2 Nīfai 3

“Te u Fokotuʻu Hake Ha Tangata Kikite”

ʻOku lekooti ʻi he vahe 3 ʻo e 2 Nīfaí ʻa e ngaahi lea tuku ʻa Līhai ki hono foha siʻisiʻi taha ko Siosefá. Naʻe lea ʻaki ʻe Līhai ha kikite naʻe fai ʻe Siosefa ʻo ʻIsipité ʻi ha meimei taʻu ʻe 1,700 nai kimuʻa pea ʻaloʻi ʻa Kalaisí. Fakakaukauloto angé ki he ʻohovale ʻa Siosefa Sāmita ʻi heʻene ʻiloʻi ko ia e kaveinga ʻo e konga lahi ʻo e kikite naʻe fai ʻe Siosefa ʻo ʻIsipité. Ko e taumuʻa ʻo e lēsoni ko ʻení ke tokoniʻi koe ke fakaloloto hoʻo fakamoʻoni ki he uiuiʻi fakalangi ʻo e Palōfita ko Siosefa Sāmitá.

Ngaahi ʻEkitivitī Ako ʻOku Ala Fakahokó

Ko e Kau Siosefa ʻe Toko Fā

ʻOku ʻi ai ha niʻihi fakafoʻituitui ʻe toko fa ʻoku fakamatalaʻi kinautolu ʻi he 2 Nīfai 3 ʻoku nau maʻu kotoa e hingoa tatau. Lau ʻa e ngaahi veesi ki he fakatātā takitaha pea talamai pe ko hai ʻoku fakafofongaʻi ʻe he ngaahi fakatātā ʻe fā ko ʻení.

2 Nīfai 3:3; 2 Nīfai 3:4; 2 Nīfai 3:11; 2 Nīfai 3:15

ʻOku fakatefito e konga lahi ʻo e 2 Nīfai 3 ʻi ha kikite naʻe fai ʻe Siosefa ʻo ʻIsipité kau ki he “tangata kikite” mo e palōfita ko Siosefa Sāmitá mo hono misiona ʻi he ngaahi ʻaho kimui ní.

Naʻe fakahoko ʻe Palesiteni Pilikihami ʻIongi (1801–77) ʻa e lea ko ʻení fekauʻaki mo e teuteu ʻa e ʻEikí ki he misiona ʻo Siosefa Sāmitá:

Naʻe ʻosi tuʻutuʻuni pē ia ʻi he fakataha alēlea ʻo e taʻengatá, kimuʻa ʻaupito pē ia pea toki fakatoka ʻa e makatuʻunga ʻo e māmaní, ʻe hoko ʻa Siosefa Sāmita ko e tangata ia ʻi he kuonga fakakosipeli fakaʻosi ʻo māmaní, ke ne ʻomai ʻa e folofola ʻa e ʻOtuá ki he kakaí, pea ke ne maʻu ʻa hono kakato ʻo e ngaahi kī mo e mālohi ʻo e Lakanga Fakataulaʻeiki ʻo e ʻAlo ʻo e ʻOtuá. Naʻe ʻafioʻi pē ia ʻe he ʻEikí, mo ʻene tamaí, mo e tamai ʻa ʻene tamaí, mo honau ngaahi hakó ʻo aʻu … kia ʻĀtama. Naʻá Ne ʻafioʻi ʻa e fāmili ko iá, pea mo e toto ko iá ʻi heʻene tafe mai mei hono tupuʻangá ʻo aʻu mai ki hono fanauʻi ʻo e tangata ko iá. Naʻe tomuʻa fakanofo pē ia ʻi he taʻengatá ke ne pule ʻi he kuonga fakakosipeli fakaʻosí ni. (Ngaahi Akonaki ʻa e Kau Palesiteni ʻo e Siasí: Pilikihami ʻIongi [1997], 116, 343)

• Ko e hā ʻe lava ke akoʻi mai ʻe he ngaahi lea ko ʻení fekauʻaki mo e uiuiʻi ʻo Siosefa Sāmitá?

• Ko e hā te nau lava ʻo akoʻi mai fekauʻaki mo e ʻEikí?

Ngaahi kikite fekauʻaki mo Siosefa Sāmitá

Lolotonga e lea ʻa Līhai ki hono foha ko Siosefá, naʻá ne lau ha konga ʻo ha kikite ʻa Siosefa ʻo ʻIsipité mei he ʻū lauʻi peleti palasá (vakai foki, Liliu ʻe Siosefa Sāmita, Sēnesi 50:24–38). Ko e konga lahi ʻo e kikite ko ʻení naʻe fekauʻaki pē ia mo e Palōfita ko Siosefa Sāmitá ʻi he ngaahi ʻaho kimui ní. Lau ʻa e 2 Nīfai 3:6–15, 24, pea fakaʻilongaʻi ʻa e ngaahi foʻi lea pe kupuʻi lea ʻoku nau akoʻi koe fekauʻaki mo Siosefa Sāmitá. (Fakatokangaʻi ange ʻoku ʻuhinga ʻa e “fua ʻo ho manavá” ki he fānaú pe hakó.)

• Ko e hā ha meʻa ʻoku makehe ange kiate koe fekauʻaki mo Siosefa Sāmitá?

• Te ke fakamatala fakanounouʻi fēfē nai ʻa e ngaahi akonaki kau ki he Palōfita ko Siosefa Sāmitá mei he meʻa naʻá ke lau ʻi he 2 Nīfai 3?

Ko e foʻi moʻoni ʻe taha ʻoku tau lava ʻo akó ko hono hanga ʻe he ʻEikí ʻo fokotuʻu e Palōfita ko Siosefa Sāmitá ke tokoni ki hono Fakafoki Mai ʻo e ongoongolelei ʻo Sisu Kalaisi.

• ʻOkú ke pehē ko e hā ʻoku mahuʻinga ai ke tau maʻu ha fakamoʻoni ki he moʻoni ko ʻení?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE fakautuutu ʻa e lau kovi ki he Palōfita ko Siosefa Sāmitá ʻi heʻetau ʻunuʻunu atu ki he Hāʻele ʻAnga Ua Mai ʻa e Fakamoʻuí. He ʻikai hōloa ʻa e ngaahi moʻoni fakakongá mo e olopoto kākaá. ʻE ʻi ai ha kau mēmipa ʻo e fāmilí mo ha ngaahi kaungāmeʻa te nau fie maʻu hoʻo tokoní. …

Ki he toʻu tupú … ʻoku ou fai atu ha pole: ʻAi ke ke maʻu haʻo fakamoʻoni fakatāutaha ki he Palōfita ko Siosefa Sāmitá. (Neil L. Andersen, “Siosefa Sāmita,” Liahona, Nōvema 2014, 30)

• ʻOku lahi fēfē nai hoʻo ongoʻi loto falala fekauʻaki mo e uiuiʻi fakalangi ʻo e Palōfita ko Siosefa Sāmita?

Ko hono maʻu ha fakamoʻoni ʻo Siosefa Sāmitá

Fakakaukauloto ki he tūkunga ko ʻení:

ʻI he taimi naʻe ʻilo ai ho kaungāmeʻa ko Mākosí ko ha mēmipa koe ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻe kamata ke ne lau fekauʻaki mo Siosefa Sāmita ʻi he uepisaiti ʻa e Siasí. Naʻá ne mālieʻia ʻi he fakaafe ke ne ako ʻiate ia pē ko Siosefa Sāmita ko ha palōfita ʻa e ʻOtuá. ʻI heʻene vahevahe mo kimoutolu ha niʻihi ʻo e ngaahi meʻa ʻokú ne akó, naʻá ne fehuʻi, “Te tau lava fēfē nai ʻo ako ʻiate kitautolu pē pe ko ha palōfita ʻa Siosefa Sāmita?”

• Ko e hā nai e meʻa te ke talaange kia Mākosí?

Ki ha ngaahi fakakaukau kehe ki hono maʻu ʻo ha fakamoʻoni ko Siosefa Sāmita ko e palōfita ʻa e ʻEikí, mamata pe lau ʻa e meʻa naʻe fokotuʻu mai ʻe ʻEletā ʻEnitasení:

Siosefa Sāmita

Lea ʻa ʻEletā Neil L. Andersen ʻi he Konifelenisi Lahi ʻo ʻOkatopa 2014.

ʻE lava pē ke kehekehe e founga ʻetau maʻu ha fakamoʻoni ki he Palōfita ko Siosefa Sāmitá. ʻE lava ke maʻu ia ʻi haʻo tūʻulutui ʻo lotu, ʻo kole ki he ʻOtuá ke fakapapauʻi mai ko ha palōfita moʻoni ia. ʻE lava ke maʻu ia ʻi hoʻo lau e fakamatala ʻa e Palōfitá ki he ʻUluaki Mata Meʻa-hā-maí. ʻE lava ke taumalingi ki ho laumālié ha fakamoʻoni ʻi hoʻo toutou lau ʻa e Tohi ʻa Molomoná. ʻE lava ke maʻu ia ʻi hoʻo fai hoʻo fakamoʻoni ki he Palōfitá pe ʻi hoʻo tuʻu ʻi he loto temipalé mo ʻiloʻi naʻe fakafoki mai ʻia Siosefa Sāmita ki māmani ʻa e mālohi māʻoniʻoni ke silaʻí. Ka ʻi he tuí mo e loto fakamātoató, ʻe fakamālohia hoʻo fakamoʻoni ki he Palōfita ko Siosefa Sāmitá. (Neil L. Andersen, “Siosefa Sāmita,” Liahona, Nōvema 2014, 30)

 

A Choice Seer Will I Raise Up: Prophet of the Restoration

Part 2: Youth share their testimonies of the Restoration and how it has impacted their lives. Based on a talk given by Elder Craig C. Christensen in October 2016.

1. Tali ha tolu ʻo e ngaahi fehuʻi ko ʻení:

• Ko e hā ha meʻa kuó ne tokoniʻi koe ke ke tui ko Siosefa Sāmitá ko ha palōfita?

• Ko e hā ha meʻa kuo tokoniʻi ai koe ʻe he Palōfita ko Siosefa Sāmitá ke mahino pe ongoʻi fekauʻaki mo Sīsū Kalaisí?

• Ko e hā ha meʻa te ke lava ʻo fai ke fakaloloto ai hoʻo fakamoʻoni ki he Palōfita ko Siosefa Sāmitá?

• ʻE tokoniʻi fēfē nai hoʻo moʻuí ʻi hono maʻu ha fakamoʻoni kia Siosefa Sāmitá?

Fili Pē: Fie Ako Lahi Ange?

ʻOku tau moihū nai kia Siosefa Sāmita?

Naʻe akoʻi ʻe ʻEletā Kēleti W. Kongi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku tau hū ki he ʻOtua ko e Tamai Taʻengatá mo Hono ʻAlo ko Sīsū Kalaisí, kae ʻikai ko e Palōfita ko Siosefá pe ha toe tangata pe fefine matelie. (Gerrit W. Gong, “Puleʻanga, Faʻahinga, mo e Lea Kotoa,” Liahona, Nōvema 2020, 39)

Ko e hā kuo lea ʻaki ʻe he kau palōfita ʻo onopōní fekauʻaki mo Siosefa Sāmitá?

Naʻe fakamoʻoni ʻa Palesiteni Lāsolo M. Nalesoni ʻo pehē:

Hear Him

President Nelson teaches how we can hear the Lord, and he issues a new proclamation: “The Restoration of the Fulness of the Gospel of Jesus Christ: A Bicentennial Proclamation to the World.”

ʻOku ou ʻilo ko Siosefa Sāmitá ko e palōfita ia ne tomuʻa fakanofo naʻe fili ʻe he ʻEikí ke ne fakaava ʻa e kuonga fakakosipeli fakaʻosí ni. Naʻe fakafoki mai e Siasi ʻo e ʻEikí ki māmani ʻiate ia. Naʻe fakamaʻu ʻe Siosefa ʻene fakamoʻoní ʻaki hono totó. ʻOku ou ʻofa mo fakaʻapaʻapaʻi ia! (Russell M. Nelson, “Fanongo Kiate Ia,” Liahona, Mē 2020, 92)

Naʻe fakamoʻoni ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Joseph, the Man and the Prophet

Dallin H. Oaks delivers a message titled "Joseph, the Man and the Prophet."

Hangē ko e Kau Māʻoniʻoni angatonu ʻo e ngaahi ʻaho kimui ní, kuó u langaki ʻeku moʻuí ʻi he fakamoʻoni mo e misiona ʻo e Palōfita ko Siosefa Sāmitá. ʻI he kotoa ʻo ʻeku laukongá mo e ngaahi fakatotolo kimuʻá, kuo teʻeki ai pē ke u mavahe mei heʻeku fakamoʻoni ki hono uiuiʻi fakaepalōfitá pea mo hono fakafoki mai ʻo e ongoongoleleí mo e lakanga fakataulaʻeikí ʻa ia naʻe kamataʻi ʻe he ʻEikí ʻo fakafou ʻiate iá. (Dallin H. Oaks, “Joseph, the Man and the Prophet,” Ensign, May 1996, 73)

Ko e fē feituʻu te u lava ʻo ako lahi ange ai fekauʻaki mo Siosefa Sāmitá?

ʻOku kau ʻi he Tefito ʻo e Ongoongoleleí “Siosefa Sāmitá” (topics.ChurchofJesusChrist.org) ha fakamatala ʻaonga mo ha ngaahi maʻuʻanga tokoni kehe ke ako lahi ange ai fekauʻaki mo e moʻui mo e misiona ʻo e Palōfita ko Siosefa Sāmitá.

 

A Choice Seer Will I Raise Up: Faith to Overcome

Part 1: Youth share their testimonies of the Restoration and how it has impacted their lives. Based on a talk given by Elder Craig C. Christensen in October 2016.

 

Lau ʻa e Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, vōliume 1, Ko e Fuka ʻo e Moʻoní, 1815–1846 (2018).