʻenau tokangá ʻi he taumuʻa ʻo e lēsoní. Ko kinautolu ʻoku ʻikai ke kaú te nau femoʻuekina ʻi he mamata ki he fānau ko eé.
Poupouʻi ke mahino (hivaʻi ha ngaahi foʻi hiva): Hivaʻi ʻa e kupu tolu ʻo e “Fānau Au ʻa e ʻOtua” (THF, 2–3) pea fakaafeʻi e fānaú ke nau fanongo ki he founga te tau teuteu ai ke toe nofo mo e Tamai Hēvaní. Fakaafeʻi ʻa e fānaú ke nau tuʻu ʻo toe hivaʻi ʻa e kupuʻi lea ko ʻení “Kapau te u fai ho finangaló.” Fakamatalaʻi ange ko e ngaahi hiva Palaimeli ʻe niʻihi ʻoku nau fakamanatu mai ha ngaahi meʻa te tau lava ke fai ke teuteu ke toe nofo fakataha mo e Tamai Hēvaní mo Sīsū Kalaisi. (hangē ko ʻení, “Te u Muimui he Palani ʻa e ʻOtuá” [THF, 86–87], “Tauhi ʻa e Ngaahi Fekaú” [THF, 68–69], “Ko e Anga-ʻofá ʻe Kamata ʻIate Au” [THF, 83], mo e “ʻI heʻeku Papitaisó” [THF, 53]). Tuku ki he tokotaha tā pianó ke tā mai ha ngaahi nota mei he taha ʻo e ngaahi foʻi hiva ko ʻení, peá ke kole ange ki he fānaú ke nau mateʻi mai pe ko e hā e foʻi hiva ko iá. Fakaafeʻi e fānaú ke nau hivaʻi ʻa e foʻi hivá pea nau tuʻu ki ʻolunga ʻo kapau ʻoku nau hiva fekauʻaki mo ha founga ʻe lava ke nau teuteu ai ke nofo mo e Tamai Hēvaní. Toe fai pehē pē ki he ngaahi hiva kehé.
Poupou ke moʻui ʻaki (tā fakatātā): Tuku ki he fānaú ke nau fakakaukau ki ha ngaahi founga te nau lava ai ke teuteu ke nofo fakataha mo e Tamai Hēvaní mo Sīsū Kalaisi. Tufa ke takitaha ʻa e tamasiʻi e laʻipepa, pea fakaafeʻi ke nau tā honau laʻinimá. Peá ke kole ange ke nau tohiʻi ʻi he foʻi tuhu takitaha ha meʻa te nau fai ʻe lava ke nau teuteu aí. Kole ange ki he fānaú ke nau fili ha taha ʻo e ngaahi meʻa ko iá ke nau ngāueʻi lolotonga e uiké. Fakahā ange te ke kole ange ke nau vahevahe ʻa e meʻa naʻa nau faí ʻi he Sāpate hokó.
Uike 4 : ʻOku ʻi ai ʻeku fakamoʻoni ko e fānau au ʻa e ʻOtuá.
Fakamahinoʻi ʻa e tokāteliné (fai ha foʻi vaʻinga ke mateʻi): Tohiʻi ʻi he palakipoé, “ʻOku ʻi ai ʻeku ______________.” Talaange ki he fānaú ke nau fakafanongo ki he kiʻi tokoni ko ʻení pea kūnima mo tuʻu ki ʻolunga ʻi heʻenau fakakaukau te nau lava ʻo fakafonu ʻa e kupuʻi leá:
-
ʻOku hanga ʻe he meʻá ni ʻo ʻai ke tau ongoʻi lelei, fiefia, pe māfana ʻi loto.
-
ʻOku foaki mai ʻeni ʻe he Laumālie Māʻoniʻoní.
-
ʻOku tokoniʻi heni kitautolu ke tau fie fai ʻa e ngaahi fili ʻoku totonú.
-
Te tau lava ʻo vahevahe ʻeni mo e niʻihi kehé ʻi heʻetau fai ha lea ʻi he Palaimelí, ʻi he efiafi fakafāmili ʻi ʻapí pea ʻi he houalotu ʻaukai mo e fakamoʻoní.
Fehuʻi ange: “Ko e hā ʻa e meʻa fakaʻofoʻofa ko ʻení?” Fakakakato ʻa e kupuʻi leá ʻaki ʻa e foʻi lea ko e fakamoʻoni, peá ke talaange ki he fānaú te nau lava ke fakamoʻoni ko e fānau kinautolu ʻa e ʻOtuá.
Tohiʻi ʻe tokoni ʻa e tefitoʻi moʻoni ʻo e ongoongoleleí ki he fānaú ke nau manatuʻi ia.
Poupouʻi ke mahino (hivaʻi ha foʻi hiva): Fakaafeʻi ʻa e fānaú ke nau hivaʻi ʻa e “Fānau Au ʻa e ʻOtua” (THF, 2–3), peá ke fehuʻi ange pe ko e hā e faʻahinga ongo ʻoku nau maʻu ʻi honau lotó ʻi heʻenau hivá. Kole ange ki ha niʻihi tokosiʻi ʻi he fānaú ke nau vahevahe mai ʻa e anga ʻenau ongoʻí. Fakamatalaʻi ange ko e ongoʻi leleí ko ia naʻe lava ke nau ongoʻí ne fou mai ia mei he Laumālie Māʻoniʻoní, mo fakahā ange ko e fānau moʻoni kinautolu ʻa e ʻOtuá. Fakamatalaʻi ange ko hono ʻiloʻi ʻoku moʻoni ʻení ʻoku ʻuhinga ia ke maʻu ha fakamoʻoni. Fakamatalaʻi ange ʻoku lahi ha ngaahi founga ke ʻilo ai ko e fānau kitautolu ʻa e ʻOtuá. Fehuʻi: “ʻOkú ke ʻilo fēfē ko e fānau koe ʻa e ʻOtuá?”
Poupouʻi ke moʻui ʻaki (fanongo ki ha ngaahi fakamoʻoni): Fehuʻi ange ki he fānaú: “Ko e hā hono ʻuhinga ʻoku mahuʻinga ai ke tau maʻu ha fakamoʻoni ko e fānau kitautolu ʻa e ʻOtuá? ʻOku anga fēfē ʻa e tokoni ʻa ʻete maʻu ha fakamoʻoní ke fai ha ngaahi fili ʻoku totonú?” Vahevahe hoʻo fakamoʻoní pea fakaafeʻi ha niʻihi ʻo e fānaú mo e kakai lalahí ke nau vahevahe ʻenau ngaahi fakamoʻoní ko e fānau kotoa kitautolu ʻa e ʻOtuá.