“Pagkaayo pinaagi sa Manluluwas—Programa aron Maulian Gikan sa Pagkaadik: Suporta samtang Naningkamot nga Maulian,” Programa aron Maulian Gikan sa Pagkaadik: Suporta samtang Naningkamot nga Maulian (2023)

“Suporta samtang Naningkamot nga Maulian,” Programa aron Maulian Gikan sa Pagkaadik; Suporta samtang Naningkamot nga Maulian

Imahe

mga lalaki nga nagginaksanay

Pagkaayo pinaagi sa Manluluwas

Suporta samtang Naningkamot nga Maulian

Ang Programa aron Maulian gikan sa Pagkaadik

Ang Kaimportante sa Pagpangita og Suporta

Ang suporta gikan sa uban importante aron matabangan kami nga maulian ug maayo. Ang pagkaadunay usa ka tawo nga among kaduolan sa panahon sa kahuyang kasagaran namatud-an nga importante. Ang paglimod ug ang pagpalayo maoy kasagarang mga timailhan sa dili makontrolar ug makaadik nga mga lihok. Dali ra ang pagbalik niini nga mga kinaiya kon wala ang suporta ug panglantaw sa uban. Importante alang kanamo nga makakuha og suporta sa labing dali nga panahon sa among paningkamot nga maulian.

Ang pagkonektar ngadto sa uban dili lang maghatag sa kadasig nga among gikinahanglan kondili makatabang usab kanamo sa paghinumdom nga kami takos sa gugma isip usa ka anak sa Dios. Samtang modangop kami sa uban alang sa suporta, mapanalanginan kami, ug kadtong mosuporta kanamo mapanalanginan usab. Samtang gamiton namo ang 12 ka lakang ug mangita og suporta gikan sa uban, tingali makabenepisyo kami gikan sa mosunod nga mga tinubdan sa suporta:

Langitnong Amahan, Jesukristo, ug ang Espiritu Santo. Ang Langitnong Amahan, si Jesukristo, ug ang Espiritu Santo mao ang labing maayo nga mga tinubdan sa suporta. Ang kausaban mahimong posible pinaagi ni Jesukristo ug sa Iyang Pag-ula. Sa Basahon ni Mormon, gipaambit ni propeta Alma nga si Kristo “modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayod sumala sa unod unsaon pagtabang ang iyang mga katawhan sumala sa ilang mga kahuyang” (Alma 7:12). Mobati kita nga gitabangan ug gialimahan kon kita mapaubsanong moduol sa atong Langitnong Amahan ug sa Iyang Anak, si Jesukristo. Importante nga dili mabaliwala ang tabang sa Manluluwas pinaagi sa Pag-ula. Siya nagtudlo kanato, “Ako mao ang dalan, ang kamatuoran, ug ang kinabuhi” (Juan 14:6). Ang Espiritu Santo makahatag kanato og kahupayan, kalinaw, ug espiritwal nga kalig-on aron makapadayon.
Mga sakop sa pamilya. Ang mga sakop sa pamilya mahimong tinubdan sa suporta pinaagi sa pagtanyag og gugma ug pagdawat. Mapalambo nila ang ilang abilidad sa pagsuporta pinaagi sa paggamit sa mga baroganan sa ebanghelyo nga gitudlo diha sa Suporta nga Giya:Tabang alang sa mga Kapikas ug Pamilya sa mga Nagpaayo (ChurchofJesusChrist.org). Bisan og dili tanang sakop sa pamilya ang anaa sa emosyonal nga kahimtang sa paghatag og kahupayan, kadtong makahimo sa kasagaran mao ang labing maayo nga mga tinubdan sa suporta.
Mga higala. Ang mga higala makahatag og gugma ug suporta sa higayon nga kami moistorya nila mahitungod sa among mga panglimbasog, itug-an man namo kanila o dili ang mga detalye. Kon ang mga higala adunay kaisog sa pagtug-an sa mga kinaiya nga kinahanglan namong hunongon, o kon sila modasig kanamo sa pagpangita og tabang, makapadayon kami sa among paglambo nga maulian. Samtang masinati namo ang gugma ug suporta gikan sa mga higala, makapahinumdom kini kanamo sa among bili ug kabililhon.
Eklesyastikal nga mga lider. Ang eklesyastikal nga mga lider makahatag og mahinungdanong suporta sa proseso sa kausaban. Kini nga mga lider makatabang kanamo nga mobati sa gugma sa Manluluwas ug adunay mahinungdanong papel sa pagtabang kanamo nga makahinulsol ug mahimong limpyo sa espirituwal nga paagi gikan sa dili makontrolar ug makaadik nga mga lihok.
Mga Sponsor. Ang sponsor mao ang tawo kinsa naulian pinaagi sa pagbuhat sa 12 ka lakang. Tungod sa ilang kasinatian, nasayod sila unsaon sa pagtabang kanamo sa pagbuhat ug paggamit niini nga mga lakang. Sa kasagaran mamatikdan nila ang kadili matinuoron ug makasabot sa ubang mga kalisod bisan kon wala kami makamatikod niini. Ang sponsor anaa aron matabangan kami nga mapahimutang ang among “[kinabuhi] sa hustong panglantaw ug malikay sa pagpasulabi o pagpagamay sa among mga tulubagon” (Addiction Recovery Program: Giya aron Maayo ug Maulian Gikan sa Pagkaadik [2005], 29).
Mga miting alang sa mga naningkamot aron maulian. Ang mga miting sa pagsuporta usa ka luwas nga dapit diin among makaplagan ang pagdawat, paghigugma ug pagsuporta. Niini nga mga miting mopakigbahin kami sa among mga kasinatian ingon man usab sa among hugot nga pagtuo ug paglaom nga maulian pinaagi sa Manluluwas nga si Jesukristo ug pinaagi sa paggamit sa 12 ka lakang ngari sa among kinabuhi. Ang pagpakigbahin sa among mga kasinatian makatabang kanamo sa pagbuhat sa gikinahanglang mga kausaban ug pagkaplag sa paglaom nga ang pagkamaulian ug pagkaayo posible.
Mga propesyonal sa kahimsog sa pangisip ug medikal nga mga propesyonal. Ang mga propesyonal makahatag og mga panabot ug talagsaon nga mga kahanas nga gikinahanglan aron maulian ug maayo gikan sa dili makontrolar ug makaadik nga mga lihok. Kon nagsagubang gihapon kami sa dili makontrolar ug makaadik nga mga lihok bisan kon miapil na kami sa Programa aron Maulian gikan sa Pagkaadik, kinahanglan nga among ikonsiderar ang pagpangita og propesyonal nga tabang gikan sa propesyonal sa kahimsog sa pangisip o medikal nga propesyonal. Kon mangita og propesyonal nga tabang, ang mga miyembro sa Simbahan kinahanglang mopili og tawo nga nagsuporta sa mga baroganan sa ebanghelyo.

Pagpili og mga Tawo nga Mosuporta Kaninyo

Sa Programa sa Simbahan aron Maulian gikan sa Pagkaadik, dili ka hatagan og usa ka sponsor o usa ka kaabag sa pagsuporta. Ang paghukom kon kanus-a ug kinsa ang pangayoan og tabang usa ka personal nga desisyon. Pagmainampoong mokonsiderar niadtong anaa sa inyong palibot kinsa gibati ninyo nga labing komportable nga kapangayoan og tabang, o kinsa ang labing makatabang kaninyo. Kasagaran, kon mas daghang tawo ang mosuporta kaninyo, mas dako ang kahigayonan nga inyong makab-ot ang pagkaulian. Samtang kamo makatino sa tawo nga gusto ninyong mahimong kaabag sa pagsuporta [support system], posibling lisod ug makahadlok ang pagpangayo sa ilang tabang. Apan, kon buhaton ninyo, matingala kamo sa dakong gugma ug pagdawat nga inyong mabatyagan. Kon kamo mas mokonekta sa uban, mas daghan og oportunidad nga kamo makadawat og gugma.

Sa pagpili sa mga tawo nga mosuporta kaninyo, hunahunaa nga kinahanglan nga sila kasaligan kaayo. Ang pipila ka labing epektibong mga tawo nga mosuporta kaninyo mao kadtong adunay kasamtangan nga koneksiyon kaninyo (mga ginikanan, kapikas, pamilya, o mga lider sa Simbahan), kadtong gusto nga kamo molampos, aktibo kaayo sa Simbahan, ug nakasabot o adunay tinguha sa pagsabot sa tukma nga matang sa hagit nga inyong giatubang. Ang usa ka tawo nga nakabuntog sa iyang kaugalingong mga hagit sa kasagaran adunay mas dakong pagsabot sa mga hagit nga nasinati sa uban. Kadtong adunay susamang mga hagit sa kasagaran adunay mas dakong abilidad sa pagsabot sa inyong panglimbasog.

Samtang inyong sugdan ang proseso sa pag-usab, posible nga mahimo kamong huyang sa pisikal, emosyonal, ug sa espirituwal nga paagi. Pagmatngon nga dili kamo makapalambo og dili angay nga pakigrelasyon ni bisan kinsa nga nagsuporta kaninyo.