2 Nifae 26

Vaai, Alofa, ma Taulima Isi e pei ona Faia e le Atua

O aso uma lava tatou te feagai ai ma savali ma faamatalaga na fuafua ia faatosina ai o tatou lagona ma vaaiga. I le 2 Nifae 26, na aoao mai ai Nifae e uiga i le vaaiga a le Atua. O lenei lesona ua faamoemoe e fesoasoani ia te oe e vaai, alofa, ma taulima ai isi e pei ona faia e le Atua.

O la tatou vaaiga

Iloilo ata nei ma mafaufau pe faapefea e matatioata eseese ona aafia ai la tatou vaai.

• E mafai faapefea e nei matatioata eseese ona aafia ai se vaaiga a se tasi?

• O a nisi o mea e aafia ai le ala tatou te vaai ma taulima ai isi?

Faaalu sina taimi e manatunatu ai i lau vaaiga i isi. Mafaufau po o le a se mea o loo ono mamanuina lau vaaiga ma pe mafai faapefea e lenei mea ona aafia ai ou lagona e uiga i le taulimaina o isi. A o e suesue, saili mo musumusuga ia iloa ai mea e mafai ona e faia e vaai ma taulima ai isi e pei ona faia e le Faaola.

O lenei lesona ua faamoemoe e fesoasoani ia te oe e vaai, alofa, ma taulima ai isi e pei ona faia e le Atua.

O uiga o le Atua

I le 2 Nifae 26, na vaai ai Nifae i le galuega a le Faaola i sa Nifaē, faapea foi le amioleaga ma le faatafunaga mulimuli o lona nuu. Sa ia vaai foi i le amioleaga o Nuuese i aso amulī. I se faatusatusaga, sa ia faamamafaina ai loa le tausiga a le Atua mo Ana fanau uma.

Mafaufau i fesili nei e tolu a o e faitauina le 2 Nifae 26:12–13, 23–33:

• O le a se silasila ma ni lagona o le Atua e uiga i Lana fanau?

• E faapefea ona Ia faatinoa lenei mea?

• O a auala e finagalo o Ia tatou te vaai ma taulima ai isi?

1. Tali fesili nei:

   • O a upu, fasifuaitau, po o upumoni na e faailogaina e mafai ona tali ai fesili? Aisea?

   • O le a se mea na e aoaoina pe lagonaina e faatatau i uiga o le Atua?

   • E mafai faapefea e le manatuaina o nei upumoni e uiga i le Atua ona aafia ai lou sootaga ma Ia? E mafai faapefea ona aafia ai le ala e te taulima ai isi?

Ia maitau o le 2 Nifae 26:33, na faapupula mai ai e Nifae le tele o ituaiga eseese o tagata taitoatasi e ala i le faatulagaina o i latou i vaega tuufaafeagai. O faauigaga nei e mafai ona fesoasoani e te malamalama atili ai i nei mea. Atonu e te mafaufau e tusi nei faauigaga i au tusitusiga paia i tafatafa o le fuaiupu lenei.

• Pologa: O se pologa.

• Le ua faapaupau: O se tasi e le talitonu i le Atua.

• Iutaia ma le Nuuese: O se fasifuaitau e faatatau i tagata uma o le aiga o Isaraelu ma i latou e le o ni aiga o Isaraelu.

O le2 Nifae 26:33 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e maua gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

• O le a se eseesega e ono i ai pe afai e talia ma faaaoga e le lalolagi ia aoaoga o loo i le fuaiupu 33?

Faaalu sina taimi e manatunatu ai i lau vaaiga, e aofia ai le auala e te lagona ai ma taulima ai isi, pe a faatusatusa i le vaaiga a le Atua ma le auala o loo Ia lagona ma taulima ai isi.

Atonu e te manao e matamata le vitio “We Don’t Need to Be the Same to Be One” (1:00), o loo maua i le ChurchofJesusChrist.org, manatunatu i mea atonu e finagalo le Alii e te faaleleia.

We Don’t Need to Be the Same to Be One

We are different by design. Embrace the “and.”

2. Tali fesili nei:

   • E mafai faapefea ona aafia ai oe i le manatuaina o le vaaiga ma lagona o le Atua i tagata uma?

   • O a ni auala o loo lelei ai lau vaai ma le taulimaina o isi e pei ona vaai ma taulimaina i latou e le Tama Faalelagi ma Iesu?

   • E mafai faapefea e le manatuaina o aoaoga e uiga i le Alii i le 2 Nifae 26:33 ona fesoasoani ia te oe e vaai, alofa, ma taulima ai isi e pei ona faia e le Atua?

I nai aso e sosoo ai, taumafai e maitau pe faapefea ona e vaai, lagona agai, ma taulima isi. Faalogo mo uunaiga mai le Agaga Paia ma saili le fesoasoani a le Alii e faia soo se suiga talafeagai e alofa ma taulima lelei atili ai isi e pei ona faia e le Atua.

Tuu i le faitalia: O e Manao e Aoao Atili?

E mafai faapefea ona ou avea atili e faapei o le Atua i le vaai ma le alofa atu i isi?

Na aoao mai e Peresitene Russell M. Nelson le auala e mafai ai e Iesu Keriso ona fesoasoani ia i tatou i a tatou taumafaiga e faaleleia atili:

Tatou te lei ausia lava le lotogatasi ma le va fealoaloai lea o le a mafai ai e alii ma tamaitai uma ma tama ma teine uma ona avea ma ituaiga sili ona lelei o i latou lava.

O le vaifofō mo le mea o faafatiatamai ia i tatou sa faatonuina mai e le Fomai Sili, o Iesu le Keriso. Ina ua luiina o Ia e se Faresaio taufaifai e faailoa mai le poloaiga silisili i le tulafono, o le tali a le Faaola sa sili ona manatua pea ma puupuu. Sa faatumulia i le upumoni lea e taitai atu ai i se olaga fiafia. O Lana faatonuga o le alofa muamua lea i le Atua ma o tatou loto atoa, ma, ia alofa atu i o tatou tuaoi e pei o i tatou lava ia i tatou (tagai Mataio 22:35–39). …

Tatou te fesootai uma lava, ma ua ia i tatou se tiutetauave na tuuina mai e le Atua e fesoasoani e faaleleia atili ai le olaga mo i latou o loo siomia ai i tatou. E le faapea e tatau ona tatou tutusa pe foliga tutusa ina ia maua ai le alofa o le tasi mo le isi. Tatou te le tau malilie faatasi foi ina ia alofa ai le tasi i le isi. Afai e i ai so tatou faamoemoe e toe maua le agalelei ma lagona fetausia’i faaletagata o loo tatou moomoo i ai, e tatau ona amata ia i tatou taitoatasi, e taitoatasi i le taimi. (Russell M. Nelson, “NAACP Convention Remarks” [lauga i le tauaofiaga faaletausaga a le National Association for the Advancement of Colored People in Detroit, Michigan, Iulai 21, 2019], newsroom.ChurchofJesusChrist.org)

Na faasoa mai e Elder Dale G. Renlund o le Korama Aposetolo e Toasefululua le mea lenei:

O Le Filemu o Keriso e Faaumatia ai le Feitaga’i

Ua aoao mai Elder Renlund e faapea o le faamuamua o le alofa o le Atua ma lo tatou avea ma soo o Iesu Keriso, e mafai ai ona tatou faatoilaloina o tatou eseesega ma maua le filemu.

O le lotogatasi e manaomia ai le taumafaiga. E atia’eina pe a tatou faafaileleina le alofa o le Atua i o tatou loto ma tatou taulai atu i lo tatou taunuuga e faavavau. Tatou te lotogatasi e ala i lo tatoui faasinomaga autu lautele o ni fanau a le Atua ma lo tatou tuuto atu i upumoni o le talalelei toefuataiina. Ona o lena mea, o lo tatou alolofa i le Atua ma le avea o i tatou ma soo o Iesu Keriso, e faaosofia ai le popole moni mo isi. Tatou te faatauaina le felanulanua’i o uiga o isi, o vaaiga mamao, ma taleni. Afai e le mafai ona tatou faamuamuaina lo tatou avea ma soo o Iesu Keriso i luga atu o mea tatou te fiafia i ai ma o tatou manatu faaletagata lava ia, e tatau la ona tatou toe su’esu’e a tatou faamuamua ma suia. (Dale G. Renlund, “O Le Filemu o Keriso e Faaumatia ai le Feitaga’i,” Liahona, Nov. 2021, 84)

Na aoao mai Sister Michelle D. Craig, Fesoasoani Muamua i le Au Peresitene Aoao o Tamaitai Talavou, mea nei:

Pray for Eyes to See as He Sees

Michelle D. Craig of the Young Women General Presidency shares how to see things more deeply, as Jesus Christ does. “Pray for eyes to see,” she counsels. “His grace will increase our capacity.”

E mafai faapefea e aoaoga o loo i le 2 Nifae 26:33 ona fesoasoani i tagata ia o mai i le Faaola?

Sa sailiili Calyann i le Ekalesia ae sa i ai ni ona atugaluga. Matamata le vitio o loo i lalo e vaai ai pe na faapefea ona fesoasoani le 2 Nifae 26:33 ia te ia.

Jesus is Real: Calyann's Experience with the Book of Mormon

Friends, fun, success—Calyann had it all! That was until she realized she lived in a prison of her own making. While learning of Jesus Christ, Calyann felt His love, which is available to all who seek Him.

• Manatua o le vitio talu ai ua fautuaina foi o se vitio faataitai i le lesona e sosoo ai.

Pe o le lotogatasi ea ia Keriso o lona uiga e tatau ona tutusa uma i tatou?

Na aoao mai Elder Quentin L. Cook ma Elder Jeffrey R. Holland o le Korama a Aposetolo e Toasefululua i auala e faataga ai e le aganuu a Keriso ia eseesega o tagata taitoatasi:

I o tatou aso, … mo le toatele o tagata o le faamamafa ua i le taaituaiga, ua tele ina faavae i luga o tulaga, itupa, lanu, ma le tamaoaiga. I le tele o atunuu, pe afai e le o le toatele lava, ua matua fetotoai lava tagata e uiga i le ala e ola ai. I le Ekalesia a le Alii, na pau le aganuu tatou te mulimuli ai ma aoao atu o le aganuu o le talalelei a Iesu Keriso. O le lotogatasi tatou te sailia o le autasi lea ma le Faaola ma Ana aoaoga. …

O le faataunuuina o tiutetauave e atofa mai le lagi, e faavae i luga o le amiotonu, lotogatasi, ma le tutusa i luma o le Atua, e aumaia ai le fiafia ma le filemu patino i lenei lalolagi ma saunia ai i tatou mo le ola e faavavau i le lalolagi a sau. (Quentin L. Cook, “Saunia e Feiloai ma le Atua,” Liahona, Me 2018, 116)

O loo i ai le avanoa mo i latou e tautatala i gagana eseese, faamanatu aganuu eseese, ma nonofo i le anoa’i o nofoaga. O loo i ai le avanoa mo e nofofua, mo e ua faaipoipoina, i latou e toatele aiga, ma e e leai ni fanau. O loo i ai le avanoa mo i latou na i ai ni fesili e faatatau i lo latou faatuatua ma le avanoa mo i latou o loo i ai pea ni fesili. O loo i ai se avanoa mo i latou e eseese tosinaga faalefeusuaiga. I se faapuupuuga, o loo i ai se nofoaga mo tagata uma e alolofa i le Atua ma faamamalu i Ana poloaiga ua o se fua faatonutonu e le masolia mo amioga patino faaletagata. (Jeffrey R. Holland, “O Pese e Usuina ma Lē Usuina,” Liahona, Me 2017, 51)

Matamata i le vitio lenei, lea o loo tuuina mai ai e Elder Holland le fautuaga ia i latou o e lagona le lotovaivai pe tuuesea mai le malo o le Alii ona latou te manatu e matuai ese lava i latou nai lo isi tagata uma.

“Songs Sung and Unsung”

When you’re feeling low and your days are difficult, remember, “the Savior hears the songs you cannot sing. ”Don’t give up. “Believe in yourself and believe in Him.”

O Pese e Usuina ma Lē Usuina

I le faaaogaina ai o mafaufauga mai le viiga “Ua Susulu Mai Nei o le La,” ua aumaia ai e Elder Holland se faamalosiauga ia i latou o e lagonaina le le mafai ona latou usuina o le “fati o le olioli.”